Aaleshi Yoshifo Shetu Taya Pula:

Mbela Kalunga oku na etameko?

▪ Ombiimbeli otayi gandja eyamukulo kutya Kalunga ke na etameko. Kalunga oko owala a kala aluhe. Ngaashi naanaa edhiladhilo li na ko nasha nokukala po kwaKalunga aluhe li li oshinima oshidhigu okuuviwa ko, itatu vulu oku shi tinda molwaashoka owala itaatu vulu oku shi uva ko nawa.

Mbela oshi li ngaa mondjila okukala twa tegelela tu uve ko iinima ayihe kombinga yaKalunga? Omuyapostoli Paulus okwa popi a ti: “Ano [uuwindji] wuuyamba waKalunga ou thike peni! Uunongo noondunge dhe odha hulila peni! Olye ta vulu okufatulula omatokolo ge? Olye ta vulu okuuva ko oondjila dhe?” (Aaroma 11:33) Omadhiladhilo getu itaga vulu lela okuuva ko uunongo waKalunga nontseyo ye ngaashi owala okahanona itaaka vulu okuuva ko iilonga yomuvali gwako ayihe. Oohapu dhaPaulus ndhika dha nwethwa mo, nonando otadhi popi unene kombinga yuunongo waKalunga nohenda ye ndjoka ya yooloka ko kuyaantu, otadhi ulike kutya opu na uukwatya waJehova Kalunga nosho wo iilonga mbyoka yi li kokule unene nomadhiladhilo getu. Osha yela kutya okukala kwaKalunga kee na etameko oshinima shimwe shomiinima mbyoka. Natango, otatu vulu okukala tu na einekelo thiluthilu mwaashoka Ombiimbeli tayi longo kombinga yaKalunga. Jesus Kristus okwa popi kombinga yomanyolo omayapuki a ti: “Oohapu dhoye odho oshili.”—Johannes 17:17.

Sho Moses a li ta galikana kuJehova, okwa ti: “Oko wa li noto ka kala aluhe sigo aluhe.” (Episalomi 90:2) Mpaka Moses okwa hokolola okukala po kwaKalunga ku li oshinima tashi tanunuka koombinga dhi li mbali. Yimwe oyu uka konakuyiwa. Jehova oku li “ngoka ta kala e na omwenyo sigo aluhe.” (Ehololo 4:10) Kungawo, okukala po kwaKalunga otaku tsikile ku uka monakuyiwa sigo aluhe. Onkwawo oyu uka monakuziwa. Oku shi popya niitya yimwe, Kalunga ina shitwa ye ine ya po. Pehala lyaashono, okukala po kwaKalunga okwa kala po nale okuza monakuziwa kaaku na etameko.

Omadhiladhilo kombinga yiinima ihaayi monika omadhigu koyendji yomutse okuuva ko. Nonando ongawo, omathimbo gamwe ohatu ungaunga nomadhiladhilo omadhigu ngaashi okuyalula okuza ponola wu uka komeho nokuza ponola wu uka konima. Okuyalula oonomola otaku vulu okuyalulwa kaaku na ehulilo, okutya nee nduno okuuka pombanda nenge opevi. Mbela katu na okulongitha oshiholelwa shika shi na ko nasha noomvula dhokukala po kwOmushiti?

Onkee ano, oshi li she eleka sho Kalunga oye awike e na edhinasimaneko ‘Omukwaniilwa gwaaluhe.’ (1 Timoteus 1:17) Dhiladhila owala kombinga yaashika: Jesus Kristus, aayengeli omamamiliyona megulu nosho wo aantu kombanda yevi ayehe oye na etameko molwaashoka oya li ya shitwa. (Aakolossa 1:15, 16) Hasho shi li ngaaka naKalunga. Okukondjitha kutya Kalunga oku na okukala a shitwa otaku eta po omadhiladhilo kaage na oshilonga noitaaga hulu po kombinga yaangoka a shita Kalunga. Aawe, Jehova oye awike a kala po “aluhe sigo aluhe.” (Episalomi 90:2) Oku shi popya niitya yimwe, Jehova opo a kala “okuza komathimbo gonale.”—Judas 25.

Ihe kaleka momadhiladhilo kutya edhiladhilo kutya Kalunga okwa kala po kee na etameko oli li oshinima shoka tashi tu gumu paumwene. Kokutala nawa kegalikano lyaMoses otaku ulike kutya okukala po kwaKalunga kaaku na ehulilo otaku shilipaleke euvaneko lyopahole kutya otatu ka kala sigo aluhe. Mepingathano nokukalamwenyo kwetu kwongashingeyi hoka okufupi, Kalunga ota hokololwa e li “aluhe egameno lyetu.” E li He omunahole, Jehova okwa kala aluhe ha gamene oshigwana she nota ka tsikila oku shi gamena aluhe. Oshili ndjoka onkumithi nayi ku hekeleke.—Episalomi 90:1.