ONGULUMAMBO MOINTANETA yiileshomwa yopaMbiimbeli
ONGULUMAMBO MOINTANETA
yiileshomwa yopaMbiimbeli
Oshindonga
  • OMBIIMBELI
  • IILESHOMWA
  • OKUGONGALA
  • w08 11/1 ep. 8-10
  • Ombiimbeli oya hunganeka onakuyiwa yi li popepi

Oshitopolwa shika kashi na okavidio.

Opu na epuko lyasha, okavidio itaka yi komeho.

  • Ombiimbeli oya hunganeka onakuyiwa yi li popepi
  • Oshungolangelo tayi tseyitha uukwaniilwa waJehova—2008
  • Uupalanyolo uushona
  • Uuyelele wa faathana
  • Omalaleko nuuyamba muuyuni uupe
  • Onakuyiwa onkumithi oya hunganekwa
  • Konima yaHarmagedon, Eviparadisa
    Ngoye oto vulu okukala nomwenyo sigo aluhe mOparadisa kombanda yevi
Oshungolangelo tayi tseyitha uukwaniilwa waJehova—2008
w08 11/1 ep. 8-10

Ombiimbeli oya hunganeka onakuyiwa yi li popepi

SHO a li a popi kombinga yonakuyiwa yaantu nosho wo yevi, omuyapostoli Petrus okwa nyola a ti: “Tse otwa tegelela shoka Kalunga e shi uvaneka: egulu epe nevi epe, moka tamu ka kala uuyuuki.” (2 Petrus 3:13) Euvaneko ‘lyegulu epe nevi epe,’ tango olya li lya hunganekwa okupitila momuprofeti Jesaja. (Jesaja 65:17; 66:22) Sho Petrus a popi ehunganeko ndika okwa li u ulike kutya inali gwanithwa natango thiluthilu pethimbo lye.

Konima yethimbo lwomo 96 E.N., lwaampono Ehololo ndyoka lya gandjwa okupitila momuyapostoli Johannes olya li lya kwatakanitha “evi epe” nomalaleko nuuyamba kohi yUukwaniilwa waKalunga. (Ehololo 21:1-4) Oohapu dhaJesus naandhoka dhomuyapostoli Paulus kombinga yoonkalo dhuuyuni manga Uukwaniilwa waKalunga inawu ya, otadhi gwanithwa ngashingeyi. Onkee ano, otu na okukala twa tegelela Uukwaniilwa mboka masiku wu ete uuyuni uupe. Uuyuni mboka uupe otawu ka kala wa fa peni? Embo lyOmbiimbeli lyaJesaja otali shi tu lombwele.

Omalaleko nuuyamba muuyuni uupe

Ombili muuyuni auhe nokulongela Kalunga muukumwe. “Otaa ka hambula omagongamwele gawo, ga ninge omatemo nomagonga gawo iimwitho. Iigwana itayi ka ya we kiita, itayi ilongekidhile we olugodhi.”—Jesaja 2:2-4.

Ombili pokati kaantu niinamwenyo. “Embungu otali ka kala pamwe nokanzi, nongwe tayi kala ya lala pokakombwena. Okatana nokankoshona otau napele pamwe, nokamati okashona take u litha. Ongombe onzinzi nemwanka enyali otayi napele pamwe, noyana taa gondjo pamwe. Nonime otayi li omwiidhi ya fa ongombe. . . . Kondundu yandje ondjapuki itaku ka longwa uuwinayi nenge iikolokosha, oshoka evi otali ka udha okutseya OMUWA kwa fa omeya ga siikila efuta.”—Jesaja 11:6-9.

Iikulya ya gwana aantu ayehe. “Kondundu Sioni OMUWA Omunankondoawike ota hangele iigwana ayihe oshituthi shoontumba dhomagadhi noshomaviinu ga dhindolekeka.”—Jesaja 25:6.

Itapu ka kala we eso. “OMUWA Omupangeliawike ota ka hanagula po eso sigo aluhe. Ota ka theta po omahodhi momeho gaayehe e ta kutha po okudhinwa kwaantu ye muuyuni auhe. OMUWA mwenemwene a popi ngeyi.”—Jesaja 25:8.

Oonakusa otaya ka yumudhwa. “Oonakusa yoye taa ningi aanamwenyo, nomidhimba dhandje tadhi yumuka. Pendukeni, ligoleni, one, mwa lala montsi, . . . nevi otali umbu mo oonakusa.”—Jesaja 26:19, OB-1954.

Messias omupanguli omuuyuuki. “Iha pangula pakutala kwomeho, ye iha tokola pakuuva okandondo, ihe ohu uthile oonakuhepa nuuyuuki nota popile uuthemba woohepele moshilongo.”—Jesaja 11:3, 4.

Aaposi noombolo otaya ka aludhwa. “Omeho gaaposi otaga ka tsikuluka, nomakutsi goombolo otaga ka uva ko.”—Jesaja 35:5.

Ombuga otayi ka kala yo opala. “Ombuga nomalondo otaga ka nyanyukwa, ontale otayi ka tundulukwa nokutemuna oongala. Ombuga otayi ka imba nokuligola kenyanyu.”—Jesaja 35:1, 2.

Evi epe. “Otandi shiti egulu epe [epangelo epe lyomegulu] nevi epe [uulikumwe waantu aayuuki]. Iiningwanima yonale otayi ka dhimbiwa thiluthilu. Nyanyukweni nokuligola pombanda omolwaayihe mbyoka tandi yi shiti. . . . [Mboka taya ka kala muuyuni uupe waKalunga mboka wu uvanekwa] otaa ka tunga omagumbo, opo ya kale mo yo yene. Otaa ka tsika omiviinu, opo ya lye iiyimati yadho yo yene. Itaa ka tunga omagumbo, nayalwe taya ka kala mo, nenge ya tsike sha, nayalwe taa ka lya iiyimati. Omasiku gaantu yandje otaga ka kala omale ga fa omasiku gomuti. Aahogololwa yandje otaya ka kala ko olule nokunyanyukilwa iilonga yiikaha yawo yene. Itaa ki ihepeka owala, noyana itaye ke ya valela omupya. Otandi ke ya yambeka pamwe noluvalo lwawo sigo aluhe. Manga nokuli inaa galikana, otandi ya uvu, nomanga inaa indila ndje, otandi ya yamukula.” “‘Ngashika egulu epe nevi epe tandi ke ga shita notaga kala koshipala shandje, osho wo oluvalo lweni nedhina lyeni tali kala po.’”—Jesaja 65:17-25; 66:22.

Onakuyiwa onkumithi oya hunganekwa

Embo lyOmbiimbeli lyaJesaja halyo a like tali hunganeke shi na ko nasha nomalaleko nuuyamba gomonakuyiwa. Ombiimbeli oyi na omahunganeko ngoka taga hokolola iinima iikumithi mbyoka Kalunga ta ka gwanitha okupitila mUukwaniilwa we kohi yaKristus.a Mbela owa hala okukala monkalo yoparadisa ya tya ngaaka? Oto vulu, ngele owi ilongo shoka Ombiimbeli tayi ti kombinga yelalakano lyaKalunga ewanawa li na ko nasha nonakuyiwa nokwiilonga nkene to vulu okukala gumwe gwomwaamboka taya ka kala mo. Oonzapo dhaJehova otadhi ka kala dha nyanyukwa oku ku kwathela.

[Enyolo lyopevi]

a Omolwuuyelele wa gwedhwa po kombinga yUukwaniilwa waKalunga naashoka tawu ke e ta, tala pepandja 76-85 lyembo Omalongo gashili gOmbiimbeli ogeni naanaa? lya nyanyangidhwa kOonzapo dhaJehova.

[Ethano pepandja 8]

Ombili otayi ka kala pokati kaantu nosho wo pokati kaantu niinamwenyo

[Ethano pepandja 9]

Oonakusa otaya ka yumuka

[Ethano pepandja 10]

Evi alihe otali ka ninga oparadisa

    Ndonga Publications (1987-2025)
    Za mo
    Inda mo
    • Oshindonga
    • Tumina yalwe
    • Hogolola
    • Copyright © 2025 Watch Tower Bible and Tract Society of Pennsylvania
    • Ngele to longitha ongulumambo yetu
    • Uuyelele wiinima yopaumwene
    • Privacy Settings
    • JW.ORG
    • Inda mo
    Tumina yalwe