Uuyamba mboka hawu zi kuKalunga
MBELA ngele owu li omudhiginini kuKalunga, ote ke ku laleka nuuyamba nomaliko? Otashi vulika e ku laleke nuuyamba, ihe hanuuyamba mboka wa li wa hala. Dhiladhila owala kombinga yaMaria, yina yaJesus. Omuyengeli Gabriel okwa li a holokele Maria e te mu lombwele kutya ‘okwa silwa ohenda’ kuKalunga nosho wo kutya ota ka vala Omwana gwaKalunga. (Lukas 1:28, 30-32) Ihe nando ongaaka, ka li omuyamba. Sho Maria a li a gandja eyambo konima yokuvalwa kwaJesus, okwa li a gandja “omatendeguti gaali nenge uungutyona uyali” mboka wa li hawu gandjwa kaantu mboka ya hepa wu li omayambo kuJehova.—Lukas 2:24; Levitikus 12:8.
Mbela sho Maria a li a hepa, osha hala okutya, ka li a lalekwa nuuyamba kuKalunga? Mepingathano naashoka, sho a li a ka talela po Elisabet omukwanezimo gwe, “Elisabet oku udha Ombepo Ondjapuki nokwa popi mokule a ti: ‘Kala wa yambekwa mokati kaakiintu aakweni, nosho wo okanona hoka to ka vala, naka yambekwe.’” (Lukas 1:41, 42) Maria okwa li a pewa uuthembahenda wokuninga yina gwopantu gwOmwana gwaKalunga omuholike.
Jesus mwene ka li omuyamba. Ka li owala a valwa moluhepo nokukokela mulwo, ihe okwa kala ohepele okukalamwenyo kwe akuhe kwokombanda yevi. Esiku limwe okwa li a lombwele omulumentu gumwe ngoka a li a hala okuninga omulongwa gwe a ti: “Oombandje odhi na omakwena, noondhila odhi na iihandhila, ihe Omuna gwOmuntu ke na mpoka ta langeke omutse gwe.” (Lukas 9:57, 58) Nonando ongaaka, shoka Jesus Kristus a li a ningi sho e ya kombanda yevi, osha li she shi ningi tashi wapa opo aalongwa ye ya vule okuninga aayamba kaaku na we. Omuyapostoli Paulus okwa li a nyola a ti: “Okwi iningi ohepele omolweni, opo mu ninge aayamba omolwoluhepo lwe.” (2 Aakorinto 8:9) Uuyamba washike Jesus a li a pe aalongwa ye? Kunena otu na uuyamba washike?
Aalongwa oya li ya pewa uuyamba washike?
Olundji uuyamba wopamaliko ohawu imbi omuntu a kale e na eitaalo, molwaashoka omuyamba oha kala i inekela momaliko ge, pehala lyokwiinekela Kalunga. Jesus okwa ti: “Aayamba oye na uudhigu ngiini okuya mOshilongo shaKalunga!” (Markus 10:23) Osha yela kutya uuyamba mboka Jesus a li a pe aalanduli ye, kawa li uuyamba wopamaliko.
Dhoshili, oyendji yomAakriste yomethelemumvo lyotango oya li oohepele. Sho omulumentu ngoka a valwa oshilema a li i indile iimaliwa, Petrus okwa li e mu yamukula a ti: “Ngame kandi na nando iimaliwa, ihe shoka ndi shi na, otandi shi ku pe. Medhina lyaJesus Kristus Omunasareti otandi ku lombwele: thikama, ngu u ende!”—Iilonga 3:6.
Oohapu dhomulongwa Jakob odhu ulike wo kutya egongalo lyopaKriste olya li li na unene tuu oohepele. Okwa li a nyola ta ti: “Aamwameme aaholike pulakeneni! Kalunga okwa hogolola oohepele yomuuyuni mbuka, ya ninge aayamba yomeitaalo noya ka pewe Oshilongo shoka e shi uvanekela mboka ye mu hole.” (Jakob 2:5) Natango omuyapostoli Paulus okwa li a popi kutya hayendji ya li “aanongo” nenge “aanankondo” nenge “ya valekeka,” ya li ya ningi iilyo yegongalo lyopaKriste.—1 Aakorinto 1:26.
Ngele uuyamba mboka Jesus a li a pe aalongwa kawa li wopamaliko, mbela okwa li e ya pe uuyamba washike? Montumwafo ndjoka Jesus a li a tumine kegongalo lyaSmirna okwa ti: “Uudhigu woye ondi u shi; onda tseya oluhepo lwoye—ihe ngoye omuyamba.” (Ehololo 2:8, 9) Aakriste yokuSmirna nonando oya li oohepele, oya li ye na uuyamba wu vule oshisiliveri nenge oshingoli. Oya li aayamba omolweitaalo lyawo nuudhiginini wawo kuKalunga. Eitaalo olyo oshinima shi na ondilo molwaashoka ka li shi ‘lyaantu ayehe.’ (2 Aatessalonika 3:2) Mboka kaaye na eitaalo oyo oohepele momeho gaKalunga.—Ehololo 3:17, 18.
Uuyamba mboka hawu zi mokukala wu na eitaalo
Omomikalo dhini eitaalo lya simana? Mboka ye na eitaalo muKalunga ohaya mono uuwanawa ‘muuwanawa we kaawu shi kuyelekwa, eidhidhimiko nontalanteni ye.’ (Aaroma 2:4) Ohaya nyanyukilwa wo ‘edhiminopo lyoondjo dhawo’ molwaashoka oye na eitaalo mekuliloyambo lyaJesus. (Aaefeso 1:7) Natango oye na uunongo mboka “oohapu dhaKristus” hadhi etele mboka ye na eitaalo. (Aakolossa 3:16) Sho taya galikana kuKalunga meitaalo, “ombili yaKalunga, ndjoka yi vule uunongo auhe,” ohayi gamene omitima dhawo nomadhiladhilo gawo notashi ye etele egwaneno nenyanyu.—Aafilippi 4:7.
Kakele kuuwanawa auhe mboka, ayehe mboka ye na eitaalo muKalunga okupitila mOmwana, Jesus Kristus, oye na etegameno lyomwenyo gwaaluhe. Oohapu dhaJesus Kristus dha tseyika nawa otadhi ti: ‘Kalunga okwa kala e hole uuyuni, okwa gandja Omwana awike, opo shaa ngoka te mu itaale, kaa kane, ihe a kale e na omwenyo gwaaluhe.’ (Johannes 3:16) Etegameno li na ondilo ohali nkondopalekwa ngele omuntu a mono ontseyo yashili yokutseya He nOmwana, molwaashoka Jesus okwa ti wo: “Mboka ye ku tseya, Kalunga awike kashili, noya tseya wo Jesus Kristus, ngoka we mu tumu, oyo mboka ye na omwenyo gwaaluhe.”—Johannes 17:3.
Nonando omalaleko nuuyamba gaKalunga ogopambepo, opu na wo uuwanawa wopamaiyuvo nosho wo wopalutu. Tala oshiholelwa shaDalídio gwomuBrasilia. Manga inaa tseya oshili kombinga yelalakano lyaKalunga, okwa li ha longitha nayi iikolitha. Uupyakadhi we mbuka owa li hawu piyaganeke nayi ekwatathano lyuukwanegumbo we. Kakele kaashono, ka li ha longitha nawa iimaliwa ye. Opo nduno okwa tameke okukonakona Ombiimbeli nOonzapo dhaJehova nokwa li a lunduluka noonkondo.
Eitaalo ndyoka Dalídio a li opo a mono olya li lye mu kwathele opo a vule okweetha po omikalondjigilile dhe ndhoka dha nika oshiponga. Okwa li a ningi ehumokomeho lyopambepo neendelelo osho molwaashono a ti: “Onda li handi yi ondingosho nondingosho; ngashingeyi ohandi yi egumbo negumbo.” Okwa ningi omulongi gwOohapu dhaKalunga gwethimbo lyu udha. Elunduluko lya tya ngaaka inali hwepopaleka owala uukolele we, ihe olya hwepopaleke wo onkalo ye yopashimaliwa. Dalídio okwa ti: “Iimaliwa mbyoka nda li handi longitha mokunwa, ngashingeyi ohandi yi longitha mokukwathela yalwe mboka ye na ompumbwe nenge okulanda iinima mbyoka nda pumbwa.” Okwa li wo a mono ookuume yolela oyendji okupitila mokweendathana kwe naantu mboka ye na uupambepo wa fa we. Ngashingeyi Dalídio oku na ombili yopamadhiladhilo negwaneno ndyoka itaali vulu okuyelekwa nakehe shoka a li ha nyanyukilwa manga inaa tseya Kalunga.
Tala koshiholelwa shilwe shaRenato ngoka a ninga omuyamba monkalamwenyo ye sho i itaala muJehova Kalunga. Ngele to tala oshipala she sha nyanyukwa kunena, oshi li oshidhigu okwiitaala kutya okwa li ha ningwa nayi monkalamwenyo ye. Sho a li okahanona, okwa li e ekelwahi kuyina. Okwa li a thigwa mondjato kohi yoshipundi shombaanga, okwa li a mona iihuna noonkondo nokaankoga ke kaka li ka za po natango. Aakiintu yaali mboka ya li taye ende po oya li ya mono ondjato yi li kohi yoshipundi tayi inyenge. Tango oya li ye shi opu na ngoka a thigi okambishona mpoka. Sho ya mono kutya okahanona, oye ka fala mbalambala koshipangelo shopopepi opo kaka mone ekwatho lyopaunamiti.
Omukiintu gumwe gwomuyo okwa li Onzapo yaJehova, nokwa li a lombwele Rita ngoka naye Onzapo kombinga yokahanona. Rita okwa li ha vala aanona ya sa noku na owala okanona kamwe kokakadhona. Okwa li a halelela okanona kokamati, onkee ano, okwa tokola okukutha po Renato opo e mu tekule.
Rita okwa li a lombwele Renato manga a li omushuushuka kutya haye meme gwe gwoshili. Ihe okwa li e mu sile oshimpwiyu nohole nokwa li e mu longo nuudhiginini omithikampango dhOmbiimbeli. Sho e ende ta koko okwa tameke okukala e na ohokwe mOmbiimbeli. Olupandu lwe lwokupandula sho a hupithwa momukalo omukumithi nalwo olwa li lwa koko. Omeho ge ohaga kala gu udha omahodhi oshikando kehe ta lesha oohapu dhomupisalomi David ndhoka tadhi ti: “Tate nameme otaa vulu okweetha ndje, ihe OMUWA ota sile ndje oshimpwiyu.”—Episalomi 27:10.
Oku ulike olupandu lwaashihe shoka Jehova e mu ningila, Renato okwa li a ninginithwa mo 2002 nokwa li a yi miilonga yethimbo lyu udha omumvo gwa ka landula ko. Natango ke shi kutya He nayina oyo oolye notashi vulika nokuli kee na esiku ne ke ya mone. Ihe nonando ongawo, Renato oku uvite kutya gamwe gomomagano ge na ongushu onene ngoka a mona ogo okutseya Jehova nokukala e na eitaalo muye e li He omunahole.
Otashi vulika wa halelela okukala wu na ekwatathano lyopothingo nolyopahole naKalunga ndyoka tali vulu okuyambapaleka lela onkalamwenyo yoye. Ompito yokukala nekwatathano lya tya ngaaka naJehova Kalunga nosho wo Omwana, Jesus Kristus, oye egulukila aantu ayehe kashi na nduno mbudhi kutya omuyamba nenge ohepele. Ekwatathano lya tya ngaaka otashi vulika itaali ku etele uuyamba wopamaliko, ihe otali ku etele ombili yokomutima negwaneno, iinima mbyoka itaayi vulu okulandwa niimaliwa ayihe mbyoka yi li muuyuni. Oohapu ndhoka dhi li mOmayeletumbulo 10:22 otadhi popi oshili sho tadhi popi kutya “eyambeko lyOmuwa otali yambapaleke, nuupyakadhi wiilonga itau gwedhele ko sha.”
Jehova Kalunga okwa hokwa noonkondo aantu mboka taye ya kuye: “Ando to pulakene shili iipango yandje, andola omayambeko otage ku kungulukile ga fa omulonga tagu tondoka omeya, nuuyuuki otau tookele kungoye wa fa omakuthikuthi gomefuta.” (Jesaja 48:18) Oku uvaneka wo kutya mboka taye ya kuye neinyengotompelo lya yela nosho wo niikala yu uka otaya ka lalekwa nuuyamba sho a popi ta ti: “Ondjambi yeifupipiko netilo okutila OMUWA oyo uuyamba, esimano nomwenyo omule.”—Omayeletumbulo 22:4.
[Oohapu dha simana pepandja 5]
Nonando uukwanegumbo moka mwa putukila Jesus owa li wa hepa pamaliko, Kalunga okwa li e wu laleke nuuyamba
[Ethano pepandja 6]
Okukala wu na eitaalo muKalunga otashi ku etele ombili, egwaneno nosho wo enyanyu