Mbela Kalunga okwa hokwa omalongelokalunga agehe?

Shoka oyendji haya ti:

▪ “Omalongelokalunga agehe ondjila yimwe ndjoka yu uka kuKalunga.”

▪ “Kashi na mbudhi kutya omeitaalo lini wu li, shampa owala wu li omunashili oshi li nawa.”

Jesus okwa ti ngiini?

▪ “Indeni mo, mu pitile mosheelo shoka sha patekidha, oshoka osheelo shoka oshinene nondjila ndjoka ya mbwalangandja otayi fala mekano, noku na oyendji mboka taye yi lamba. Ihe osheelo shoka oshishona nondjila ndjoka ya thinana otayi fala komwenyo, naashona yowala mboka taa yi mono.” (Mateus 7:13, 14) Jesus ka li i itaala kutya omalongelokalunga agehe ondjila yimwe ndjoka yu uka kuKalunga.

▪ “Mesiku ndyoka oyendji otaa ka lombwela ndje taa ti: ‘Omuwa, Omuwa!’ Hatse tuu mboka tu uvitha medhina lyoye notwa tidha mo oompwidhuli medhina lyoye notwa longo iilongankondo oyindji medhina lyoye?” (Mateus 7:22, 23) Jesus ina panda ayehe mboka tayi iti kutya aalanduli ye.

AALONGELIKALUNGA oyendji oya simaneka omalongo nomithigululwakalo dhawo yene. Ihe ongiini ngele omalongo ngoka itaga tsu kumwe naashoka shi li mOohapu dhaKalunga, Ombiimbeli? Jesus okwa li a popi oshiponga shokulandula omithigululwakalo dhaantu sho a lombwele aawiliki yomalongelokalunga yopethimbo lye a ti: “One tamu kutha oohapu dhaKalunga oonkondo omolwomithigululwakalo dheni.” Okwa tsikile ko ta totha moohapu dhaKalunga ta ti: “Aantu mbaka ohaa simaneke ndje owala noohapu dhomokana, ihe omitima dhawo odhi li kokule nangame. Okulongela ndje kwawo osima yowala, oshoka otaa longo omalongo gopaipango yaantu.”—Mateus 15:1-9; Jesaja 29:13.

Kakele kelongelokalunga, eihumbato nalyo olya simana wo. Ombiimbeli otayi popi yamwe mboka hayi iti otaya longele Kalunga tayi ti: “Oyo otaa ti kutya oya tseya Kalunga, ihe iilonga yawo itayi shi holola.” (Titus 1:16) Ombiimbeli otayi popi lela aantu yopethimbo lyetu tayi ti: “[Oye] hole olundundu peha lyokuhola Kalunga. Oyo otaa ka kala ya fa haa simaneke Kalunga, ihe otaa idhimbike oonkondo dhe. Yanda aantu ya tya ngaaka.”—2 Timoteus 3:4, 5.

Nonando osha pumbiwa omuntu a kale omunashili, hasho owala tashi pulwa. Omolwashike mbela? Omolwaashoka omuntu otashi vulika a kale ihaa longo uulunde, ihe okwa puka. Onkee ano, ontseyo yashili kombinga yaKalunga oya simanenena. (Aaroma 10:2, 3) Okukala tu na ontseyo ndjoka nokukatuka metsokumwe naashoka Ombiimbeli tayi ti otashi ke tu ningitha tu kale twa hokiwa kuKalunga. (Mateus 7:21) Odhoshili kutya elongelokalunga lyashili olya kwatela mo okukala niikala yu uka, okwiitaala shoka shi li mondjila nokukatuka pandunge. Okukatuka oonkatu dhu uka otashi ti okulonga ehalo lyaKalunga.—1 Johannes 2:17.

Ngele owa hala okutseya oshindji shoka Ombiimbeli tayi ti kombinga yaKalunga, ninga ekwatathano nOonzapo dhaJehova wu pewe ekonakonombiimbeli lyoshali pegumbo.

[Oohapu dha simana pepandja 9]

Elongelokalunga lyashili olya kwatela mo okukala niikala yu uka, okwiitaala shoka shi li mondjila nokukatuka pandunge