Hedha popepi naKalunga

Okwe tu pa emanguluko lyokuninga omatokolo

2 AAKWANIILWA 18:1-7

AAVALI oya tegelelwa ya tulile po oyana oshiholelwa oshiwanawa. Eputudho ewanawa lyaavali otali vulu okukwathela okanona ka kale ke na uukwatya uuwanawa noka kale haka ningi omatokolo gomondjila monkalamwenyo. Shinikitha oluhodhi, aavali oyendji ihaya tulile po oyana oshiholelwa oshiwanawa. Mbela shika osha hala okutya aanona mboka kaye na esiku ye shi pondole? Otatu adha eyamukulo moohapu ndhika dhoshili tadhi shilipaleke kutya Jehova Kalunga atuhe okwe tu pa emanguluko lyokuninga omatokolo. Dhiladhila shi na ko nasha naHiskija, ngaashi ta popiwa mAakwaniilwa aatiyali 18:1-7.

Hiskija okwa li omwana ‘gwaAhas’ omukwaniilwa gwaJuda. (Ovelise 1) Ahas okwa li a ningitha aapangelwa ye ya ethe po okulongela Jehova. Omukwaniilwa nguka omukolokoshi okwa kala ha galikana Baal, ta ningi aantu omafikiloyambo. Okwa li a dhipagitha gumwe nenge ye vulithe po yomaamwayinamati yaHiskija koshidhipagelo. Ahas okwe edhilithitha omiyelo dhotempeli e ta “tungitha iiyambelo piikololo ayihe yaJerusalem.” Okwi “iyetele ondjahi yOMUWA.” (2 Ondjalulo 28:3, 24, 25) Osha yela kutya he yaHiskija okwa li omukolokoshi kaaku na we. Ihe mbela Hiskija okwa li e endulula omapuko ngono ga li ga ningwa kuhe?

Sho Hiskija a ningi omukwaniilwa a landula Ahas, okwa li u ulike nziya kutya ini iyethela a nwethwe mo koshiholelwa oshiwinayi shahe. Hiskija okwa “ningi shoka sho opalela OMUWA.” (Ovelise 3) Hiskija okwi inekele Jehova. “MuJuda kamwa li omukwaniilwa gulwe e mu fa, e mu tetekela ando nenge e mu landula.” (Ovelise 5) Momvula yotango yepangelo lye, omukwaniilwa ngoka omugundjuka okwa li a tamekulula elongelokalunga lyashili shoka sha li sha ningitha omahala gopombanda ga hanagulwe po, hoka kwa li haku longelelwa iikalunga. Otempeli oya li ya patululwa ishewe, naantu oya kala ishewe melongelokalunga lyashili. (Ovelise 4; 2 Ondjalulo 29:1-3, 27-31) Hiskija “okwa li omwiinekelwa gwOMUWA ye ina etha okuvulika kuye . . . Omolwashoka OMUWA a li e mu na.”—Ovelise 6, 7.

Oshike sha li sha ningitha Hiskija a kale inaa landula oshiholelwa oshiwinayi shahe? Mbela otashi vulika oyina Abi ngoka kaatu na uuyelele owundji kombinga ye, oye a li a nwetha mo nawa omwana? Mbela oshiholelwa oshiwanawa shaJesaja ngoka a li a tameke iilonga ye yokuhunganeka manga Hiskija inaa valwa, osho sha li sha nwetha mo omukwaniilwa nguka omugundjuka?a Ombiimbeli inayi shi popya. Kashi na nduno mbudhi kutya oshike, oshinima shoshili osho shono kutya: Hiskija okwa li a hogolola okweenda mondjila ndjoka ya li yi li mepingathano naandjoka ye endwa kuhe.

Oshiholelwa shaHiskija otashi ladhipike kehe ngoka tashi vulika e na oshimoniwa oshiwinayi sho ta putuka omolwokuputudha kwaavali hoka kaaku li nawa. Onakuziwa itayi vulu okulundululwa; itatu vulu okudhima po iimoniwa iiyehameki mbyoka ye tu ningilwa. Ihe itashi ti kutya ngele twa mona iimoniwa ya tya ngaaka katu na shoka tatu ka pondola monkalamwenyo. Otatu vulu okuninga omatokolo ngashingeyi ngoka taga vulu oku tu etela onakuyiwa ombwanawa. Ngaashi Hiskija, otatu vulu okuhogolola okukala tu hole Kalunga kashili Jehova noku mu longela. Oonkatu dha tya ngaaka ohadhi etele aantu onkalamwenyo tayi ti sha ngashingeyi notadhi vulu okufala komwenyo gwaaluhe muuyuni uupe waKalunga. (2 Petrus 3:13; Ehololo 21:3, 4) ehalo lavo vene ehalo lavo vene ehalo lavo vene Katu na tuu okukala tu na olupandu lwokupandula Kalunga omunahole ngoka e tu pa omagano ge na ondilo gokukala nemanguluko lyokuninga omatokolo!

[Enyolo lyopevi]