Kutha ombinga mokuninga okugongala kwopaKriste ku kale taku tungu
‘Sho hamu gongala, kehe shimwe oshi na okukala [tashi tungu] egongalo.’—1 KOR. 14:26, yelekanitha NW.
1. Shi ikolelela kAakorinto yotango ontopolwa 14, elalakano lya simana olyashike lyokugongala kwopaKriste?
‘OKUGONGALA kwonena kakwa li tuu taku ladhipike!’ Mbela owu na esiku wa li wu uvite ngaaka sho okugongala pOshinyanga shUukwaniilwa kwa piti mo? Nopwaahe na omalimbililo owu na esiku wa li wu uvite ngaaka! Okugongala kwegongalo ohaku tu ladhipike shili, ihe shoka itashi tu kumitha. Paushili wo wene, ngaashi owala sha li methimbo ndiyaka lyAakriste yonale, elalakano lyokugongala kwetu kunena olyo okutunga pambepo ayehe mboka ye li po. Ndhindhilika nkene omuyapostoli Paulus a li a tsu omuthindo elalakano ndyoka lyokugongala kwopaKriste montumwafo ye yotango ndjoka a li a nyolele Aakorinto. Montopolwa 14 okwa popi lwiikando kutya kehe oshitopolwa hashi gandjwa pokugongala kwegongalo oshi na okukala shi na elalakano lya faathana, sha hala okutya, ‘okutunga egongalo alihe.’—Lesha 1 Aakorinto 14:3, 12, 26.a
2. (a) Oshike hashi ningitha okugongala ku kale taku tungu? (b) Epulo lini tatu ka kundathana?
2 Shotango, okugongala taku tungu nenge taku tu longo oku li kwa nwethwa mo kombepo yaKalunga. Onkee ano, ohatu tameke okugongala kehe mokugalikana tashi zi komutima kuJehova, Tate yetu gwomegulu moka ha pulwa a laleke nuuyamba okugongala kwetu okupitila mombepo ye ondjapuki. Nonando ongawo, otu shi shi kutya iilyo ayihe yegongalo otayi vulu okukutha ombinga mokukaleka okugongala ku kale taku tungu ngaashi tashi vulika. Onkee ano, oonkatu dhimwe dhini tatu vulu okukatuka pauhandimwe tu shilipaleke kutya okugongala kokwoshiwike hoka haku ningwa mOshinyanga shetu shUukwaniilwa oku li aluhe haku tu etele etalaleko lyopambepo nosho wo eladhipiko?
3. Okugongala kwopaKriste okwa simana shi thike peni?
3 Opo tu yamukule epulo ndyoka, otatu ka konakona iinima yontumba mbyoka yi na okukalekwa momadhiladhilo kwaamboka haya kwatele komeho okugongala kwetu. Otatu ka kundathana wo nkene egongalo alihe tali vulu okukutha ombinga mokukaleka okugongala ku kale taku tungu ayehe mboka ye li po. Oshikundathanwa shika oshi li sha simana kutse molwaashoka okugongala kwetu oku li okuyapuki. Dhoshili, okukala pokugongala nokukutha ombinga muko oyi li oshitopolwa sha simana shokulongela kwetu Jehova.—Eps. 26:12; 111:1; Jes. 66:22, 23.
Okugongala kwa nuninwa okukonakona Ombiimbeli
4, 5. Elalakano lyokukonakona Oshungolangelo olyashike?
4 Atuheni otwa hala okumona uuwanawa mEkonakono lyetu lyOshungolangelo lyokoshiwike. Onkee ano, opo tu uve ko nawa elalakano lyotango lyokugongala hoka, natu tale ketompelo kutya omolwashike tu na Ekonakono lyOshungolangelo nosho wo omalunduluko gamwe ngoka ga ningwa miitopolwa yokukonakonwa yOshungolangelo.
5 Elalakano kutya omolwashike tu na Ekonakono lyOshungolangelo olyokukonakona Ombiimbeli nekwatho lyoshifo shika. Eeno, pEkonakono lyetu lyOshungolangelo, Oohapu dhaKalunga ‘ohadhi fatululwa,’ ngaashi naanaa sha li pethimbo lyaNehemia gwonale, ‘opo aantu ye dhi uve ko.’—Neh. 8:8; Jes. 54:13.
6. (a) Elunduluko lini lya ningwa kEkonakono lyOshungolangelo? (b) Oshike shi na okukalekwa momadhiladhilo shi na ko nasha nomanyolo ngoka taku tiwa kutya “lesha”?
6 Molwaashoka Ombiimbeli oyo yi li elongithwambo lyetu lya simana, elunduluko olya li lya ningwa kEkonakono lyOshungolangelo. Omanyolo gontumba ge etwa mo oga nyolwa kutya “lesha.” Atuheni otatu ladhipikwa tu landule sho omanyolo ngaka taga leshwa pokugongala, tatu lesha mOombiimbeli dhetu yene. (Iil. 17:11) Omolwashike? Ngele tatu mono omayele gaKalunga mOombiimbeli dhetu yene, ohashi thindile sha momitima dhetu. (Heb. 4:12) Onkee ano, manga omanyolo ngoka inaaga leshwa mokule, ngoka ta kwatele komeho oku na okupa aakalipo ayehe ethimbo lya gwana ya konge omanyolo ngaka opo ya landule mOombiimbeli dhawo sho oovelise tadhi leshwa.
Ethimbo olindji okuulika eitaalo lyetu mokuninga omatyokosha
7. Pethimbo lyEkonakono lyOshungolangelo otu na ompito yokuninga shike?
7 Natango elunduluko limwe lya ningwa kiitopolwa yokukonakonwa yOshungolangelo oli na ko nasha nuule wayo. Moomvula opo dha zi ko, oya li ya ningwa iifupi. Kungawo, pethimbo lyokukonakona Oshungolangelo, ethimbo efupi olya longithwa mokulesha uutendo omanga pu na ethimbo olindji lyokuninga omatyokosha. Ngashingeyi oyendji megongalo oye na ompito yokuulika eitaalo lyawo mokuninga omatyokosha gawo mokuyamukula omapulo ngoka ge li mo, taya yelitha nkene enyolo tali tsu kumwe nedhiladhilo, mokugandja iimoniwa paufupi mbyoka tayi ulike nkene shi li pandunge okulandula omakotampango gOmbiimbeli, nenge momikalo dhilwe dhi ili. Opu na wo okulongithwa ethimbo lyokukundathana omathano.—Lesha Episalomi 22:22; 35:18; 40:9.
8, 9. Oshilonga shaangoka ta kwatele komeho Ekonakono lyOshungolangelo oshini?
8 Ihe ethimbo ndyoka lya gwedhwa po otali ka kala po owala ngele aakuthimbinga taya ningi omatyokosha gawo paufupi nongele ngoka ta kwatele komeho ta kala itaa ningi aluhe omatyokosha pethimbo lyEkonakono lyOshungolangelo. Onkee ano, oshike tashi vulu okukwathela ngoka ta kwatele komeho a kale e na ondjele pokati komatyokosha ge nosho wo ngoka taga gandjwa kegongalo opo okugongala ku kale taku tungu aantu ayehe?
9 Opo tu li yamukule, dhiladhila kethaneko ndika. Ekonakono lyOshungolangelo ndyoka tali ningwa momukalo gu li nawa olya fa ehwata lyoongala ndhoka oombwanawa okutala. Ngaashi owala ehwata lyoongala odhindji hali kala li na oongala dhomaludhi ogendji, osho wo mEkonakono lyOshungolangelo hamu kala mu na omatyokosha ogendji. Natango, ngaashi owala ongala yimwe mehwata lyoongala ya yooloka koonkwawo muunene nomolwaala, omatyokosha ngoka haga ningwa pokugongala nago oga yooloka muule wago nosho wo momukalo ngoka taga gandjwa. Oshilonga shaangoka ta kwatele komeho oshashike? Omatyokosha ge mpaka naampeyaka oga fa omafo omazize ngoka haga gwedhwa mehwata lyoongala. Omafo ngoka ihaga kala ogo ge li mo ogendji; pehala lyaashono, ohaga tula mo omutungilo nokukwatela kumwe oongala adhihe. Sha faathana, ngoka ha kwatele komeho okwa pumbwa okukaleka momadhiladhilo kutya oshilonga she osho okugwedha po koohapu ndhoka tadhi tanga Jehova tadhi ningwa kegongalo, ihe hakugandja omatyokosha ogendji. Eeno, uuna omatyokosha ogendji ga yoolokathana taga ningwa kegongalo nosho wo omatyokosha omashona ga yela ga ningwa kwaangoka ta kwatele komeho ga tulwa kumwe nuukeka, ohaga tungu po ehwata lyoohapu oombwanawa ndhoka tadhi ka nyanyudha kehe gumwe pokugongala.
‘Tu hambeleleni Kalunga aluhe shi ninge eyambo lyetu’
10. Aakriste yopetameko oya li ya tala ko ngiini okugongala kwegongalo?
10 Oohapu dhaPaulus ndhoka dhi li mAakorinto yotango 14:26-33 ndhoka tadhi popi okugongala kwopaKriste otadhi tu pe uuyelele wankene okugongala hoka kwa li haku ningwa methelemumvo lyotango. Omulongwantu gumwe gwOmbiimbeli okwa ningi etyokosha koovelise ndhika a ti: “Oshinima oshindhindhilikwedhi kombinga yelongelokalunga lyOngeleka yonale osha yela kutya konyala aantu ayehe oye ya yu uvite kutya oye na uuthembahenda nosho wo oshinakugwanithwa shokugwedha ko sha kokugongala. Omuntu ka li e ya nelalakano lyokukala owala omupulakeni; ine ya nelalakano lyokumona owala ihe olyokugandja.” Dhoshili, Aakriste yonale oya li ya tala ko okugongala kwopaKriste ku li ompito yokuulika eitaalo lyawo.—Rom. 10:10.
11. (a) Oshike hashi ningitha wo okugongala ku kale taku tungu, nomolwashike? (b) Omaetopo geni taga vulu okuhwepopaleka omatyokosha getu pokugongala? (Tala enyolo lyopevi.)
11 Okuulika eitaalo lyetu pokugongala okupitila momatyokosha getu ohaku ningitha wo okugongala ku kale ‘taku tungu egongalo.’ Dhoshili, oto shi zimine kutya kashi na nduno mbudhi kutya otwa kala tatu ya kokugongala uule woomvula dhi thike peni, otashi tu nyanyudha natango okupulakena komatyokosha gaamwatate naamwameme. Ohatu gumwa ketyokosha lyomukokele omwiitaali omukwetu omudhiginini; ohatu kala tu uvite twa tungwa uuna omukuluntugongalo ngoka e na ko nasha natse ta gandja etyokosha; nohatu kala tatu imemeha uuna okanona ka ningi etyokosha lyopaunathangwa ndyoka tali ulike ohole yako yokuhola Jehova. Osha yela kutya mokuninga omatyokosha, atuheni ohatu kutha ombinga mokuninga okugongala kwopaKriste ku kale taku tungu.b
12. (a) Oshike tashi vulu okwiilongwa moshiholelwa shaMoses naJeremia? (b) Egalikano ohali dhana onkandangala yini mokuninga omatyokosha?
12 Ihe kwaamboka ye na ohoni otashi vulu okukala eshongo enene okugandja omatyokosha. Ngele osho shi li ngaaka nangoye, otashi vulu okukala ekwatho wu dhimbulukwe kutya hangoye awike wu na uupyakadhi mbuka. Dhoshili, nokuli naapiya yaKalunga aadhiginini ngaashi Moses naJeremia oya li yu ulike kutya inayi inekela oonkondo dhawo dhokupopya montaneho. (Eks. 4:10; Jer. 1:6) Natango, ngaashi owala Jehova a li a kwathele aapiya ye mboka yonale ye mu tange montaneho yaantu, ote ke tu kwathela wo tu ninge omayambo goku mu tanga. (Lesha Aaheberi 13:15.) Ongiini to vulu okumona ekwatho lyaJehova wu sinde uumbanda woye wokuninga omatyokosha? Tango, ilongekidhila nawa okugongala. Opo nduno, manga inoo ya kOshinyanga shUukwaniilwa, galikana kuJehova e to mu pula e ku pe omukumo wu ninge etyokosha lyoye. (Fil. 4:6) Oto pula oshinima “shoka she mu opalela,” onkee ano oto vulu okukala neinekelo kutya Jehova ota ka yamukula egalikano lyoye.—1 Joh. 5:14; Omayel. 15:29.
Okugongala hoka kwa nuninwa ‘okutunga, okuladhipika nokuhekeleka’
13. (a) Okugongala kwetu oku na okuguma ngiini mboka ye li pokugongala? (b) Epulo lini lya simanenena kaakuluntugongalo?
13 Paulus okwa ti kutya elalakano lya simana lyokugongala kwegongalo olyo ‘okutunga, okuladhipika nokuhekeleka’ mboka ye li pokugongala.c (1 Kor. 14:3, NW) Ongiini aakuluntugongalo Aakriste kunena taya vulu okushilipaleka kutya iitopolwa yawo yopokugongala ohayi talaleke aamwahe naamwayina nohayi ya hekeleke? Opo tu yamukule epulo ndyoka, natu tale kokugongala hoka Jesus a li a kwatele komeho konima owala yeyumuko lye.
14. (a) Iiningwanima yini ya li ya ningwa manga okugongala hoka kwa li kwa longekidhwa kuJesus inaaku ningwa? (b) Omolwashike aayapostoli ya li ya pepelelwa sho ‘Jesus e ya kuyo nokwe ya lombwele’ oshinima shontumba?
14 Tango, tala kiiningwanima mbyoka ya li ya ningwa manga okugongala hoka inaaku ningwa. Manga owala Jesus inaa dhipagwa, aayapostoli “oye mu thigi po e taa yi ontuku,” nongaashi naanaa sha li sha hunganekwa, ‘oya halakanithwa kehe gumwe oti iyukile kaandjawo.’ (Mark. 14:50; Joh. 16:32) Opo nduno konima yeyumuko lye, Jesus okwa hiya aayapostoli ye mboka ya li ya teka omukumo opo ya ka kale pamwe pokugongala kwi ikalekelwa.d Onkee ano, “aalongwa mboka omulongo nagumwe oya yi kuGalilea okondundu ndjiyaka Jesus e yi ya lombwele.” Sho ya thiki, “Jesus okwe ya kuyo nokwe ya lombwele” oshinima shontumba. (Mat. 28:10, 16, 18) Dhiladhila nkene aayapostoli ya li ya pepelelwa sho Jesus a katuka oonkatu ndhoka. Jesus okwa li a kundathana nayo kombinga yashike?
15. (a) Oshikundathanwa shini Jesus a li a kundathana, ihe oshike a li inaa kundathana? (b) Ongiini okugongala hoka kwa li kwa gumu aayapostoli?
15 Jesus okwa li a tameke netseyitho tali ti: “Ongame onda pewa epangelo alihe.” Opo nduno okwe ya pe oshinakugwanithwa a ti: “Indeni ano, ka ningeni aantu ayehe aalongwa yandje.” Hugunina okwe ya shilipaleke pahole a ti: “Otandi kala pamwe nane omasiku agehe.” (Mat. 28:18-20) Mbela owa koneka kutya oshike Jesus inaa ninga? Ka li a ganda aayapostoli ye; ye ina longitha okugongala hoka okutula momalimbililo omainyengotompelo gawo nenge e ya ningithe ya kale yu uvite ye na ondjo mokupopya uunkundi wawo wopokathimbo weitaalo. Pehala lyaashono, Jesus okwe ya shilipalekulula kutya ye naHe oye ya hole moku ya inekelela oshinakugwanithwa sha simana. Omukalo ngono Jesus a li u ungaunga nayo ogwa li gwa gumu ngiini aayapostoli? Oya li ya tungwa pambepo, ya ladhipikwa noya hekelekwa osho molwaashoka konima yokugongala hoka ya li ishewe ya tameke ‘okulonga nokuuvitha onkundana ombwaanawa.’—Iil. 5:42.
16. Ongiini aakuluntugongalo Aakriste kunena ye na okuholela oshiholelwa shaJesus mokukwatela komeho okugongala hoka ku li onzo yetalaleko?
16 Mokuholela Jesus, aakuluntugongalo kunena ohaya tala ko okugongala ku li ompito yokushilipalekulula ooitaali ooyakwawo kutya Jehova oku hole oshigwana she nohole itaayi hulu po. (Rom. 8:38, 39) Onkee ano, miitopolwa yawo yopokugongala, aakuluntugongalo oye na okuukitha eitulomo kokuvula kwaamwahe ihe hakomaunkundi gawo. Kaye na okukala ya limbililwa omainyengotompelo gaamwahe. Pehala lyaashono, okupopya kwawo oku na okuulika kutya oya tala ko ooitaali ooyakwawo ye hole Jehova noya hala okuninga shoka shi li mondjila. (1 Tes. 4:1, 9-12) Odhoshili kutya omathimbo gamwe otashi vulika aakuluntugongalo ya kale ya pumbwa okupukulula egongalo alihe, ihe ngele oohandimwe yontumba oyo owala ya pumbwa okupukululwa, otashi ka kala pandunge ye shi ninge owala naamboka ya pumbwa epukululo. (Gal. 6:1; 2 Tim. 2:24-26) Uuna taya popi negongalo alihe, elalakano lyawo oli na okukala lyokupandula mpoka sho opala. (Jes. 32:2) Oye na okukambadhala okupopya momukalo ngoka tagu talaleke noku pa oonkondo ayehe mboka ye li po.—Mat. 11:28; Iil. 15:32.
Okugongala kwetu oku li onzo yehekeleko
17. (a) Omolwashike sha simanenena ngashingeyi shi vulithe nale okugongala kwetu ku kale ku li onzo yehekeleko? (b) Oshike to vulu okuninga paumwene opo wu kaleke okugongala taku tungu? (Tala oshimpungu “Omikalo omulongo opo okugongala ku kale taku ku tungu notaku tungu wo yalwe.”)
17 Sho omathiminiko guuyuni waSatana tage ende tagi indjipala, otwa pumbwa tu shilipaleke kutya okugongala kwetu kwopaKriste oku li onzo yehekeleko kwaayehe. (1 Tes. 5:11) Omumwameme ngoka nomusamane gwe ya li ye na okwiidhidhimikila uudhigu uunene pwa pita ngashingeyi oomvula dhontumba, okwa ti: “Okukala pOshinyanga shUukwaniilwa osha li sha fa tu li moshikaha shaJehova. Pethimbo ndyoka twa li mpoka, tu li mokati kaamwatate naamwameme Aakriste, otwa li tu uvite kutya otu undulila omutengi gwetu kuJehova notwa mona ombili yokomutima.” (Eps. 55:22) Ayehe mboka haya kala pokugongala kwetu nayo oyu uvite ya ladhipikwa noya hekelekwa. Opo tu shilipaleke kutya shika osho tashi ka ningwa, natu tsikile okugwanitha po ombinga yetu mokukaleka okugongala kwopaKriste taku tungu.
[Omanyolo lyopevi]
a Osha li sha hunganekwa kutya iinima yimwe mbyoka ya li hayi ningwa methelemumvo lyotango pokugongala kwopaKriste oya li tayi ka hula po. Pashiholelwa, ihatu popi we “omalaka gaa shiwike” nenge tu ‘hunganeke.’ (1 Kor. 13:8; 14:5, KB) Nonando shoka osho shi li ngawo, omalombwelo gaPaulus otage tu kwathele tu tseye nkene okugongala kwopaKriste ku na okukala kunena.
b Omolwomaetopo gankene tatu vulu okuhwepopaleka omatyokosha getu pokugongala, tala embo Mona ouwa mOfikola yOukalele woPauteokratika pepandja 70.
c Kombinga yeyooloko ndyoka li li pokati koshitya “ladhipika” nosho wo “hekeleka,” o-Vine’s Expository Dictionary of Old and New Testament Words oya yelitha kutya oshitya shOshigreka sha tolokwa “hekeleka” otashi gandja edhiladhilo “lya kola lyokukala wu na onge shi vulithe [okuladhipika].”—Yelekanitha Johannes 11:19.
d Ompito ndjika otashi vulika oyo ya li ya popiwa kuPaulus sho a li a ti kutya Jesus okwi “ihololele ishewe aalanduli ye ye vule omathele gatano.”—1 Kor. 15:6.
Oto yamukula ngiini?
• Okugongala kwopaKriste okwa simana shi thike peni?
• Ongiini omatyokosha ngoka haga ningwa pokugongala haga ningitha okugongala ku kale taku ‘tungu egongalo’?
• Oshike tashi vulu okwiilongwa mokugongala hoka Jesus a li a ningi naalanduli ye?
[Oshimpungu/Omathano pepandja 26]
OMIKALO OMULONGO OPO OKUGONGALA KU KALE TAKU KU TUNGU NOTAKU TUNGU WO YALWE
Ilongekidha komeho yethimbo. Ngele wa konakona oshitopolwa shoka tashi ka kundathanwa pOshinyanga shUukwaniilwa komeho yethimbo, okugongala otaku ka kala okuhokitha noto ka kala to vulu oku ku dhimbulukwa nawa.
Kala ho kala pokugongala pandjigilile. Molwaashoka okugongala ku na aantu oyendji ohaku kala taku ladhipike kehe gumwe e li po, okukala po kwoye otaku eta po eyooloko.
Thika pethimbo. Ngele owa kuutumba manga okugongala inaaku tameka, oto vulu okwiimba eimbilo lyopetameko nokupulakena egalikano, iinima mbyoka yi li oshitopolwa shokulongela kwetu Jehova.
Kala aluhe wu na iileshomwa mbyoka ya pumbiwa. Etelela Ombiimbeli yoye niileshomwa mbyoka tayi longithwa pokugongala opo wu landule nowu mone eityo lyaashoka tashi kundathanwa.
Henuka okupiyaganekwa kusha. Pashiholelwa, lesha omatumwalaka gokongodhi ngele okugongala kwa piti mo ihe hapethimbo lyokugongala. Kungawo oto ka kaleka iinima yopaumwene pondondo yawo.
Kala ho kutha ombinga. Uuna oyendji taya ningi omatyokosha, oyendji ohaya ladhipikwa nohaya tungwa pambepo komatyokosha goyendji ngoka tagu ulike eitaalo lyawo.
Kaleka etyokosha lyoye efupi. Shika otashi pe aantu oyendji ngaashi tashi vulika ompito ya kuthe ombinga mokuninga omatyokosha.
Kala ho gwanitha po iinakugwanithwa yoye. Wu li omunasikola mOsikola yoPauteokratika nenge omukuthimbinga mOkugongala kwoPailonga, ilongekidha nawa, iyenditha po komeho yethimbo nokukambadhala ngaashi to vulu kuu kaleke oshinakugwanithwa shoye.
Kala ho pandula mboka ya kutha ombinga. Lombwela mboka ye na iitopolwa pokugongala nenge ya ninga omatyokosha nkene oonkambadhala dhawo tadhi pandulwa.
Kala ho endathana nayalwe. Okupopitha nosho wo okuninga oonkundathana tadhi tungu manga okugongala inaaku tameka nokonima yakwo ohaku gwedha ko oshindji kokutyapula okugongala nokuuwanawa mboka hawu zi mokukala pukwo.