Mbela owa simaneka shoka Jehova a ninga po opo e ku hupithe?
“Omuwa, Kalunga kaIsraeli, na hambelelwe! Oshoka okwe ya okuhupitha nokumangulula aantu ye.”—LUK. 1:68.
1, 2. Onkalo ndjoka tu li muyo kunena ya kwata miiti otayi vulu okuyelekanithwa nashike , nomapulo geni ta tu ka kudhathana?
DHILADHILA owala ando wu li moshipangelo moombete. Owu li nduno mondunda moka mu na aavu ayehe taye ehama omukithi omudhipagi kaagu na epango. Sho wu uvu kutya ndohotola ota kambadhala okumonena omukithi ngoka epango, owa mono etegameno. Owa kala nduno wa tegelela nondjuulukwe wu uve kutya oshike sha ningwa po. Esiku limwe owa lombwelwa kutya omukithi ogwa monenwa epango. Ndohotola okwa ningi eiyambo enene opo a monene omukithi ngoka epango. Mbela oto ka kala wu uvite ngiini? Dhoshili, oto ka kala wa simaneka nowa pandula omulumentu ngoka e shi ningi tashi wapa opo ngoye nayakweni mu vule okuhupithwa.
2 Oshinima sha tya ngaaka otashi vulika shi kale sha fa omashendjo, ihe otashi thaneke oshinima sha kwata miiti shoka atuheni twa taalela. Atuheni otu li monkalo ya kwata miiti yi vule ndjoka ya popiwa metetekelo. Otwa pumbwa omuhupithi. (Lesha Aaroma 7:24.) Jehova okwa li a ningi eyambo enene opo e tu hupithe. Omwana naye wo okwa ninga eiyambo endhindhilikwedhi. Natu kundathaneni omapulo gane ga simanenena. Omolwashike twa pumbwa omuhupithi? Ehupitho lyetu olya li lya pula Jesus shike? Olya li lya pula Jehova shike? Ongiini tatu vulu okuulika kutya otwa pandula shoka Kalunga a ninga opo e tu hupithe?
Omolwashike twa pumbwa ehupitho?
3. Ongiini uulunde tawu yelekanithwa nomukithi gwomukwawu?
3 Patengeneko ndyoka opo lya ningilwe, gumwe gwomomikithi dhomikwawu mondjokonona yaantu ogwa li omukithi gwegwililila lyaSpania ngoka gwa li ko mo 1918 nogwa li gwa dhipaga aantu omamiliona omilongo. Omikithi dhilwe odha nika oshiponga noonkondo. Omikithi dha tya ngaaka otashi vulika dhi kwate aantu aashona, ihe ohadhi dhipaga aantu oyendji yomwaamboka dha kwata.a Onkee ano, ongiini mbela ngele otwa yeleke uulunde nomukithi ngoka gwomukwawu? Dhimbulukwa oohapu ndhoka dhi li mAaroma 5:12 tadhi ti: “Uulunde owe etwa muuyuni komuntu gumwe, nuulunde we owe etelele eso. Onkee ano eso olya taandele maantu ayehe, oshoka ayehe oya yono.” Kehe gumwe oku na uulunde molwaashoka aantu ayehe oya yono. (Lesha Aaroma 3:23.) Aantu yangapi ya sa kuulunde? Paulus okwa nyola kutya uulunde owe etelele eso ‘maantu ayehe.’
4. Jehova okwa tala ko ngiini ethimbo lyokukalamwenyo kwetu, nongiini etaloko lye lya yooloka ko kwaandyoka lyaantu kunena?
4 Aantu oyendji kunena ohaya dhiladhila kutya uulunde neso oyi li oshinima shopaunshitwe. Ohaye ehamekwa owala unene keso lyomuntu ngoka inaa thika methimbo lyokusa, ihe ihaye ehamekwa naanaa keso lyomuntu ngoka a kulupa molwaashoka ohaye li tala ko li li “paunshitwe.” Oshi li wo oshipu kaantu okudhimbwa kutya Omushiti okwe li tala ko ngiini. Onkalamwenyo yetu ofupi noonkondo yi vulithe ngaashi Jehova a li a hala yi kale. Dhoshili, kapu na omuntu a vulu okukala nomwenyo nokuli nando olyo ‘esiku limwe’ pataloko lyaJehova. (2 Pet. 3:8) Osho molwaashoka Oohapu dhaKalunga tadhi ti kutya onkalamwenyo yetu ofupi ya fa omwiidhi ngoka hagu kukuta mbala. (Eps. 39:5; 1 Pet. 1:24) Otwa pumbwa okukaleka oshinima shoka momadhiladhilo. Omolwashike? Ngele otu uvu ko kutya “omukithi” ngoka tu na ogwa kwata miiti shi thike peni otatu vulu okukala tu na olupandu lwepango lyago, sha hala, okutya ehupitho lyetu.
5. Uulunde owe tu etele shike atuheni?
5 Opo tu uve ko nkene uulunde wa kwata miiti nosho wo iilanduliko yawo, otu na okukambadhala tu uve ko shoka uulunde we tu etela. Shoka otashi vulu okukala oshidhigu petameko molwaashoka uulunde owe tu etela shoka inaatu mona nando onale. Adam naEva petameko oya li ye na onkalamwenyo ya gwanenena. Oya li ye na omadhiladhilo nomalutu ga gwanenena, oya li taya vulu okuhogolola okupangela omadhiladhilo, omaiyuvo niilonga yawo. Kungawo, oya li taya vulu okutsikila okukokeka omaukwatya omawanawa ye li aapiya yaJehova Kalunga. Pehala lyaashono, oye ekelehi omagano gawo ge na ondilo. Sho ya tokola okulonga uulunde koshipala shaJehova, oyi ikanithile yo yene noyana onkalamwenyo ndjoka Jehova a li e ya nunina. (Gen. 3:16-19) Kungawo, oyi ikwawulile yo yene nosho wo tse “omukithi” omudhigu ngoka twa zi nokukundathana. Jehova okwa li e ya pe egeelo ndyoka ya li yi ilongela. Ihe tse okwe tu uvanekela kutya ote ke tu hupitha.—Eps. 103:10.
Okuhupithwa kwetu okwa li kwa pula Jesus shike?
6, 7. (a) Ongiini Jehova a li u ulike petameko kutya opo tu vule oku ka hupithwa otashi pula eiyambo? (b) Oshike tatu vulu okwiilonga komayambo ngoka ga li ga yambwa kuAbel nokookukululwa mboka ya li ko manga Ompango yaMoses kaaya li po?
6 Jehova okwa li e shi shi kutya otashi ka pula ondilo opo oluvalo lwaAdam naEva lu hupithwe. Mehunganeko ndyoka li li muGenesis 3:15, otatu lesha mo shi na ko nasha naashoka sha kwatelwa mo opo aantu ya hupithwe. Jehova okwa li e na okugandja “oluvalo,” omuhupithi ngoka a li ta ka hanagula po Satana noku mu nyanyagula po thiluthilu. Onkee ano, omuhupithi ngoka okwa li taka mona iihuna, notaka ningwa oshilalo moshithi shompadhi ye pathaneko. Shoka oshiehameka noshiyemateka, ihe mbela otashi ti shike? Omuhogololwa gwaJehova okwa li e na okwiidhidhimikila shike?
7 Opo aantu ya kulilwe muulunde, omuhupithi okwa li e na oku shi ninga okupitila mokuninga ekwatakanitho opo li shi ninge tashi wapa aantu ya galukile kuKalunga mokukutha po iilanduliko mbyoka ye etwa po kuulunde. Mbela shoka osha li tashi ka kwatela mo shike? Osha li sha popiwa metetekelo kutya opwa li pwa pumbiwa eyambo. Sho omulumentu gwotango omudhiginini Abel a li a yambele Jehova oshinamwenyo, Jehova okwa li e mu hokwa. Konima yethimbo, ookukulululwa aadhiginini ngaashi Noa, Abraham, Jakob naJob nayo wo oya li ya yamba omayambo ngoka Kalunga a hokwa. (Gen. 4:4; 8:20, 21; 22:13; 31:54; Job 1:5) Konima yomathelemimvo Ompango yaMoses oya li ya gandja uuyelele wa yela kombinga yeyambo.
8. Omusaaseri omukuluntu okwa li ha ningi shike mEsiku lyEkwatakanitho omumvo kehe?
8 Gamwe gomomayambo ga simana ga li ge na okugandjwa paMpango yaMoses oongoka ga li haga gandjwa mEsiku lyEkwatakanitho omumvo kehe. Mesiku ndyoka omusaaseri omukuluntu okwa li ha longo iilonga yontumba tayi thaneke sha. Okwa li ha yambele Jehova omafikiloyambo opo aantu ya dhiminwe po oondjo dhawo, tango, odhaamboka yomongundu yaasaaseri nolutiyali, odhaamboka kaaye shi yomezimo lyaasaaseri. Omusaaseri omukuluntu okwa li ha yi mUuyapukielela wetsalihangano nenge wotempeli, moka a li owala e na okuya mo oye awike noku na owala oku shi ninga mesiku ndyoka limwe alike lyokomumvo. Moka okwa li ha shashamine ombinzi yomayambo komeho goshikethahangano. Kombanda yoshisiikilitho shoka oshiyapuki, omathimbo gamwe okwa li haku holoka oshikogo tashi adhima, shoka tashi thaneke okukala po kwaJehova Kalunga.—Eks. 25:22; Lev. 16:1-30.
9. (a) Omusaaseri omukuluntu okwa li ta thaneke lye mEsiku lyEkwatakanitho, nomayambo ngoka a li ha yamba oga li taga thaneke shike? (b) Oshike sha li tashi thanekwa kokuya kwomusaaseri omukuluntu mUuyapukielela?
9 Omuyapostoli Paulus okwa li a nwethwa mo a holole kutya iiningwanima mbyoka yopathaneko oya hala okutya shike. Oku ulike kutya omusaaseri omukuluntu ota thaneke Mesiasa, Jesus Kristus, omanga okugandja omayambo taku thaneke eso lyaKristus lyeiyambo. (Heb. 9:11-14) Eyambo ndyoka lya gwanenena olye shi ninga tashi wapa opo ongundu yaasaaseri yaamwahe yaKristus aagwayekwa 144 000 ‘noonzi dhilwe’ dhi vule okudhiminwa po. (Joh. 10:16) Ngele omusaaseri omukuluntu ta yi mUuyapukielela okwa li ta thaneke okuya kwaJesus megulu a ka gandje ongushu yekuliloyambo lye kuJehova Kalunga.—Heb. 9:24, 25.
10. Ehunganeko lyOmbiimbeli olyu ulike kutya Mesiasa ota ka ningilwa shike?
10 Opo oluvalo lwaAdam naEva lu hupithwe osha li shi na okupula oshindji. Mesiasa okwa li e na okuyamba po omwenyo gwe. Aapolofeti yomOmanyolo gOshihebeli oya gandja uuyelele owundji kombinga yaashika. Pashiholelwa omupolofeti, Daniel okwa li a popi sha yela kutya “omuwiliki omuhogololwa gwaKalunga” ota ka “dhipagwa” opo ‘oondjo dhi dhimwe po.’ (Dan. 9:24-26) Jesaja okwa li a hunganeke kutya Mesiasa ita ka taambiwa ko, ota ka hepekwa nokudhipagwa opo oondjo dhaantu inaaya gwanenena dhi dhimwe po.—Jes. 53:4, 5, 7.
11. Omomikalo dhini Omwana gwaJehova a li u ulike kutya oku na ehalo okuyamba po omwenyo gwe opo tu vule okuhupithwa?
11 Manga Omwana gwaKalunga epona inee ya kombanda yevi, okwa li e shi shi kutya okuhupithwa kwetu okwa li taku ke mu pula shike opo tu vule okuhupithwa. Okwa li e na okumona iihuna opo nduno ota ka dhipagwa. Mbela sho He a li e mu lombwele shoka ta ka ningilwa okwa li a sholola nenge e mu tukulile oshibotha? Mepingathano naashoka, okwa li a vulika kuHe. (Jes. 50:4-6) Sha faathana, manga Jesus a li kombanda yevi okwa li a gwanitha po ehalo lyaHe. Omolwashike? Okwa yamukula noohapu tadhi landula a ti: “Ondi hole Tate.” Okwa popi wo ta ti: “Ohole onenenene omuntu ta vulu okukala e yi na yokuhola ookuume ke, oyo okugandja omwenyo gwe omolwawo.” (Joh. 14:31; 15:13) Onkee ano, otwa hupithwa omolwohole yOmwana gwaJehova. Nonando osha li she mu pula omwenyo gwe gwopantu gwa gwanenena, okwa li a nyanyukwa oku shi ninga omolwokuhupithwa kwetu.
Shoka Jehova a li a ningi opo tu vule okuhupithwa
12. Ekulilo olya li euliko lyohole yalye, nomolwashike a li e li ningi?
12 Jesus haye a li a tokola kutya opu na okuyambwa ekuliloyambo nenge nkene li na okuningwa. Pehala lyaashono, ekulilo lyetu olya ningwa pahalo lyaJehova. Omuyapostoli Paulus okwa popi kutya oshiyambelo shomotempeli hoka kwa li haku yambelwa omayambo otashi thaneke ehalo lyaJehova. (Heb. 10:10) Onkee ano, otu na okupandula unene Jehova omolwekuliloyambo lyaKristus ndyoka lye shi ninga tashi wapa opo tu hupithwe. (Luk. 1:68) Shoka oshi li euliko lyehalo lya gwanenena nosho wo ohole ye onene yokuhola aantu.—Lesha Johannes 3:16.
13, 14. Ongiini oshiholelwa shaAbraham tashi vulu oku tu kwathela tu kale tu na olupandu lwaashoka Jehova e tu ningila?
13 Opo Jehova e tu ulukile ohole ye momukalo nguka, osha li she mu pula shike? Oshidhigu kutse opo tu shi uve ko. Ihe Ombiimbeli oyi na ehokololo ndyoka tali vulu oku tu kwathela tu uve ko nawa oshinima shoka. Jehova okwa li a pula omulumentu omudhiginini Abraham a ninge oshinima shimwe oshidhigu noonkondo, a yambe po omwanamati Isak. Abraham okwa li e hole omwana noonkondo, molwaashoka sho Jehova a li ta popi naye, okwa li a popi kombinga yaIsak a ti: ‘Omumwoye, epona ngoka u mu hole.’ (Gen. 22:2) Ihe Abraham okwa li a mono kutya okulonga ehalo lyaJehova osha li sha simana shi vulithe nokuli ohole yokuhola Isak. Abraham okwa li a vulika kuJehova e ta ka ninga shoka a lombwelwa. Ihe Jehova ka li e etha Abraham a ninge shoka Ye mwene a li ta ka ninga esiku limwe. Kalunga okwa li a tumu omuyengeli a keelele Abraham manga owala inaa yamba po omwana. Abraham okwa li a tokolatoko okuvulika kuKalunga ke mokuninga oshinima shika sha li emakelo edhigu molwaashoka okwa li e na uushili kutya omwana ote ke mu mona ishewe okupitila meyumuko. Ihe okwa li e na eitaalo lya kola kutya Kalunga ote ke mu yumudha. Dhoshili, Paulus okwa li a popi kutya Abraham okwa li a pewa Isak okupitila meyumuko “a fa a za meso.”—Heb. 11:19, KB.
14 Oshidhigu kutse okudhiladhila nkene Abraham a li u uvite sho a li ti ilongekidha a ka yambe po omwana. Shoka sha li sha ningilwa Abraham otashi faathanithwa naashoka Jehova a li a ningi mokuyamba po Omwana ngoka i ithana “Omumwandje omuholike.” (Mat. 3:17) Dhimbulukwa kutya Jehova okwa li u uva nayi noonkondo. Jehova nOmwana oya li ya kala pamwe uule woomvula omamiliyona, tashi vulika nokuli oomvula omabiliyona. Jesus okwa li a longo nenyanyu pamwe naHe e li “engomba” noku li Omupopiliko gwe, sha hala okutya, ‘Ohapu.’ (Omayel. 8:22, 30, 31; Joh. 1:1) Itatu vulu okuuva ko shoka Jehova a li i idhidhimikile sho Omwana a hepekwa, a shekwa nopo nduno okwa dhipagwa ongo omulongi gwomuyonena. Jehova okwa li a ningi eyambo enene opo tu vule okuhupithwa. Ongiini nduno tatu vulu okuulika kutya otwa lenga ehupitho ndyoka?
Ongiini to vulu okuulika kutya owu na olupandu molwaashoka wa hupithwa?
15. Ongiini Jesus a li a manitha oshilonga shekwatakanitho, noshe etitha iizemo yini?
15 Jesus okwa li a manitha oshilonga she oshinene shekwatakanitho sho a yumudhwa a ye megulu. Sho a hangana ishewe naHe omuholike, okwa gandja omwenyo gwe kuHe gu li eyambo. Shoka oshe etelele omalaleko nuuyamba. Oshe shi ningi tashi wapa opo oondjo dhi dhimwe po, tango odhAakriste aagwayekwa nopo nduno “odhuuyuni auhe.” Omolweyambo ndyoka, kunena ayehe mboka tayi iyele ombedhi omolwoondjo dhawo e taya ningi aalanduli yaKristus yashili otaya vulu okukala ye na ekwatathano ewanawa naJehova Kalunga. (1 Joh. 2:2) Shika oshe ku guma ngiini?
16. Ongiini tatu vulu oku shi thaneka kutya omolwashike tu na okukala tu na olupandu lwaashoka Jehova a ninga opo tu vule okuhupithwa?
16 Natu tale natango kethaneko ndyoka lya li lya gandjwa petameko. Natu tye nduno ndohotola ngoka a monene omukithi epango okwe ya mondunda moka mu li naavu ooyakweni e te mu lombwele ta ti kutya kehe ngoka ta ka pewa epango e ta nu omiti ngaashi a lombwelwa, ita ka kala inaa aluka. Ongiini mbela ngele oyendji yomaavu ooyakweni oya tindi okuninga ngaashi ndohotola e ya lombwela, taya nyenyeta kutya otashi ka kala oshidhigu kuyo okunwa omiti? Mbela nangoye oto ka ninga ngaashi yo nonando owu na uushili kutya omuti otagu ka longa? Hasho nando. Kapu na omalimbililo oto ka kala wa hala okuulika olupandu molwepango ndyoka wa pewa e to ningi naanaa ngaashi ndohotola e ku lombwela, nokuli tashi vulika wu lombwele yalwe shoka wa tokola okuninga. Shi vulithe pwaashoka, kehe gumwe gwomutse oku na okukala a halelela okuulukila Jehova kutya okwa pandula noonkondo ehupitho ndyoka a ninga tali wapa okupitila mekuliloyambo lyOmwana.—Lesha Aaroma 6:17, 18.
17. Omomikalo dhini to vulu okuulika kutya owu na olupandu lwaashoka Jehova a ninga opo e ku hupithe?
17 Ngele otu na olupandu lwaashoka Jehova nOmwana ye tu ningila opo tu vule okuhupithwa muulunde neso otatu ke shi ulika. (1 Joh. 5:3) Otatu ka kondjitha egamo lyokulonga uulunde ndyoka tu na. Onkee ano, katu na okukala tatu longo uulunde owina nokukala nonkalamwenyo yopaali, tu na iihelele. Ngele otwa kala hatu ningi ngaaka, otashi ku ulika kutya katu na olupandu lwekuliloyambo. Pehala lyaashoka, otatu ku ulika kutya otu na olupandu ngele tatu kambadhala okukala twa yogoka momeho gaKalunga. (2 Pet. 3:14) Otatu ke shi ulika mokupopya nayalwe kombinga yetegameno ewanawa ndyoka tu na opo nayo ya kale ye na ekwatathano ewanawa naJehova nokukala ye na etegameno lyonakuyiwa. (1 Tim. 4:16) Dhoshili, otwa gwana okulongitha ethimbo lyetu noonkondo dhetu tu longele Jehova nOmwana. (Mark. 12:28-30) Dhiladhila owala kwaashoka. Otatu vulu okukala twa tegelela ethimbo ndyoka uuna tatu ka kala kaatu shi we aalunde. Otatu vulu oku ka kala nomwenyo sigo aluhe twa gwanenena ngaashi sha li elalakano lyaJehova, omolwekuliloyambo ndyoka a gandja opo e tu hupithe.—Rom. 8:21.
[Enyolo lyopevi]
a Egwililila lyaSpania olya popiwa kutya olya li lya kwata aantu ye thike konyala petata lyaantu yomuuyuni auhe. Ombuto ndjoka oya li ya dhipaga aantu okuza popelesenda yimwe sigo opoopelesenda omulongo. Mepingathano naashoka, omukithi gweEbola ogwa pumba noonkondo, ihe sho gwa li gwa kwata aantu, ogwa li gwa dhipaga aantu ye thike lwopoopelesenda 90 dhaantu mboka gwa kwata.
Oto yamukula ngiini?
• Omolwashike wa pumbwa ehupitho noonkondo?
• Ombepo yaJesus yokwiiyamba oye ku guma ngiini?
• Owu uvite ngiini omolwomagano gekulilo ngono Jehova a ninga?
• Ehupitho ndyoka Jehova a ninga otali ku inyengitha wu ninge shike?
[Ethano pepandja 30]
Omusaaseri omukuluntu gwaIsraeli ngoka a li ha yamba omayambo mEsiku lyEkwatakanitho okwa li ta thaneke Mesiasa
[Ethano pepandja 31]
Sho Abraham a li e na ehalo lyokuyamba po omwana otashi tu longo oshindji kombinga yeyambo ndyoka Jehova a ningi