“Omesho” aJehova otaa konenene ovanhu aveshe
‘Omesho Omwene otaa konenene oludalo lovanhu.’ — EPS. 11:4.
1. Ohatu nanenwa kovanhu va tya ngahelipi?
OHO kala u udite ngahelipi shi na sha novanhu ovo ve na ko nasha naave shili? Ngeenge we va pula ve ku lombwele oshili shi na sha naave ohave ku lombwele. Ohave ku kwafele nehalo liwa ngeenge u na omhumbwe. Ohave ku pukulula yo pahole ngeenge wa pumbwa okupukululwa. (Eps. 141:5; Gal. 6:1) Mbela iho kala u udite wa nanenwa kovanhu va tya ngaho? Jehova nOmona waye osho naanaa ve li ngaho. Ove na ko nasha nokuli naave ve dule ovanhu aveshe, nohave shi ningi nopehe na okulihola mwene molwaashi ova hala oku ku kwafela u ka “mone omwenyo waalushe.” — 1 Tim. 6:19; Eh. 3:19.
2. Jehova oku na ko nasha novapiya vaye shi fike peni?
2 Omupsalme David okwa popya kutya Jehova oku na ko nasha nafye shili eshi a ti: “Omesho [Omwene] taa tale, neemhafu daye tadi konenene oludalo lovanhu.” (Eps. 11:4) Kalunga ihe tu tale ashike, ndele ohe tu konakona yo. David okwa popya yo a ti: ‘Ove ho tale omutima wange, moufiku to u shipaashipa, ndele ito mono sha.’ (Eps. 17:3) Osha yela kutya David okwa li e shii kutya Jehova oku na ko nasha naye shili. Okwa li e shii kutya ota ka nyemateka Jehova noita ka kala a hokiwa kuye ngeenge okwa kala ta diladila osho inashi koshoka ile e na omutima u na oukengeleledi. Mbela Jehova oku li ngoo omunhu wolela kwoove ngaashi a li kuDavid?
Jehova oha mono osho shi li momitima dovanhu
3. Jehova oha ulike ngahelipi ondjele shi na sha nokuhawanenena kwetu?
3 Jehova oha yandje unene elitulemo kounhu wetu womeni, sha hala okutya, osho tu li lela momutima. (Eps. 19:15; 26:2) Molwaashi oku tu hole, iha konenene omapuko etu manini. Pashihopaenenwa, eshi omukulukadi waAbraham, Sara, a li ina lombwela omweengeli oshili oo a li e mu holokela molutu lopambelela, omweengeli oo okwa li a didilika kutya Sara okwa li a tila nokwa fya ohoni, onghee hano, ka li e mu hanyena sha kwata moiti. (Gen. 18:12-15) Eshi tatekulululwa Job a li e “litala omuyuki koshipala shaKalunga,” Jehova okwa li e mu nangeka noupuna molwaashi okwa li e shii kutya Job okwa li a monifwa oixuna neenghono kuSatana. (Job 32:2; 42:12) Sha faafana, Jehova ka li a handukila omufiyekadi wokuSarfat omolweendjovo odo a li a ula omuprofeti Elia. Jehova okwa li e wete kutya omufiyekadi oo okwa li a nyika oluhodi eshi a filwa okaana kaye oko akeke. — 1 Eeh. 17:8-24.
4, 5. Ongahelipi Jehova a li a kenukila Abimelek monghedi omo a li a ungaunga naye?
4 Molwaashi Jehova oha konakona omitima detu, oha yavelele nokuli novanhu ovo vehe fi ovaitaveli. Natu tale kunghee a li a ungaunga naAbimelek, ohamba yoshilando shOvafilisti, Gerar. Molwaashi Abimelek ka li e shii kutya Abraham naSara ovalihomboli, okwa li a kufa po Sara a ninge omukulukadi waye. Ndele fimbo Abimelek a li ina nangala naSara, Jehova okwa li a popya naye okupitila mondjodi a ti: “Ame ondi shi shii nokutya, ove we shi ninga pauyuki wokomwenyo, ndele ame mwene nde ku kelela u ha nyone kuame. Onghee hano inandi shi itavela ove u mu kume. Shunifa hano paife omwalikadi womulumenhu ou, osheshi ye omuxunganeki. Ndele ye ote ke ku ilikanena ove u kale nomwenyo.” — Gen. 20:1-7.
5 Jehova okwa li ta dulu okuungaunga nonyanya naAbimelek, oo a li ha longele oikalunga. Ndele Kalunga okwa li a didilika kutya Abimelek okwa li a katuka pauyuki pomhito oyo. Jehova okwa li e linyengifwa kolukeno e mu yavelele, nokwa li e mu lombwela osho e na okuninga opo a diminwe po noku “kale nomwenyo.” Mbela ino hala okulongela Kalunga a tya ngaho?
6. Jesus okwa li a hopaenena Xe meenghedi dilipi?
6 Jesus okwa li a hopaenena Xe filufilu, a li ha tale komaukwatya mawa ovahongwa vaye, nokwa li he va dimine po nehalo liwa ngeenge va nyona. (Mark. 10:35-45; 14:66-72; Luk. 22:31, 32; Joh. 15:15) Oikala yaye oya li tai tu kumwe neendjovo daye odo di li muJohannes 3:17, odo tadi ti: “Kalunga ina tuma Omona waye mounyuni a tokole ounyuni, ndelenee ounyuni u xupifwe kuye.” Jehova naJesus ove tu hole filufilu nohole i na oudiinini. Ove tu hole shili, molwaashi ova hala tu ka mone omwenyo. (Job 14:15) Ohole ya tya ngaho otai tu kwafele tu ude ko kutya omolwashike Jehova he tu konakona, he tu tale ko monghedi omo he tu tale ko nomolwashike ha katuka metwokumwe naasho e wete mufye. — Lesha 1 Johannes 4:8, 19.
Jehova ohe tu konakona pahole
7. Jehova ohe tu konakona nelalakano lashike?
7 Inashi yuka okudiladila kutya Jehova oku li ngaashi omupolifi te tu tale okudja meulu opo e tu kwate ngeenge hatu nyono. Satana oye he tu lundile, ta ti kutya otu li hole fye vene. (Eh. 12:10) Oha ti yo kutya otu na omalinyengotomheno mai, nonande hasho. (Job 1:9-11; 2:4, 5) Omupsalme umwe okwa popya shi na sha naKalunga a ti: “Omwene, ngenge to konenene omawii, Omwene, olyelye ta kala po?” (Eps. 130:3) Ngeno Kalunga osho a li ha ningi ngaho, ngeno kape na oo ta dulu okukala po. (Omuud. 7:20) Ponhele yaasho, Jehova ohe tu pashukile nonghenda, ngaashi omudali omunahole oo he shi ningi nelalakano lokwaamena ovana vaye ovaholike koiponga. Luhapu ohe tu kwafele tu didilike mo omaunghundi etu, opo tu henuke oiponga. — Eps. 103:10-14; Mat. 26:41.
8. Jehova oha hongo ngahelipi ovapiya vaye noku va pa outekuduliko?
8 Kalunga ohe tu ulikile ohole okupitila mehongo nosho yo moutekuduliko oo he tu pe okupitila mOmishangwa nosho yo meendja dopamhepo odo he tu pe okupitila ‘momupiya omudiinini nomunaendunge.’ (Mat. 24:45; Heb. 12:5, 6) Jehova ohe tu kwafele yo okupitila meongalo lopaKriste nosho yo ‘meeshali di li ovanhu.’ (Ef. 4:8, NW) Kakele kaasho, Jehova oha tale kutya ohatu linyenge ngahelipi kedeulo olo he tu pe nohe tu kwafele yo natango ngeenge twa pumbwa ekwafo la wedwa po. Epsalme 32:8 otali ti: “Onda hala ndi ku longe, ndi ku udikile ondjila, ei u nokweenda nayo; onda hala ndi ku twe omayele; eisho lange tali ku pashukile.” Onghee hano, osha fimana okukala alushe hatu pwilikine kuJehova. Otwa pumbwa okulininipika koshipala shaye, nokudimina kutya oku li Omuhongi wetu nosho yo Tate yetu omunahole. — Lesha Mateus 18:4.
9. Oikala ilipi tu na okuhenuka, nomolwashike?
9 Onghee hano, inatu efa nande omitima detu di kukutikwe kounhwa, kokuheneitavelo, ile “kekotokelo loulunde.” (Heb. 3:13; Jak. 4:6) Luhapu oikala oyo ohai kwata omunhu ngeenge okwa kala ha diladila osho inashi yuka ile a kulika omahalo mai. Otashi dulika nokuli a kale ina hala okutambula ko omayele opamishangwa oo a pumbwa. Ndele osho shii unene oshosho kutya, otashi dulika aha efe po nandenande oikala ile eendjila daye dii, nokungaho, okwe li ninga omutondi waKalunga, onghalo oyo i tilifa neenghono. (Omayel. 1:22-31) Natu ka taleni koshihopaenenwa shaKain, oshiveli shaAdam naEva.
Jehova oku wete oinima aishe noha katuka metwokumwe naasho e wete
10. Omolwashike Jehova a li ina hokwa eyambo laKain, na Kain okwa li e linyenga ngahelipi?
10 Eshi Kain naAbel va li va etela Jehova omayambo, Jehova okwa li a yandja elitulemo komayambo avo nosho yo komalinyengotomheno avo. Molwaashi Kalunga okwa li a mona osho sha li momitima davo, okwa li a hokwa eyambo laAbel olo a li a yamba meitavelo, ndele ka li a hokwa eyambo laKain, olo la li la ulika okuheneitavelo kwaye. (Gen. 4:4, 5; Heb. 11:4) Ponhele yokulihonga oshilihongomwa moshiningwanima osho nokulundulula oikala yaye, Kain okwa li a handukila omumwaxe. — Gen. 4:6.
11. Kain okwa li a ulika ngahelipi kutya oku na omutima u na omakoto, noshike hatu lihongo mwaasho?
11 Jehova okwa li a didilika oikala ya nyika oshiponga oyo Kain a li a kulika, nokwa li e mu lombwela pahole kutya ngeenge okwa longo ouwa ota ka kala a hafa. Shi nyikifa oluhodi, Kain okwa li e lipwililikila omayele Omushiti waye ndele ta dipaa omumwaxe. Oikala ii yomutima yaKain oye ke limonikila mo vali eshi a li a nyamukula Kalunga nodino eshi e mu pula a ti: “Ondenge yoye Abel oku li peni?” Kain okwa li a nyamukula a handuka a ti: “Ame nghi shi shii. Aame mbela omufita wondenge yange?” (Gen. 4:7-9) Omutima kau na tuu omakoto, tau dulu nokuli okuningifa omunhu aha tambule ko omayele oo taa di kuKalunga odikilila! (Jer. 17:9) Onghee hano, natu lihongeni sha momahokololo oo nokukala hatu endelele okweekelashi omadiladilo mai nosho yo okuhenuka omahalo inaa koshoka. (Lesha Jakob 1:14, 15.) Ngeenge otwa pewa omayele e likolelela kOmishangwa natu pandule omolwomayele oo noku a tala ko e li euliko kutya Jehova oku tu hole.
Itatu dulu okuholeka Jehova omanyono etu
12. Jehova oha ungaunga ngahelipi nomanyono?
12 Ovanhu vamwe otashi dulika va kale ve udite kutya ngeenge kape na oo e va mona eshi tava nyono itava ka handukilwa. (Eps. 19:13) Ndele paulelalela kape na oo ta dulu okuholeka enyono laye. Ombibeli otai ti: “Aishe oya kala ngaho poluhaela momesho aye, kuou tu noku mu lihepaululila.” (Heb. 4:13) Jehova oku li Omutokoli oo ha konakona omalinyengotomheno etu omoule, noha ungaunga nomanyono monghedi ya yuka. Oye “Kalunga omunanghenda, omunanheni, nomunene mouwanghenda nomoudiinini.” Ndele “ita efa okuhandukila” omunyoni oo ine livela ombedi ile oohandimwe ovo tava “nyono owina” ile ve na oinheya. (Ex. 34:6, 7; Heb. 10:26) Oushili oo ou liwetikile monghedi omo Jehova a li a ungaunga naAkan nosho yo naAnanias naSafira.
13. Okudiladila kwa puka okwa li kwa katukifa ngahelipi Akan eenghatu dii?
13 Akan okwa li a nyona oshipango shaKalunga, eshi a li e likufila oixuulwa moshilando shaJeriko ndele te i fudike metwali laye, tashi dulika a li a kwafelwa koukwaneumbo waye. Eshi enyono laye la li la etwa poluhaela, Akan okwa li a dimina kutya okwa nyona sha kwata moiti, molwaashi okwa li a popya a ti: “Ame onda nyona kOmwene.” (Jos. 7:20) Akan okwa li a kulika oikala ii yomutima, ngaashi ashike Kain. Olwisho olo la li le linyengifa Akan nola li le mu ningifa omukengeleledi. Molwaashi paulelalela oixuulwa yomuJeriko oya li yaJehova, Akan okwa li a vaka po oinima yaJehova, naasho osha li sha pula omwenyo waye nosho yo eemwenyo doukwaneumbo waye. — Jos. 7:25.
14, 15. Omolwashike Ananias naSafira va li inava hokiwa vali kuKalunga, noshike hatu lihongo moshinima shavo?
14 Ananias nomukulukadi waye, Safira, ova li oilyo yeongalo lopaKriste lomefelemudo lotete muJerusalem. Konima yoPentekoste 33 O.P., opa li pa totwa oshikefa shomayambidido okukwafela ovaitaveli vape ovo va dja koitukulwa yokokule nova li hava kala muJerusalem. Oshikefa osho shomayambidido osha li sha kalekwa po komayambidido ehalo liwa. Ananias okwa li a landifa po epya lavo nokwa li a yambidida imwe yomoimaliwa koshikefa osho shomayambidido. Omukulukadi waye okwa li e shii kutya okwa li te liningifa a fa a yambidida oimaliwa aishe oyo a li a mona. Nopehe na omalimbililo, ovalihomboli ovo ova li va hala okupewa efimano le likalekelwa meongalo. Ndele ova li va longa oilonga youkengeleledi. Jehova okwa li a hololela omuyapostoli Petrus pashikumwifilonga oukengeleledi oo Ananias a li a ninga, na Petrus okwa li a ka pula Ananias kutya omolwashike a kengelela. Pefimbo opo tu opo, Ananias okwe lidenga po ndele ta fi. Okafimbo kanini konima yaasho, Safira naye okwa ka fya. — Oil. 5:1-11.
15 Ounghundi waAnanias naSafira kawa li ashike wa holoka po ombadilila. Ova li va pangela omhangela ndele tava popi oipupulu opo va fufye ovayapostoli. Ndele osho shii unene oshosho kutya, ova li va ‘fufya omhepo iyapuki nosho yo Kalunga.’ Monghedi omo Jehova a li a ungaunga naAnanias naSafira otai ulike lela kutya oha amene eongalo kovanaihelele. Doshili, “oixuna yongaho okuwila momake aKalunga omunamwenyo.” — Heb. 10:31.
Natu kaleni alushe ovadiinini
16. (a) Satana oha kendabala ngahelipi okunwefa mo oshiwana shaKalunga? (b) Satana oha longifa eenghedi dilipi opo a nwefe mo ovanhu vomoshitukulwa sheni?
16 Satana ota kendabala okuninga keshe osho ta dulu opo e tu nwefe mo ile e tu ningife tu kale vali inatu hokiwa kuJehova. (Eh. 12:12, 17) Omakonda aye oku liwetikile nawa mounyuni ou wa duvila omilele da nyata nou hole elongifo leenghono. Omafano oipala ohaa dulu okumonika noupu keekombiyuta nosho yo moinima imwe yopaelektronika. Inatu liyandja nande komaponokelo aSatana. Ponhele yaasho, natu kale tu na omadiladilo a fa omupsalme David oo a ti: “Mokweenda kwange onda hala ndi diinine ouyuki. . . . Meumbo lange nda hala ndi kale mo nomutima wa yela.” — Eps. 101:2.
17. (a) Omolwashike Jehova ha holola omanyono oo a holekwa mokweendela ko kwefimbo? (b) Otu na okukala twa tokola toko okuninga shike?
17 Kunena, Jehova iha holola pashikumwifilonga omanyono a kwata moiti ovanhu nosho yo oukengeleledi, ngaashi a li ha ningi omafimbo amwe mefimbo lonale. Ndele nande ongaho, oku wete oinima aishe, nota ka holola oinima oyo ya holekwa pefimbo laye la wapala nomonghedi ya yuka. Paulus okwa ti: “Omatimba ovanhu vamwe oku li poluhaela, notaa tetekele okupangulwa, ndele oo avamwe otae va shikula konima.” (1 Tim. 5:24) Ohole oyo hai linyengifa Jehova a holole oilonga ii. Jehova oku hole eongalo nokwa hala oku li amena opo li kale la koshoka. Kakele kaasho, oha file onghenda ovo va li va nyona ndele ove livela ombedi shili. (Omayel. 28:13) Onghee hano, natu kendabaleni okulongela Kalunga nomutima aushe nokuhenuka enwefemo keshe lii.
Natu longele Jehova nomutima aushe
18. Ohamba David oya li ya hala omonamati wayo a kale e udite ngahelipi shi na sha naKalunga?
18 Ohamba David oya li ya lombwela omonamati wayo Salomo, ya ti: “Kalunga kooxo, kala u mu shii, noku mu longela nomutima aushe nomwenyo u nehalo liwa, osheshi Omwene ta panaapana omitima adishe nediladilo keshe lomomwenyo ye e li shii.” (1 Omaf. 28:9) David ka li ashike a hala omonamati waye Salomo a kale a itavela muKalunga, ndele okwa li yo a hala a kale e na olupandu omolwokunakonasha shili kwaKalunga shi na sha novapiya vaye. Mbela oho pandula Jehova omolwokunakonasha nafye kwaye shili?
19, 20. PaPsalme 19:8-12, oshike sha li sha kwafela David a ehene popepi naKalunga, nongahelipi hatu dulu okuhopaenena David?
19 Jehova oku shii kutya ovanhu ovo ve na oikala iwa otava ka nanenwa kuye nonokutya ngeenge ove lihongo kombinga yomaukwatya aye mawa otashi ke va ningifa va kale ve udite va ehena popepi naye. Onghee hano, Jehova okwa hala tu mu shiive nosho yo omaukwatya aye mawa. Mbela ongahelipi hatu dulu okuninga ngaho? Omokukala hatu konakona Eendjovo daye nongeenge hatu nangekwa noupuna kuye. — Omayel. 10:22; Joh. 14:9.
20 Mbela ohatu lesha ngoo Ombibeli keshe efiku, twa dimina kutya oya dja kuKalunga nokupula ekwafo kuye opo tu tule moilonga osho hatu lihongo? Mbela ou wete nghee sha fimana okukala metwokumwe nomafinamhango Ombibeli? (Lesha Epsalme 19:8-12.) Ngeenge osho, eitavelo loye muJehova otali ka kala la pama noto ka kala u mu hole nohole yomoule. Jehova ota ka ehena popepi elela naave, to ka enda pamwe naye, oku shi popya pafaneko. (Jes. 42:6; Jak. 4:8) Jehova ote ke ku ulikila kutya oku ku hole moku ku nangeka noupuna noku ku amena pamhepo eshi to ende mondjila ya finana oyo tai twala komwenyo. — Eps. 91:1, 2; Mat. 7:13, 14.
Oto nyamukula ngahelipi?
• Jehova ohe tu konakona nelalakano lashike?
• Oshike sha li sha ningifa oohandimwe vamwe va ninge ovatondi vaKalunga?
• Ongahelipi hatu dulu okuulika kutya Jehova omunhu wolela kufye?
• Ongahelipi hatu dulu okutwikila okulongela Kalunga nomutima aushe?
[Efano pepandja 9]
Jehova ohe tu pashukile ngahelipi ngaashi omudali omunahole?
[Efano pepandja 10]
Oshilihongomwa shilipi hatu lihongo moshinima shi na sha naAnanias?
[Efano pepandja 11]
Oshike tashi ke tu kwafela tu twikile okulongela Jehova nomutima aushe?