Inaya tila we ehulilo

MOOMVULA dho 1970 nasha Gary naKaren oya li ya tameke okwiitaala kutya ehulilo lyuuyuni oli li popepi. Onkee ano, oya zi mo moshilando moka ya li ya kala e taya yi komikandi ye ki ilongele yo yene. Oya li ya hala okuhupa.

Opo ya mone ontseyo ndjoka ya li taya ka pumbwa, oya li ya landa omambo, ya yi kootundi nokoosemina noya popi naantu oyendji ngaashi tashi vulika. Oya li ya ningi oshikunino e taya tsike omiti dhiiyimati omishona dhi li 50. Oya li ya landa oombuto niilongitho ya gwana. Oya li yi ilongo okumeneka iikunomwa noku yi pungula. Kuume kawo okwa li e ya longo okuteta onyama noku yi ninga oondhingu. Karen okwa li i ilongo okudhimbulula iimeno nosho wo omidhi mokuti opo ya vule oku dhi lya ngele iikulya mbyoka ye na ya pu po. Gary okwa li i ilongo okuninga omahooli okuza momapungu, nkene e na okuninga esiga lyiitenda hali longo niikuni nankene e na okutunga egumbo ndyoka li na kehe shimwe ya pumbwa.

Karen ota ti: “Omolwoonkalo dha nika oshiponga muuyuni pethimbo ndyoka, onda li ndi uvite kutya okukala po kwaantu okwa li pokuhula po.” Gary ota yelitha ta ti: “Ngaashi naanaa aagundjuka yalwe, onda li nda kambadhala okukandula po omaupyakadhi ngaashi uukwamuhoko, iita yaVietnam nosho wo eyonuko. Ihe onda li nda yematekwa nziya. Onda li ndi wete kutya aantu oya fa ye li pokwiihanagula po yo yene.”

Gary ota ti: “Uusiku wumwe sho nda li kaandi na shoka te ningi, onda kutha Ombiimbeli e tandi lesha okuza kuMateus sigo okEhololo. Onda li nde yi leshulula ishewe muusiku une wa ka landula ko. Ongula onene ontitano, onda lombwele Karen nda ti: ‘Otu li momasiku gahugunina. Kalunga ota ka katuka oonkatu nziya o opaleke evi. Otwa pumbwa okukonga mboka taya ka hupa.’” Gary naKaren oya tameke okuya elongelokalunga nelongelokalunga taya kongo aantu mboka ya hala okwiilongekidhila ehulilo.

Nziya, gumwe gwomOonzapo dhaJehova okwa li a konkola pegumbo lyawo nokwa li a tameke okukonakona Ombiimbeli nayo. Karen ota ti: “Onda li nda nyanyukwa noonkondo molwaashoka Omanyolo onda li nde ga yelithilwa nawa. Onda kala nale te kongo oshili kombinga yethimbo lyehulilo nohugunina onda li nde yi mono. Onda li nda mono etegameno lyashili lyonakuyiwa. Ihe nokuli oshinima shi vule mpoka, onda li nda tameke okukala nuukuume wopothingo naTate gwomegulu e li Omushiti naKalunga gwewangandjo.”

Gary ota ti: “Onkalamwenyo yandje oya tameke okukala yi na eityo. Sho nda tameke okukonakona Ombiimbeli, kanda li te vulu oku ku etha po. Onda lesha omahunganeko gOmbiimbeli, nda konakona uunzapo kutya oga li taga gwanithwa nonda li nda tompwa kutya Kalunga ota ka katuka onkatu nziya. Onda li te dhiladhila: ‘Aantu kaye na okukala tayi ilongekidhile iiponga, ihe onkalamwenyo ndjoka Kalunga e tu halela.’ ” Gary naKaren oya li ya mono etaloko li li nawa li na ko nasha nonakuyiwa. Pehala lyokukala tayi ipula kombinga yehulilo lyuuyuni, oya tameke okukala ye na einekelo kutya Kalunga ota ka hulitha po omaupyakadhi ngoka ga gwilila po aantu nota ka ninga evi oparadisa ishewe.

Ngashingeyi konima yoomvula 25, Gary naKaren otaya ningi shike? Karen ota ti: “Otandi tsikile okukokeka ohole yandje yokuhola Jehova Kalunga nosho wo eitaalo muye nohandi kambadhala okukwathela yalwe ya ninge sha faathana. Ngame naGary ohatu kwathelathana mokukambadhala okukaleka po uukwanegumbo wetu wa kola nowa hangana mokulongela Kalunga. Ohatu kambadhala tu kale twi iyunganeka nohatu kambadhala okukaleka onkalamwenyo yetu yanathangwa opo tu tu ukithe eitulomo lyetu kuyalwe nokoompumbwe dhawo.”

Gary okwa gwedha ko a ti: “Aluhe ohandi galikana Uukwaniilwa waKalunga wu ye nokweetela aantu omamiliyona epepelelo. Kehe ethimbo handi kutha ombinga mokuuvithila yalwe onkundana ombwanawa yUukwaniilwa, ohandi galikana ndi kwathele omuntu ngaa nando gumwe a kale e na etegameno okuza mOmbiimbeli. Muule woomvula 25 dha piti, Jehova okwa li a yamukula egalikano ndyoka. Ngame naKaren otwi itaala kutya Jehova ota ka eta omalunduluko omanene kombanda yevi, ihe inatu tila we ehulilo.”—Mateus 6:9, 10; 2 Petrus 3:11, 12.

[Ethano pepandja 9]

Ngashingeyi Gary naKaren ohaya nyanyukilwa okukwathela yalwe ya mone etegameno metumwalaka lyOmbiimbeli