Jehova okwa wana okutangwa kovanhu aveshe
“Halleluya!” — EPS. 111:1.
1, 2. Outumbulilo “Halleluya” owa hala okutya shike, nowa longifwa ngahelipi mOmishangwa dopaKriste dOshigreka?
OTUMBULILO “Halleluya!” ohau longifwa luhapu meengeleka dOukwakriste. Ovanhu vamwe ohave u longifa nokuli mokupopya kwavo kwakeshe efiku. Ndele ovanhu ashike vanini ve shii eityo liyapuki loutumbulilo oo, kakele kaasho, onghedi yokukalamwenyo yavahapu ovo have u longifa itai ulike kutya ohava fimaneke Kalunga. (Tit. 1:16) Emboitya limwe lOmbibeli ola yelifa kutya oshitya “Halleluya!” “osha li hashi longifwa kovashangi vomapsalme ve lili noku lili va shive vamwe opo va tange Jehova pamwe navo.” Ovahongwanhu vamwe vOmbibeli ova popya nokuli kutya outumbulilo “Halleluya” otau ti “Tangeni Jah, [sha hala okutya], Jehova.”
2 Onghee hano, itashi kumwifa eshi o-New World Translation ya toloka outumbulilo oo mEpsalme 111:1, tai ti: ‘Tangeni Jehova!’ Oshitya shOshigreka osho sha tolokwa “Halleluya” osha holoka oikando ine mEhololo 19:1-6, tashi longifwa mokuhambelela okuxulifwa po kwomalongelokalunga oipupulu. Eshi omalongelokalunga oipupulu taa ka hanaunwa po, ovalongelikalunga vashili otava ka kala ve na etomheno le likalekelwa lokulongifa outumbulilo “Halleluya” monghedi yefimaneko.
Oinenelonga yaJehova
3. Ovakriste ohava ongala pamwe pandjikilile omolwetomheno la fimana lilipi?
3 Omushangi wEpsalme 111 ote tu pe omatomheno mahapu kutya omolwashike Jehova a wana filufilu okutangwa kovanhu aveshe. Ovelishe 1 otai ti: ‘Onda hala okutanga Omwene nomutima aushe mongudu yovayuki nomeongalo.’ Eendombwedi daJehova kunena nado osho di udite ngaho. Etomheno la fimana molwaashi hatu ongala pamwe pandjikilile momaongalo ile poyoongalele yakula, olo okutanga Jehova.
4. Ongahelipi ovanhu tava dulu okukonakona oilonga yaKalunga?
4 ‘Oilonga yOmwene oinene, oya wana okukonakonwa kovahokwi vayo aveshe.’ (Eps. 111:2) Didilika outumbulilo oo “okukonakonwa.” Embo limwe lomauyelele ola ti kutya ovelishe oyo otai dulu okulongifwa shi na sha novanhu ovo hava “dilonga va mana mo nohava konakona” oilonga yaKalunga. Eshito otali ulike kutya Jehova oKalunga kelalakano, molwaashi eshito ola unganekwa monghedi ikumwifi. Jehova okwa shita etango, edu nosho yo ohani i kale tai longele kumwe nawa opo edu li kale tali mono oupyu nouyelele wa yeleka. Oinima oyo oye shi ninga tashi shiiva opo pa kale oufiku nomutenya, omafimbo omudo a yoolokafana nosho yo okutumbalala nokulota kwomeva efuta.
5. Omakonakono oo a ningwa kovanongononi opo va ude ko nawa eshito otaa holola shike?
5 Eshi ovanongononi va ninga omakonakono ova mona ouyelele muhapu kombinga yedu kutya ola fikama peni mokati keepulaneta odo da dingilila etango nonokutya ohani yetu oi na ounene nondjudo ya yeleka oyo tai i ningifa i dingonoke edu monghedi ya wanenena. Okulongela kumwe kwomaminikilo okeulu nosho yo opo a fikama, okwe shi ninga tashi shiiva opo pa kale omafimbo omudo a yoolokafana. Ovanongononi ova mona yo kutya eenghono dopaushitwe ohadi longele kumwe nawa meshito. Onghee hano, omuprofesor umwe omuindjiniya okwa popya moshitukulwa shi na oshipalanyole, “The Designed ‘Just So’ Universe,” a ti: “Oshipu okuuda ko kutya omolwashike ovanongononi vahapu va lundulula okudiladila kwavo moule womido 30 da pita, nova dimina kutya omunhu okwa pumbwa okwiitavela kutya eshito inali holoka po ashike ngahenya. Otu na omatomheno mahapu okwiitavela kutya oku na omunduluki omunaendunge ngeenge otwa konakona nawa onghedi omo edu la shitikika.”
6. Ou udite ngahelipi shi na sha nonghedi omo Kalunga a shita ovanhu?
6 Oinenelonga imwe oyo Kalunga a longa, oyo onghedi omo e tu shita. (Eps. 139:14) Kalunga okwe tu shita tu na omadiladilo nomalutu e na oilyo aishe oyo twa pumbwa opo tu dule okulonga. Pashihopaenenwa, okwe tu shita monghedi ikumwifi, molwaashi ohatu dulu okupopya, okupwilikina nosho yo okulesha nokushanga. Ovanhu vahapu ova shitwa nomaukwatya oo. Omalutu etu okwa shitwa monghedi ikumwifi, haa dulu okukala ofika a yukilila. Omudutilo nonghedi omo omalutu etu a fikama po oye shi ninga tashi shiiva opo tu dule okukala hatu linyenge, hatu longo nopo olutu li dule okunyanyaula oikulya noupu opo tu mone eenghono. Oinima ya tya ngaho ohai tu kumwifa neenghono. Kakele kaasho, omakwatafano makumwifi eesele domaliudo odo hadi ningifa omadiladilo nosho yo oyuuditifi yetu i longele kumwe, oku dule kokule oinima aishe oyo ovanongononi va longa. Ovanhu ohava dulu ashike okulonga oinima omolwomadiladilo noyuuditifi oyo va pewa kuKalunga. Nokuli nomuindjiniya oo a deulikika noku na owino ita dulu okunduluka po oshinima shiwa nohashi kwafa ngaashi omake nominwe detu dokeenyala. Lipula kutya, ‘ngeno Kalunga ka li e tu shita tu na eenyala, mbela ngeno ohatu dulu ngoo okulonga oilonga ikumwifi ngaashi okufaneka nokutunga omatungo?’
Oinenelonga yaKalunga nosho yo omaukwatya aye
7. Omolwashike tu na okutala ko Ombibeli i li imwe yomoinenelonga yaKalunga?
7 Oinenelonga yaJehova oya kwatela mo oinima ikwao ikumwifi oyo a ningila ovanhu, ngaashi oyo ya hepaululwa mOmbibeli. Ombibeli otai tu kumwe monghedi ikumwifi. Inai fa omambo makwao, molwaashi oya ‘yandjwa keenghono domhepo yaKalunga noi shii okuhonga.’ (2 Tim. 3:16) Pashihopaenenwa, embo lotete lOmbibeli, Genesis, otali hokolola nghee Kalunga a li a xulifa po oukolokoshi pefimbo laNoa. Embo etivali, Exodus, otali hokolola nghee Jehova a li a ulika kutya oye Kalunga kashili eshi a li a mangulula Ovaisrael moupika waEgipti. Omushangi wepsalme otashi dulika a li ta diladila kombinga yoiningwanima oyo, eshi a ti: ‘Oilonga [yOmwene] oya tumbala noya fimana, nouyuki waye otau kalele alushe. Oye okwa dika oshidimbulukifo shoikumwifilonga yaye; Omwene Oye omunamutimanghenda nomunalukeno.’ (Eps. 111:3, 4) Mbela ino dimina kutya oilonga oyo Jehova a longa monakudiwa naayo ta longo mefimbo letu otai tu dimbulukifa ‘etumbalo nefimano’ laye?
8, 9. (a) Oilonga yaKalunga oya yooloka ko ngahelipi koilonga ihapu yovanhu? (b) Omaukwatya aKalunga amwe elipi wa hokwa?
8 Didilika yo kutya omupsalme oo okwa divilika omaukwatya mawa aJehova, ngaashi ouyuki, olukeno nonghenda. Otu shi shii nawa kutya oilonga yovanhu ovalunde luhapu ihai longwa pauyuki. Oilonga yavo ohai holola kutya ovanalwisho, ovanandubo nove na ounwa. Oikala yavo oyo oi liwetikile moilwifo ya nyika oshiponga oyo va longa nelalakano lokuliyambapaleka nomolwoita oyo hava etifa po. Nokungaho, ohava etele ovanhu omamiliyona ovo vehe na ondjo oluhodi. Kakele kaasho, oilonga ihapu yovanhu ohai fininikile ovakwanaluhepo kongudi. Pashihopaenenwa, ovanhu vahapu otashi dulika ve shii kombinga yovapika ovo va li hava longifwa okutunga eembila dooFarao vaEgipti, ovo va li ve na ounwa. Kakele kaasho, oilonga ihapu yovanhu kunena ohai hepeke ovanhu nohai “nyono edu.” — Lesha Ehololo 11:18.
9 Oilonga yaJehova oya yooloka ko kwaayo yovanhu, molwaashi ohai longwa alushe pauyuki. Oilonga yaJehova oya kwatela mo efiloshisho laye lopahole li na sha nokuxupifa ovanhu ovalunde. Kalunga okwa li a ‘holola ouyuki waye’ eshi a yandja ekulilo. (Rom. 3:25, 26) Doshili, ‘ouyuki waye otau kalele alushe.’ Kalunga okwa li a ulika kutya oku na olukeno monghedi omo a kala ta ungaunga nelididimiko novanhu ovalunde. Omafimbo amwe okwa li nokuli ha longifa outumbulilo “akutu” lwoikando, ta indile oshiwana shaye shi efe po eendjila dasho dii noshi longe ouyuki. — Lesha Hesekiel 18:25.
Jehova oha wanifa po omaudaneko aye
10. Jehova okwa tula po oshihopaenenwa shoudiinini shilipi eshi a li a ninga ehangano naAbraham?
10 ‘Ava have mu tila, ote va pe eendya, alushe oha dimbulukwa ehangano lavo naye.’ (Eps. 111:5) Eendjovo odo omupsalme a popya movelishe oyo otashi dulika tadi ulike kehangano olo Jehova a li a ninga naAbraham. Jehova okwa li a udaneka kutya ota ka nangeka noupuna oludalo laAbraham nonokutya oludalo laye otali ka nangala omivelo dovatondi valo. (Gen. 22:17, 18; Eps. 105:8, 9) Oludalo laAbraham olo la li la ninga oshiwana shaIsrael, shi li ewanifo lotete leudaneko olo. Oshiwana shaIsrael osha li sha kala efimbo lile moupika waEgipti, ndelenee ‘Kalunga okwa li a dimbulukwa ehangano laye naAbraham’ nokwa li e shi mangulula mo moupika. (Ex. 2:24) Onghedi omo Jehova a li a ungaunga noshiwana shaye otai ulike kutya oha yandje nehalo liwa. Okwa li he shi palula palutu nosho yo pamhepo. (Deut. 6:1-3; 8:4; Neh. 9:21) Momafelemido a ka shikula ko, oshiwana shaIsrael osha li hashi liteeka po Kalunga, nonande okwa li he shi tumine ovaprofeti ve shi ladipike shi alukile kuye. Omido di dule pe 1 500 lwaapo okudja eshi Jehova a li a mangulula Ovaisrael muEgipti, okwa li a tuma Omona waye ewifa kombada yedu. Ndele Ovajuda vahapu kava li va tambula ko Jesus nova li nokuli ve mu dipaifa. Okudja opo, Jehova okwa li a hoolola oshiwana shopamhepo shipe, sha hala okutya, ‘Israel yaKalunga.’ Oshiwana osho osha ninga oludalo laAbraham lopamhepo pamwe naKristus, na Jehova okwa li a xunganeka kutya ota ka longifa oludalo olo opo a nangeke noupuna ovanhu. — Gal. 3:16, 29; 6:16.
11. Ongahelipi Jehova ta twikile ‘okudimbuluka ehangano laye’ naAbraham?
11 Jehova ota ‘dimbuluka natango ehangano laye’ nosho yo omanangeko noupuna oo a udaneka okupitila mulo. Oha yandje eendja dihapu dopamhepo kunena momalaka e dule po 400. Kakele kaasho, ota twikile okunyamukula omailikano etu e na sha nokufila oshisho eemhumbwe detu dopalutu, oo hatu ilikana metwokumwe neendjovo odo tadi ti: “Tu pa efiku keshe omungome wetu womafiku aeshe.” — Luk. 11:3; Eps. 72:16, 17; Jes. 25:6-8.
Jehova omunaenghono adishe
12. Israel shonale osha li sha pewa ngahelipi ‘efyuululo loilongo yovapaani’?
12 ‘Eenghono doinenelonga yaye okwe di shiivifa oshiwana shaye, eshi e shi fyuululifa oilongo yovapaani.’ (Eps. 111:6) Omupsalme oo otashi dulika a li ta diladila koshiningwanima shimwe sha tongomana osho sha li sha ningwa mondjokonona yOvaisrael, eshi va li va mangululwa moupika waEgipti pashikumwifilonga. Eshi Jehova a li e va eta mEdu lEudaneko, Ovaisrael ova li va finda omauhamba oo a li koushilo nokouninginino womulonga waJordan. (Lesha Nehemia 9:22-25.) Kungaho, Jehova okwa li a pa Ovaisrael ‘efyuululo loilongo yovapaani.’ Kalunga ka li tuu a holola eenghono daye!
13, 14. (a) Omupsalme otashi dulika a li ta diladila oshiningwanima shilipi omo Jehova a li a holola eenghono daye? (b) Jehova okwa li vali a longa oinenelonga yokumangulula ilipi?
13 Nonande Jehova okwa li a ningila Ovaisrael oinima aishe oyo, kava li ve mu fimaneka noka va li va fimaneka ooxekululwa, ngaashi Abraham, Isak naJakob. Ova li va tukululila Kalunga oshibofa, na Kalunga okwa li a ningifa Ovababilon ve va kufe mo medu lavo noku va twala moupongekwa. (2 Omaf. 36:15-17; Neh. 9:28-30) Ngeenge omushangi wEpsalme 111 okwa li ko konima eshi Ovaisrael va aluka moupongekwa kuBabilon, ngaashi ovahongwanhu vamwe vOmbibeli tava ti, okwa li e na natango etomheno la wedwa po lokutanga Jehova omolwouyuki waye nosho yo eenghono daye. Kalunga okwa li a ulika kutya omuyuki noku na eenghono eshi a li a mangulula Ovajuda moukwatwa waBabilon, osho sha li sha shiivika ihashi mangulula eenghwate dasho. — Jes. 14:4, 17.
14 Omafelemido atano lwaapo konima yaasho, Jehova okwa li a ulika eenghono daye monghedi ikumwifi neenghono, eshi a mangulula ovanhu ovo ve livela ombedi moupika woulunde nefyo. (Rom. 5:12) Osho oshe shi ninga tashi shiiva opo ovanhu 144 000 va ninge ovamwaxe vaKristus ovavaekwa. Mo 1919, Jehova okwa li a longifa eenghono daye opo a mangulule oshixupe shinini shovavaekwa ovo okudja moupika womalongelokalunga oipupulu. Oilonga oyo va kala tava wanifa po mefimbo eli lexulilo ova dula ashike oku i longa kekwafo leenghono daKalunga. Ngeenge ova kala ovadiinini fiyo okefyo, otava ka pangela kombada yedu okudja meulu pamwe naJesus Kristus opo va etele ovanhu ovo ve livela ombedi omauwa. (Eh. 2:26, 27; 5:9, 10) Otava ka fyuulula edu monghedi ikumwifi ve dule Israel shonale. — Mat. 5:5.
Omafinamhango aJehova otaa kalelele noku shii okulineekelwa
15, 16. (a) Oshike sha kwatelwa moilonga yomake aKalunga? (b) Kalunga okwa li a pa Israel shonale oipango ilipi?
15 ‘Oilonga yomake aye, oyo oudiinini nouyuki, omapangelo aye aeshe e shii kulineekelwa, ihaa hekuka nande, taa kalelele po fiyo alushe, taa wanifwa noudiinini nouyuki.’ (Eps. 111:7, 8) Oipelende yomamyanya ivali oko kwa li kwa shangwa eemhango omulongo da fimana odo da li da pewa Ovaisrael, oi li imwe ‘yomoilonga yomake [aJehova].’ (Ex. 31:18) Eemhango odo nosho yo dikwao adishe odo da ka ninga oshitukulwa shehangano lOmhango yaMoses, oda kanghamena komafinamhango taa kalelele noku shii okulineekelwa.
16 Pashihopaenenwa, imwe yomeemhango odo da shangwa koipelende oyo otai ti: “Aame Omwene Kalunga koye, Aame Kalunga komuladi.” Oshipango osho osha twikila ko tashi ti: “Ame ohandi file onghenda omayovi, ava ve hole nge nde tava diinine oipango yange.” Oipelende oyo yomamanya oya li yo i na omafinamhango ihaa lunduluka ngaashi, “fimaneka xo nanyoko,” “ino vaka” nosho yo omhango oyo tai tu pe eudeko lomoule li na sha nokuhatwila olwisho oinima yavamwe. — Ex. 20:5, 6, 12, 15, 17.
Jehova Omuyapuki noku li Omuxupifi wetu
17. Ovaisrael ova li ve na okufimaneka edina laJehova omolwomatomheno elipi?
17 ‘Oshiwana shaye okwe shi tumina ekulilo, nehangano laye navo okwe li dika li kalelele; edina laye oliyapuki nola tilika.’ (Eps. 111:9) Omupsalme oo otashi dulika natango a li ta diladila shi na sha nokukala kwaJehova omudiinini kehangono olo a li a ninga naAbraham. Omolwetomheno olo, Jehova ka li a efa oshiwana shaye eshi sha li moupika muEgipti nosho yo eshi sha li sha twalwa moupongekwa kuBabilon, ndele meenghalo adishe odo okwa li a xupifa oshiwana shaye. Nonande ngeno Jehova okwa li ashike e va xupifa peemhito odo dopavali, Ovaisrael kava li ve na okushekifa edina laye liyapuki. — Lesha Exodus 20:7; Ovaroma 2:23, 24.
18. Omolwashike u udite shi li oufembanghenda okuhumbata edina laKalunga?
18 Ovakriste vashili vokunena ovo va mangululwa okudja moupika woulunde nefyo, navo ove na okufimaneka edina laJehova. Otu na okuninga ngaashi hatu dulu opo tu kale metwokumwe neindilo lotete loshihopaenenwa sheilikano laJesus olo tali ti: “Edina loye nali yapulwe.” (Mat. 6:9) Okukala hatu dilonga kombinga yedina olo likumwifi otaku ke tu ningifa tu kale tu na etilokalunga. Omushangi wEpsalme 111 okwa li e na etaleko la yuka li na sha netilokalunga, eshi a ti: ‘Okutila Omwene oko efina lounongondunge. Aveshe ava tava kala mulo [tava diinine oipango yaye], otava nongopalelele.’ — Eps. 111:10.
19. Ohatu ka kundafana shike moshitukulwa tashi landula?
19 Okukala tu na etilokalunga la yuka otaku ke tu kwafela tu tonde owii. Otashi ke tu kwafela yo tu hopaenene omaukwatya aKalunga makumwifi, ngaashi oo a tumbulwa mEpsalme 112, olo hatu ka kundafana moshitukulwa tashi landula. Espalme olo otali ka ulika kutya otu na okuninga po shike opo tu dule okukala mokati kovanhu omamiliyona ovo tava ka twikila okutanga Kalunga fiyo alushe. Jehova okwa wana okutangwa filufilu! ‘Efimano laye otali kala fiyo alushe.’ — Eps. 111:10.
Omapulo okudilonga
• Omolwashike Jehova a wana okutangwa kovanhu aveshe?
• Omaukwatya aJehova elipi a hololwa koilonga yaye?
• Ou udite ngahelipi shi na sha noufembanghenda wokuhumbata edina laKalunga?
[Efano pepandja 20]
Etomheno la fimana molwaashi hatu ongala pamwe pandjikilile, olo okutanga Jehova
[Efano pepandja 23]
Eemhango daJehova adishe oda kanghamena komafinamhango taa kalelele noku shii okulineekelwa