Nkene Jesus a simanekitha uuyuuki waKalunga

“Kalunga okwa gandja Jesus, opo mokusa kwe a ninge iikulila, moka aantu mboka ye mu itaala, taa dhiminwa po oondjo dhawo. Kalunga okwe mu gandja, opo a ulike, nkene ta ningi aantu aayuuki koshipala she.”—ROM. 3:25.

1, 2. (a) Ombiimbeli otayi tu longo shike kombinga yonkalo yaantu? (b) Omapulo geni taga ka yamukulwa moshitopolwa shika?

EHOKOLOLO lyOmbiimbeli kombinga yuunashipotha moshikunino shaEden olyi shiwike nawa. Atuhe otwa gumwa kiilanduliko yuulunde waAdam, ngaashi sha yelithwa moohapu ndhika tadhi ti: “Uulunde owe etwa muuyuni komuntu gumwe, nuulunde we owe etelele eso. Onkee ano eso olya taandele maantu ayehe, oshoka ayehe oya yono.” (Rom. 5:12) Kashi na nee mbudhi kutya otu kambadhale shi thike peni okulonga shoka shi li mondjila, ohatu ningi omapuko, nomolwaashoka otwa pumbwa okudhiminwa po kuKalunga. Nokuli nomuyapostoli Paulus okwa li a nyenyeta a ti: “Uuwanawa mboka nda hala oku u ninga, ihandi u longo, ihe uuwinayi mboka inaandi u hala, owo he longo. Ongame omuntu omukweyi!” —Rom. 7:19, 24.

² Omolwuulunde wetu otwa gwana okwiipula omapulo ngaka ga simana: Osha li tashi vulika ngiini opo Jesus Omunasareti a valwe kee na oondjo? Ongiini onkalamwenyo yaJesus ya li ya simanekitha uuyuuki waJehova? Ndyoka lya simana unene olyo: Oshike sha tsakanithwa keso lyaKristus?

Uuyuuki waKalunga owa li wa patanekwa

3. Satana okwa li a pukitha ngiini Eva?

³ Aakuluntu yetu yotango, Adam naEva, oya li ye ekelehi uunamapangelo waKalunga sho ya li ya hogolola okupangelwa “keyoka ndyoka hali ithanwa omuhindadhi nenge Satana.” (Eh. 12:9) Natu tale kutya shika osha li sha ningwa ngiini. Omukalo gwaJehova gwokupangela gwuuyuuki ogwa li gwa tulwa momalimbililo kuSatana. Okwa li e shi ningi sho a pula Eva a ti: “Kalunga okwe mú lombwele shili, mwaaha lye ko komiti adhihe dhomeyana?” Eva okwa li e endulula shoka Kalunga a ya lombwele kutya omuti gwontumba kaya ya li ye na oku gu guma, oshoka ngele oye shi ningi, otaya si. Opo nduno Satana okwa li a lundile Kalunga kutya okwa fundja. Okwa ti: “Itamu si shili.” Satana okwa li a pukitha Eva moku mu itaalitha kutya Kalunga okwe mu indika sha oshiwanawa nosho wo kutya shampa a li oshiyimati shoka, ota kala a fa Kalunga mokukala a manguluka okuninga ngaashi a hala.—Gen. 3:1-5.

4. Ongiini aantu ya yi kohi yepangelo lyomupataneki Satana?

⁴ Satana okwa li a hala lelalela okutya ngele aantu oya manguluka ko kuKalunga, otaya ka kala ye na enyanyu. Pehala lyokwaambidhidha uunamapangelo waKalunga wuuyuuki, Adam okwa li a pulakene komukulukadhi gwe nokulya pamwe oshiyimati shoka shi indikwa. Kungawo Adam okwa li a kanitha ekwatathano lye lya gwanenena naJehova nokwa li e tu tula kondjoko yonyanya yuulunde neso. Pethimbo olyo tuu ndyoka, aantu oya yi kohi yepangelo lyomupataneki Satana, ‘kalunga kuuyuni mbuka.’—2 Kor. 4:4, OB-1954; Rom. 7:14.

5. (a) Ongiini Jehova a li a dhiginine oohapu dhe? (b) Kalunga okwa li a pe oluvalo lwaAdam naEva etegameno lini?

⁵ Jehova okwa li a dhiginine oohapu dhe dhi shi okwiinekelwa nokwa tokolele Adam naEva eso. (Gen. 3:16-19) Ihe shoka kasha li sha hala okutya elalakano lyaKalunga olya hulile muunyengwi. Hasho nando! Sho Jehova a li a tokola Adam naEva, okwa li a pe oluvalo lwawo lwomonakuyiwa etegameno ewanawa. Shika okwa li e shi ningi mokutseyitha elalakano lye lyokweeta po “oluvalo” ndoka Satana ta ka tsa moshithi. Ihe Oluvalo ndoka lwu uvanekwa olwa li talu ka aluka koshithi notalu ka “nyanyula omutse [gwaSatana].” (Gen. 3:15) Ombiimbeli otayi gwedha ko oshindji moshinima shika mokupopya kombinga yaJesus Kristus tayi ti: “Onkee ano Omuna gwaKalunga okwa holoka, opo a hanagule po iilonga yomuhindadhi.” (1 Joh. 3:8) Ihe ongiini eihumbato nosho wo eso lyaJesus lya li lya simanekitha uuyuuki waKalunga?

Eityo lyeninginitho lyaJesus

6. Otu shi shi ngiini kutya Jesus ina thigulula uulunde kuAdam?

⁶ E li omulumentu a koka, Jesus okwa li ta ka kala naanaa e thike pamwe naAdam sho a li a gwanenena. (Rom. 5:14; 1 Kor. 15:45) Shika otashi ti kutya Jesus okwa li e na okuvalwa a gwanenena. Ongiini shika sha li tashi wapa? Omuyengeli Gabriel okwa li a yelithile Maria yina yaJesus sha yela a ti: “Ombepo Ondjapuki otayi ku lambele, noonkondo dhaKalunga gwokombandambanda otadhi ku siikile. Onkee ano omunona nguka ota ka lukwa Omuna gwaKalunga.” (Luk. 1:35) Sho Jesus a li okanona, osha yela kutya Maria okwa li e mu hokololele iinima yontumba shi na ko nasha nokuvalwa kwe. Osho molwaashoka pompito yimwe sho Maria naJosef ngoka a tekula Jesus ya li ye mu adha motempeli yaKalunga, okanona haka oka li ke ya pula ka ti: “Kamu shi shi nani kutya ngame ondi na okukala mumbika yaTate?” (Luk. 2:49) Osha yela kutya okuza sho a li okanona okashona, Jesus okwa li e shi shi kutya ye Omwana gwaKalunga. Onkee ano osha li sha simanenena kuye okusimanekitha uuyuuki waKalunga.

7. Jesus okwa li e na eliko lini li na ondilo?

⁷ Jesus okwa li u ulike kutya okwa li e na ohokwe onene miinima yopambepo mokuya kokugongala kwelongelokalunga pandjigilile. Molwaashoka okwa li a gwanenena, osha yela kutya Jesus okwa li i ilongo nokuuva ko iinima ayihe mbyoka u uvu naambyoka a lesha mOmanyolo gOshihebeli. (Luk. 4:16) Okwa li wo e na eliko lilwe li na ondilo, sha hala okutya, olutu lwopantu lwa gwanenena ndoka lwa li talu vulu okuyambwa po pehala lyaantu. Sho Jesus a li a ninginithwa, okwa li a galikana notashi vulika a li ta dhiladhila kombinga yoohapu dhopahunganeko dhEpisalomi 40:6-8.—Luk. 3:21; lesha Aahebeli 10:5-10.a

8. Omolwashike Johannes Omuninginithi a li ta kambadhala okukeelela Jesus kaa ninginithwe?

⁸ Tango Johannes Omuninginithi okwa li a hala okukeelela Jesus kaa ninginithwe. Omolwashike? Omolwaashoka Johannes okwa li ta ninginitha Aajuda shi li endhindhiliko lyokwiiyela ombedhi omolwokuyona kwawo Ompango. E li omupambele gwe, Johannes okwa kala e shi kutya Jesus omuyuuki nonkee ano ka li a pumbwa okwiiyela ombedhi. Jesus okwa li a shilipaleke Johannes kutya osha li she eleka a ninginithwe. Jesus okwa li a yelitha kutya osha li shi na okuningwa ‘opo ya gwanithe ashihe shoka Kalunga e shi hala.’—Mat. 3:15.

9. Eninginitho lyaJesus olya li tali thaneke shike?

⁹ E li omuntu a gwanenena, Jesus okwa li ta vulu okuthika pehulithodhiladhilo kutya, ngaashi Adam, okwa li ta vulu okukala he yoluvalo lwa gwanenena. Ihe Jesus ka li nando a hala onakuyiwa ya tya ngaaka molwaashoka shika kasha li ehalo lyaJehova. Kalunga okwa li a tumu Jesus kombanda yevi opo a gwanithe po onkandangala yOluvalo lwu uvanekwa nenge Mesiasa. Shika osha li sha kwatela mo Jesus a yambe po omwenyo gwe gwopantu gwa gwanenena. (Lesha Jesaja 53:5, 6, 12.) Dhoshili, eninginitho lyaJesus kali na eityo lya fa ndyoka lyetu. Inaku kwatela mo okwiiyapulila Jehova, molwaashoka Jesus okwa li nale oshitopolwa shoshigwana shaIsraeli shi iyapulila Kalunga. Pehala lyaashono, eninginitho lyaJesus olya li tali thaneke okwiigandja kwe okulonga ehalo lyaKalunga ngaashi sha yelithwa mOmanyolo shi na ko nasha naMesiasa.

10. Okulonga ehalo lyaKalunga e li Mesiasa okwa kwatela mo shike, na Jesus okwa li u uvite ngiini kombinga yaashika?

¹⁰ Shoka Jehova a li a halela Jesus osha li sha kwatela mo okuuvitha onkundana ombwanawa yUukwaniilwa waKalunga, okuninga aantu aalongwa noku ya longekidha omolwiilonga yokuninga aantu aalongwa monakuyiwa. Okwiigandja kwaJesus okwa kwatela mo wo ehalo lye lyokwiidhidhimikila omahepeko neso linyanyalitha mokwaambidhidha uunamapangelo waJehova Kalunga wopauyuuki. Molwaashoka Jesus okwa li shili e hole He gwomegulu, okwa li a nyanyukilwa okulonga ehalo lyaKalunga nokwa li a mbilipalelwa sho a gandja olutu lwe lu li eyambo. (Joh. 14:31) Osha li she mu opalela wo okutseya kutya ongushu yomwenyo gwe gwa gwanenena otayi vulu okupewa Kalunga yi li iikulila opo yi tu kulile muupika woondjo nosho wo weso. Mbela Kalunga okwa li a hokwa eigandjo lyaJesus opo a humbate iinakugwanithwa mbika iinene? Eeno, okwa li e li hokwa shili.

11. Ongiini Jehova a li u ulike kutya okwa hokwa Jesus e li Mesiasa nenge Kristus omuuvanekwa?

¹¹ Aanyoli ayehe yane yOmavaangeli oya li ya gandja uunzapo shi na ko nasha nokuulika kwaJehova Kalunga sha yela mo kutya okwa li a hokwa Jesus sho a zi momeya momulonga gwaJordan. Johannes Omuninginithi okwa li a gandja uunzapo a ti: “Onda mono Ombepo ya kuluka megulu ya fa onguti noye mu lambele . . . notayi kala kombanda [yaJesus] . . . Ngame onde shi mono notandi mú hokololele nokutya oye Omuna gwaKalunga.” (Joh. 1:32-34) Natango, pompito oyo ngaa ndjoka Jehova okwa li a ti: “Nguka oye Omumwandje omuholike nde mu hokwa.”—Mat. 3:17; Mark. 1:11; Luk. 3:22.

Okwa kala omudhiginini sigo okeso

12. Jesus okwa li a ningi shike uule woomvula ndatu netata konima yeninginitho lye?

¹² Uule woomvula ndatu netata dha li dha landula ko, Jesus okwa li i igandja mokulonga aantu kombinga yaHe nosho wo kombinga yuuyuuki wuunamapangelo waKalunga. Okweenda kwe apuhe mEvi lyEuvaneko kolupadhi okwa li kwe mu lolodha, ihe kapwa li shoka tashi vulu oku mu keelela kaa gandje uunzapo thiluthilu kombinga yoshili. (Joh. 4:6, 34; 18:37) Jesus okwa li a longo yalwe kombinga yUukwaniilwa waKalunga. Pashikumithalonga, okwa li a aludha aavu, ta kutitha oongundu dhaantu nokwa li nokuli a yumudha aasi, nokungawo okwa li u ulike shoka Uukwaniilwa tawu ka ningila aantu.—Mat. 11:4, 5.

13. Jesus okwa li a longo aantu shike shi na ko nasha negalikano?

¹³ Pehala lyokwiipandula omolwiilonga yokuuvitha nokwaaludha, Jesus okwa li a tula po oshiholelwa sha tongomana mokugandja neifupipiko omahambelelo agehe kuJehova. (Joh. 5:19; 11:41-44) Jesus okwa li wo a popi iinima ya simanenena mbyoka tu na okugalikana kombinga yayo. Omagalikano getu oge na okukwatela mo eindilo kutya edhina lyaKalunga, Jehova, ‘li yapulwe’ nokutya uunamapangelo waKalunga wopauyuuki wu pingene po elelo lyaSatana ewinayi opo “ehalo [lyaKalunga] li gwanithwe kombanda yevi wo ngaashi megulu.” (Mat. 6:9, 10) Jesus okwa li e tu ladhipike wo tu katuke metsokumwe negalikano lya tya ngaaka ‘mokukonga tango [Uukwaniilwa] waKalunga nuuyuuki we.’—Mat. 6:33, yelekanitha KB.

14. Omolwashike sha li sha pula Jesus oonkambadhala opo a gwanithe po onkandangala ye melalakano lyaKalunga nonando okwa li a gwanenena?

¹⁴ Sho ethimbo lyeso lye lyopayambo lya hedha popepi, Jesus okwa li muudhigu uunene wopamaiyuvo omolwoshinakugwanithwa oshinene shoka a li e na. Elalakano lyaHe nosho wo esimano lye olya li lyi ikolelela keidhidhimiko lyaJesus okwiidhidhimikila ompangu kaayi li pauyuuki nosho wo eso elulu. Sho ku na omasiku gatano keso lye, Jesus okwa galikana a ti: “Ngashingeyi omwenyo gwandje ogwa tukuluka. Ondi tye shike we? Tate, hupitha ndje mokathimbo nkaka. Ihe osho tuu shika she eta ndje mokathimbo nkaka komahepeko.” Konima sho a li u ulike omaiyuvo ngaka gopantu, nokwaaihola mwene Jesus okwa li a gandja eitulomo lye koshinima shoka sha simanenena nokwa galikana a ti: “Tate, simanekitha edhina lyoye.” Mbalambala Jehova okwa yamukula a ti: “Onde li simanekitha notandi li simanekitha natango.” (Joh. 12:27, 28) Eeno, Jesus okwa li e na ehalo lyokupita memakelo enenenene lyuudhiginini ndyoka kaapu na nando omuntu a li a taalelwa kulyo. Otu na uushili kutya Jesus mokuuva oohapu ndhoka dhaHe gwomegulu okwa li kwe mu pe omukumo opo a pondole mokusimanekitha nokuyuukipalitha uunamapangelo awuhe waJehova, nokwa li a pondola moku shi ninga.

Shoka eso lyaJesus lya gwanitha po

15. Jesus manga inaa sa, omolwashike a popi a ti: “Ayihe ya gwanithwa”?

¹⁵ Sho Jesus a li komuti gwomahepeko nokwa li e li pokufudha mo omufudho gwe gwahugunina gwuuwehame, okwa ti: “Ayihe ya gwanithwa!” (Joh. 19:30) Kekwatho lyaKalunga, Jesus ka li tuu a gwanitha po iinima iikumithi pethimbo lyoomvula ndatu netata okuza peninginitho lye sigo okeso lye! Sho Jesus a si, opwa holoka ekakamo lyevi edhigu nomukuluntu gwetangakwiita lyAaroma ngoka a li ta kwatele komeho okudhipagwa kwaJesus okwa li i inyengithwa a tye: “Kapu na omalimbililo, nguka okwa li Omuna gwaKalunga.” (Mat. 27:54) Osha yela kutya omunambelewa nguka okwa li a mono sho Jesus ta shekwa molwaashoka aniwa ti iti ye Omuna gwaKalunga. Kakele kiihuna ayihe mbyoka a mono, Jesus okwa li a kakatele uudhiginini we nokuulika kutya Satana oye omuniifundja omunyanyalithi. Shi na ko nasha naayehe mboka haya ambidhidha uunamapangelo waKalunga, Satana okwa li e ya shongo a ti: “Omuntu ota gandja po iinima ye ayihe, opo a kale e na omwenyo.” (Job 2:4) Omolwuudhiginini we, Jesus oku ulike kutya Adam naEva oya li taya vulu okukala aadhiginini sho ya li ya makelwa nemakelo ndyoka lyanathangwa. Shoka sha simana shi vule ayihe, onkalamwenyo yaJesus neso lye oya li ya simanekitha nokutumbalekitha uunamapangelo waJehova wopauyuuki. (Lesha Omayeletumbulo 27:11.) Mbela eso lyaJesus olya li lya gwanitha po oshindji shi vulithe mpoka? Eeno!

16, 17. (a) Omolwashike sha li tashi vulika koonzapo dhaJehova ndhoka dha tetekela Aakriste dhi kale dha talika ko kuye dhi li aayuuki? (b) Ongiini Jehova a li a laleke nuuyamba uudhiginini wOmwana, nOmuwa Jesus Kristus ota tsikile okuninga shike?

¹⁶ Aapiya oyendji yaJehova oya li kombanda yevi manga Jesus kaa li ko. Oya li ya talika ko kuKalunga ye li aayuuki noya li ya pewa etegameno lyeyumuko. (Jes. 25:8; Dan. 12:13) Ihe pakankameno lini lyopampango Jehova Kalunga omuyapuki a li ta vulu okuyambeka aantu aalunde momukalo omukumithi gwa tya ngawo? Ombiimbeli otayi yelitha tayi ti: “Kalunga okwa gandja Jesus, opo mokusa kwe a ninge iikulila, moka aantu mboka ye mu itaala, taa dhiminwa po oondjo dhawo. Kalunga okwe mu gandja, opo a ulike, nkene ta ningi aantu aayuuki koshipala she. Nale Kalunga okwa li i idhidhimikile nokwe etha oondjo dhaantu, inee ya geela omolwadho, [opo a holole uuyuuki we methimbo ndika lyongashingeyi, Ye mwene a kale omuyuuki, Ye a yuukipalithe ngoka i itaala Jesus, KB].”—Rom. 3:25, 26.

¹⁷ Jesus okwa li a pewa ondjambi kuJehova sho a li a yumudhilwa pondondo yopombanda ndjoka a li e na nale manga inee ya kombanda yevi. Jesus ngashingeyi ota nyanyukilwa okwaahasa e li oshishitwa shopambepo shi na eadhimo. (Heb. 1:3) E li Omupristeli Omukuluntu nOmukwaniilwa, Omuwa Jesus Kristus ota tsikile okukwathela aalanduli ye opo ya simanekithe uuyuuki waKalunga. Inatu pandula tuu sho Tate yetu gwomegulu Jehova e li Omugandji gwondjambi kwaayehe mboka haye mu simanekitha nohaye mu longele nuudhiginini mokuholela Omwana!—Lesha Episalomi 34:3; Aahebeli 11:6.

18. Oshike tashi ka konakonwa moshitopolwa tashi landula?

¹⁸ Aantu ayehe aadhiginini okuza kuAbel oya kala nokunyanyukilwa ekwatathano lyopothingo naKalunga molwaashoka oya li ye na eitaalo tali longo nosho wo einekelo mOluvalo lwu uvanekwa. Jehova okwa kala e shi shi kutya Omwana ota ka kala omudhiginini muye nosho wo kutya eso lye otali ka siikila “oondjo dhuuyuni” pamukalo gwa gwanenena. (Joh. 1:29) Eso lyaJesus olye etela wo aantu mboka ye li ko kunena uuwanawa. (Rom. 3:26) Onkee ano, ekulilo lyaJesus otali vulu oku ku etela omayambeko geni? Shoka otashi ka konakonwa moshitopolwa tashi landula.

[Enyolo lyopevi]

Oto yamukula ngiini?

• Uuyuuki waKalunga owa li wa patanekwa ngiini?

• Eninginitho lyaJesus olya li tali thaneke shike?

• Eso lyaJesus olya gwanitha po shike?

[Ethano pepandja 15]

Mbela owu shi kutya oshike sha li tashi thanekwa keninginitho lyaJesus?