Jehova oye ‘Omuxupifi’ wetu

“Omwene ote va kwafa, ndee te va xupifa.” — EPS. 37:40.

1, 2. Oushili wa fimanenena u na sha naJehova ulipi u li odjo yehekeleko notau tu pameke?

OMIDIDIMBE doinima ihadi kala ashike ponhele imwe da mwena. Eshi edu tali dingonoka etango, omididimbe ohadi ende tadi lunduluka. Ndele mepingafano nomididimbe odo hadi lunduluka, Omushiti wedu netango iha lunduluka nandenande. (Mal. 3:6) Ombibeli oya popya shi na sha naKalunga ya ti: ‘Puye kape na omalunduluko omudidimbe.’ (Jak. 1:17, yelekanifa NW.) Oushili oo wa fimanenena u na sha naJehova ou li lela odjo yehekeleko kufye notau tu pameke, unene tuu ngeenge twa taalela omayeleko ile omashongo manene. Omolwashike mbela taku dulu okutiwa ngaho?

² Ngaashi twa mona moshitukulwa sha tetekela, Jehova okwa li a ‘xupifa’ oshiwana shaye pefimbo lOmbibeli. (Eps. 70:6) Jehova iha lunduluka noha wanifa po alushe omaudaneko aye. Onghee hano, ovapiya vaye vokunena navo otava dulu okukala nelineekelo kutya “ote va kwafa, ndee te va xupifa.” (Eps. 37:40) Jehova oha xupifa ngahelipi ovapiya vaye kunena? Ongahelipi ta dulu oku tu xupifa pauhandimwe?

Jehova oha xupifa ovapiya vaye kovatondi vavo

3. Omolwashike hatu dulu okukala noushili kutya ovapataneki voshiwana shaJehova itava dulu okukangheka oilonga yasho yokuudifa onghundana iwa?

³ Omapataneko oo haa etifwa kuSatana kae na nande efiku a imbe Eendombwedi daJehova di mu longele oye aeke. Eendjovo daKalunga otadi tu shilipaleke tadi ti: “Oshilwifo keshe tashi hambulwa shi ku lwife, otashi nyengwa. Nakeshe elaka tali ku hokololifa, oto li tomhele oushima.” (Jes. 54:17) Ovapataneki ova kala tava kendabala okukangheka oilonga yokuudifa yoshiwana shaKalunga, ndele inava pondola. Natu ka taleni koihopaenenwa ivali.

4, 5. Oshiwana shaJehova osha li sha shakeneka omapataneko elipi mo 1918, noidjemo oya li ya tya ngahelipi?

⁴ Mo 1918, oshiwana shaJehova osha li sha shakeneka omahepeko manene, oo a li a xwaxwamekwa kovawiliki vomalongelokalunga nelalakano lokukangheka oilonga yasho yokuudifa. Mo 7 Mei, epangelo lOilongo yaHangana yaAmerika ola li la yandja elombwelo opo J. F. Rutherford, oo a li ta pashukile oilonga yokuudifa yEendombwedi daJehova mounyuni aushe pefimbo opo, a kwatwe po pamwe navakwao vamwe ovo va li hava longo naye kombelewa ya kula. Meni leemwedi mbali, omumwatate Rutherford nosho yo vakwao vamwe ova li va tokolwa shihe li pauyuki taku tiwa kutya ova li va pangela eemhangela domonanguwi dokutwa ondubo nepangelo nova li va pewa ehandukilo lodolongo loule wefimbo lile. Mbela ovapataneki ova li ngoo va pondola okuxulifa po oilonga yokuudifa filufilu okupitila momhangu? Hasho nandenande!

⁵ Dimbuluka kutya Jehova okwa udaneka a ti: “Oshilwifo keshe tashi hambulwa shi ku lwife, otashi nyengwa.” Mo 26 Marsa 1919, konima yeemwedi omuwoi okudja eshi omumwatate Rutherford navakwao va li va tulwa modolongo, ova li va mangululwa inashi teelelwa eshi va li va lombwelwa ve lifutile mo. Mo 5 Mei 1920, oshibofa osho va li tava pangulilwa osha li sha ekelwashi. Ovamwatate ovo ova li va longifa omhito oyo opo va twikile noilonga yokuudifa Ouhamba. Mbela osho osha li sha etifa oidjemo ya tya ngahelipi? Oilonga yokuudifa oya li ya tamunuka mo neenghono. Jehova, ‘Omuxupifi’ wetu, oye a li a etifa oidjemo aishe oyo. — 1 Kor. 3:7.

6, 7. (a) Hitler okwa li a ninga oshikonga shashike shi na sha nEendombwedi daJehova muNdowishi, noshidjemo osha li shike? (b) Ondjokonona yoshiwana shaJehova shokunena otai yandje oumbangi ulipi?

⁶ Natu taleni oshihopaenenwa oshitivali. Mo 1934, Hitler okwa li a popya kutya ota ka xulifa po filufilu Eendombwedi daJehova muNdowishi. Osho kasha li ashike epopyo lomokanya. Konima eshi a popya eendjovo odo, ovanhu vahapu ova li va kwatwa po nova li va tulwa meedolongo. Eendombwedi daJehova omayovi oda li tadi hepekwa, nadimwe omafele oda li da dipaelwa meekamba deenghwate. Ndele mbela Hitler okwa li ngoo a pondola okukomba po Eendombwedi daJehova filufilu? Mbela okwa li ngoo a pondola okukangheka filufilu oilonga yokuudifa onghundana iwa muNdowishi? Hasho nandenande! Pefimbo olo lomahepeko, ovamwatate ova li va twikila noilonga yokuudifa, tave shi ningi monanguwi. Konima eshi epangelo laHitler la teka po, ovamwatate ova li va longifa omhito oyo opo va twikile okuudifa. Kunena, muNdowishi omu na ovaudifi vOuhamba ve dule po 165 000. Natango, ‘Omuxupifi’ wetu okwa li a wanifa po eudaneko laye olo tali ti: “Oshilwifo keshe tashi hambulwa shi ku lwife, otashi nyengwa.”

⁷ Ondjokonona yoshiwana shaJehova shokunena otai ulike kutya Jehova ke na efiku a efe oshiwana shaye shi hanaunwe po shi li ongudu. (Eps. 116:15) Ndele mbela Jehova ote ke tu amena ngoo tu li oohandimwe? Jehova ohe tu xupifa ngahelipi pauhandimwe?

Jehova ote ke tu amena ngoo ngeenge hatu hepekwa palutu?

8, 9. (a) Otu shi shii ngahelipi kutya Jehova ina udaneka oku tu amena palutu pashikumwifilonga? (b) Otwa pumbwa okudimina shike?

⁸ Otu shi shii kutya Jehova ina udaneka kutya ote ke tu amena alushe palutu pauhandimwe. Ndele nande ongaho, ohatu hopaenene Ovaheberi vatatu ovadiinini ovo va li va anya okulinyongamena oshihongwafano shoshingoli shohamba Nebukadnesar. Ovalumenhu ovo ovanyasha ovatilikalunga kava li va teelela ngeno Jehova e va amene pashikumwifilonga opo vaha yahamekwe palutu. (Lesha Daniel 3:17, 18.) Ndele Jehova okwa li e va xupifa opo vaha pye komundilo oo wa li wa hanya. (Dan. 3:21-27) Nokuli nopefimbo lOmbibeli, Jehova ka li ha xupifa alushe ovanhu pashikumwifilonga. Ovapiya vaye vahapu ovadiinini ova li va dipawa kovapataneki vavo. — Heb. 11:35-37.

⁹ Mbela Jehova ohe tu xupifa kunena? Heeno, e li ‘Omuxupifi’ wetu, ota dulu oku tu xupifa pauhandimwe ngeenge tu li meenghalo da nyika oshiponga. Mbela ohatu dulu ngoo okupopya kondadalunde kutya Jehova oye a li a ya olunyala moshinima shonhumba ile hasho? Ahowe. Ndele nande ongaho, omunhu oo a xupa moshiponga shonhumba otashi dulika a kale e udite kutya Jehova oye e mu amena. Kashi li pandunge okukala hatu twifa umwe omhata ngeenge oku udite kutya okwa xupifwa kuJehova. Ndele pefimbo opo tuu opo, otu na yo okukala twa dimina kutya Ovakriste vahapu ovadiinini ova kanifa eemwenyo davo omolwomahepeko, ngaashi naanaa pefimbo lepangelo laHitler. Vamwe ova fila moiponga yombadilila i lili noku lili. (Omuud. 9:11) Otashi dulika tu lipule kutya: ‘Mbela Jehova okwa li a nyengwa ‘okuxupifa’ ovapiya vaye ovadiinini eshi a efa va dipawe?’ Hasho nandenande!

10, 11. Omolwashike ovanhu itava dulu okuhenuka efyo, ndele Jehova ota dulu okuninga po shike?

¹⁰ Diladila kwaashi: Ovanhu itava dulu okuhenuka efyo, molwaashi kape na omunhu ta dulu ‘okuxupifa omwenyo waye mepangelo loshovafi’ ile tu tye monhele yopafaneko omo hamu i ovafi. (Eps. 89:49) Ndele mbela ongahelipi shi na sha naJehova? Omumwameme umwe oo a li a xupa pefimbo lomahepeko epangelo laHitler, okwa li a popya shi na sha naasho ina Ondombwedi a li e mu lombwela opo e mu hekeleke omolwovaholike vavo ovo va li va fila meekamba deenghwate, a ti: “Ngeenge efyo ola kala tali pangele ovanhu oule wefimbo lile, mbela osho osha hala kutya oli na eenghono li dule Kalunga?” Efyo kali na eenghono nandenande li dule omunaenghono adishe, oo e li Odjo yomwenyo. (Eps. 36:10) Ovanhu aveshe ovo ve li moshovafi, ove li medimbuluko laJehova note ke va xupifa, sha hala okutya, ote ke va nyumuna. — Luk. 20:37, 38; Eh. 20:11-14.

¹¹ Kunena, Jehova oha amene ovalongeli vaye ovadiinini meenghedi di lili noku lili. Paife natu ka taleni keenghedi nhatu omo Jehova he tu ‘xupifa.’

Jehova ohe tu amene pamhepo

12, 13. Omolwashike eameno lopamhepo la fimanenena, na Jehova ohe tu amene ngahelipi pamhepo?

¹² Jehova oha amene ovapiya vaye pamhepo, neameno la tya ngaho ola fimanenena. Tu li Ovakriste vashili, otu shii kutya ope na oshinima shimwe shi na ondilo inene shi dule okukalamwenyo kwetu kwopaife. Oshinima osho shi na ondilo osho ekwatafano letu lopofingo naJehova. (Eps. 25:14; 63:4) Ngeenge katu na ekwatafano lopofingo naJehova, onghalamwenyo yetu itai kala lela ina eityo paife, noitatu ka kala tu na eteelelo li na sha nonakwiiwa.

¹³ Otwa pandula eshi Jehova he tu pe ekwafo alishe olo twa pumbwa opo tu kaleke po ekwatafano letu lopofingo naye. Okwe tu pa Eendjovo daye, omhepo yaye iyapuki nosho yo eongalo laye lomounyuni aushe opo i tu kwafele. Mbela ongahelipi hatu dulu okulongifa pauyadi omafiloshisho a tya ngaho? Ohatu ka kala tu na eitavelo la pama nohatu ka kala tu na eteelelo la twa li na sha nonakwiiwa, ngeenge otwa kala hatu lesha nokukonakona noukeka Eendjovo daKalunga pandjikilile. (Rom. 15:4) Ngeenge otwa kala hatu ilikana kuJehova twa mana mo e tu pe omhepo yaye iyapuki, omhepo yaye otai ke tu kwafela tu henuke okuninga oinima oyo tai dulu okunyona po ekwatafano letu naye. (Luk. 11:13) Ngeenge otwa kala hatu katuka metwokumwe newiliko olo hatu pewa kongudu yomupiya okupitila moishangomwa ya kanghamena kOmbibeli nosho yo mokukala pokwoongala nopoyoongalele inini nai yakula, ohatu ka kala twa paluka pamhepo ‘omolwoikulya oyo hatu pewa pefimbo layo.’ (Mat. 24:45) Omafiloshisho a tya ngaho ohae tu amene pamhepo nohae tu kwafele tu ehene popepi naKalunga. — Jak. 4:8.

14. Hokolola oshimoniwa osho tashi ulike kutya Jehova oha amene ovapiya vaye pamhepo.

¹⁴ Opo tu divilike oushili oo kutya Jehova ohe tu amene pamhepo, natu dimbuluke ovadali ovo va tumbulwa pehovelo loshitukulwa sha tetekela. Konima yomafiku manini okudja eshi omonakadona wavo, Theresa, a li a kana, ova li va uda onghundana ii kutya okwa dipawa.a Xe yaTheresa okwa ti: “Onda li handi ilikana Jehova opo a amene omonakadona wetu. Ndele eshi a hangwa a dipawa, tete onda li handi lipula kutya Jehova ka li a uda omailikano ange. Ondi shii kutya Jehova ina udaneka kutya ota ka amena ovapiya vaye pauhandimwe pashikumwifilonga. Onda li nda twikila okwiilikana kuJehova opo ndi kale ndi na eudeko li na sha naasho. Onda li nda hekelekwa okushiiva kutya Jehova oha amene oshiwana shaye pamhepo, sha hala okutya, ohe tu pe ekwafo olo twa pumbwa opo amene ekwatafano letu naye. Eameno la tya ngaho ola fimana neenghono, molwaashi otali dulu okukuma onakwiiwa yetu yaalushe. Kungaho, Jehova okwa li a amena Theresa pamhepo, molwaashi okwa kala ta longele Jehova noudiinini fiyo omokufya kwaye. Onda li nda mbilipalelwa okushiiva kutya onghalamwenyo yaye i na sha nonakwiiwa oya amenwa kuJehova.”

Jehova oha kwafele ovapiya vaye ngeenge tava vele

15. Omeenghedi dilipi Jehova ta dulu oku tu kwafela tu dule okuungaunga nomikifi?

¹⁵ Jehova ota dulu oku tu kwafela ngeenge hatu “vele,” ngaashi ashike a li a kwafela David. (Eps. 41:4) Nonande Jehova ohe tu kwafele kunena, ihe tu velula pashikumwifilonga. Ohe tu kwafele ngahelipi? Omafinamhango oo taa hangwa mEendjovo daye otaa dulu oku tu kwafela tu ninge omatokolo e li pandunge e na sha nouhaku nosho yo oinima ikwao. (Omayel. 2:6) Ohatu dulu yo okumona ouyelele nomaetepo taa longo mOshungonangelo nomo-Awake! oo taa kundafana omaupyakadi a pamba oukolele wetu. Jehova ohe tu pe “eenghono di dule odo dopaushitwe” okupitila momhepo yaye opo tu dule okuungaunga neenghalo odo tu li mudo notu kanyatele oudiinini wetu, kashi na nee mbudi kutya oshike tashi ka ningwa po. (2 Kor. 4:7, NW) Osho otashi dulu oku tu kwafela tuha wililwe po komikifi ndele hatu kala inatu yandja vali elitulemo koupamhepo wetu.

16. Omumwatate umwe okwa li a ungaunga ngahelipi nomukifi waye?

¹⁶ Dimbuluka omumwatate omunyasha oo a popiwa pehovelo loshitukulwa sha tetekela. Mo 1998, omumwatate oo okwa li a kwatwa komukifi woshinamenena nowa li we mu lemaneka filufilu.b Omumwatate oo okwa li a ungaunga ngahelipi nomukifi waye? Okwa hokolola a ti: “Omafimbo amwe onda li handi kala ndi udite ouyahame nonda nyemata, nonda li ndi udite kutya ohandi ka mona ashike epepelelo ngeenge onda fi. Ndele onda li handi ilikana kuJehova ngeenge ndi udite nda wililwa po a pe nge oinima itatu: omutima wa ngungumana, elidiiniko nosho yo elididimiko. Ondi wete kutya Jehova okwa li a uda omailikano ange. Omutima wa ngungumana ohau kwafele nge ndi kale handi diladila oinima oyo tai tungu, ngaashi kutya onghalamwenyo otai ka kala ya tya ngahelipi mounyuni mupe eshi handi ka kala vali handi dulu okweenda, okuhafela oikulya iwa nokukala handi dulu vali okupopya noukwaneumbo wange. Elidiiniko ohali kwafele nge ndi lididimikile omashongo okukala oshilema. Elididimiko ohali kwafele nge ndi kanyatele oudiinini wange nola kwafela nge ndiha efe oinima imwe i nyone po ekwatafano lange naJehova. Ondi udite ngaashi omupsalme David, molwaashi ondi udite kutya Jehova okwa kwafela nge eshi handi vele.” — Jes. 35:5, 6.

Jehova oha palula ovapiya vaye

17. Jehova okwe tu udanekela shike, neudaneko olo ola hala okutya ngahelipi?

¹⁷ Jehova okwe tu udanekela kutya ote tu file oshisho palutu. (Lesha Mateus 6:33, 34 nosho yo Ovaheberi 13:5, 6.) Ndele osho inashi hala okutya Jehova ote ke tu pa oipalwifa pashikumwifilonga ile ngeno kutya katu na okulonga sha. (2 Tes. 3:10) Eudaneko olo ola hala okutya: Ngeenge otwa kongo tete Ouhamba waKalunga mokukalamwenyo kwetu notu na ehalo okulonga oilonga yokulikongela omboloto, ohatu dulu okukala nelineekelo kutya Jehova ote ke tu kwafela tu mone oipumbiwa yonghalamwenyo. (1 Tes. 4:11, 12; 1 Tim. 5:8) Jehova ota dulu oku tu pa osho twa pumbwa monghedi omo inatu shi teelela, tashi dulika a longife omulongelikalunga mukwetu e tu kwafele ile e tu pe oilonga.

18. Hokolola oshimoniwa osho tashi ulike kutya Jehova ota dulu okuwanifa po eemhumbwe detu.

¹⁸ Dimbuluka omudalakadi ehe na kaume kopahombo oo a popiwa pehovelo loshitukulwa sha tetekela. Osha li shidjuu komumwameme oo okumona oilonga yokulikongela omboloto eshi a li a tembukila konhele imwe nomonakadona waye omunyasha. Omumwameme oo okwa hokolola a ti: “Onda li handi i moukalele efimbo longula, nonda li handi i alushe ndi ka konge oilonga yokulikongela omboloto efimbo lomutenya. Ohandi dimbuluka efiku limwe eshi nda li nda ya kofitola ndi ka lande omashini. Onda li handi tale oikwambidi, ndele mupya munene kanda li ndi na oimaliwa ya wana okulanda nande oshimwe. Kape na nande efiku limwe nda li ndi udite nda polimana neenghono monghalamwenyo yange ngaashi efiku olo. Ndele eshi nda aluka kofitola efiku olo, onda li nda hanga oushako ve na omaludi aeshe oikwambidi konima yeumbo lange. Oikulya oyo oya li ya wana oku tu palula oule weemwedi. Onda li nda hovela okulila nokupandula Jehova.” Diva, omumwameme oo okwa li a uda kutya mboli oushako ovo voikwambidi okwa li e va etelwa komumwatate umwe womeongalo lavo oo a li e na oshikunino shoikwambidi. Lwanima, omumwameme oo okwa ka shangela omumwatate oo onhumwafo ta ti: “Nonande onda li nde ku pandula neenghono efiku olo, onda li yo nda pandula Jehova eshi wa ulikila nge olune opo a dimbulukife nge kutya okuhole nge.” — Omayel. 19:17.

19. Pefimbo loudjuu munene, ovapiya vaJehova otava ka kala ve na elineekelo lilipi, nove na okukala va tokola toko okuninga shike paife?

¹⁹ Okutala koihopaenenwa yomOmbibeli nosho yo koihopaenenwa yokunena, otashi tu kwafele tu kale twe lineekela kutya Jehova oye Omukwafi wetu. Pefimbo loudjuu munene oo u li pokuhanga ounyuni ou waSatana, ohatu ka kala twa pumbwa ekwafo laJehova neenghono shi dulife nale. Ndele nande ongaho, ovapiya vaJehova otava ka kala ve mu lineekela filufilu. Otava ka dula okuyelula omitwe davo pombada nokunyakukwa, ve shii kutya exupifo lavo ola ehena popepi. (Luk. 21:28) Onghee hano, natu kaleni twa tokola toko okukala twe lineekela Jehova, kashi na nee mbudi kutya ohatu hangwa komayeleko a tya ngahelipi. Natu kale yo twa shilipalekwa filufilu kutya Kalunga ketu oo iha lunduluka, oye ‘Omuxupifi’ wetu.

[Omashangelo opedu]

Oto dimbuluka?

• Jehova ota dulu ngahelipi okuxupifa ovapiya vaye ovo va dipawa?

• Omolwashike eameno lopamhepo la fimanenena?

• Osha hala okutya ngahelipi eshi Jehova a udaneka kutya ote ke tu fila oshisho palutu?

[Efano pepandja 14]

Omumwatate Rutherford navakwao vamwe ova li va kwatwa po mo 1918, ndele lwanima ova ka mangululwa noshibofa osho va li tava pangulilwa osha li sha ekelwashi

[Efano pepandja 16]

Jehova ota dulu oku tu kwafela ngeenge hatu “vele”