Oshinima 1

Kala wu hole aantu, haimaliwa nomaliko

OMBIIMBELI OTAYI LONGO SHIKE? “Mohole yeliko omo tamu zi uukolokoshi auhe.”—1 Timoteus 6:10.

ESHONGO LINI LI LI PO? Aaningi yomatseyitho giipindi ohaye tu thiminike tu kale inaatu gwana naashoka tu na. Oya hala tu kale aapika yiilonga yetu opo tu mone oshimaliwa oshindji tu lande iinima iipe, iiwanawa niinene. Iimaliwa ohayi heke aantu noshi pu okukala tu yi hole. Ihe Ombiimbeli otayi tu londodha kutya omuntu ngoka e hole eliko ke na siku a gwanenwe. Omukwaniilwa Salomo okwa nyola a ti: “Nakuhola iimaliwa ihe yi kuta, nanakuhola uuyamba iha gwana.”—Omuuvithi 5:10.

OSHIKE TO VULU OKUNINGA? Holela Jesus nokwiilonga okukala wu hole aantu pehala lyokuhola iinima. Jesus okwa li e na ehalo okugandja po kehe shimwe e na, nokuli nomwenyo gwe, molwaashoka okwa li e hole aantu. (Johannes 15:13) Okwa ti: “Okugandja oku na elago ku vule okutaamba.” (Iilonga 20:35) Ngele otwa kala hatu gandja ethimbo niiniwe yetu kuyalwe, nayo osho taye ke tu ningila. Jesus okwa ti: “Gandjeni, nane wo otamu ka pewa.” (Lukas 6:38, KB) Mboka haya lalakanene iimaliwa nomaliko ohayi iyetele iimpwiyu oyindji nokumona iihuna. (1 Timoteus 6:9, 10) Mepingathano naashono, okugwanenwa kwashili ohaku zi mokukala wu hole aantu ooyakweni nomokukala wu holike.

Omolwashike itoo tala ngele oto vulu okuninga onkalamwenyo yoye yanathangwa? Mbela ito vulu okushonopeka iinima mbyoka wu na nenge mbyoka wa hala okulanda? Ngele owe shi ningi, otashi vulika to ka mona kutya owu na ethimbo nosho wo oonkondo dhokuninga iinima mbyoka ya simanenena monkalamwenyo, okukwathela aantu nokulongela Kalunga ngoka e ku pa kehe shimwe wu na.—Mateus 6:24; Iilonga 17:28.

[Ethano pepandja 4]

“Gandjeni, nane wo otamu ka pewa”