Longa aanona yoye

Mbela owu na ondumbo? Aamwahe yaJosef oya li ye mu sila ondumbo

NATU popyeni kutya okusila yalwe ondumbo otaku ti shike. Mbela oshi li oshidhigu okukala wu hole omuntu gwontumba molwaashoka ha popilwa muuwanawa kuyalwe, ha kala o opala nenge omufuuli?a—Shoka osho tashi vulu okukala ngaaka uuna wa sila gulwe ondumbo.

Ondumbo otayi vulu okuholoka muukwanegumbo ngele aavali oye hole po owala okanona kamwe komuwo. Ombiimbeli otayi tu lombwele uukwanegumbo wumwe moka mwa li mwa holoka uupyakadhi uunene omolwondumbo. Natu tale uupyakadhi mboka wa li wa holoka po naashoka tatu ilongo mo.

Josef okwa li omwanamati gwaJakob omuti-11 naamwahe oya li ye mu sila ondumbo. Mbela owu shi kutya omolwashike?—Omolwaashoka he yawo, Jakob okwa li e hole uunene Josef. Pashiholelwa, Jakob okwa li a tungile Josef ohema ombwanawa yoondjila. Jakob okwa li e hole unene Josef ‘oshoka okwe mu valelwa muukulupe’ nokwa li okanona ke kotango hoka a valelwa komukulukadhi gwe Rakel ngoka a li e hole.

Ombiimbeli otayi ti kutya “aamwahe sho ya mono kutya he oku hole Josef e ya vule, oye mu tondo.” Esiku limwe Josef okwa li a lombwele uukwanegumbo waandjawo kutya okwa yaguma aamwahe ayehe taye mu inyongamene, mwa kwatelwa nahe. Ombiimbeli otayi ti kutya “Aamwahe yaJosef oye mu sile efupa” nahe okwa li e mu ganda nokuli molwaashoka e ya lombwele ondjodhi ndjoka.—Genesis 37:1-11.

Konima yethimbo sho Josef a li e na oomvula 17, aamwahe oya li oshinano shokilometa yimwe mokuti taya litha oonzi niikombo yahe. Jakob okwa li a tumu Josef a ka tale nkene aamwahe ye li po. Mbela owu shi kutya oyendji yomuyo oya li ya hala okuninga shike sho ye mu mono te ya?—Oya li ya hala oku mu dhipaga. Ihe yaali yomuyo Ruben naJuda oya li ye shi tindi.

Sho Aaismaeli ya li ye ende po yu uka kuEgipiti, Juda okwa lombwele aamwahe a ti: “Natu mu landithii po.” Osho ya ningi. Oya dhipaga oshikombo e taya yaya ohema yaJosef mombinzi yasho. Konima sho ya li yu ulukile he ohema yaJosef, he okwa lili nokwa ti: “Oshilikama she mu lya po!”—Genesis 37:12-36.

Mokweendelako kwethimbo, Josef okwa kala e holike kuFarao omupangeli gwaEgipiti. Shika osha li ngaaka unene tuu sho a li a fatulula oondjodhi mbali dhaFarao kekwatho lyaKalunga. Ondjodhi yotango oya li oonzinzi heyali dho ondoka noonkwawo heyali dha nanga. Ontiyali oya li oonyapi dhiilya heyali dho opala noonkwawo heyali dha theta noonshona. Josef okwa li a fatulula oondjodhi adhihe kutya otapu ka kala oomvula heyali dheloolo naheyali dhondjala yekomba. Palombwelo lyaFarao, Josef okwa li a pewa oshinakugwanithwa shokupungula iikulya momimvo ndhoka dheloolo opo ya vule okuhupa pethimbo lyondjala.

Sho ondjala ye ya uukwanegumbo waJakob mboka wa li kokule oshinano shookilometa odhindji owa li wa pumbwa iikulya. Jakob okwa li a tumu oyanamati aakuluntu omulongo ya ka lande iikulya kuEgipiti. Oya li ye ya puJosef, ihe inaye mu dhimbulula. Josef ka li e yi ihololele kutya oye lye. Okwa li e ya makele, nokwa li a mono kutya oya li yi iyela ombedhi yaashoka ya li ye mu ningile. Opo ihe okwe ya lombwele kutya oye lye. Oya li ya papatelathana ya nyanyukwa.—Genesis ontopolwa 40-45.

Oshike to vulu okwiilonga kombinga yokusila yalwe ondumbo mehokololo ndika lyOmbiimbeli?—Ondumbo otayi vulu okweeta uupyakadhi uunene, tashi vulika nokuli omuntu a kale a hala okuningila omumwayina uuwinayi. Natu leshe Iilonga 5:17, 18 nosho wo Iilonga 7:54-59 nokutala shoka ondumbo ya li ya ningitha aantu ya ningile aalongwa yaJesus.—Konima yokulesha oovelise ndhika, mbela oto vulu okumona kutya omolwashike kaatu na okusila yalwe ondumbo?—

Josef okwa kala nomwenyo oomvula 110. Okwa putudha aanona ye mboka ye mu valele aatekulu nokwa li wo e na aatekulululwa. Otu na uushili kutya Josef okwa kala aluhe he ya longo ya kale ye holathane nokukala ihaaya sile yalwe ondumbo.—Genesis 50:22, 23, 26.

[Enyolo lyopevi]

Omapulo:

○ Otashi ti shike okusila yalwe ondumbo?

○ Ondumbo oya li ya ningitha aamwahe yaJosef ya ninge shike?

○ Omolwashike Josef a li a dhimine po aamwahe?

○ Oshike otatu iilongo mehokololo ndika?