“Sindeni uuwinayi” mokupangela ondjahi

“Aaholike, inamu shunithila omuntu uuwinayi, . . . ihe sindeni uuwinayi nuuwanawa.”—ROM. 12:19, 21.

1, 2. Oonzapo ndhoka dha li molweendo odha gandja oshiholelwa oshiwanawa shini?

OONZAPO DHAJEHOVA dhi li 34 sho dha li molweendo dhu uka keyapulo lyoshitayimbelewa, ondhila moka dha li oya katekwa omolwuupyakadhi mboka ya li yi na. Nonando oya li ye na okutuka owala uule wowili yimwe, oya kala uule woowili 44 pokapale koondhila mpoka pwaahe na iikulya ya gwana nomeya nosho wo uundjugo wokolela. Aafalelwa oyendji oya li ya geya noya kala nokuningila aaniilonga pokapale omatilitho. Ihe aamwatate naamwameme oya kala ya ngungumana.

² Lwahugunina, Oonzapo odha thiki, ihe odha adha oshitopolwa shahugunina shopolohalama yelangeko tashi ningwa. Nonando odha li dha vulwa odha kala po konima yoshipopiwa opo dhi nyanyukilwe endathano naamwatate yomoshitopolwa. Konima yethimbo, odha dhimbulula kutya eidhidhimiko neipangelo lyadho olya li li wetike. Gumwe gwomaafaalelwa okwa lombwele aalongi yomondhila a ti: “Ando mondhila muno kamwa li Aakriste 34, ando pokapale mpano opwa tukuka evundakano.”

Otu li muuyuni wu udha ondjahi

3, 4. (a) Ongiini nuule wethimbo li thike peni ondjahi nelongithonkondo ya kala nokupangela aantu? (b) Mbela Kain okwa li ta vulu okupangela ondjahi ye? Shi yelitha.

³ Omathininiko gonkalamwenyo yiinima yuukolokoshi otaga vulu okugeyitha aantu. (Omuuv. 7:7) Olundji ongeyo ndjoka ohayi etitha uutondwe nelongitho lyoonkondo. Opu na iita pokati kiilongo yilwe, nomahilathano ngoka tage eta oontamanana momagumbo otagi indjipala. Ongeyo ya tya ngaaka nelongithonkondo oya za nale. Kain, omwanamati gwosheeli shaAdam naEva okwa dhipaga omumwayina Abel omolwefupa. Kain oshinima shika shinyanyalitha okwe shi longo nonando Jehova okwe mu kumagidha a pangele ondjahi ye nokwe mu uvanekele kutya ote ke mu yambeka ngele okwe yi pangele.—Lesha Genesis 4:6-8.

⁴ Nonando Kain ka li a gwanenena, okwa li ta vulu okuninga ehogololo moshinima shika. Okwa li ta vulu okupangela ondjahi ye. Onkee ano, okwa li e na okuhumbata omutengi gwiilonga ye. Sha faathana, oshidhigu kutse okuyanda ondjahi niilonga iiwinayi molwaashoka inatu gwanenena. Uupyakadhi wulwe uunene owo “omathimbo omadhigu” ngoka tu li mugo. (2 Tim. 3:1) Pashiholelwa, onkalo yuuhupilo otayi vulu oku tu thininika pamaiyuvo. Opolisi nomahangano ngoka haga kwathele omaukwanegumbo oya ti kutya oontamanana nelongithonkondo momaukwanegumbo ohayi etithwa unene kuuhupilo mboka tawu shongola.

5, 6. Iikala yuuyuni yini tayi vulu oku tu nwetha mo?

⁵ Aantu oyendji mboka hatu endathana nayo ‘oyi ihole,’ oye ‘hole uuntsa naadhudhu.’ Oshipu okunwethwa mo kaantu mboka ye na omaukwatya ngoka hage tu yemateke. (2 Tim. 3:2-5) Oofilima noopolohalama odhindji ko-TV ohadhi hwahwameke unene okukwatela onkone, elongithonkondo nolundji ohadhi ulike kutya oshi li nawa okukandula po omaupyakadhi okupitila miinima mbyoka. Aatali ohaya hwahwamekwa opo ya kale ya halelela okumona nkene aatondi “taya ningilwa shoka yi ilongela,” nolundji ohaya dhipagwa nonyanya kwaangoka a tali ka ko e li ofule.

⁶ Omitotolombo ndhoka otadhi humitha komeho “ombepo yuuyuni mbuka” noyomupangeli gwawo omukwanyanya, Satana. (1 Kor. 2:12; Ef. 2:2; Eh. 12:12) Ombepo ndjoka ohayi humitha komeho omahalo gopanyama notayi kondjithathana thiluthilu nombepo ondjapuki yaKalunga niiyimati yayo. Ombiimbeli oye tu longa kutya katu na okushunithila aantu uuwinayi. (Lesha Mateus 5:39, 44, 45.) Ongiini tatu vulu okutula lela miilonga omalongo gaJesus?

Iiholelwa iiwanawa niiwinayi

7. Oshike sha li sha ningwa po sho Simeon naLevi inaaya pangela ondjahi yawo?

⁷ MOmbiimbeli omu na omayele ngoka tage tu kwathele nkene tu na kupangela ondjahi nomu na wo iiholelwa yaashoka tashi ke tu ningilwa ngele tatu yi pangele nosho wo ngele itaatu yi pangele. Tala shoka sha li sha ningwa po sho oyana yaJakob Simeon naLevi ya geele Sikem sho a mitike omumwayina Dina. Oya li ya ‘geya unene.’ (Gen. 34:7) Oyanamati yaJakob mboka oya ponokele oshilando shaSikem noye shi yugu e taya kwata po aakiintu naanona. Ayihe mbika inaye yi ninga owala medhina lyaashoka sha ningilwa Dina, ihe otashi vulika omolwuuntsa. Oya li yu uvite kutya Sikem okwe ya hinda pamwe nahe Jakob. Ihe mbela Jakob okwa li a tala ko ngiini eihumbato lyawo?

8. Ehokololo lyaSimeon naLevi olyu ulike shike kombinga yokukwatela onkone?

⁸ Oshinima shoka sha ningwa kuDina osha li she ehameke he, Jakob, ihe nonando ongaaka, okwa li u uvitile nayi shoka oyanamati ya ningi. Simeon naLevi oya li ya kambadhala okupopila iilonga yawo taya ti: “Inatu hala, omumwameme ta ningwa ngaaka a fa ohonda.” (Gen. 34:31) Ihe hapo owala sha li sha hulile mpoka, molwaashoka Jehova okwa li a yemata. Konima yoomvula odhindji, Jakob okwa lombwelwa kutya omolwelongithonkondo nondjahi yaSimeon naLevi, oluvalo lwawo otalu ka halakanithilwa muIsraeli. (Lesha Genesis 49:5-7.) Kalunga nahe yawo Jakob, kaya li ye ya hokwa omolwokwaahapangela ondjahi yawo.

9. Oshike shaale shi geyithe David?

⁹ Omukwaniilwa David okwa li e na oompito odhindji dhokugalulila aatondi ye uuwinayi, ihe ine shi ninga. (1 Sam. 24:3-7) Ihe oshikando shimwe, okwa ale a geye. Omulumentu gumwe omuyamba gwedhina Nabal okwa li a vavaukile aapiya yaDavid nonando oya li ya gamene aapiya yaNabal noonzi dhe. Aapiya yaDavid oya li ya yemata unene, na David okwa ale e mu galulile uuwinayi. Omanga David naapiya ye ya li mondjila oku ka ponokela Nabal nuukwanegumbo we, omupiya gumwe omugundjuka okwa lombwele Abigajil, omukadhi omunandunge gwaNabal shoka sha ningwa po nokwe mu kumagidha a ninge po sha. Abigajil okwa tula kumwe nziya omagano ogendji nokwa yi a ka tsakaneke David. Abigajil okwa gandja ombili omolwuugoya waNabal e ta pula David e mu dhimine po. David okwi igaluluka e ta ti: ‘Na hambelelwe molwaashoka wa gamene ndje kiihuna yedhipago.’—1 Sam. 25:2-35.

Eihumbato lyopaKriste

10. Aakriste oye na okuulika iikala yini kombinga yondjahi?

¹⁰ Shoka sha li sha ningwa kuSimeon naLevi nosho wo kuDavid naAbigajil otashi ulike lela kutya Jehova oku tonde ondjahi ya pitilila nokushunithila uuwinayi. Oha yambeke oonkambadhala dhokukonga ombili. Omuyapostoli Paulus okwa nyola a ti: “Ne yene kombinga yeni ningeni ashihe tamu shi vulu, mu kale nombili naantu ayehe. Aaholike, inamu shunithila omuntu uuwinayi, ihe etheni, ondjahi yaKalunga yi shi ninge. Oshoka enyolo otali ti: ‘Egeelo olyandje, ongame mwene tandi ka geela, Omuwa osho ta ti.’ Onkee ano ninga, ngaashi enyolo tali ti: ‘Omutondi gwoye ngele okwa sa ondjala, mu pa a lye. Ngele okwa sa enota, mu pa a nwe, oshoka moku shi ninga oto gongele omakala ga tema komutse gwe.’ Inamu sindwa kuuwinayi, ihe sindeni uuwinayi nuuwanawa.”—Rom. 12:18-21.a

11. Ongiini omumwameme gumwe a li i ilongo nkene e na okupangela ongeyo ye?

¹¹ Omayele ngoka otatu vulu oku ga tula miilonga. Pashiholelwa, omumwameme gumwe okwa li a nyenyeta pomukuluntugongalo kombinga yomuhona gwe omupe. Omumwameme okwa ti kutya omuhona gwe oku na onyanya noke na ohenda. Omumwameme okwa li e mu geela nokonyala e ethe po iilonga. Omukuluntugongalo okwe mu kumagidha kaa katuke onkatu meendelelo, molwaashoka okwa mono kutya ongeyo ye oyo ya nayipaleka onkalo. (Tit. 3:1-3) Omukuluntugongalo okwa ti kutya nonando oku mone iilonga yimwe, oku na natango okulundulula iikala ye uuna ta ningwa nayi. Okwe mu pe omayele u ungaunge nomuhona gwe ngaashi Jesus e tu longa. (Lesha Lukas 6:31.) Omumwameme okwa zimine. Oshe eta iizemo yini? Konima yethimbo iikala yomuhona gwe oya lunduluka, nokwa li ha pandula omumwameme omolwokulonga kwe nuudhigini.

12. Omolwashike omaupyakadhi pokati kAakriste hage tu ehameke unene?

¹² Katu na okukala twa kumwa ngele otu na uupyakadhi pokati ketu nagumwe ngoka kee shi Omukriste. Otu shi kutya iinima monkalelo yuuyuni waSatana olundji kayi li pauyuuki notu na okukondja opo aakolokoshi kaaye tu geyithe. (Eps. 37:1-11; Omuuv. 8:12, 13; 12:13, 14) Ihe ohashi vulika shi tu ehameke unene ngele tu na uupyakadhi nomumwatate nenge nomumwameme. Omumwameme gumwe okwa ti: “Onda li ndi na uupyakadhi okuzimina kutya oshigwana shaJehova inashi gwanenena sho nde ya moshili.” Ohatu kala twi inekela kutya iilyo ayihe megongalo lyopaKriste otayi ka ungaunga natse nohenda, konima sho twa zi muuyuni mboka waahe na ohenda nohole. Onkee ano, ohashi tu ehameke noku tu geyitha uuna Omukriste omukwetu a katuka momukalo gwa samapala nenge itaagu opalele, uunene tuu ngele oku na oshinakugwanithwa megongalo. Otashi vulika tu pule ngeyi: ‘Iinima ya tya ngawo otayi vulu ngiini okuholoka mokati koshigwana shaJehova?’ Iinima yoludhi ndoka oya holokele nomokati kaagwayekwa pethimbo lyaayapostoli. (Gal. 2:11-14; 5:15; Jak. 3:14, 15) Oshike tu na okuninga uuna twa gumwa kiinima mbyoka?

13. Omolwashike tu na okusinda omaupyakadhi, nongiini tu na oku shi ninga?

¹³ Omumwameme ngoka a popiwa metetekelo okwa ti: “Ondi ilongo okugalikanena kehe gumwe ngoka a yemateka ndje. Shika osha li sha kwathele ndje aluhe.” Ngaashi twe shi lesha metetekelo, Jesus okwe tu longa tu galikanene aahepeki yetu. (Mat. 5:44) Otu na okukala hatu kwatele aluhe aamwatate naamwameme yopambepo momagalikano getu. Ngaashi owala he ha kala a hala oyana ya kale ye holathane, naJehova okwa hala aapiya ye kombanda yevi ya kale taya longele kumwe. Omanga twa tegelela oku ka kala nombili notwa nyanyukwa sigo aluhe, ote tu longo nale tu kale hatu shi ningi. Sho tatu longo iilonga ye ya simana okwa hala tu kale tatu longele kumwe. Onkee ano, natu kandule po omaupyakadhi getu nenge tu ‘dhime po’ omayono e tatu kala nombili. (Lesha Omayeletumbulo 19:11.) Otu na oku kwathelathana uuna pwa holoka uupyakadhi pokati ketu naamwatate, pehala lyokukala kokule nayo, naJehova ote ke tu papatela ‘momaako ge gaaluhe.’—Deut. 33:27.

Eidhidhimiko ohali eta iizemo iiwanawa

14. Ongiini tatu vulu okukondjitha enwethomo lyaSatana lyokweeta etopoko?

¹⁴ Opo Satana noompwidhuli dhe ya piyaganeke iilonga yetu yokuuvitha onkundana ombwanawa ohaya vundakanitha onkalo momaukwanegumbo nomegongalo. Ohaya kambadhala okweeta etopoko molwaashoka oye shi kutya otali vulu oku tu yona po. (Mat. 12:25) Opo tu kondjithe enwetho mo lyawo ewinayi oshi li nawa okulandula omayele gaPaulus ngoka taga ti: ‘Omumati gwOmuwa ita pumbwa okutamanana. Ye oku na okukala omwiidhidhimiki.’ (2 Tim. 2:24) Natu kale tu shi kutya tse “itatu kondjitha aantu, ihe otatu kondjitha oonkondo dhomombepo.” Opo tu pondole molugodhi nduka otwa pumbwa okwiihomateka iikondjitho yopambepo, mwa kwatelwa “okuuvitha elaka etoye lyombili.”—Ef. 6:12-18.

15. Otu na okwiinyenga ngiini komaponokelo ngoka tage tu zilile kondje yegongalo?

¹⁵ Aatondi yaJehova mboka kaaye shi iilyo yegongalo ohaya ponokole nonyanya oshigwana she oshinambili. Yamwe ohaye tu ponokele komalutu ko kwene. Yalwe ohaye tu lundile miikundaneki nenge moompangu dhopauyuni. Jesus okwa lombwele aalunduli ye ya kale yi ilongekidha okuningilwa iinima mbyoka. (Mat. 5:11, 12) Otatu ki inyenga ngiini uuna tatu shi ningilwa? Katu na nando ‘okushunithila uuwinayi’ gumwe mokupopya nenge moku mu guma kolutu.—Rom. 12:17; lesha 1 Petrus 3:16.

16, 17. Aamwatate megongalo limwe oya li ya taalela eshongo lini?

¹⁶ Kutya nee Ondiaboli oyi kambadhale okuninga shike, otatu vulu okugandja uunzapo uuwanawa ngele tatu ‘sindi uuwinayi nuuwanawa.’ Pashiholelwa, montuntu yimwe egongalo limwe olya adhika lya futa nale oshinyanga shaayehe opo li vule okuningila mo Edhimbuluko. Sho omusita gwongeleka yomoshitopolwa e shi uvu okwa lombwele iilyo yongeleka ye yi ye komambo moshinyanga shoka pethimbo mpoka Edhimbuluko li na okuningwa. Ihe omukuluntu gwopolisi okwa lombwele omusita gwongeleka ndjoka a gandje ompito kOonzapo. Ihe sho ethimbo lya thiki, oshinyanga osha li shu udha iilyo yongeleka ndjoka noya tameke nelongelokalunga lyawo.

¹⁷ Omanga opolisi tayi ilongekidha oku ya tidha mo koonkondo omusita gwongeleka okwe ya komukuluntugongalo e te mu pula ta ti: “Omu na sha shi ikalekelwa ongulohi yonena?” Omumwatate okwe mu lombwele kutya otu na Edhimbuluko. Omusita ngoka okwa ti: “Inandi shi tseya!” Omupolisi okwi igidha a ti: “Otwe shi ku lombwela ongula yonena!” Omusita gwongeleka okwa li i ishi omakoto nokwa pula omukuluntugongalo ta popi ti imemeha ta ti: “Ngashingeyi otamu ningi nee ngiini? Tse otwa gongala nale. Otamu ka pitika opolisi yi tu tidhe mo?” Okwa li a hala okweenda aamwatate mevi, ya kale oyo ya fa ya gandja epitikilo kopolisi yi ya tidhe mo. Aamwatate oya li yi inyenge ngiini?

18. Aamwatate oya li yi inyenge ngiini koluhindo lwongeleka yimwe, noshe eta iizemo iiwanawa yini?

¹⁸ Oonzapo odha li dha zimine opo iilyo yongeleka mbyoka yi tsikile nelongelokalunga lyawo uule wominute 30, ihe nonando ongaaka oya pitililitha ethimbo. Konima sho iilyo yongeleka ya zi mo moshinyanga, aamwatate oya tameke nziya nEdhimbuluko. Esiku lya landula ko epangelo olya li lyu unganeke pu ningwe omapulapulo kombinga yaashoka. Konima sho oshili ya monika okakomitiye oka li ka lombwele ongeleka yi tseyithe kutya epuko kalya li kOonzapo, ihe okomusita gwawo. Okakomitiye oka pandula Oonzapo sho dha li dha ngungumana monkalo ndjoka ondhigu. Oonkambadhala dhadho okukala “nombili naantu ayehe” odha li dhe eta iizemo iiwanawa.

19. Oshike tashi vulu ishewe okuhumitha komeho ekwatathano lyombili nayalwe?

¹⁹ Omukalo omukwawo okukaleka po ekwatathano lyombili nayalwe ogwo okupopya kwetu. Oshitopolwa tashi landula ko otashi ka kundathana nkene tu na okupopya oohapu oombwanawa nankene tu na oku dhi tula miilonga.

[Enyolo lyopevi]

Oto vulu okuyelitha?

• Omolwashike aantu muuyuni kunena haya geye noonkondo?

• Iiholewa yOmbiimbeli yini tayi ulike iizemo yokupangela ondjahi nosho wo yokwaahe yi pangela?

• Oshike tu na okuninga uuna Aakriste oya kwetu ye tu ninga nayi?

• Otu na okwiinyenga ngiini ngele omaponokelo tage tu zile pondje yegongalo?

[Omathano pepandja 18]

Okuungaunga nombili nayalwe ohashi vulu okulundulula iikala yawo