Oohapu dhaJehova odhi na omwenyo
Omanenedhiladhilo okuza moontumwafo dhaJohannes naJudas
OONTUMWAFO ndatu dhomuyapostoli Johannes ndhoka dha nyolelwa muEfeso, tashi vulika mo 98 E.N., odhi li dhimwe dhomomambo gahugunina ngoka ge li mOohapu dhaKalunga dha nwethwa mo. Oontumwafo mbali dhotango otadhi ladhipike Aakriste ya kale nokweenda muuyelele nokukondjitha uushunimonima. Montitatu Johannes ina popya owala okweenda mondjila yashili, ihe okwa ladhipike wo Aakriste ya kale haya longele kumwe.
Judas omumwayina gwaJesus okwa li a londodha Aakriste ooyakwawo kombinga yaantu aawinayi mboka yi iyakele megongalo nokwa gandja wo omayele nkene ye na okukondjitha enwethomo ewinayi montumwafo ye ndjoka ya nyolelwa muPalestina, tashi vulika mo 65 E.N. Ngele tatu gandja eitulomo ketumwalaka ndyoka li li moontumwafo dhaJohannes naJudas, otashi vulu oku tu kwathela tu kale tu na eitaalo lya kola nonando opu na iiyimbi oyindji.—Heb. 4:12.
KALENI NOKWEENDA MUUYELELE NOMOHOLE NOSHO WO MEITAALO
(1 Joh. 1:1–5:21)
Ontumwafo yotango yaJohannes ndjoka ya li ya nyolelwa ayehe mboka ye na uukumwe naKristus, otayi gandja omayele ga nuninwa okukwathela Aakriste ya kondjithe uushunimonima nokukala ya kola moshili noye li aayuuki. Okwa li a tsu omuthindo ompumbwe yokukala nokweenda muuyelele nomohole nosho wo meitaalo.
Johannes okwa nyola a ti: “Ngele tatu ende muuyelele, ngashika [Kalunga] a kala muuyelele, nena otu na ehangano pokati ketu.” Molwaashoka Kalunga oye Onzo yohole, omuyapostoli okwa ti: “Tu holathaneni.” Nonando “ohole yokuhola Kalunga” ohayi tu inyengitha ‘tu dhiginine iipango ye,’ ohatu sindi uuyuni okupitila ‘meitaalo lyetu’ okwiitaala Jehova Kalunga, Oohapu dhe nOmwana.—1 Joh. 1:7; 4:7; 5:3, 4, OB-1954.
Omapulo gopamanyolo taga yamukulwa:
2:2; 4:10—Ongiini Jesus e li ‘eyambo lyoondjo dhetu’? Jesus okwa gandja omwenyo gwe gu li eyambo okugwanitha po uuyuuki wa gwanenena opo Kalunga a kale ishewe natse nombili. Pakankameno lyeyambo ndika, Kalunga okwa li a vulu okuulika ohenda nokudhima po oondjo dhaamboka ye na eitaalo tali longo muJesus.—Joh. 3:16; Rom. 6:23.
2:7, 8 (OB-1954)—Oshipango shini Johannes ta popi shi li “oshikulu” noshi li wo “oshipe”? Johannes ota popi kombinga yoshipango shohole yokwiiyambela aamwatate. (Joh. 13:34) Okwe shi ithana “oshikulu” molwaashoka Jesus okwe shi gandja pwa pita omimvo 60 manga Johannes inaa nyola ontumwafo ye yotango ya nwethwa mo. Kungeyi, ooitaali oya kala ye shi na okuza ‘ketameko’ lyonkalamwenyo yawo ye li Aakriste. Oshipango oshi li wo “oshipe” molwaashoka otashi pula opo tu kale tu ‘hole yakwetu ngaashi tu ihole tse yene’ notashi pula ohole yeiyambo mwene.—Lev. 19:18; Joh. 15:12, 13.
3:2 (OB-1954)—Oshike ‘inaashi hololelwa natango’ Aakriste aagwayekwa, notaya ka mona lye “ngashika e li”? Shoka inaaya hololelwa osho kutya otaya ka kala ya tya ngiini sho taya ka yumudhwa nomalutu gopambepo ya ka kale megulu. (Fil. 3:20, 21) Ihe shoka ye shi osho owala kutya ‘ngele Kalunga ta holoka, otaya ka ninga ye mu fa, oshoka oyo otaye ke mu mona ngashika e li,’ sha hala okutya, e li “Ombepo.”—2 Kor. 3:17, 18.
5:5-8—Ongiini omeya, ombinzi nombepo tayi hokolola nenge tayi gandja uunzapo kutya “Jesus oye Omuna gwaKalunga”? Omeya oga li ga gandja uunzapo, molwaashoka sho Jesus a ninginithwa, Jehova okwa li a popi kutya oku li Omwana e mu hokwa. (Mat. 3:17) Ombinzi yaJesus nenge omwenyo gwe ngoka gwa gandjwa gu li “iikulila yaantu ayehe,” ogu ulike wo kutya Jesus Omwana gwaKalunga. (1 Tim. 2:5, 6) Ombepo ondjapuki nayo oya li yu ulike kutya Jesus Omwana gwaKalunga sho ya li ye mu lambele peninginitho lye noya li ye mu ningitha ‘e ende apehe, a longe uuwanawa noku aludhe ayehe mboka ye li mepangelo lyomuhindadhi.’—Joh. 1:29-34; Iil. 10:38.
Iiyilongomwa kutse:
2:9-11; 3:15. Ngele Omukriste okwa pitike sha nenge omuntu gwontumba a yone po ohole ye yokuhola aamwahe, nena ote ende momilema dhopambepo noke shi mpoka u uka.
KALENI “HAMU ENDE MOSHILI”
(2 Joh. 1-13)
Johannes okwa tameke ontumwafo ye ontiyali a ti: “Ongame omukuluntu okomukulukadhi omuhogololwa noyana.” Okwa li a nyanyukwa sho a mono ‘oyana yomukulukadhi haye ende moshili.’—2 Joh. 1, 4, OB-1954.
Konima sho Johannes e ya ladhipike ya kokeke ohole, okwa nyola a ti: “Ohole ndjoka tandi yi popi, otayi ti kutya tse otu na okukala tatu vulika kiipango yaKalunga.” Okwe ya londodha wo kombinga ‘yaahongololi naakondjithi yaKristus.’—2 Joh. 5-7.
Omapulo gopamanyolo taga yamukulwa:
1, 13 (OB-1954)—Olye ‘omukulukadhi [nenge omukiintu] omuhogololwa’? Johannes otashi vulika a li ta popi omukulukadhi gwedhina Kyria ndyoka tali ti “omukiintu” mOshigreka. Nenge tashi vulika a li a longitha omupopyofano ta popi egongalo lyontumba opo a ngwangwaneke aahepeki yomagongalo. Ngele okwa li ta popi egongalo lyontumba, oyana oye li iilyo yegongalo ndyoka ‘noyana yomumwayina omukiintu’ otayu ulike kiilyo yegongalo lilwe.
Iiyilongomwa kutse:
2, 4. Opo tu hupithwe osha simanenena tu tseye nokukakatela ‘oshili,’ sha hala okutya, omalongo agehe gopaKriste ngoka ge li mOmbiimbeli.—3 Joh. 3, 4.
8-11. Ngele inatu hala okukanitha “esilohenda, olukeno nombili” mbyoka ya za kuTate Kalunga nokuJesus Kristus nosho wo eendathano lyopahole lyooitaali ooyakwetu, otu na ‘okwiikotokela’ pambepo nokwaahataamba mboka “itaa kala melongo lyaKristus.”—2 Joh. 3.
‘TU LONGENI PAMWE MOKUTAANDELITHA OSHILI’
(3 Joh. 1-14)
Johannes ontumwafo ye ontitatu okwe yi nyolele kuume ke Gaius. Okwa nyola a ti: “Kape na sha shilwe hashi nyanyudha ndje, shi vulithe okuuva kutya aamwandje oya kala moshili.”—3 Joh. 4.
Johannes okwa pandula Gaius molwaashoka okwa li “omudhiginini miilonga” yokukwathela aamwahe mboka ya li ye ya talele po. Omuyapostoli ngoka okwa ti: “Otu na okukwatha aalumentu ya tya ngaaka, opo tu longe pamwe nayo mokutaandelitha elaka lyoshili.”—3 Joh. 5-8.
Omapulo gopamanyolo taga yamukulwa:
11—Omolwashike yamwe haya longo uuwinayi? Mboka inaaya kola moshili ihaya mono Kalunga nomeho gopambepo. Molwaashoka ihaya vulu oku mu mona nomeho gawo gopanyama, ohayi ihumbata ya fa kee ya wete.—Hes. 9:9.
15—Oolye taya popiwa ye li ‘ookuume’? Uutumbulilo ‘ookuume’ owa kwatela mo oshindji kaashi shi owala mboka ye ninathane omakwatathano gopothingo. Johannes ote wu longitha okupopya ooitaali ooyakwawo ayehe.
Iiyilongomwa kutse:
4. Mboka ya kola pambepo megongalo ohaya kala ya nyanyukwa unene ngele taya mono aagundjuka yamo ‘taye ende moshili.’ Aavali nayo ihaya kala tuu ya nyanyukwa ngele ye shi pondola mokukwathela oyana ya ninge aapiya yaJehova!
5-8. Yamwe yomwaamboka haya longo nuudhiginini molwohole yokuhola aamwahe naJehova oyo aatonateli aayendi, aatumwa, mboka taya longo moBetel nosho wo aakokolindjila. Eitaalo lyawo oli shi okuholelwa notwa gwana oku ya ambidhidha pahole.
9-12. Otu na okulandula oshiholelwa shaDemetrius omudhiginini, ihe hashaDiotrefes ngoka a li omulundili.
‘IKALEKENI MOHOLE YAKALUNGA’
(Jud. 1-25)
Judas ota hokolola mboka yi iyakela megongalo kutya ‘ohaya ngungutula nokupa ooyakwawo uusama. Oyo ohaa landula uuhalu wawo; ohaa popi oohapu dhuuntsa nohaa fundjaleke aantu, opo ye ya likole.’—Jud. 4, 16.
Ongiini Aakriste taya vulu okukondjitha omanwethomo omawinayi? Judas okwa nyola a ti: “Ookuume kandje, dhimbulukweni oohapu mwe dhi lombwelwa nale kaayapostoli yOmuwa Jesus Kristus.” Okwa gwedha ko a ti: “Ne mwi ikaleke mohole yaKalunga.”—Jud. 17-21.
Omapulo gopamanyolo taga yamukulwa:
3, 4—Omolwashike Judas a ladhipike Aakriste ‘ya kondjele eitaalo’? Molwaashoka ‘mokati kawo omwi iyakele aakeenakonasha naKalunga.’ Aalumentu mboka oya li ya “goyokitha elaka lyesilohenda lyaKalunga ketu nokwaaneidhiliko kwawo.”
20, 21—Ongiini tatu vulu ‘okwiikaleka mohole yaKalunga’? Otatu vulu oku shi ninga momikalo dhi li ndatu: (1) Omokwiitungila ‘meitaalo lyetu eyapuki’ okupitila mokukonakona nuudhiginini Oohapu dhaKalunga nomokukutha ombinga nuulaadhi miilonga yokuuvitha; (2) omokugalikana ‘mombepo ondjapuki,’ sha hala okutya, metsokumwe nenwethomo lyayo; nosho wo (3) mokukala neitaalo tali longo mekuliloyambo lyaJesus Kristus, ndyoka tali shi ningi tashi vulika tu mone omwenyo gwaaluhe.—Joh. 3:16, 36.
Iiyilongomwa kutse:
5-7. Mbela aakolokoshi otaa vulu okuyanda epangulo lyaJehova? Iiholelwa itatu yelondodho mbyoka ya popiwa kuJudas otayi ulike kutya itaye shi vulu.
8-10. Otu na okulandula oshiholelwa shomuyengeli omukuluntu Mikael nokusimaneka mboka ya pewa oonkondopangelo kuKalunga.
12, yelekanitha NW. Aashunimonima mboka hayi iningitha ya fa ye na ohole oye li oshiponga keitaalo lyetu naanaa ngaashi omamanya kohi yomeya taga vulu okweetela oosikepa nenge aayogi oshiponga. Aalongi aafundja otashi vulika ya kale ya fa haya gandja nehalo ewanawa, ihe oya fa iikogo tayi matukithwa kombepo molwaashoka kaye na sho ye shi pambepo. Aantu ya tya ngaaka oya fa omiti dhopokufu dha sa, ihaadhi imi iiyimati. Oya taalela ehanagulo ngaashi omiti ndhoka dha vudhwa mo. Ano oshi li pandunge tu yande aashunimonima.
22, 23. Aakriste yashili oye na okutonda shoka oshiwinayi. Opo ya kambadhale okuhupitha “mboka ya limbililwa” kaaya ye momulilo gwehanagulo lyaaluhe, mboka ya pyokoka pambepo megongalo unene tuu aatonateli ya langekwa po oye na oku ya kwathela pambepo.
[Omathano pepandja 30]
Omeya, ombinzi nombepo oya gandja uunzapo kutya “Jesus oye Omuna gwaKalunga”