Nkene etumwalaka lyaJesus lye ku kwatela mo

“Ngame onde ya, opo ya kale ye na omwenyo meudhililo alihe lyagwo.”—JOHANNES 10:10.

ELALAKANO enene lyaJesus Kristus okuya kombanda yevi okugandja, ihe hakupewa. Okupitila muukalele we okwa pe aantu omagano kaage shi okuyelekwa, etumwalaka ndyoka tali holola oshili kombinga yaKalunga nosho wo ehalo lye. Mboka taya taamba ko etumwalaka ndyoka otaya vulu okunyanyukilwa onkalamwenyo ohwepo ngaashingeyi, ngaashi Aakriste yashili omamiliyona ye shi mona.a Oshinima sha simanenena metumwalaka ndyoka Jesus a li u uvitha osho omagano ngoka ge na ondilo, sha hala okutya, omwenyo gwe gwa gwanenena ngoka a gandja omolwetu. Onkalonawa yetu yaaluhe oyi ikolelela kunkene tatu inyenge ketumwalaka ndyoka lya simanenena.

Shoka Kalunga naKristus ya gandja Jesus okwa li e shi kutya ota ka dhipagwa nonyanya kaatondi ye. (Mateus 20:17-19) Oohapu dhe dha tseyika nawa ndhoka dhi li muJohannes 3:16 otadhi ti: ‘Osho ngeyi Kalunga a kala e hole uuyuni, oye a gandja Omwana awike, opo shaa ngoka te mu itaale, kaa kane, ihe a kale e na omwenyo gwaaluhe.’ Jesus okwa ti wo kutya ye okwe ya ‘okugandja omwenyo gwe, a hupithe oyendji.’ (Mateus 20:28) Omolwashike a ti kutya omwenyo gwe ogwa li gu na okugandjwa, pehala lyokukuthwa mo?

Omolwohole ye onene Kalunga okwa ningi elongekidho opo aantu ya hupithwe muulunde mboka we etitha okwaahagwanenena neso. Okwe shi ningi sho a tumu Omwana epona kombanda yevi a gandje ekuliloyambo. Jesus okwa gandja omwenyo gwe gwa gwanenena nehalo ewanawa omolwetu. Elongekidho ndyoka ohali ithanwa ekulilo noli li omagano kaaku nawe ngoka Kalunga a pa aantu.b Omagano ngoka otaga vulu oku ke tu petha omwenyo gwaaluhe.

Shoka wa pumbwa okuninga Mbela owa pandula omagano gekuliloyambo? Oshi ikolelela kungoye. Natu tye nduno gumwe okwe ku etele omagano ga gonyenwa mokapakete. Omagano ngoka otaga ka ninga owala goye ngele we ga taamba e to ga kutha mo mokapakete. Sha faathana, Jehova okwe ku pa ekuliloyambo, ihe omagano ngoka otaga ningi owala goye mwene ngele we ga taamba. Oto ke ga taamba ngiini?

Jesus okwa ti kutya “ngoka te mu itaale,” oye ta ka mona omwenyo gwaaluhe. Owu na okukala neitaalo monkalamwenyo yoye ayihe. (Jakob 2:26) Okukala neitaalo tali longo muJesus otashi ti kutya onkalamwenyo yoye oyi na okukala metsokumwe naashoka a popya nosho wo iilonga ye. Opo wu shi ninge owu na okukala wu shi nawa Jesus nosho wo He. Jesus okwa ti: “Mboka ye ku tseya, Kalunga awike kashili, noya tseya woJesus Kristus, ngoka we mu tumu, oyo mboka ye na omwenyo gwaaluhe.”—Johannes 17:3.

Konyala oomvula 2000 dha piti, Jesus Kristus okwa li u uvitha etumwalaka ndyoka lya lundulula onkalamwenyo yaantu omamiliyona muuyuni auhe. Mbela owa hala okutseya oshindji kombinga yetumwalaka ndyoka nosho wo nkene tali vulu oku ku etela uuwanawa pamwe naaholike yoye ngaashingeyi nosigo aluhe? Oonzapo dhaJehova otadhi ka kala dha nyanyukwa oku ku kwathela.

Jesus Kristus okwa li u uvitha etumwalaka ndyoka tali vulu okulundulula onkalamwenyo yoye sigo aluhe.

[Omanyolo gopevi]