ONGULUMAMBO MOINTANETA yiileshomwa yopaMbiimbeli
ONGULUMAMBO MOINTANETA
yiileshomwa yopaMbiimbeli
Oshindonga
  • OMBIIMBELI
  • IILESHOMWA
  • OKUGONGALA
  • w10 2/1 ep. 14-18
  • ‘Popya nuulaadhi Oohapu dhaKalunga’

Oshitopolwa shika kashi na okavidio.

Opu na epuko lyasha, okavidio itaka yi komeho.

  • ‘Popya nuulaadhi Oohapu dhaKalunga’
  • Oshungolangelo tayi tseyitha uukwaniilwa waJehova—2010
  • Uupalanyolo uushona
  • Uuyelele wa faathana
  • Otwa pumbwa okukala tu na uulaadhi
  • Nkene omuntu ta vulu okukala e na uulaadhi
  • Omauwanawa ngoka haga zi mokukala aalaadhi
  • Ombepo yaKalunga nayi ku ninge omulaadhi
  • Natu holeleni Jesus mokuuvitha nomukumo
    Oshungolangelo tayi tseyitha uukwaniilwa waJehova—2009
  • Mona omayamukulo gomapulo taga landula
    Oshigongi shoPashikandjo shOonzapo dhaJehova shomo 2018-2019 tapu ka kala Omutonatelishikandjo
  • Jehova tu pa uulaadhi
    ‘Imbila Jehova nenyanyu’
  • Kala wu na omukumo
    Kala wu hole aantu — ya ninga aalongwa
Tala uuyele wa gwedhwa po
Oshungolangelo tayi tseyitha uukwaniilwa waJehova—2010
w10 2/1 ep. 14-18

‘Popya nuulaadhi Oohapu dhaKalunga’

“Oyu udhithwa Ombepo Ondjapuki e taa tameke [okupopya] nuulaadhi oohapu dhaKalunga.”—IIL. 4:31.

1, 2. Omolwashike tu na okukambadhala tu kale tatu pondola muukalele wetu?

KONIMA yomasiku gatatu manga inaa sa, Jesus okwa li a lombwele aalongwa ye a ti: ‘Onkundana ndjika ombwanawa yuukwaniilwa otayi ku uvithilwa uuyuni auhe yi ningile iigwana ayihe uunzapo; notaku ya ihe ehulilo.’ Jesus omuyumudhwa manga inaa londa a ye megulu okwa li a lombwele aalanduli ye ya ‘ka ninge aantu ayehe aalongwa ye, noku ya longa okudhiginina ayihe mbyoka e yi ya lombwele.’ Okwa li e yu uvanekele kutya ota ka kala pamwe nayo “omasiku agehe sigo ehulilo lyuuyuni.”—Mat. 24:14, NW; 26:1, 2; 28:19, 20.

2 Tu li Oonzapo dhaJehova, otu na ombinga miilonga mbyoka ya li ya tameke nale methelemumvo lyotango. Kapu na iilonga yilwe ya simana mbyoka tayi vulu okuyelekwa niilonga yokuuvitha Uukwaniilwa noyokuninga aantu aalongwa mbyoka tayi hupitha oomwenyo. Inashi simana tuu tu kale tatu pondola muukalele wetu! Moshitopolwa shika otatu ka tala kutya ongiini okukala tatu wilikwa kombepo ondjapuki haku tu kwathele tu popye nuulaadhi uuna tu li muukalele. Iitopolwa iyali tayi landula otayi ke tu ulukila nkene ombepo yaJehova tayi vulu oku tu wilika tu longe aantu nuukeka nokukala hatu uvitha nopwaahe na oluthuwo.

Otwa pumbwa okukala tu na uulaadhi

3. Omolwashike twa pumbwa okukala tu na uulaadhi sho tatu kutha ombinga miilonga yokuuvitha?

3 Iilonga yetu yokuuvitha Uukwaniilwa mbyoka twa pewa kuKalunga oyi li uuthembahenda itaawu vulu okuyelekwa nasha. Ihe ihayi kala kaayi na omashongo. Nonando aantu yamwe otaya taamba ko onkundana ombwanawa yUukwaniilwa waKalunga nenyanyu, oyendji oya fa naanaa mboka ya li ko pethimbo lyaNoa. Jesus okwa li a popi kutya “inaye shi tseya, sigo eyelu lye ya nolye ya hanagula po ayehe.” (Mat. 24:38, 39) Opu na wo mboka haye tu sheke nenge haye tu pataneke. (2 Pet. 3:3) Omapataneko ohaga vulu okuza kaakwanepangelo, kaanasikola ooyakwetu, kaaniilonga pamwe natse nenge nokuli kaakwanezimo. Kakele kaashoka, otashi vulika tu na uunkundi ngaashi ohoni nuumbanda wokutila kutya pamwe aantu itaye ke tu taamba ko. Iinima oyindji otayi vulu oku shi ninga shi kale oshidhigu kutse tu kale kaatu na “uulaadhi” wokupopya oohapu dhaKalunga. (Ef. 6:19, 20) Opo tu tsikile okupopya oohapu dhaKalunga, otwa pumbwa okukala tu na uulaadhi. Oshike tashi vulu oku tu kwathela tu kale tu na uulaadhi?

4. (a) Uulaadhi oshike? (b) Ongiini omuyapostoli Paulus a li a vulu okupopya nAatessalonika nomukumo?

4 Oshitya shOshigreka shoka sha tolokwa “uulaadhi” otashi ti “okwaahenuugoyoki.” Oshitya shoka oshi na edhiladhilo lyokukala wu na “omukumo, einekelo nokwaahe na uumbanda.” Uulaadhi itashi ti kutya okwaahalila okathima koluko nenge okwaahe na omikalo. (Kol. 4:6) Nonando otu na uulaadhi, otu na wo okukala tu na ombili naantu ayehe. (Rom. 12:18) Ihe natango, sho tatu uvitha onkundana ombwanawa yUukwaniilwa waKalunga, otwa pumbwa okukala tu na ondjele shi na ko nasha nuulaadhi neyawalo opo kaatu uvithe nayi yalwe owina. Eeno, okukala omulaadhi otashi pula tu kokeke omaukwatya galwe. Uulaadhi mboka ihawu ya po koonkondo dhetu yene. Konima sho omuyapostoli Paulus nooyakwawo ya li ya ‘shekwa muFilippi,’ oshike sha li she ya kwathele ya popye ‘nomukumo’ naamboka ya li muTessalonika? Paulus okwa nyola a ti: “Kalunga okwe tu pe omukumo.” (Lesha 1 Aatessalonika 2:2.) Jehova Kalunga ota vulu okukutha po uumbanda wetu noku tu pa uulaadhi wa fa mboka a li e ya pe.

5. Ongiini Jehova a li a pe Petrus, Johannes naalongwa yalwe uulaadhi?

5 Sho ya li ya patanekwa ‘kaawiliki yAajuda, kaakuluntu nokaalongimpango,’ omuyapostoli Petrus nomuyapostoli Johannes oya li ya ti: “Tokoleni ne yene kutya oshini po shu uka koshipala shaKalunga. Otu na okuvulika kune nenge otu na okuvulika kuKalunga? Oshoka itatu vulu okumwena, tu kale ando itaatu hokolola shoka tse twe shi mono notwe shi uvu.” Pehala lyokugalikana kuKalunga opo omahepeko ga hule po, yo nooitaali ooyakwawo oya galikana kuJehova taya ti: “Omuwa, pulakena, nkene taa popitha aamati yoye nomagandambadhi, ngoye u pe aamati yoye oohapu dhoye, tu popye nuulaadhi auhe twaa na uumbanda.” (Iil. 4:5, 19, 20, 29) Jehova okwa li i inyenge ngiini keindilo lyawo? (Lesha Iilonga 4:31.) Jehova okwa li e ya kwathele ya kale nuulaadhi okupitila mombepo ye. Ombepo yaKalunga otayi vulu wo oku tu ningila sha faathana. Ongiini nduno tatu vulu okumona ombepo yaKalunga nokuwilikwa kuyo muukalele wetu?

Nkene omuntu ta vulu okukala e na uulaadhi

6, 7. Omomukalo guni gu ukilila moka omuntu ta vulu okumona ombepo ondjapuki yaKalunga? Gandja iiholelwa.

6 Omukalo gu ukilila opo tu mone ombepo ondjapuki yaKalunga ogwo oku yi pula. Jesus okwa li a lombwele aapulakeni ye a ti: “Ne mboka aawinayi ngele omu shi okupa aana yeni omagano omawanawa, unene tuu Ho yeni yomegulu ota gandja Ombepo Ondjapuki kumboka taye mu indile.” (Luk. 11:13) Dhoshili, otu na okukala hatu galikana tu pewe ombepo ondjapuki nopwaahe na oluthuwo. Ngele otu na uumbanda wokulonga iilonga yimwe mbyoka ya kwatelwa muukalele wetu, ngaashi okugandja uunzapo mepandaanda, okugandja uunzapo wontukuluka nenge okugandja uunzapo momahala gomalandithilo, otatu vulu okugalikana kuJehova e tu pe ombepo ye noku mu pula e tu kwathele tu uvithe nuulaadhi.—1 Tes. 5:17.

7 Shoka osho naanaa omukiintu gumwe Omukriste gwedhina Rosa a li a ningi.a Esiku limwe manga Rosa a li kiilonga, omulongiskola gumwe ngoka haya longo naye okwa li ta lesha olopota ndjoka ya za koskola yilwe shi na ko nasha nankene aanona ya li haya ningwa nayi. Omulongiskola okwa li u uvithwa nayi noonkondo kwaashoka a li a lesha e ta popi mokule ta ti: “Yakwetu, uuyuni mbuka owu uka naanaa peni?” Rosa ka li ta vulu okweetha ompito ya tya ngaaka inaa gandja uunzapo. Oshike a li a ningi po opo a mone uulaadhi wokupopya? Rosa okwa ti: “Onda galikana kuJehova e tandi mu pula a pe ndje ombepo ye yi kwathele ndje.” Okwa li a gandja uunzapo uuwanawa e ta ningi elongekidho opo ya kundathane ishewe. Tala wo koshiholelwa shokakadhona koomvula ntano kedhina Milane hoka ka kala moshilando New York. Milane okwa ti: “Manga inaandi ya koskola, tse nameme ohatu galikana aluhe kuJehova.” Ohaya galikana ya pewe shike? Opo Milane a pewe uulaadhi a kale a dhiginina eitaalo lye nokupopya kombinga yaKalunga ke! Yina okwa ti: “Shika osha li sha kwathele Milane a vule okuyelithila yalwe kutya okwa tala ko ngiini iituthivalo nomasiku gomafudho nokutinda okukutha ombinga uuna iinima ya tya ngaaka tayi dhanwa.” Mbela iiholelwa mbika itayi tu ulukile kutya okugalikana otaku kwatha lela ngele omuntu a pumbwa okupopya nuulaadhi?

8. Oshike tatu vulu okwiilonga komupolofeti Jeremia shi na ko nasha nokukala tu na uulaadhi?

8 Ipula wo kombinga yaashoka sha li sha kwathele omupolofeti Jeremia a kale e na uulaadhi. Sho Jehova a li e mu langeke po a ninge omupolofeti gwiigwana, Jeremia okwa li a yamukula a ti: “Kandi shi kupopya, oshoka ngame omunona.” (Jer. 1:4-6) Nonando ongaaka, mokweendela ko kwethimbo, Jeremia okwa kala nokulonga iilonga ye yokuuvitha nopwaahe na oluthuwo nonuudhiginini, noyendji oya li ye mu tala ko e li omupopi gwoohapu dhomupya. (Jer. 38:4) Okwa li u uvitha nuulaadhi epangulo lyaJehova uule woomvula 65. Molwaashoka Jeremia okwa li a tseyika nawa muIsraeli omolwiilonga ye yokuuvitha nuulaadhi nokwaahe na uumbanda, konima yoomvula 600 sho Jesus a li a popi nuulaadhi, aantu yamwe oya li yi itaala kutya oJeremia a galukile momwenyo. (Mat. 16:13, 14) Ongiini omupolofeti Jeremia ngoka a li inaa hala okukala omupolofeti petameko a li a sindi okukala e na ohoni? Okwa popi a ti: “Etumwalaka [lyOohapu dhaKalunga] olya fa omulilo gwa hwama meni lyandje. Onde gu idhidhimikile, ihe ine vula okumwena.” (Jer. 20:9) Eeno, oohapu dhaJehova odha li dha pe Jeremia oonkondo nodhe mu ningitha u uvithe.

9. Omolwashike oohapu dhaKalunga tadhi vulu oku tu guma momukalo moka dha li dha gumu Jeremia?

9 Montumwafo ye ndjoka a li a nyolele Aahebeli, omuyapostoli Paulus okwa nyola a ti: “Oohapu dhaKalunga odhi na omwenyo nodhi na oonkondo dhokulonga sha. Odho odhi na omayego dhi vule egongamwele lyoongenge mbali. Otadhi tete e tadhi adha sigo okomwenyo nombepo, moongolo nomomongo. Otadhi holola puuyelele omahalo nomadhiladhilo gomomitima dhaantu.” (Heb. 4:12) Etumwalaka lyaKalunga nenge oohapu dhe otadhi vulu oku tu guma momukalo moka dha li dha gumu Jeremia. Dhimbulukwa kutya nonando aantu oya li ya longithwa okunyola Ombiimbeli, yo kayi shi owala ehwata lyomambo ngoka ge na uunongo wopantu, molwaashoka olya nwethwa mo kuKalunga. MuPetrus omutiyali 1:21, otatu lesha taku ti: Kaku na nando elaka lyopahunganeko lya za mehalo lyomuntu, ihe aantu mokupopya elaka lya za kuKalunga oya wilikwa kOmbepo Ondjapuki.” Ngele otwa kala hatu kutha ethimbo lyokukonakona Ombiimbeli nawa paumwene, omadhiladhilo getu otage ku udhithwa netumwalaka ndyoka lya nwethwa mo kombepo ondjapuki. (Lesha 1 Aakorinto 2:10.) Etumwalaka ndyoka otali vulu okukala ‘lya fa omulilo gwa hwama’ meni lyetu, opo kaatu vule oku li kaleka owala mutse yene.

10, 11. (a) Otu na okukala hatu konakona Ombiimbeli ngiini opo tu kale tu na uulaadhi wokupopya? (b) Tumbula po nando yimwe yomoonkatu ndhoka ngoye to dhiladhila okukatuka opo wu hwepopaleke ekonakono lyoye lyopaumwene.

10 Opo ekonakono lyetu lyopaumwene lyOmbiimbeli li tu nwethe mo lela, oli na okuningwa momukalo moka etumwalaka lyayo tali adha omitima dhetu, nokungeyi otali gumu uuntu wetu womeni. Pashiholelwa, omupolofeti Hesekiel okwa li a mono emoniko moka a li a pulwa a lye po ondhingwambo ndjoka ya li yi na etumwalaka ndyoka a li e na oku ku uvithila aantu mboka ya li inaaya hala okupulakena. Hesekiel okwa li e na okukala e uvite ko nawa etumwalaka ndyoka alihe noku li ninga oshitopolwa she mwene. Ngele natse osho twa kala hatu ningi, oshilonga shokuuvitha etumwalaka ndyoka otashi ka kala oshiwanawa, sha fa shi na omulyo gwomagadhi goonyushi.—Lesha Hesekiel 2:8–3:4, 7-9.

11 Otu li monkalo ya faathana naandjoka yaHesekiel. Aantu oyendji kunena inaya hala nando okuuva shoka Ombiimbeli tayi ti. Ngele otwa kala nokudhiginina okupopya oohapu dhaKalunga, osha simana tu konakone Omanyolo momukalo ngoka tagu tu pitike tu ga uve ko nawa. Natu kale hatu dhi konakona pandjigilile, ihe hamaluthe. Ehalo lyetu nali kale lya fa ndyoka lyomupisalomi ngoka i imbi ta ti: “OMUWA, omugameni nomuhupithi gwandje, taamba oohapu nomadhiladhilo gandje!” (Eps. 19:14) Inashi simana tuu tu kuthe ethimbo lyokutedhatedha kwaashoka twa lesha, opo oshili yOmbiimbeli yi ye muule womitima dhetu! Dhoshili, otu na okukambadhala okuhwepopaleka ekonakono lyetu lyopaumwene.b

12. Omolwashike okugongala kwopaKriste haku tu kwathele tu kale hatu wilikwa kombepo ondjapuki?

12 Omukalo gulwe opo tu mone uuwanawa mombepo ondjapuki yaJehova, ogwo ‘okusilathana oshimpwiyu, okukwathathana mokuholathana nokulongelathana uuwanawa, twaaha ethe po okugongala pamwe.’ (Heb. 10:24, 25) Okuninga oonkambadhala tu kale hatu kala pokugongala kwopaKriste pandjigilile, okupulakena nawa nosho wo okutula miilonga shoka twi ilongo odho omikalo omiwanawa dhokuulika kutya ohatu wilikwa kombepo. Oshoshili kutya ombepo yaJehova ohayi gandja ewiliko okupitila megongalo.—Lesha Ehololo 3:6.

Omauwanawa ngoka haga zi mokukala aalaadhi

13. Oshike tatu vulu okwiilonga mwaashoka Aakriste yomethelemumvo lyotango ya li ya gwanitha po miilonga yokuuvitha?

13 Ombepo ondjapuki oyi na oonkondo yi vule adhihe meshito alihe nohayi vulu okupa aantu oonkondo ya longe ehalo lyaJehova. Aakriste yomethelemumvo lyotango oya li ya nwethwa mo kuyo opo ya gwanithe po iilonga iinenenene yokuuvitha. Oya li yu uvithile “aantu ayehe yomuuyuni” onkundana ombwanawa. (Kol. 1:23) Ngele tatu dhiladhila kutya oyendji yomuyo oya li aantu “inaa longwa,” ohashi kala sha yela kutya oya li yi inyengithwa kombepo yi na oonkondo kaaku na we.—Iil. 4:13.

14. Oshike tashi vulu oku tu kwathela tu kale twa “hwama mombepo”?

14 Mokukala pamukalo ngoka tagu tu pitike tu wilikwe kombepo ondjapuki monkalamwenyo yetu, otaku ke tu inyengitha tu gwanithe po uukalele wetu nuulaadhi. Okugalikana twaahe na oluthuwo tu pewe ombepo, okukonakona nuukeka paumwene, okutedhatedha pamwe negalikano kwaashoka twa lesha nokuya kokugongala kwopaKriste pandjigilile, ayihe mbika otayi eta omauwanawa ngoka taga vulu oku tu kwathela tu kale twa “hwama mombepo.” (Rom. 12:11) Ombiimbeli oya popi shi na ko nasha ‘nOmujuda gumwe, edhina lye Apollos, a valelwa muAleksandria, ngoka a li e ya kuEfeso,’ ya ti: “Okwa [li a hwama mombepo e ta] popi nuulaadhi nokwa longo aantu elongo lyu uka kombinga yaJesus.” (Iil. 18:24, 25, yelekanitha NW.) Mokukala twa “hwama mombepo,” otatu vulu okuulika uulaadhi muukalele wetu wegumbo negumbo nosho wo uuna tatu gandja uunzapo wontukuluka.—Rom. 12:11, OB-1954.

15. Ongiini okupopya nuulaadhi haku tu etele uuwanawa?

15 Okupopya nuulaadhi mokugandja uunzapo otaku tu etele uuwanawa. Iikala yetu otayi ka hwepopala molwaashoka otu uvite kutya iilonga yetu oya simana noyi na uuwanawa. Otatu ka kala twa hwama noonkondo molwaashoka ohatu mono enyanyu enene uuna uukalele wetu tawu pondola. Uulaadhi wetu otawu ka kala wo wa kolekwa molwaashoka otu shi shi kutya iilonga yetu yokuuvitha oye endelela.

16. Oshike tu na okuninga ngele otwa kala kaatu na we uulaadhi womuukalele mboka twa li tu na nale?

16 Ongiini ngele otwa kala kaatu na we uulaadhi womuukalele mboka twa li tu na nale? Ngele osho, otwa pumbwa okuninga eikonakono lyomuule. Paulus okwa li a nyola a ti: “Ikonakoneni, ne mu iyeleke, opo mu tale, ngele omu li tuu meitaalo.” (2 Kor. 13:5) Ipula mwene to ti: ‘Onda hwama ngaa natango mombepo? Mbela ohandi galikana ngaa kuJehova a pe ndje ombepo ye? Mbela omagalikano gandje ohagu ulike ngaa kutya onde mu inekela mokulonga ehalo lye? Mbela oge na oohapu dholupandu omolwuukalele mboka e tu inekelela? Ohandi konakona paumwene shi thike peni? Ohandi tedhatedha shi thike peni kombinga yaashoka nda lesha naashoka ndu uva? Ohandi kutha ombinga shi thike peni pokugongala kwegongalo?’ Okudhiladhila komapulo ngaashi ngaka otaku vulu oku ku kwathela wu ndhindhilike kutya ongiini to vulu okuhwepopaleka onkalo yoye.

Ombepo yaKalunga nayi ku ninge omulaadhi

17, 18. (a) Iilonga yokuuvitha otayi longwa shi thike peni kunena? (b) Ongiini tatu vulu okuulika “uulaadhi uunene” mokuuvitha onkundana ombwanawa yUukwaniilwa waKalunga?

17 Omuyumudhwa Jesus okwa li a lombwele aalongwa ye a ti: “One otamu ka pewa oonkondo, uuna Ombepo Ondjapuki ta ka tililwa mune. Nena one otamu ka ninga oonzapo dhokuhokolola ndje paantu ayehe mboka ye li muJerusalem, muJudea alihe nomuSamaria sigo omiilongo ayihe yokombanda yevi.” (Iil. 1:8) Iilonga mbyoka ya li ya tameke okulongwa pethimbo ndyoka otayi longwa inaashi monika nale kunena. Oonzapo dhaJehova dhi li lwopomamiliyona gaheyali ohadhi uvitha etumwalaka lyUukwaniilwa miilongo yi vulithe 230, nokulonga muukalele konyala oowili omamiliyona eyuvi 1,5 momvula. Itashi nyanyudha tuu okukala aalaadhi mokukutha ombinga miilonga mbika itaayi ke endululwa we!

18 Ngaashi sha li methelemumvo lyotango, kunena iilonga mbika yokuuvitha muuyuni auhe otayi longwa kohi yewiliko lyombepo yaKalunga. Ngele otwi inyenge kewiliko lyombepo, otatu ku ulika kutya otu na “uulaadhi uunene” muukalele wetu. (Iil. 28:31) Onkee ano, natu wilikweni kombepo sho tatu uvitha onkundana ombwanawa yUukwaniilwa waKalunga.

[Omanyolo gopevi]

a Omadhina oga lundululwa.

b Opo wu mone uuwanawa wa dhenga mbanda mokulesha Ombiimbeli nosho wo mekonakono lyo ye lyopaumwene, tala embo Mona ouwa mOfikola yOukalele woPauteokratika montopolwa yi na oshipalanyolo “Kala u hole okulesha” nosho wo “Okukonakona Eendjovo daKalunga ohaku tu etele ouwa,” omapandja 21-32.

Owi ilonga shike?

• Omolwashike twa pumbwa okukala aalaadhi mokupopya oohapu dhaKalunga?

• Oshike sha li sha kwathele aalongwa yotango ya popye nuulaadhi?

• Ongiini tatu vulu okukala tu na uulaadhi?

• Ongiini okukala tu na uulaadhi taku tu etele uuwanawa?

[Ethano pepandja 16]

Ongiini aavali taya vulu okukwathela aanona yawo ya kale ye na uulaadhi?

[Omathano pepandja 17]

Egalikano paufupi otali vulu oku ku kwathela wu kale wu na uulaadhi muukalele

    Ndonga Publications (1987-2025)
    Za mo
    Inda mo
    • Oshindonga
    • Tumina yalwe
    • Hogolola
    • Copyright © 2025 Watch Tower Bible and Tract Society of Pennsylvania
    • Ngele to longitha ongulumambo yetu
    • Uuyelele wiinima yopaumwene
    • Privacy Settings
    • JW.ORG
    • Inda mo
    Tumina yalwe