Elongo lyopakalunga oli na ondilo li vule omalongo agehe
“Iinima ayihe yilwe oyo ekanitho lyowala, ngele tandi yi yeleke nokutseya Jesus Kristus, Omuwa gwandje, shoka osho oshinima shondilo shi vule ayihe.”—FIL. 3:8.
1, 2. Aakriste yamwe oya hogolola okuninga shike, nomolwashike?
ROBERT okwa kala ha ningi nawa mosikola okuza sho omushona. Sho a li e na owala oomvula hetatu, gumwe gwomaalongi ye okwa li e mu talele po kaandjawo nokwa li e mu lombwele kutya kapu na shoka tashi mu imbi a ninge kehe shoka a hala okuninga. Okwa li a popi kutya okwi inekela kutya esiku limwe ona ka ninge ondohotola yopaunamiti. Elongo ndyoka a mona mongundu yopombanda olye mu ninga a gwana okuya koyunivesiti kehe ya dhenga mbanda moshilongo shawo. Robert okwa tokola okwaaha taamba ko ompito ndjoka oyendji ya tala ko yi ikalekelwa nohayi monika owala lumwe monkalamwenyo opo a lalakanene okukala omukokolindjila gwondjigilile.
2 Ngaashi Robert, Aakriste aagundjuka naakokele oyendji oye na oompito dhokuninga ehumokomeho monkalelo ndjika yiinima. Yamwe oya hogolola okwaaha longitha oompito ndhoka, opo ya vule okulalakanena iinima yopambepo. (1 Kor. 7:29-31) Oshike hashi inyengitha Aakriste ya kale ye na ehalo okulonga nuudhiginini miilonga yokuuvitha ngaashi Robert e shi ningi? Kakele kohole yawo yokuhola Jehova ndjoka yi li etompelo lya simanenena, oya pandula wo elongo lyopakalunga ndyoka li na ondilo. Mbela owa dhiladhila ngaa nale kutya ando owa li inoo ilonga oshili, ando onkalamwenyo yoye oya fa peni? Okudhiladhila kombinga yomalaleko nuuyamba gamwe ga tongomana ngoka tu na, molwaashoka twa longwa kuJehova, otaku ke tu kwathela tu kale tu na olupandu okupandula onkundana ombwanawa nokukala aalaadhi moku yi lombwela yalwe.
Okulongwa kuKalunga oku li uuthembahenda
3. Omolwashike tatu vulu okukala nuushili kutya Jehova oku na ehalo okulonga aantu inaaya gwanenena?
3 Omolwuuwanawa we, Jehova oku na ehalo okulonga aantu inaaya gwanenena. Jesaja 54:13 ota popi pahunganeko kombinga yAakriste aagwayekwa ta ti: “Ongame mwene tandi ka longa aantu yandje, notandi ya pe elago nombili.” Ekotampango ndyoka otali longo wo ‘koonzi dhilwe’ dhaKristus. (Joh. 10:16) Shika oshi iwetikile mehunganeko ndyoka tali gwanithwa kunena. Jesaja okwa li a mono memoniko aantu ya za miigwana ayihe taya matukile kelongelokalunga lyashili. Okwa popi kutya oya li taya lombwelathana taya ti: “Natu londeni kondundu yOMUWA, tu ye kotempeli yaKalunga kaIsraeli. Oshoka ote ke tu nongeka shoka a hala tu longe; otatu ke enda momapola e ga hogolola.” (Jes. 2:1-3) Kashi shi tuu uuthembahenda okukala twa longwa kuKalunga!
4. Jehova okwa tegelela mboka ta longo ya ninge shike?
4 Ongiini tatu vulu okukala twa gwana okumona uuwanawa melongo lyopakalunga? Oshitegelelwa sha simanenena osho kutya omuntu oku na okukala omwiifupipiki nomunambili. Omupisalomi David okwa nyola a ti: “OMUWA oye omuyuuki nomwaanawa. . . . Aaishonopeki ote ya tula mondjila yu uka.” (Eps. 25:8, 9) Jesus naye okwa ti: “Otandi ku hambelele, Tate, Omuwa gwegulu nogwevi, oshoka iinima mbika ongoye we yi holeke aanongo naanamayele nowe yi hololele mboka ya fa uunona.” (Luk. 10:21) Mbela ino hala okuhedha popepi naKalunga ngoka ‘ha sile ohenda aaishonopeki’?—1 Pet. 5:5.
5. Oshike she shi ningi tashi wapa tu mone ontseyo yokutseya Kalunga?
5 Tu li aapiya yaJehova, mbela otatu vulu ngaa okupopya kutya otwa tseya oshili kuunongo wetu yene? Aawe. Dhoshili, itatu vulu nando okumona ontseyo yokutseya Kalunga kuunongo wetu yene. Jesus okwa ti: “Kaku na nando omuntu ta vulu okuya kungame, okuninga Tate, nguka a tuma ndje, te mu eta kungame.” (Joh. 6:44) Okupitila miilonga yokuuvitha nosho wo mombepo ondjapuki, Jehova ota hili aantu mboka ya fa oonzi, sha hala okutya, ‘omaliko giigwana ayihe.’ (Hag. 2:7) Mbela ino pandula okukala gumwe gwomwaamboka Jehova ta hilile kOmwana?—Lesha Jeremia 9:23, 24.
Elongo lyopakalunga ohali lundulula onkalamwenyo yomuntu yi kale yi li nawa
6. ‘Ontseyo yokutseya Jehova’ otayi vulu okunwetha mo ngiini aantu momukalo omundhindhilikwedhi?
6 Jesaja okwa longitha oohapu tadhi thaneke ethano ewanawa ndyoka tali ulike nkene omaukwatya gaantu taga ka lunduluka methimbo lyetu. Mboka ya li ye na ekuni oya ninga aanambili. (Lesha Jesaja 11:6-9.) Mboka ya li ye tondathane omolwuukwamuhoko, uukwashigwana nenge molwomaputuko galwe, oyi ilonga okukala pamwe ya hangana. Oku shi popya pathaneko, oya ‘hambula omagonga gawo iimwitho.’ (Jes. 2:4) Oshike she ya ningitha ya ninge omalunduluko omandhindhilikwedhi ga tya ngaaka? Aantu oya mona ‘ontseyo yokutseya Jehova’ noye yi longitha monkalamwenyo yawo. Nonando aapiya yaKalunga inaya gwanenena, oye na uumwayinathana wopaigwana washili. Onkundana ombwanawa ndjoka tayi uvithwa muuyuni auhe nosho wo iizemo iiwanawa mbyoka ya za mokuuvitha otayi ulike nkene elongo lyopakalunga li na ondilo.—Mat. 11:19.
7, 8. (a) Elongo lyopakalunga olya kwathela aantu ya sinde gamwe ‘gomomapopilongulu omanenene’ geni? (b) Oshike tashi ulike kutya elongo lyopakalunga ohali simanekitha Jehova?
7 Omuyapostoli Paulus okwa yelekanitha uukalele waapiya yaKalunga nonkalonawa yopambepo. Okwa nyola a ti: “Iikondjitho mbyoka tatu yi longitha molugodhi nduka, kayi shi yomuuyuni mbuka, ihe oyo iikondjitho ya kola tatu yi pewa kuKalunga, tayi vulu okuhanagula po omapopilongulu omanene. Otatu hanagula po omadhiladhilo agehe gomaifundjaleko. Otatu kumuna po einenepeko kehe ndyoka tali inenepekele okutseya Kalunga.” (2 Kor. 10:4, 5) ‘Okomapopilongulu omanenene’ gamwe geni elongo lyopakalunga tali mangulula aantu? Okutumbula po owala gamwe, okomutengi gwomalongo giifundja, iidhila nomalongo guunongo wopantu. (Kol. 2:8) Elongo lyopakalunga ohali kwathele aantu ya sinde iilonga iiwinayi nokukokeka omaukwatya ngoka ga hokiwa kuKalunga. (1 Kor. 6:9-11) Otali hwepopaleke onkalamwenyo yuukwanegumbo. Otali gandja wo etegameno kwaamboka kaaye na elalakano lyashili monkalamwenyo. Ndika olyo elongo ndyoka lya pumbiwa kunena.
8 Uukwatya wumwe womomaukwatya ngoka Jehova ha kwathele aantu ya kokeke owo uunashili, ngaashi tashi ulikwa koshimoniwa tashi landula. (Heb. 13:18) Omukiintu gumwe gwomuIndia okwa li a taamba ko ekonakonombiimbeli nokonima yethimbo okwa ningi omuuvithi inaa ninginithwa. Esiku limwe manga a li ta shuna kegumbo ta zi kokutunga Oshinyanga shUukwaniilwa, okwa toola okalyenge koshingoli kongushu yoodola 8 000 popepi nosasiyona yoombesa. Nonando omukiintu nguka okwa li ohepele, okwe ka fala kopolisi yi ka konge mwene gwako. Omupolisi ka li ta vulu oku shi itaala. Konima yethimbo, omupolisi gulwe okwa li a pula omukulukadhi nguka a ti: “Omolwashike wa tokola oku ke eta huno?” Omukulukadhi okwe mu yelithile ta ti: “Okukonakona Ombiimbeli okwa lundulula ndje, onkee ano ngashingeyi ondi li omunashili.” Omupolisi okwa li a kumwa nokwa li a lombwele omukuluntugongalo Omukriste ngoka a li e ya pamwe nomukiintu ngoka kopolisi a ti: “Moshilongo muka omu na aantu ye vulithe pomamiliyona 38. Ngele to vulu okukwathela aantu omulongo yomuyo ya kale ngaashi omukiintu nguka, otashi ka kala oshiwanawa noonkondo.” Ngele tatu tala aantu omamiliyona mboka oonkalamwenyo dhawo dha lundululwa kelongo lyopakalunga, mbela katu na omatompelo ogendji okupandula Jehova?
9. Ongiini aantu taya vulu okuninga omalunduluko omanene monkalamwenyo yawo?
9 Oonkondo dhOohapu dhaKalunga dhokulundulula pamwe nekwatho ndyoka Jehova ha gandja okupitila mombepo ye ondjapuki, ohadhi kwathele aantu ya lundulule oonkalamwenyo dhawo. (Rom. 12:2; Gal. 5:22, 23) Aaefeso 4:24 otaya ti: “Zaleni omuntu omupe ngoka a shitwa a fa Kalunga nohi iholola ye mwene mokukalamwenyo ku uka nokwa yapuka.” Etumwalaka ndyoka tali adhika mOohapu dhaKalunga, Ombiimbeli, oli na oonkondo dhokuulika kutya omuntu okwa tya ngiini meni, notadhi vulu okulundulula omukalo moka ha dhiladhila nonkene e uvite nokuli shi na ko nasha niinima yontumba. (Lesha Aahebeli 4:12.) Omuntu ota vulu okukala kuume kaKalunga nokukala netegameno lyokukala nomwenyo sigo aluhe ngele a mono ontseyo yashili yOmomanyolo nongele ta tsitha kumwe onkalamwenyo ye nomithikampango dhaJehova dhuuyuuki.
Jehova okwe tu longekidhila onakuyiwa
10. (a) Omolwashike Jehova oye awike ta vulu oku tu longekidhila onakuyiwa? (b) Omalunduluko omanene geni taga ka ningwa masiku ngoka taga ka guma kehe gumwe kombanda yevi?
10 Jehova oye awike ta vulu oku tu kwathela tu ilongekidhile onakuyiwa, molwaashoka oku shi shoka tashi ka ningwa komeho. Oku utha kutya onakuyiwa yaantu otayi ka kala ya tya ngiini. (Jes. 46:9, 10) Ehunganeko lyOmbiimbeli otali ulike kutya “esiku enene lyOMUWA oli li popepi.” (Sef. 1:14) Shi na ko nasha nesiku ndyoka, oohapu dhomOmayeletumbulo 11:4 tadhi landula otadhi ka gwanithwa: “Uuyamba itau kwatha sha esiku lyondjahi, ihe uuyuuki otau ya hupitha meso.” Ngele ethimbo lyaKalunga lyokupangula uuyuni waSatana lya thiki, shoka tashi ka kala sha simanenena osho okukala twa hokiwa kuKalunga. Iimaliwa itayi ka kala yi na ongushu. Hesekiel 7:19 ota ti: “Otaa ka ekelahi iingoli yawo niisiliveli momapandaanda ngaashi iinyakwi.” Okukala tu shi shika manga kuyele otashi ke tu kwathela tu ninge etokolo li li pandunge.
11. Elongo lyopakalunga ohali tu kwathele tu ilongekidhile onakuyiwa momukalo gumwe guni?
11 Omukalo gumwe moka elongo lyopakalunga tali vulu oku tu longekidhila okuya kwesiku lyaJehova ogwo oku tu kwathela tu itulile po omalalakano omawanawa. Omuyapostoli Paulus okwa nyolele Timoteus a ti: “Kumagidha aayamba yeliko lyokombanda yevi, yaa inenepeke yo yaa inekele iinima mbyoka tayi hulu po, ihe naa inekele Kalunga.” Nokuli nando katu shi aayamba, otatu vulu okukwathelwa komayele ngaka gopakalunga ga nwethwa mo. Mbela shika osha kwatela mo shike? Pehala lyokwiipungulila omaliko, otu na okulalakanena “okulonga uuwanawa” e tatu kala “aayamba yiilonga iiwanawa.” Ngele tatu pititha komeho iinima yopambepo monkalamwenyo yetu, otatu “igongelele eliko ndyoka tali ka ninga ekankameno lya kola konakuyiwa.” (1 Tim. 6:17-19) Eiyambo lya tya ngaaka otali ulike kutya otu na uunongo tawu longo molwaashoka Jesus okwa ti kutya “otashi kwatha shike, omuntu nando ni ilikolele uuyuni auhe, ye e ta kanitha omwenyo gwe?” (Mat. 16:26, 27) Mokutala kesiku lyaJehova ndyoka li li popepipepi, oshi li nawa ngele kehe gumwe gwomutse ti ipula ngeyi: ‘Mbela openi tandi pungula eliko lyandje? Mbela ondi li omupika gwaKalunga nenge ogwomaliko?’—Mat. 6:19, 20, 24.
12. Omolwashike kaatu na okuteka omukumo ngele yamwe oya dhina uukalele wetu?
12 Oshilonga shoka sha simanenena kAakriste ‘shomiilonga iiwanawa’ mbyoka ya popiwa mOohapu dhaKalunga, osho oshilonga shokuhupitha oomwenyo shokuuvitha Uukwaniilwa nokuninga aantu aalongwa. (Mat. 24:14; 28:19, 20) Ngaashi naanaa sha li methelemumvo lyotango, aantu yamwe otashi vulika ya kale ya dhina uukalele wetu. (Lesha 1 Aakorinto 1:18-21.) Ihe shoka itashi lundulula ongushu yetumwalaka lyetu noitashi ti kutya inashi simana we okupa kehe gumwe ompito yoku li itaala manga pu na natango ethimbo. (Rom. 10:13, 14) Sho tatu kwathele yalwe ya mone uuwanawa melongo lyopakalunga, otatu ka mona omalaleko nuuyamba ogendji.
Jehova oha laleke nuuyamba aapiya ye ngele taya ningi omaiyambo
13. Omaiyambo geni omuyapostoli Paulus a li a ningi omolwonkundana ombwanawa?
13 Manga inaa ninga Omukriste, omuyapostoli Paulus okwa li a longwa opo e shi pondole monkalelo yOshijuda. Manga a li inaa gwanitha oomvula 13, okwa li a tembukile kuJerusalem okuza moshilando shaandjawo Tarso opo a ka longwe komulongi gwOmpango Gamaliel ngoka a li a simanekwa noonkondo. (Iil. 22:3) Konima yethimbo, Paulus okwa li a tameke okukala a yooloka ko kwaamboka yopethimbo lye nokwa li a tsikile neilongo ndyoka, otashi vulika a li a ningi ependa meitaalo lyopaShijuda. (Gal. 1:13, 14) Sho a taamba ko onkundana ombwanawa nokwa tameke iilonga yokuuvitha, okwa li a thigi po ayihe mbyoka. Mbela Paulus okwa li i ipe uusama sho a ningi ehogololo ndyoka? Aawe. Okwa li a nyola a ti: “Eeno shili, iinima ayihe yilwe oyo ekanitho lyowala, ngele tandi yi yeleke nokutseya Jesus Kristus, Omuwa gwandje, shoka osho oshinima shondilo shi vule ayihe. Omolwe onde ekelehi iinima ayihe nonde yi tala oyo iiyagaya yowala.”—Fil. 3:8.
14, 15. Tu li “aalongi pamwe naKalunga” omalaleko nuuyamba geni hatu mono?
14 Aakriste kunena ohaya ningi omaiyambo molwonkundana ombwanawa ngaashi Paulus a li a ningi. (Mark. 10:29, 30) Mbela otwa kanitha sha sho hatu ningi omaiyambo? Robert ngoka a tumbulwa metetekelo, okwa li e uvite ngaashi naanaa yalwe ya li yu uvite, sho a ti: “Inandi ipa uusama mwaashoka nda ningi. Uukalele wethimbo lyu udha owe etele ndje enyanyu nosho wo embilipalelo nowa pitike ndje ndi ‘konakone nondi mone nkene Jehova omwaanawa.’ Kehe oshikando nda yamba po iinima yopamaliko omolwomalalakano gopambepo, Jehova okwa li a laleke ndje nuuyamba niinima oyindji yi vulithe mbyoka nda yamba po. Ohashi kala sha fa inaandi yamba po sha. Onda likola owala oshindji.”—Eps. 34:8; Omayel. 10:22.
15 Ngele oho kutha ombinga miilonga yokuuvitha noyokulonga aantu, nangoye osha yela kutya owa mona oompito dhokumakela nokumona kutya Jehova omwaanawa. Mbela opwa li omathimbo gamwe wa kwathelwa kombepo ye ondjapuki sho wa li to lombwele yalwe onkundana ombwanawa? Mbela owa li wa mona yalwe mboka ya li ya nyanyukwa sho Jehova a patulula omitima dhawo ya gandje eitulomo ketumwalaka? (Iil. 16:14) Mbela Jehova okwa li e ku kwathele wu sinde omaupyakadhi, tashi vulika sho e ku egululile ondjila wu tamunune mo uukalele woye? Mbela okwa li e ku yambidhidha pethimbo wa li muudhigu opo wu vule okutsikila oku mu longela sho wa li wu uvite kuu na oonkondo oku shi ninga? (Fil. 4:13) Ngele tatu mono nkene Jehova he tu kwathele muukalele wetu, ota ka kala gwolela kutse notatu kala tu uvite tu li popepi naye. (Jes. 41:10) Mbela kashi shi elaleko nuuyamba okukala gumwe ‘gwomaalongi pamwe naKalunga’ miilonga ya simana yelongo lyopakalunga?—1 Kor. 3:9.
16. Owu uvitile ngiini oonkambadhala nosho wo omaiyambo ngoka ho ningi shi na ko nasha nelongo lyopakalunga?
16 Aantu oyendji oye na ehalo okulonga sha sha simanenena tashi kalelele monkalamwenyo yawo. Otwa mona kutya nokuli niilonga yomupondo mbyoka ya longwa kaantu muuyuni wonena olundji ohayi dhimbiwa mbala. Ihe nando ongaaka, iilonga mbyoka oshigwana shaJehova tashi longo kunena opo shi yapulithe edhina lye, osha yela kutya otayi ka kala oshitopolwa shondjokonona yoshigwana she. Iilonga mbyoka otayi ka dhimbulukiwa sigo aluhe. (Omayel. 10:7; Heb. 6:10) Natu kaleni ano twa lenga uuthembahenda wetu wokukutha ombinga miilonga yokuuvitha kombinga yaJehova mbyoka itaayi ka dhimbiwa nando.
Oto yamukula ngiini?
• Jehova okwa tegelela aantu mboka ta longo ya kale ya tya ngiini?
• Ongiini elongo lyopakalunga hali hwepopaleke onkalamwenyo yaantu?
• Omomikalo dhini twa lalekwa nuuyamba molwokukwathela yalwe ya mone uuwanawa melongo lyopakalunga?
[Ethano pepandja 25]
Mboka ya longwa kuJehova oye na uumwayinathana washili wopaigwana
[Ethano pepandja 26]
Mbela kashi shi elaleko nuuyamba okukala gumwe ‘gwomaalongi pamwe naKalunga’?