Mbela oho tila oonakusa?

KEPULO ndika oyendji ohaya yamukula owala taya ti: “Aawe. Omolwashike ndi na oku ya tila?” Oyi itaala kutya oonakusa oya sa shili. Ihe aantu omamiliyona oyi itaalithwa kutya aantu ngele ya si ohaya ka ninga iishitwa yopambepo.

KuBenin, muAfrika lyokUuninginino, aantu oyendji oyi itaala kutya oonakusa ohaya vulu okugaluka ya dhipage yalwe yomiilyo yomaukwanegumbo gawo. Aantu ohaya landitha po omaliko gawo nenge ya ka lye oondjo opo ya fute iinamwenyo ya vule okuninga omayambo niituthi okugeyululitha oonakusa yawo. Yamwe oompulile, shoka sha kwatela mo edhiladhilo kutya omuntu ngele a si ombepo ohayi hupu po nohayi vulu okukala yi na ekwatathano naamboka ye na omwenyo. Yalwe ohaya kala ye na uumbanda kutya ombepo yanakusa otayi vulu oku ya nwetha mo.

Gumwe ngoka e na oshimoniwa sha tya ngaaka oAgboola, omulumentu ngoka a kala popepi noongamba dhopokati kaBenin naNigeria. Okwa ti: “Oompwidhuli otadhi dhana onkandangala monkalamwenyo yomoshitopolwa shetu. Oshi li omukalondjigilile okuyoga omidhimba momukalo gwontumba oku dhi longekidhila okuya mehala moka hamu kala iishitwa yopambepo. Olundji ohandi kutha othewa ndjoka ya hupu po noku yi vundakanitha mumwe nomafo gontumba. Opo nduno, sho tandi yi gwayeke kondjembo yandje yokuya nayo kuukongo, onda li nda popi muule kutya oshinamwenyo shini nda hala okuyaha. Iinima ngaashi mbika oya ha nohayi monika ya fa hayi longo shili. Onkee ano, omikalo dhimwe dhuumpulile odha li hadhi tilitha.

“Sho aamwandjemati yaali ya li ya si ombaadhilila, onda li nda fekele kutya opu na ngoka a loga ndje. Opo ndi shi tseye, onda li nda yi komulumentu gumwe omukulupe a tseyika nawa omolwuumpulile we. Okwa li a koleke shono tandi dhiladhila. Shiyemateka, okwa li a yelitha kutya aamwandjemati ngashingeyi oya tegelela mehala moka hamu kala iishitwa yopambepo ya ka ninge aalongeli yomudhipagi gwawo uuna a si. Omusamane ngoka omukulupe okwa li a gwedha ko ta ti kutya omumwandjemati gwonkelo naye ota ka sa. Konima yomasiku omashona, omwanamati ngoka naye okwa si.”

Agboola okwa li a tsakanene naJohannes, gumwe gwomOonzapo dhaJehova a za koshishiindalongo Nigeria. Johannes okwa li e mu yelithile shi ikolelela kOmbiimbeli shi na ko nasha nonkalo yoonakusa. Eyelithilo ndyoka olya li lya lundulula onkalamwenyo yaAgboola. Otali vulu wo okulundulula yoye.

Mbela oonakusa oye na omwenyo?

Olye ta vulu okuyamukula nawa epulo ndika? Hamulumentu gwontumba, kutya nduno ona kale a tseyika nawa shi thike peni. Pehala lyaashono, Jehova, Omushiti gwiinima ayihe yi na omwenyo “yomegulu noyokombanda yevi, iinima mbyoka yi wetike naambyoka yaa wetike,” oku na eyamukulo. (Aakolossa 1:16) Okwa shita aayengeli ya kale mehala moka hamu kala iishitwa yopambepo naantu niinamwenyo ya kale kombanda yevi. (Episalomi 104:4, 23, 24) Onkalamwenyo kehe pamwe okuye yi ikolelela. (Ehololo 4:11) Tala shoka Oohapu dhaKalunga, Ombiimbeli tadhi ti kombinga yeso.

Jehova oye a popya tango kombinga yeso. Okwa li a londodha Adam naEva kutya otaya ka sa ngele inaya vulika kuye. (Genesis 2:17) Shoka osha li sha hala okutya shike? Jehova okwa yelitha a ti: “Owa kuthilwe mevi nou na okushuna mevi.” (Genesis 3:19) Peso olutu lwomuntu ohalu ningi ontsi yevi moka omuntu a shitilwe. Onkalamwenyo ye ohayi hulu po.

Adam naEva oya li inaaya vulika owina nomolwaashono ya tokolelwa eso. Ihe nonando ongaaka, hayo ya li ya si tango. Omwanamati gwawo Abel oye a li a si tango. Omumwayinamati gwosheeli, Kain oye a li e mu dhipaga. (Genesis 4:8) Kain ka li a tila kutya omumwayinamati ngoka a sa ote ke mu kwatela onkone. Pehala lyaashono, Kain okwa li a tila shono aanamwenyo taya vulu oku mu ningila.—Genesis 4:10-16.

Konima yomathelemimvo ogendji, omukwaniilwa Herodes okwa haluka sho aakoneki yoonyothi ye mu lombwele kutya “omukwaniilwa gwAajuda” okwa valwa moshilongo she. Opo a dhipage ngoka a li ta ka ninga omukwaniilwa, Herodes okwa li a ningi elongekidho opo aanona aamati mboka ye na oomvula mbali naamboka aashona yomuBetlehem ya dhipagwe. Ihe omuyengeli okwa li a londodha Josef a kuthe Jesus naMaria ya “tembukile kuEgipiti.”—Mateus 2:1-16.

Sho Herodes a si, omuyengeli okwa li a lombwele Josef a shune kuIsraeli, ‘oshoka mboka ya li ya hala okudhipaga okanona, oya sa.’ (Mateus 2:19, 20) Omuyengeli ngoka e li oshishitwa shopambepo okwa li e shi kutya Herodes ita vulu we okweetela Jesus oshiponga. Josef ka li a tila nakusa omukwaniilwa Herodes. Ihe Josef okwa li a tila shoka omwanamati gwaHerodes, Arkelaus omukwanyanya ta vulu oku mu ningila. Onkee ano, Josef nuukwanegumbo we oya tula moshilongo shaGalilea, kondje yepangelo lyaArkelaus.—Mateus 2:22.

Omahokololo ngaka otage tu kwathele tu mone kutya oonakusa kaye na shoka taya vulu okuninga. Ongiini nduno iimoniwa yaAgboola nayalwe tayi vulu okuyelithwa?

“Oompwidhuli” nenge oombepo dha nyata

Sho Jesus e li omukuluntu okwa li a tsakaneke aanampwidhuli ya pwidhuka nayi. Oya li ye mu dhimbulula e taye mu ithana “Omuna gwaKalunga.” Jesus naye okwa li e shi kutya oyo oolye. Kaya li oombepo dhoonakusa. Pehala lyaashono, Jesus okwa li e yi ithana “oompwidhuli” nenge oombepo dha nyata.—Mateus 8:29-31; 10:8; Markus 5:8.

Ombiimbeli otayi popi kombinga yoombepo ndhoka hadhi vulika kuKalunga naandhoka dha li dhe mu pataneke. Embo lyaGenesis otali popi kutya sho Jehova a tidha oonakwaavulika, Adam naEva moshikunino shaEden, okwa li a langeke aakerubi nenge aayengeli kuuzilo woshikunino opo ya keelele shaangoka ta yi mo. (Genesis 3:24) Otashi vulika shika osho sha li oshikando shotango iishitwa yopambepo ya li ya monika kaantu.

Konima yethimbo, aayengeli yamwe oya li ye ya kombanda ye vi noyi ikuthile omalutu gopantu. Jehova ka li e ya pa oshilonga sha sha kombanda yevi. Pehala lyaashono, oya li ya “thigi po ehala lyawo yene” moka hamu kala iishitwa yopambepo. (Judas 6) Shoka sha li she yi inyengitha osha li okwiihola mwene. Oya li yi ikuthile aakulukadhi, mboka ya li ye ya valele aanona hayi ithanwa Aanefilim. Aanefilim noohe yawo mboka ya li aanashipotha oya li yu udhitha evi nelongithonkondo nosho wo iinima yilwe oyindji. (Genesis 6:1-5) Jehova okwa li u ungaunga nonkalo ndjoka mokweetela ombanda yevi ayihe Eyelu ndyoka lya li ko pethimbo lyaNoa. Omeya gEyelu oga li ga hanagula po aalumentu naakiintu aakolokoshi nosho wo aalefule. Mbela oshike sha li sha ningilwa aayengeli?

Eyelu olya li lye ya thininike ya shune kehala hoka haku kala iishitwa yopambepo. Onkee ano, Jehova okwa li e ya keelele kaaya shune ‘mehala lyawo yene.’ (Judas 6) Ombiimbeli oya ti: “Kalunga ine etha inaa geela aayengeli mbeyaka ya yono, ihe okwe ya umbile moheli [nenge molumbogo], moka ye li mo ya mangwa nomalyenge, ya tegelela esiku lyepangulo.”—2 Petrus 2:4.

Oheli nenge olumbogo kalu shi ehala lyokondandalunde; ihe olyo ehala lya fa ondholongo moka mboka yu umbwa megulu itaaya vulu we okulonga sha. Oompwidhuli itadhi vulu we okwiikuthila omalutu gopantu, ihe odhi na natango oonkondo oonene okunwetha mo omadhiladhilo nokukalamwenyo kwaantu. Ohadhi vulu okunwetha mo aantu niinamwenyo. (Mateus 12:43-45; Lukas 8:27-33) Ohadhi pukitha wo aantu mokwiininga dha fa oombepo dhoonakusa. Omolwashike mbela? Opo dhi keelele aantu kaaya longele Jehova momukalo ngoka a hokwa noku ya ngwangwaneka kaaya tseye onkalo yolela yoonakusa.

Nkene uumbanda wu na okusindika

Agboola okwa li a mono kutya eyelitho lyOmbiimbeli li na ko nasha neso nosho wo kutya oombepo dhoonakusa odho shike oli li pandunge. Oku uva ko kutya okwa li a pumbwa okwiilonga oshindji. Okwa li a tameke okulesha pamwe naJohannes Ombiimbeli nosho wo iileshomwa yi ikolelela kOmbiimbeli. Agboola okwa li a mono ehekeleko mokutseya kutya oyanamati oya li ya kotha mombila, ihe inaya tegelela mehala moka hamu kala iishitwa yopambepo oku ka ninga aapiya yomudhipagi gwawo.—Johannes 11:11-13.

Agboola okwa li wo a mono kutya okwa li e na okweetha po thiluthilu iinima yi na ko nasha nuumpulile. Okwa li a fike po iinima ye ayihe yi na ko nasha nuumpulile. (Iilonga 19:19) Yamwe moshitopolwa oya li ye mu londodha kutya oombepo dhoonakusa itadhi ke shi hokwa. Ihe Agboola ka li e na uumbanda washa. Okwa li a landula omayele ngoka taga a dhika mAaefeso 6:11, 12 taga ti: “Ihomatekeni iikondjitho ayihe mbyoka Kalunga te yi mú pe. . . oshoka. . . otatu kondjitha oonkondo dhomombepo.” Iikondjitho yopambepo mbika oya kwatela mo oshili, uuyuki, onkundana ombwanawa yombili, eitaalo nosho wo egongamwele lyombepo, sha hala kutya, Oohapu dhaKalunga. Iikondjitho ya tya ngaaka ohayi zi kuKalunga noyi na oonkondo.

Agboola okwa li a tondwa kuyamwe yomookuume ke noyomaakwanezimo lye molwaashoka e etha po uumpulile. Ihe nando ongaaka, kOshinyanga shUukwaniilwa shOonzapo dhaJehova shopuyo okwa li a mono ko ookuume aape, mboka yi itaala shoka Ombiimbeli tayi longo.

Agboola ngashingeyi oku shi shi kutya masiku Jehova ota ka yogola ko uukolokoshi auhe kombanda yevi nota ka hulitha po thiluthilu iilonga yoompwidhuli. Hugunina ote ke dhi hanagula po. (Ehololo 20:1, 2, 10) Kalunga ota ka yumudhila huka kombanda yevi “oonakusa ayehe mboka ye li moombila.” (Johannes 5:28, 29) Muyo omwa kwatelwa Abel, aanona kaaye na ondjo mboka omukwaniilwa Herodes a li a dhipagitha nayalwe omamiliyona. Agboola okwiitaala kutya oyanamati ye yatatu otaya ka kwatelwa mo. Mboka wu hole ya sa otashi vulika nayo ya ka kwatelwe mo. Ayehe mboka taya ka yumudhwa otaya ka shilipaleka kutya kaya li ye na sho ye shi okuza pokusa kwawo sigo opeyumudho lyawo, sha hala okutya, kaye na shoka ye shi kombinga yiituthi mbyoka ya li ya ningilwa.

Ino pumbwa okukala wa tila oonakusa. Pehala lyaashono, oto vulu okukala netegameno okuhangana ishewe noonakusa yoye aaholike. Manga wa tegelela ethimbo ndyoka, omolwashike itoo konakona Ombiimbeli wu koleke eitaalo lyoye? Endathana naamboka yi itaala shoka Ombiimbeli tayi longo. Ngele oho kutha ombinga muumpulile, shi hulitha po ngashingeyi. Igamena koompwidhuli mokwiihomateka ‘iikondjitho ayihe mbyoka Kalunga te yi ku pe.’ (Aaefeso 6:11) Oonzapo dhaJehova otadhi ka kala dha nyanyukwa oku ku kwathela. Ohadhi gandja omakonakonombiimbeli goshali pegumbo, tadhi longitha embo Omalongo gashili gOmbiimbeli ogeni naanaa?a

Agboola ke na we uumbanda wokutila oonakusa noku li i ilonga nkene ta vulu okukondjitha oompwidhuli. Okwa ti: “Kandi shi shi kutya olye e etitha eso lyaamwandjemati yatatu. Ihe okuza sho nda tameke okulongela Jehova ondi na ngashingeyi aanona yalwe yaheyali. Kapu na gumwe ngoka ha kala mehala moka hamu kala iishitwa yopambepo e ye etela oshiponga.”

[Enyolo lyopevi]

[Oohapu dha simana pepandja 27]

Kain ka li a tila kutya omumwayinamati ngoka a sa ote ke mu kwatela onkone

[Ethano pepandja 28]

Agboola ke na we uumbanda wokutila oonakusa noku li i ilonga nkene ta vulu okukondjitha oompwidhuli