‘Ikalekeni mohole yaKalunga’
‘Ikalekeni mohole yaKalunga mokutegelela kweni, Omuwa gwetu Jesus Kristus pasilohenda lye e mú pe omwenyo gwaaluhe.’—JUD. 21.
1, 2. Jehova okwe tu ulukila ngiini ohole ye, notu shi shi ngiini kutya ita ka kala owala e tu hole ngeya?
JEHOVA KALUNGA okwe tu ulukila ohole ye momikalo odhindji. Nopwaahe na omalimbililo, okwe tu ulukila ohole onenenene sho a ningi elongekidho lyekuliloyambo. Ohole ye onene yokuhola aantu oye mu ningitha a tume Omwana omuholike kombanda yevi, a se omolwetu. (Joh. 3:16) Jehova okwe shi ningi molwaashoka okwa hala tu kale nomwenyo sigo aluhe nokwa hala wo tu mone uuwanawa mohole ye sigo aluhe.
2 Mbela Jehova ota ka kala ngaa e tu hole owala, ngele ohatu ningi shoka twa hala? Hasho, muJudas ovelise 21 otatu ladhipikwa taku ti: ‘Ikalekeni mohole yaKalunga mokutegelela kweni, Omuwa gwetu Jesus Kristus pasilohenda lye e mú pe omwenyo gwaaluhe.’ Uutumbulilo ‘Ikalekeni mohole yaKalunga’ otawu ulike kutya otwa pumbwa okuninga po sha. Ihe oshike tu na okuninga opo tu ikaleke mohole yaKalunga?
Ongiini tatu vulu okukala mohole yaKalunga?
3. Jesus okwa popi oshinima shini sha simanenena shoka she mu kaleke mohole yaHe?
3 Eyamukulo kepulo ndyoka otatu li adha moohapu dhaJesus ndhoka a popi uusiku wahugunina sho a li kombanda yevi. Okwa ti: “Ngele otamu vulika komalombwelo gandje, otamu kala mohole yandje naanaa, ngashika ngame he vulika komalombwelo gaTate nonda kala mohole ye.” (Joh. 15:10) Ngaashi ovelise tayi popi, Jesus okwa li e shi kutya okuvulika kiipango yaJehova osha simanenena opo a kale e na ekwatathano ewanawa naHe. Ngele Omwana ngoka a gwanenena okwa li e na okuvulika, mbela natse katu na okuvulika kuHe?
4, 5. (a) Ongiini tatu vulu okuulika shili kutya otu hole Jehova? (b) Omolwashike katu na etompelo lya sha tu tinde okuvulika kiipango yaJehova?
4 Ohatu ulike kutya otu hole Jehova shili mokuvulika kuye. Omuyapostoli Johannes okwa ti ngeyi: “Ohole yokuhola Kalunga oyo okuvulika kiipango ye. Iipango ye kayi shi iidhigu kutse.” (1 Joh. 5:3) Aantu oyendji kunena muuyuni kaye hole okuvulika. Ndhindhilika uutumbulilo mboka tawu ti: “Iipango ye kayi shi iidhigu.” Jehova ihe tu pula tu ninge sha shoka oshidhigu kutse.
5 Oku shi thaneka: Mbela oto ka humbatitha kuume koye sha shoka wu shi kutya ite shi vulu? Hasho nando! Jehova omunahole e tu vule kokulekule noku shi omangambeko getu. Ombiimbeli otayi tu shilipaleke kutya ye “oku shi shi kutya otse ontsi yevi.” (Eps. 103:14) Ita ka pula nando tu longe sha shoka itatu vulu. Onkee ano, katu na etompelo tu tinde okuvulika kiipango yaJehova. Pehala lyaashono, otu shi kutya okuvulika kuye, oshi li ompito okuulika kutya otu hole shili Tate yomegulu notwa hala okukala mohole ye.
Omagano gi ikalekelwa ngoka Jehova e tu pa
6, 7. (a) Eiyuvo oshike? (b) Gandja eudhi nkene eiyuvo hali tu kwathele tu kale mohole yaKalunga.
6 Molwaashoka otu li muuyuni mbuka wa yonana, otu na okuninga omatokolo ngoka ga kwatela mo evuliko lyetu kuKalunga. Ongiini tatu ka shilipaleka kutya omatokolo getu oge li metsokumwe nehalo lyaKalunga? Jehova okwe tu pa omagano ngoka taga vulu oku tu kwatha unene moshinima shokuvulika. Omagano ngoka ogo eiyuvo. Eiyuvo oshike? Uukwatya wi ikalekelwa wokwiitseya mwene. Eiyuvo ohali vulu oku tu popila nenge oku tu pangula, nohali tu wilike tu ninge omatokolo monkalamwenyo yetu nenge twi ikonakone tse yene tu tale ngele iilonga yetu iiwanawa nenge iiwinayi.—Lesha Aaroma 2:14, 15.
7 Omomikalo dhini eiyuvo lyetu tali vulu oku tu kwathela? Tala keudhi tali landula. Omulumentu gumwe okwa li a kotha a pwila mo uusiku mondunda ye. Ohaluka ombwa ye oyu uvu omainyengo e tayi tameke okugwedha. Omufuthi okwa fadhuka po. Ando ombwa ye kaya li ya tonata nokaya gwedhele, andola iinima ye oya yakwa po nenge ando e ehamekwa nenge a dhipagwe nokuli. Sha faathana, ngele eiyuvo lyomuntu ihali mu pe uusama, nena ite ki ihumbata momukalo gu uka noita ka ninga omatokolo gopandunge monkalamwenyo.
8, 9. (a) Otu na okukaleka momadhiladhilo omangambeko geni geiyuvo lyetu? (b) Oshike tu na okuninga opo eiyuvo lyetu li tu kwathele lela?
8 Ngaashi ombwa, eiyuvo nalyo oli na omangambeko. Ngele ombwa ihayi gwedha, kayi na ekwatho lyasha. Sha faathana, ngele otwa nwethwa mo unene komahalo gokwiihola goomwenyo dhetu, nena eiyuvo lyetu otali vulu oku tu pukitha. Ombiimbeli otayi tu londodha kutya “omwenyo ogwo omunamakoto kombanda yiinima ayihe, nokagu shi kwaaludhwa.” (Jer. 17:9; Omayel. 4:23) Osha nika oshiponga ngele mwene gwombwa ohi ipwililike okugwedha kwayo. Sha faathana, natse ngele inatu inekela mOohapu dhaKalunga ndhoka ihaadhi lunduluka, Ombiimbeli, eiyuvo lyetu itali ke tu kwatha nando. (Eps. 119:105) Mupya munene, aantu oyendji muuyuni oye hole unene okugandja eitulomo komahalo gomitima dhawo, ihe kaye na ko nasha naanaa nomithikampango ndhoka dhi li mOohapu dhaKalunga. (Lesha Aaefeso 4:17-19.) Shika osho molwaashoka aantu oyendji haya longo iilonga iitilithi, nonando oye na eiyuvo.—1 Tim. 4:2.
9 Katu na nando okukala twe ya fa. Pehala lyaashono, natu tsikile okweetha Oohapu dhaKalunga dhi tu zule nodhi dheule eiyuvo lyetu opo li vule oku tu londodha. Otwa pumbwa okukala hatu pulakene keiyuvo lyetu ndyoka lya dheulwa kOmbiimbeli, pehala lyokweetha tu pangelwe komahalo getu yene. Otu na wo okukala hatu simaneke eiyuvo lyaamwatate naamwameme aaholike. Otu na okukambadhala opo twaahe ya pundukithe nokutseya kutya eiyuvo lyawo otashi vulika li ya pitike ya ninge nenge yaaha ninge oshinima shontumba.—1 Kor. 8:12; 2 Kor. 4:2; 1 Pet. 3:16.
10. Iinima itatu yini tatu ka kundathana ngashingeyi?
10 Natu kundathaneni iinima iitatu monkalamwenyo yetu mbyoka tayi ulike kutya otu hole Jehova okupitila mokuvulika kuye. Mukehe shimwe shomuyo, eiyuvo lyetu oli na mo ombinga, ihe opo li tu londodhe olya pumbwa tango okuwilikwa komakotampango ga nwethwa mo ngoka ge li mOmbiimbeli. Omikalo ndatu nkene tatu vulu okuulika kutya otu hole Jehova nohatu vulika kuye odho: (1) Okukala tu hole mboka Jehova e hole, (2) okuvulika nesimaneko kwaamboka ye na oonkondopangelo, (3) nokukambadhala okukala twa yogoka momeho gaKalunga.
Kala wu hole mboka Jehova e hole
11. Omolwashike tu na okukala tu hole mboka Jehova e hole?
11 Shotango, otu na okukala tu hole mboka Jehova e hole. Shi na ko nasha nookuume, aantu otaya vulu okufaathanithwa nomafulafula. Otu na egamo okutaamba ko omukalo kehe ngoka gu li momudhingoloko gwetu. Omushiti gwetu okwa tseya nawa kutya okweendathana naantu inaaya gwanenena okwa nika oshiponga noitaku kwatha sha. Onkee ano, okwe tu pa omayele gopandunge a ti: “Enda pamwe naanawino, u likole owino, ihe ngoka ta kala paagoya, ota likola uuwinayi.” (Omayel. 13:20; 1 Kor. 15:33) Kapu na gumwe gwomutse a hala ‘okulikola uuwinayi.’ Kehe gumwe gwomutse okwa hala ‘okulikola owino.’ Kapu na nando gumwe ta vulu okugwedhela po Jehova oondunge nokapu na ngoka ta vulu oku mu pukitha. Okwe tu tulila po oshiholelwa oshiwanawa shi na ko nasha nokuhogolola ookuume. Aantu inaaya gwanenena ya tya ngiini Jehova ha panga uukuume nayo?
12. Jehova oha panga uukuume naantu ya tya ngiini?
12 Jehova okwa li i ithana tatekulululwa Abraham ‘kuume ke.’ (Jes. 41:8) Abraham okwa li omudhiginini, omuyuuki nomuvuliki kaaku na we, nokwa li i itaala shili muKalunga. (Jak. 2:21-23) Jehova oha panga uukuume naantu ya tya ngaaka, nokunena osho ha ningi. Ngele Jehova oha hogolola ookuume ya tya ngaaka, mbela natse katu na okuninga sha faathana, tu ende pamwe naanawino nokulikola owino?
13. Oshike tashi ke ku kwathela wu ninge ehogololo li li nawa, uuna to panga uukuume?
13 Oshike tashi ke ku kwathela wu hogolole ookuume ye li nawa? Okutala kiiholelwa yomOmbiimbeli, ngaashi uukuume mboka wa li pokati kaRut nayinamweno Naemi, pokati kaDavid naJonatan nopokati kaTimoteus naPaulus. (Rut 1:16, 17; 1 Sam. 23:16-18; Fil. 2:19-22) Aantu mboka oya li ookuume kopothingo omolwetompelo limwe lya simanenena: Ayehe oya li ye hole Jehova shili. Openi to vulu okwaadha ookuume mboka ye hole unene Jehova ngaashi ngoye? Kala wu shi kutya megongalo lyopaKriste omu udha ookuume ya tya ngaaka. Ookuume mboka itaye ke ku ladhipika wu ninge sha shoka tashi yemateke Jehova. Pehala lyaashoka, otaye ke ku kwathela wu kale ho vulika kuJehova, wu hedhe popepi naye nowu kale wu na etaloko lyopambepo. (Lesha Aagalati 6:7, 8.) Otaye ke ku kwatha wu ikaleke mohole yaKalunga.
Vulika kwaamboka ye na oonkondopangelo
14. Iinima yini hayi tu ningitha olundji twaaha simaneke mboka ye na oonkondopangelo?
14 Omukalo omutiyali ngoka tatu vulu okuulika kutya otu hole Jehova ogwo okuvulika kwaamboka ye na oonkondopangelo. Otu na oku ya simaneka. Omolwashike omathimbo gamwe hashi kala oshidhigu oku ya simaneka? Etompelo limwe, aantu mboka ye na oonkondopangelo inaaya gwanenena. Limwe natango, tse inatu gwanenena. Otwa valwa negamo lyokutukulutha uunashipotha.
15, 16. (a) Omolwashike sha simana kutse tu simaneke mboka Jehova i inekelela oshinakugwanithwa shokusila oshimpwiyu oshigwana she? (b) Otatu ilongo mo shike momukalo ngoka Jehova a li a tala ko Aaisraeli sho ya tsile Moses ondumbo?
15 Otashi vulika wi ipule: ‘Omolwashike tu na okusimaneka mboka ye na oonkondopangelo ngele nani oshidhigu?’ Eyamukulo olya kwatela mo ompata yuunamapangelo. Olye to ka hogolola a ninge omupangeli gwoye? Ngele otwa hogolola Jehova, otu na okuvulika koonkondopangelo dhe. Ngele hasho, ongiini tatu vulu oku mu ithana Omupangeli gwetu? Natango, Jehova oha longitha aantu inaaya gwanenena mboka ha pe oshinakugwanithwa ya sile oshimpwiyu oshigwana she. Ngele otatu tsu ondumbo naantu mboka, Jehova ote ke tu tala ko ngiini?—Lesha 1 Aatessalonika 5:12, 13.
16 Pashiholelwa, sho Aaisraeli ya li ya tamanana nokutsa ondumbo naMoses, Jehova okwa li e shi tala ko kutya oye mwene ya tsile ondumbo. (Num. 14:26, 27) Kalunga ina lunduluka. Uuna tatu tsile ondumbo mboka a pa oonkondopangelo, oye tatu tsile ondumbo.
17. Iikala yu uka yini tu na okukokeka ngele tashi ya kwaamboka ye na oonkondopangelo megongalo?
17 Omuyapostoli Paulus oku ulike iikala yu uka mbyoka tu na okukokeka ngele tashi ya kwaamboka ye na oonkondopangelo megongalo lyopaKriste. Okwa nyola a ti: “Vulikeni kaawiliki yeni, [ne] mu landule omalombwelo gawo. Oyo ohaa tonatele oomwenyo dheni ya na evululuko, oshoka otaa ke dhi pulwa kuKalunga. Ngele otamu vulika, nena otaa longo [iilonga] yawo nenyanyu, ihe ngele hasho, nena otaa longo neyeme, naashika itashi mú kwatha sha.” (Heb. 13:17) Otu na shili okulonga nuudhiginini tu kokeke iikala yokuvulika noyokulongela kumwe. Ihe dhimbulukwa kutya otwa hala okukala mohole yaKalunga. Mbela katu na okuninga oonkambadhala dha mana mo tu adhe elalakano ndyoka?
Kala wa yogoka momeho gaJehova
18. Omolwashike Jehova a hala tu kale twa yogoka?
18 Omukalo omutitatu ngoka tatu vulu okuulika kutya otu hole Jehova ogwo okukambadhala tu kale twa yogoka momeho ge. Olundji aavali ohaya si oshimpwiyu opo oyana ya kale ya yela. Omolwashike mbela? Shotango, opo oyana ya kale ye na uukolele noya yogoka. Oshikwawo, ngele okanona oka yogoka ohashi simanekitha egumbo moka ka za, noha shi ulike kutya aavali oye ka hole nohaye ka sile oshimpwiyu. Omolwomatompelo ga faathana, Jehova okwa hala tu kale twa yogoka. Oku shi kutya uuyogoki owa pumbiwa omolwonkalonawa yetu. Okwa tseya wo kutya uuyogoki wetu ohawu mu simanekitha e li Tate yetu gwomegulu. Oku shi ninga osha simanenena molwaashoka otashi vulu okuhila aantu ya kale ya hala okulongela Kalunga sho ye wete twa yooloka ko kuuyuni mbuka wa yonuka.
19. Otu shi shi ngiini kutya uuyogoki wopalutu owa simana?
19 Omomikalo dhini tu na okukala twa yogoka? Omomikalo adhihe. Jehova okwa li a lombwele Aaisraeli yonale kutya uuyogoki wopalutu owa simana lela. (Lev. 15:31) Ompango yaMoses oya popya kombinga yokweekelahi iiyagaya, okwoopaleka iikwatelwa nokuyoga iikaha, oompadhi nosho wo oonguwo. (Eks. 30:17-21; Lev. 11:32; Num. 19:17-20; Deut. 23:13, 14) Aaisraeli oya li haya dhimbulukithwa aluhe kutya Kalunga kawo, Jehova oye omuyapuki, sha hala kutya, okwa yela shekesheke. Aapiya yaKalunga omuyapuki nayo oye na okukala aayapuki.—Lesha Levitikus 11:44, 45.
20. Omomikalo dhini twa pumbwa okukala twa yogoka?
20 Onkee ano, otwa pumbwa okukala twa yogoka meni nokombanda. Ohatu kambadhala okukaleka omadhiladhilo getu ga yogoka. Ohatu dhiginine omakotampango gaJehova ge na ko nasha nuuyogoki, nonando uuyuni mbuka we tu dhingilila owa pilaala monyata yiipala. Shoka sha simanenena, osho okukaleka elongelokalunga lyetu lya yela mokuhenuka onyata kehe yomalongelokalunga giifundja. Ihatu dhimbwa oohapu dha nwethwa mo ndhoka dhi li muJesaja 52:11 tadhi ti: “Shi thigeni po! Inamu guma tuu shoka sha nyata! Iyoololeni mo musho ne mu iyapule.” Nokunena ohatu kaleke elongelokalunga lyetu lya yela mokwaaha kala nombinga ya sha miinima yomalongelokalunga giifundja. Pashiholelwa, shika osho molwashoka hatu henuka okukutha ombinga miituthi yomalongelokalunga nomasiku gomafudho ngoka ga simana muuyuni kunena. Oshi li eshongo lela oku kala twa yogoka, ihe aapiya yaJehova ohaye shi ningi molwaashoka otashi ya kwathele yi ikaleke mohole ye.
21. Ongiini tatu vulu okushilipaleka kutya otatu ikaleke mohole yaKalunga?
21 Jehova okwa hala twi ikaleke mohole ye sigo aluhe. Ihe atuhe otwa pumbwa okushilipaleka kutya otatu ningi ngaashi tatu vulu okwiikaleka mohole ye. Shika otatu vulu oku shi ninga mokulandula oshiholelwa shaJesus nokuulika kutya otu hole Jehova mokuvulika kiipango Ye. Oku shi ninga otatu ka kala nuushili kutya kapu na sha shoka “tashi vulu oku tu topola ko kohole yaKalunga yi li muJesus Kristus, Omuwa gwetu.”—Rom. 8:38, 39.
Oto dhimbulukwa?
• Eiyuvo lyetu otali vulu oku tu kwathela ngiini tu ikaleke mohole yaKalunga?
• Omolwashike tu na okukala tu hole mboka Jehova e hole?
• Omolwashike sha simanenena tu simaneke mboka ye na oonkondopangelo?
• Omolwashike oshigwana shaKalunga shi na okukala sha yogoka?
[Oshimpungu/Ethano pepandja 28]
Embo Ndyoka Tali Tu Kwathele Tu Ihumbate Nawa
Poshigongi shoshikandjo 2008/2009 opwa li pwa gandjwa embo lyomapandja 224 li na oshipalanyolo ‘Ikalekeni mohole yaKalunga.’ Elalakano lyembo ndika epe olyashike? Olya nuninwa okukwathela Aakriste ya tseye omithikampango dhaJehova noya kale ye dhi hole. Otali kundathana unene tuu eihumbato lyopaKriste. Oku li konakona nawa otashi ke tu kwathela tu mone kutya okukala metsokumwe nomithikampango dhaJehova monkalamwenyo yetu okwo dhingi ngashingeyi notaku fala komwenyo gwaaluhe monakuyiwa.
Kakele kaashono, embo ndika olya nyolwa li tu kwathele tu mone kutya okuvulika kuJehova kaku shi omutenge. Pehala lyaashono, oku li owala omukalo oku mu ulukila nkene tu mu hole. Onkee ano, embo ndyoka otali tu inyengitha tu ipule: ‘Omolwashike ndi na okuvulika kuJehova?’
Olundji mboka haye etha po okulongela Jehova, ohaye shi ningi omolwomayono ga kwata miiti, ihe hamolwaashoka kaayu uvite ko elongo lyontumba. Onkee ano, osha simanenena tu koleke ohole yetu yokuhola iipango yaJehova nosho wo omakotampango ge ngoka hage tu wilike monkalamwenyo yetu yakehe siku. Otwi inekela kutya embo ndika otali ka kwathela oonzi dhaJehova dhi kale dha tokola toko okulonga shoka shu uka, okuulika kutya Satana omufundja nosho wo shoka sha simanenena, okwiikaleka mohole yaKalunga.—Jud. 21.