Aantu aashona otaya ka pangela, ihe oyendji otaya ka mona uuwanawa
OKUZA pethimbo lyaayapostoli, Kalunga okwa kala nokuhogolola maantu omwaalu gwa ngambekwa gwAakriste aadhiginini moku ya pa uukwashigwana womegulu. Shika oshe eta elunduluko enene monkalamwenyo yaantu mboka, nomolwaashoka Oohapu dhaKalunga otadhi li popi li li evalululo. Elalakano lyevalululo ndyoka olyo okulongekidha aapiya mboka yaKalunga ya valululwa ya ka ninge aapangeli megulu. (2 Timoteus 2:12) Opo ya vule okuninga aapangeli, ohaya yumudhilwa omwenyo gwomegulu. (Aaroma 6:3-5) Megulu, ‘otaa ka pangela ombanda yevi’ pamwe naKristus.—Ehololo 5:10, NW; 11:15.
Ihe Oohapu dhaKalunga otadhi ti wo kutya yamwe mboka inaaya valululwa nayo otaya ka mona ehupitho lyaaluhe. MOmbiimbeli (mOmanyolo gOshihebeli nosho wo mOmanyolo gopaKriste gOshigreka) otamu popiwa kutya Kalunga oku na elalakano okuhupitha oongundu mbali dhaantu, sha hala okutya, okangundu okashona kaapangeli mboka taya ka kala megulu nongundu onene yaapangelwa mboka taya ka kala kombanda yevi. Pashiholelwa, tala sho omuyapostoli Johannes a li a nyolele ooitaali ooyakwawo mboka ya valululwa. Okwa popi shi na ko nasha naJesus a ti: “Kristus ye mwene oye eyambo lyokudhima po oondjo dhetu [okangundu okashona], lyo kali shi ashike lyoondjo dhetu, ihe nolyaandhoka wo dhaantu ayehe [ongundu onene].”—1 Johannes 2:2.
Sha faathana, omuyapostoli Paulus okwa nyola a ti: “Kehe shoka shomeshito [ongundu onene] otashi tegelele nondjuulukwe onene eholoko lyaana yaKalunga [okangundu okashona].” (Aaroma 8:19-21) Oohapu ndhika dhomuyapostoli Johannes naPaulus otadhi ti ngiini? Otadhi ti kutya mboka ya valululwa otaya ka pangela mepangelo lyomegulu. Onelalakano lyashike taya ka pangela? Okweetela uuwanawa aantu omamiliyona ogendji noonkondo mboka taya ka kala kombanda yevi ye li aapangelwa yepangelo lyaKalunga. Molwaashoka Jesus okwa li a longo aalongwa ye ya galikane taya ti: ‘[Uukwaniilwa woye nawu ye, KB], ehalo lyoye nali gwanithwe kombanda yevi wo ngaashi megulu.’—Mateus 6:10.
Oshili oyo tuu ndjoka kombinga yehupitho lyoongundu mbali otayi popiwa wo mOmanyolo gOshihebeli. Pashiholelwa, tala shoka Jehova a li a lombwele hekulululwa yaJesus Abraham a ti: “Omungoye nomoluvalo lwoye [okangundu okashona] aantu yomiigwana ayihe [ongundu onene] otaa ka lalekwa nuuyamba.” (Genesis 22:18) Eeno, iigwana ayihe otayi ka mona ompito yokulalekwa nuuyamba okupitila ‘moluvalo’ lwaAbraham.
‘Oluvalo’ ndoka olye? OJesus Kristus, pamwe naamboka ya valululwa noya mona uukwashigwana womegulu. Omuyapostoli Paulus ote shi yelitha ta ti: “One ngele yaKristus, nena one oluvalo lwaAbraham naathigululi pauvaneko.” (Aagalati 3:16, 29, OB-1954) Omalaleko nuuyamba geni taga vulu okumonika kiigwana ayihe okupitila ‘moluvalo’ ndoka? Uuthembahenda wokuhokiwa kuKalunga nowokunyanyukilwa omwenyo gwaaluhe moparadisa kombanda yevi. Omupisalomi David okwa li a hunganeke a ti: “Aayuuki otaa ka thigulula evi e taa kala mo sigo aluhe.”—Episalomi 37:29; Jesaja 45:18; Ehololo 21:1-5.
Dhoshili, aantu yamwe owala taya ka pangela megulu, ihe aantu oyendji otaya ka mona uuwanawa wepangelo ndyoka wokukala nomwenyo sigo aluhe kombanda yevi nomalaleko nuuyamba galwe ogendji. Ngoye nuukwanegumbo woye otamu vulu okukala mokati kaamboka taya ka mona uuwanawa waaluhe mboka tawu ke etwa kUukwaniilwa waKalunga.
[Ethano pepandja 12]
Omamiliyona ogendji otaga ka lalekwa nuuyamba mokukala nomwenyo sigo aluhe kombanda yevi. Mbela nangoye oto ka kala mokati kago?