Omapulo okuza kaaleshi

Molwaashoka Jehova okwi indika elongelo lyiikalunga, omolwashike kaa li a geele Aaron sho a li a ningi ontana yoshingoli?

Sho Aaron a li a ningi ontana yoshingoli, ngaashi sha nyolwa muEksodus ontopolwa 32, okwa li a yono oshipango shaKalunga shi na ko nasha nelongelo lyiikalunga. (Eks. 20:3-5) Omolwoshinima shoka a li a ningi, “OMUWA okwa li a geele wo Aaron noonkondo a hala oku mu dhipaga, nopethimbo tuu ndyoka [Moses okwa] galikanene wo Aaron.” (Deut. 9:19, 20) Mbela egalikano lyaMoses olya li “li na oonkondo” moshinima shaAaron? (Jak. 5:16) Eeno. Omolwegalikano ndyoka nosho wo molwomatompelo gamwe gaali Jehova okwa fa a li a yamukula egalikano lyaMoses noka li a geele Aaron.

Osha yela kutya etompelo limwe oondyoka li na ko nasha nondjokonona yaAaron yuudhiginini. Sho Moses a li a lombwelwa a ye kuFarao noku kuthe mo oshigwana shaIsraeli muEgipiti, Jehova okwa li a hogolola Aaron a ye naMoses ye a ka popye e li omupopiliko gwe. (Eks. 4:10-16) Aalumentu mbaka yaali oya li aavuliki noya li ya holokele koshipala shomukwaniilwa gwaEgipiti lwiikando oyindji, noyi idhidhimikile okuya kuFarao ngoka a li e na omutse omukukutu. Onkee ano, manga a li natango muEgipiti, Aaron okwa kala e na ondjokonona yiilonga yuudhiginini kuJehova.—Eks. 4:21.

Tala wo kwaashoka sha li sha ningitha Aaron a ninge ontana yoshingoli. Moses okwa li e li kondundu yaSinai uule womasiku 40. “Aantu sho ya mono Moses a kala ko kondundu inaa za ko” oya tompo Aaron e ya ningile oshikalunga. Aaron okwa longele kumwe nayo e ta ningi ontana moshingoli. (Eks. 32:1-6) Onkee ano, iikala yaAaron oya li yu ulike kutya omwenyo gwe kagwa li gwa taamba ko okulongela oshikalunga shoka. Okwa li e shi ningi owala molwaashoka a li ta kondjithwa. Sho Moses a li e ya lombwele kutya kehe gumwe ngoka a gama kuJehova ne ye kuye, pashiholelwa oyana yaLevi ayehe, mwa kwatelwa Aaron, oya li ya gama kombinga yaJehova. Aantu mboka ya li othimba yi na ongodhi mokulongela oshikalunga shoka ye li omayuvi gatatu, oya li ya si.—Eks. 32:25-29.

Opo nduno Moses okwa lombwele aantu a ti: “Omwa yono nayi.” (Eks. 32:30) Kungawo Aaron haye awike a li e na ondjo mokuyona. Ye nosho wo aantu oya li ya mono uuwanawa omolwohenda yaJehova.

Konima yoshiningwanima shontana yoshingoli, Jehova okwa ti kutya Aaron na langekwe po a ninge omusaaseri omukuluntu. Kalunga okwa lombwele Moses a ti: “Zaleka Aaron oonguwo oondjapuki e to mu gwayeke noku mu yapula, opo a ninge omuyambi a longele ndje.” (Eks. 40:12, 13) Osha yela kutya Jehova okwa li a dhimine po Aaron omolwuunkundi we. Aaron momutima gwe okwa kala omudhiginini kelongelokalunga lyashili, ihe ka li omulongeli gwiikalunga omunashipotha.