Igamena koombepo dhuuwinayi

JAMES okwa putukila kuushayi wokantuntu kaMalaita, kamwe komOontuntu dhaSolomon. Okwa li a longwa okusimaneka aakwampungu okuza kuunona we. Okwa ti: “Kandi wete nando shi li nawa okupula aakwampungu ye etele yalwe oshiponga, ihe onda li ndi wete kutya itashi vulika wu kale nonkalamwenyo yi na elago ngele iho longitha rarafono [omukalo ngoka hagu longithwa okupula ekwatho kaakwampungu] ye ya gamene kiiponga.”

Aakalimo mOontuntu dhaSolomon oye na eitaalo lya fa lyaantu oyendji muuyuni kombinga yaakwampungu kutya otaya vulu okukwathela omuntu nenge ye mu etele oshiponga. Odhoshili kutya aantu oyendji yomoontuntu ndhoka ihaya tila aakwampungu, ihe oye ya hole.

Opu na omikalo odhindji ndhoka hadhi holola kutya omuntu okwi itaala miilonga yaakwampungu. Pashiholelwa, sho James a li okanona, aakulukadhi momukunda gwawo oya li haya patele aanona yawo moondunda uuna yu uvu okadhila hoka hayi ithana korokoro taka lili. Omolwashike mbela? Oyi itaala kutya okadhila hoka ngele taka lili otashi ti kutya gumwe oku li pokumona oshiponga.

Aakalimo yamwe momukunda ngoka ohaya tula emanya etokele pombanda yiiyelo yomagumbo gawo. James naye osho a li ha ningi nokwa li i itaala kutya emanya otali vulu oku mu gamena kee etelwe oshiponga koombepo dhuuwinayi. Ngele a li omwiha kiilonga, okwa li ha gongele uundjagumuke auhe wiikulya mbyoka ta li noku wu tula mondjato opo e ke wu ekelehi konima yethimbo. Okwa li ha kala a tila kutya ngele uundjagumuke mboka owa monika kompulile, otayi ke wu longitha opo yi mu thinge ye a kale te ehama.

Nonando otashi vulika iinima mbyoka ihayi ningwa poshitopolwa sheni, ngaashi James otashi vulika wu kale wu wete wa pumbwa okulandula omithigululwakalo opo wu gamenwe koombepo dhuuwinayi. Otashi vulika wi itaala kutya okulandula omikalo ndhoka osha pumbiwa opo wu kale wa gamenwa kiiponga.

Ngele owa simaneka Ombiimbeli, nopwaahe na omalimbililo oto ka kala wa hala okutseya shoka tayi ti mokuyamukula omapulo taga landula: (1) Ongiini oombepo dhuuwinayi tadhi vulu oku ku etela oshiponga? (2) Mbela oto vulu okunwethwa mo koompwidhuli ngele oho landula omithigululwakalo dhontumba? (3) Ongiini to vulu okugamenwa lela koombepo dhuuwinayi nokukala wa nyanyukwa?

Nkene oombepo dhuuwinayi hadhi ehameke yalwe

Ombiimbeli otayi ulike kutya oombepo dhuuwinayi itaashi vulika dhi kale aakwampungu. Oohapu dhaKalunga otadhi ti: “Aanamwenyo otaa tseya kutya oye na okusa, ihe aasi itaa tseya sha nando.” (Omuuvithi 9:5) Oshoshili kutya oombepo dhuuwinayi odho aayengeli aanashipotha mboka ya gama kombinga yaSatana mboka haya kambadhala okupukitha aantu.—Ehololo 12:9.

Omanyolo otaga popi sha yela kutya otwa pumbwa okugamenwa twaaha pukithwe koombepo dhuuwinayi. Omuyapostoli Paulus okwa nyolele Aakriste muEfeso a ti: “Itatu kondjitha aantu, ihe otatu kondjitha . . . oonkondo dhuuwinayi mewangandjo.” Omuyapostoli Petrus okwa hokolola omupangeli gwoombepo adhihe dhuuwinayi Satana Ondiaboli e li a fa ‘onime tayi ndunduma, ta kongo omuntu gwontumba, e mu ketsule po.’—Aaefeso 6:12; 1 Petrus 5:8.

Satana ohe etele aantu oshiponga moku ya pukitha. Ohe shi ningi moku ya hongolola ya longe iinima mbyoka tayi yematitha Kalunga. Ombiimbeli otayi ti kutya Satana “ohi ishitukitha, a kale a fa omuyengeli guuyelele.” (2 Aakorinto 11:14) Ohi iningi a fa oshishitwa shopambepo shoka tashi gamene aantu, nonando elalakano lye ewinayi. Satana okwa tsikitha omadhiladhilo gaantu kaaya tseye oshili kombinga ye nokombinga yaKalunga. (2 Aakorinto 4:4) Elalakano lye lyokupukitha aantu olyashike?

Satana okwa hala aantu ye mu galikane, kutya nduno oye shi shi nenge kaaye shi shi. Sho Jesus, Omwana gwaKalunga, a li kombanda yevi, Satana okwa li a hala Jesus e mu ‘tsile oongolo e te mu galikana.’ Jesus okwa ti: “Za po, Satana, oshoka okwa nyolwa: ‘Omuwa Kalunga koye oye awike u na oku mu longela.’” (Mateus 4:9, 10) Jesus okwa tindi okuninga oshinima kehe shoka tashi ulike kutya ota longele Satana.

Jehova omunankondo e vule iishitwa ayihe yopambepo noite ke etha mboka haya vulika kuye ya kale nokweehamekwa sigo aluhe. (Ehololo 4:11; Aaroma 16:20) Ihe ngele otwa hala okunyanyudha Jehova Kalunga ngaashi Jesus a ninga, katu na okutsila oongolo Satana nenge oompwidhuli dhe. Opo tu vule okuninga ngaaka, otwa pumbwa okudhimbulula omithigululwakalo ndhoka tadhi simanekitha oombepo dhuuwinayi. Ongiini to vulu oku shi ninga?

Dhimbulula omikalondjigilile ndhoka tadhi yemateke Kalunga

Jehova Kalunga okwa li a londodha oshigwana she shaIsraeli, kaashi holele omikalo dhiilongo yopuushinda. Okwa ti: “Ino pitika aantu yoye ya nonome nenge ya anekele, ya kale nuumpule nenge ya lye omayuku.” Kombinga yaamboka haya landula omikalo ndhoka, Ombiimbeli otayi ti: “OMUWA Kalunga koye oha tondo aantu mboka haa ningi iinima mbika iinyanyalithi.”—Deuteronomium 18:10-12.

Onkee ano, oshi li nawa okwiipula omapulo taga landula kombinga yomikalondjigilile ndhoka hadhi landulwa aluhe moshitopolwa sheni: Mbela omukalondjigilile otagu yambidhidha eitaalo lyokwaanekela? Mbela otagu yambidhidha edhiladhilo kutya iinima mbyoka kaayi na omwenyo otayi vulu oku tu gamena? Mbela ogwa kwatela mo egameno opo waaha thingwe? Mbela ogwa kwatela mo okuvulika kiishitwa yilwe yopambepo, pehala lyokuvulika kuJehova nomukalelipo gwe, Jesus?—Aaroma 14:11; Aafilippi 2:9, 10.

Osha simanenena wu ekelehi omikalondjigilile ndhoka tadhi humitha komeho iilonga mbyoka. Omolwashike mbela? Omuyapostoli Paulus okwa nwethwa mo a nyole ta ti: “Itashi vulika, mu nwe moshitenga shOmuwa e tamu ka nwa ishewe moshitenga shoompwidhuli.” Okwa londodha kutya mboka taya kambadhala okulongela Kalunga nosho wo oompwidhuli otaya ‘geyitha Omuwa.’ (1 Aakorinto 10:20-22) Jehova Kalunga ota pula tu mu igandjele oye awike.—Eksodus 20:4, 5.

Tala ishewe epulo ndika: Mbela omukalondjigilile ngoka otagu yambidhidha edhiladhilo kutya omuntu haye mwene e na okwiihokolola omolwiilonga ye? Pashiholelwa, oluhondelo niipala ihayi popilwa miitopolwa oyindji notayi pangulwa wo kOmbiimbeli. (1 Aakorinto 6:9, 10) Ihe momaputuko gamwe otashi vulika iinima mbyoka ya taambiwa ko uuna omukadhona ta ti kutya okwa yi momilalo omolwiiketi mbyoka a pewa.a

Ihe Ombiimbeli otayi longo kutya otu na okwiihokolola omolwiilonga yetu. (Aaroma 14:12; Aagalati 6:7) Pashiholelwa, omukiintu gwotango, Eva, okwa li u uvite kutya okwa pukithwa kuSatana opo kaaha vulike kuKalunga sho a ti: “Eyoka lya kotokele ndje nonda li.” Ihe momeho gaJehova, Eva oye a li e na okwiihokolola omolwiilonga ye. (Genesis 3:13, 16, 19) Sha faathana, natse otu na okwiihokolola omolweihumbato lyetu.—Aahebeli 4:13.

Oshike mbela wu na okuninga?

Ngele owa hala okunyanyudha Kalunga nokukala pamithikampango dhOmbiimbeli owa pumbwa okuninga ngaashi to vulu opo wu igamene kuSatana noompwidhuli dhe. Aakalimo yamwe muEfeso methelemumvo lyotango mboka ye na omitima dhu uka oya tula po oshiholelwa oshiwanawa moshinima shika. Opo yi iyoolole ko kenwethomo lyoombepo dhuuwinayi, oya li ya gongele omambo gawo agehe ngoka ya li ye na taga popi kombinga yuumpulile, e “taye ga fike po montaneho yaantu ayehe.”—Iilonga 19:19.

Omanga inaaya fika po omambo gawo, aantu mboka “oye ya e taa hempulula nokuhokolola montaneho yaayehe iinima mbyoka ye yi ninga.” (Iilonga 19:18) Molwaashoka oya li ya gumwa komitima kelongo lyaPaulus kombinga yaKristus, osha li she yi inyengithwa ya hanagule po omambo gawo guumpulile. Oya li wo ya lundulula omaiyuvo gawo shi na ko nasha nomithigululwakalo.

Dhoshili, kashi li oshipu okweekelahi omithigululwakalo. James ngoka a tumbulwa metetekelo okwa li a taalela eshongo ndyoka. Okwa tameke okukonakona Ombiimbeli nOonzapo dhaJehova nokwa li a nyanyukilwa shoka i ilonga. Ihe nando ongaaka, okwa tsikile okulongitha rarafono. Mokukonakona nkene u uvite shi na ko nasha nomithigululwakalo ndhoka, okwa mono kutya nonando okwi itaala momauvaneko gaJehova kombinga yonakuyiwa, okwa li e wete natango a pumbwa okwiigameka komikalo ndhoka opo a gamenwe kiiponga.

Oshike sha kwathele James a lundulule etaloko lye? Okwa ti: “Onda galikana Jehova a gamene ndje nokukwathela ndje ndi kale nde mu inekela. Natango, onde etha po omithigululwakalo ndhoka nda li nda landula.” Mbela okwa li a adhika koshiponga shasha? James okwa ti: “Aawe. Shoka osha ningitha ndje owala ndi ilonge okutula einekelo lyandje muJehova. Onde shi mona lela nkene Jehova ta vulu okukala e li kuume koye.” Oomvula heyali dha pita po sigo ongashingeyi James ota longo e li omukalele miilonga yethimbo lyu udha ta kwathele yamwe yi ilonge shoka Ombiimbeli tayi ti.

Omolwashike itoo landula oshiholelwa shaJames? Konakona omikalo ndhoka hadhi landulwa moshitopolwa sheni nokudhiladhila ‘pandunge’ wu tale ngele odhi li metsokumwe ‘nehalo lyaKalunga.’ (Aaroma 12:1, 2, OB-1954) Kala wu na omukumo gwokwiiyoolola ko komikalo ndhoka dha nika iidhila. Ngele to shi ningi, oto vulu okukala neinekelo kutya Jehova ote ke ku “taamba” noku ku gamena. (2 Aakorinto 6:16-18) Ngaashi James, oto ka mona uushili weuvaneko lyOmbiimbeli tali ti: “Edhina lyOMUWA olyo oshungo ya kola; omuyuuki ota matukile mo e ta gamenwa.”—Omayeletumbulo 18:10.

[Enyolo lyopevi]

[Ethano pepandja 30]

“Korokoro”

[Edhina lyomuthaneki]

Courtesy of Dr. Bakshi Jehangir

[Ethano pepandja 30]

Omukadhona ta gongele uundjagumuke wiikulya opo kawu longithwe kugumwe e mu thinge