“Ethimbo lyo opala okutaamba esilohenda lyaKalunga olyo ndika”
“Pulakena ano! Ethimbo lyo opala okutaamba esilohenda lyaKalunga olyo ndika. Esiku lyokuhupithwa onena.”—2 KOR. 6:2.
1. Omolwashike twa pumbwa okumona kutya oshike tu na okuninga pethimbo lyontumba?
“AYIHE oyi na otundi yayo, noshaa shoka kohi yegulu oshi na ethimbo lyasho.” (Omuuv. 3:1) Salomo okwa li a nyola kombinga yankene sha simana okumona kutya ethimbo lini li li nawa okuninga iinima yontumba ya simanenena, kutya nduno uunafaalama, omalweendo, uunangeshefa nenge okupopya nayalwe. Kakele kaashono, otwa pumbwa wo okumona kutya iilonga yini ya simanenena tu na okulonga pethimbo lyontumba. Noohapu dhilwe, otu na okukala tu shi kutya oshike tu na okupititha komeho.
2. Otu shi shi ngiini kutya sho Jesus a li tu uvitha okwa li e shi shi nawa ethimbo moka a li?
2 Sho Jesus a li kombanda yevi okwa li e shi nawa ethimbo moka a li nonokutya oshike a li a pumbwa okuninga. Molwaashoka okwa li e shi shi nawa kutya oshike a li e na okupititha komeho, okwa li e shi kutya omahunganeko ogendji gopaMesiasa ngoka ga kala ga tegelelwa ethimbo nuule ga gwanithwe, oga li ge li pokugwanithwa. (1 Pet. 1:11; Eh. 19:10) Opwa li pu na iilonga mbyoka e na okulonga opo aantu ya tseye kutya oye naanaa Mesiasa omuuvanekwa. Okwa li e na okugandja uunzapo nawanawa kombinga yoshili yUukwaniilwa nokugongela mboka ya li taya ka thigulula Uukwaniilwa pamwe naye monakuyiwa. Okwa li e na okutula po ekankameno lyegongalo lyopaKriste ndyoka lya li tali ka tsikila niilonga yokuuvitha noyokuninga aantu aalongwa muuyuni auhe.—Mark. 1:15.
3. Ongiini Jesus okukala kwe e shi ethimbo moka a li kwa li kwe mu inyengitha a katuke oonkatu?
3 Okukala e shi ethimbo moka a li okwa li kwe mu inyengitha a kale e na uulaadhi mokulonga ehalo lyaHe. Okwa li a lombwele aalongwa ye a ti: “Iilya oyi li po oyindji, ihe aalongi oyo aashona. Galikaneni ano mwene gwiilya, a tume aalongi keteyo lye.” (Luk. 10:2; Mal. 4:5, 6) Jesus tango okwa li a hogolola aalongwa 12 nokonima okwa ka hogolola 70 mokati kaalongwa ye e te ya pe omalombwelo gontumba nokwe ya tumu ye ku uvithe etumwalaka lituntula ndyoka tali ti: “Uukwaniilwa wegulu wa hedha popepi.” Otatu lesha kombinga yaJesus taku ti: “Sho a mana omalombwelo ngaka kaalongwa ye omulongo nayaali, okwa zi po pehala ndyoka. Oye a longo e tu u vithile aantu miilando yawo.”—Mat. 10:5-7, KB; 11:1; Luk. 10:1.
4. Omomukalo guni Paulus a li ha holele Jesus Kristus?
4 Jesus okwa tulila po aalanduli ye oshiholelwa oshiwanawa shuulaadhi noshokwiigandja kiilonga yokuuvitha onkundana ombwanawa. Omuyapostoli Paulus okwa li a popi kombinga yaashika sho a li a kumagidha ooitaali ooyakwawo a ti: “Holelii ndje, oshoka ngame otandi holele Kristus.” (1 Kor. 11:1) Omomukalo guni Paulus a li a holele Kristus? Shotango, okwa li ha longo ngaashi ta vulu mokuuvitha onkundana ombwanawa. Moontumwafo ndhoka Paulus a li a nyolele omagongalo, otatu adha mo omautumbulilo ngaashi “longeni nuupenda,” “longeleni Omuwa nomwenyo aguhe,” “kaleni mwi ipyakidhila aluhe niilonga yOmuwa” nosho wo “shaa shoka tamu shi longo, shi longeni nomwenyo aguhe ongaamboka itaamu longele aantu, ihe Omuwa ye mwene.” (Rom. 12:11; 1 Kor. 15:58; Kol. 3:23) Paulus ka li nando a dhimbwa sho Omuwa Jesus Kristus a li e mu ihololele mondjila yokuya kuDamasko nosho wo etumwalaka ndyoka Jesus a pe omulongwa Ananias a lombwele Paulus tali ti: “Inda ko kuye, oshoka ngame onde mu hogolola, a longele ndje ye a tseyithile aapagani naakwaniilwa yawo nAaisraeli edhina lyandje.”—Iil. 9:15; Rom. 1:1, 5; Gal. 1:16.
“Ethimbo lyo opala okutaamba esilohenda lyaKalunga”
5. Oshike sha li shi inyengitha Paulus a longe uukalele we nuulaadhi?
5 Uuna tatu lesha embo lyIilonga, otu wete lela kutya Paulus okwa li u ulike omukumo nosho wo uulaadhi muukalele we. (Iil. 13:9, 10; 17:16, 17; 18:5) Paulus okwa li e shi kutya ethimbo ndyoka a li mulyo olya simana. Okwa li a popi a ti: “Pulakena! Ethimbo lyo opala okutaamba esilohenda lyaKalunga olyo ndika. Esiku lyokuhupithwa onena.” (2 Kor. 6:2) Omumvo 537 K.E.N., ogwa li omumvo gwo opala opo mboka ya li muupongekwa muBabilonia ya galukile koshilongo shaandjawo, Jerusalem. (Jes. 49:8, 9) Ihe mbela Paulus okwa li ta popi kombinga yashike? Ontopolwa moka mwa za oohapu ndhoka otayi tu kwathele tu tseye kutya okwa li ta dhiladhila shike.
6, 7. Oshilonga sha simana shini sha li sha pewa Aakriste aagwayekwa yokunena, noolye taya longo pamwe nayo?
6 Petameko lyontumwafo ye, Paulus okwa li a popi kombinga yoshilonga sha simana shoka ye nAakriste ooyakwawo aagwayekwa ya li ya pewa. (Lesha 2 Aakorinto 5:18-20.) Okwa li a yelitha kutya oya li yi ithanwa kuKalunga nelalakano lyontumba, opo ya pewe “oshilonga shokuhanganitha aantu yalwe naye,” ya indile aantu ya “hanganithwe naKalunga.” Shoka osha li tashi ti kutya ya kale ishewe ye na uukuume naKalunga nenge ya hangane naye.
7 Okuza ngaa puunashipotha womuEden, aantu ayehe oya topoka ko kuJehova. (Rom. 3:10, 23) Okukala ya topoka ko kuye, okwe ya ningitha ya kale ye li momilema dhopambepo naashoka oshe ya ningitha ya kale haya mono iihuna nohaya si. Paulus okwa nyola a ti: “Otu shi shi kutya sigo ongashingeyi kehe shimwe shomeshito otashi fudhagana kuuwehame wa fa mboka wopevalo lyokanona.” (Rom. 8:22) Ihe Kalunga okwa katuka oonkatu i “indile” aantu ya galukile kuye nenge ya hangane naye. Mboka owo uukalele wa li wi inekelelwa Paulus nAakriste aagwayekwa ooyakwawo. “Ethimbo lyo opala okutaamba esilohenda lyaKalunga” ndyoka, otashi vulika li kale “esiku lyokuhupithwa” kwaamboka yi itaala Jesus. Aakriste ayehe aagwayekwa nosho wo “oonzi dhilwe” ndhoka tadhi longo pamwe nayo otaya tsikile okuhiya aantu ya mone uuwanawa ‘methimbo lyo opala lyokutaamba esilohenda lyaKalunga.’—Joh. 10:16, NW.
8. Oshike sha ningitha ehiyo lyokuhanganitha aantu naKalunga li kale endhindhilikwedhi?
8 Shoka sha ningitha ehiyo lyokuhanganitha aantu naKalunga li kale endhindhilikwedhi noonkondo osho kutya nonando aantu oyo ya li ya yono po ekwatathano lyawo naKalunga okupitila muunashipotha wawo muEden, Kalunga oye mwene a li a katuka onkatu tango e li galulile po. (1 Joh. 4:10, 19) Okwa li a ningi po shike? Paulus okwa yamukala a ti: “Otse otatu uvitha kutya Kalunga okwa li muKristus nokwa hanganitha aantu ayehe naye ye ina yalulila aantu oondjo dhawo. Kalunga okwe tu pe elaka tali popi, nkene ta hanganitha aantu naye mwene.”—2 Kor. 5:19; Jes. 55:6.
9. Paulus okwa li a ningi shike opo u ulike kutya okwa pandula esilohenda lyaKalunga?
9 Sho Jehova a gandja ekuliloyambo okwe shi ningi tashi wapa opo mboka ye na eitaalo tali longo mulyo ya dhiminwe po ondjo dhawo noya kale ishewe ye na uukuume naKalunga nenge ya hangane naye. Kakele kaashono, okwa li a tumu aatumwa ye opo ya ladhipike aantu kehe pamwe ya ninge ombili naye. (Lesha 1 Timoteus 2:3-6.) Molwaashoka Paulus okwa li e shi kutya ehalo lyaKalunga olini nokwa li e shi ethimbo moka a li, okwa li a longo nuudhiginini ‘moshilonga shokuhanganitha aantu naKalunga.’ Ehalo lyaKalunga inali lunduluka. Ota hiya natango aantu mboka ya topoka ko kuye ya hangane naye. Oohapu dhaPaulus ndhoka tadhi ti kutya “ethimbo lyo opala okutaamba esilohenda lyaKalunga olyo ndika” nosho wo “esiku lyesilohenda onena,” otadhi longo natango. Jehova Kalunga ke shi tuu omunahenda nomunalukeno!—Eks. 34:6, 7.
Inatu ‘hepitha esilohenda lyaKalunga’
10. “Esiku lyokuhupithwa” otali ti shike kAakriste aagwayekwa yonale nosho wo yokunena?
10 Aantu yotango mboka ya li ya mono uuwanawa mesilohenda inaali longelwa, oyo mboka ya li “muukumwe naKristus.” (2 Kor. 5:17, 18) Kuyo “esiku lyokuhupithwa” olya li lya tameke poPentekoste 33 E.N. Okuza mpoka, oya li yi inekelelwa oshilonga shokuuvitha oohapu ‘dhokuhanganitha.’ Kunena, oshihupe shAakriste aagwayekwa otashi tsikile okulonga “oshilonga shokuhanganitha aantu naKalunga.” Oya li ya mono kutya aayengeli yane mboka omuyapostoli Johannes a li a mono memoniko lyopahunganeko, oya li ‘ya keelele oombepo dhokoombinga ne, dhaa pepe kevi.’ Onkee ano, sigo okunena oli li “esiku lyokuhupithwa” nosho wo “ethimbo lyo opala okutaamba esilohenda lyaKalunga.” (Eh. 7:1-3) Omolwetompelo ndika, okuza petameko lyethelemimvo eti-20, oshihupe shaagwayekwa osha kala nokugwanitha po nuulaadhi “oshilonga shokuhanganitha aantu naKalunga” muuyuni auhe.
11, 12. Ongiini Aakriste aagwayekwa ya li yu ulike petameko lyethelemimvo eti-20 kutya oye shi ethimbo ndyoka ye li mulyo? (Tala ethano pepandja 23.)
11 Pashiholelwa, ngaashi sha popiwa membo Jehovah’s Witnesses—Proclaimers of God’s Kingdom, pehulilo lyethelemimvo eti-20, “C.T. Russell nooyakwawo oya li yi itaala lela kutya oya li pethimbo lyeteyo nonokutya aantu oya pumbwa okuuva oshili ndjoka tayi ya mangulula.” Oya li ya ningi po shike kombinga yaashika? Aamwatate mbaka oya li yu uvite kutya inashi gwana owala okuhiya aantu ye ye okupulakena elongelokalunga, molwaashoka oya li ya ndhindhilika kutya oye li pethimbo lyeteyo, “ethimbo lyo opala okutaamba esilohenda lyaKalunga.” Aasita yUukwakriste oya kala owala taya hiya aantu ye ye kelongelokalunga. Pehala lyaashono, Aakriste aagwayekwa mboka oya li ya tameke okukonakona ya tale kutya omikalo dhilwe dhini ishewe tadhi longo ndhoka ye na okulongitha opo ya taandelithe onkundana ombwanawa. Kakele kaashono, oya li ya longitha pandunge uuteknologi woshinanena opo ya humithe komeho iilonga yawo.
12 Opo ongundu ndjoka onshona yaauvithi aalaadhi yi taandelithe onkundana ombwanawa yUukwaniilwa, oya li ya longitha uutraktate, uufo, omambo niifo. Oya li wo ya longekidha omauvitho niinyolwa e taye yi gandja yi ka nyanyangidhwe miifokundaneki omayovi. Oya li ya tumu oopolohalama dhopaMbiimbeli kooradio dhopashigwana nodhopaigwana. Oya li ya toto po nokulongitha omathano hagi inyenge tage endele pamwe newi, nokuli nomanga oofabulika dhokuninga oomuvi inaadhi ninga omathano ga tya ngawo. Okukala nuulaadhi wa tya ngawo okwa li kwe e ta iizemo ya tya ngiini? Kunena, oku na aantu omamiliyona gaheyali lwaampoka mboka ya li ya taamba ko etumwalaka ndyoka tali ti: ‘Hanganithweni naKalunga’ notaye li tseyithile yalwe. Dhoshili, aapiya yaJehova mboka yonale oya li oshiholelwa oshiwanawa shuulaadhi nonando oonkalo dhawo odha li dha ngambekwa.
13. Otu na okukaleka momadhiladhilo elalakano lyaKalunga lini?
13 Oohapu dhaPaulus ndhoka tadhi ti kutya “ethimbo lyo opala okutaamba esilohenda lyaKalunga olyo ndika,” odhi li natango dhoshili. Tse mboka twa mona esilohenda lye ndyoka inaali longelwa, otu na olupandu molwaashoka otwa pewa ompito yokuuva nokutaamba ko etumwalaka lyokuhanganithwa. Pehala lyokukala kaatu na ko na sha, otu na okukaleka momadhiladhilo oohapu dhaPaulus tadhi landula ndhoka tadhi ti: “Otatu mú [kumagidha], mwaa hepithe esilohenda lyaKalunga ndyoka mwe li taamba.” (2 Kor. 6:1) Elalakano lyesilohenda lyaKalunga olyo ‘okuhanganitha aantu naye mwene’ okupitila muKristus.—2 Kor. 5:19.
14. Miilongo oyindji omwa holoka oompito dhokuninga shike?
14 Aantu oyendji mboka ya pukithwa kuSatana, oye li natango ya topoka ko kuKalunga nokaye na ko nasha nelalakano lyesilohenda lyaKalunga. (2 Kor. 4:3, 4; 1 Joh. 5:19) Ihe oonkalo dhuuyuni ndhoka tadhi ende tadhi nayipala noonkondo odha ningitha oyendji ya katuke oonkatu sho yu ulukilwa kutya uukolokoshi nokumona iihuna kwaantu okwe ya po molwaashoka ya topoka ko kuKalunga. Nokuli nomiilongo moka aantu oyendji ya li ihaaya kala ya nyanyukilwa iilonga yetu yokuuvitha, ngashingeyi oyendji oya taamba ko onkundana ombwanawa noya katuka onkatu ya hangane naKalunga. Ihe mbela otu uvite ko ngaa kutya ndika olyo ethimbo ndyoka tu na okulonga nuulaadhi twa mana mo okuuvitha etumwalaka ndika tali ti kutya natu “hanganithwe naKalunga”?
15. Pehala lyokuuvitha owala etumwalaka ndyoka tali ningitha aantu ya kale yu uvite ya pepelelwa, otwa hala aantu ayehe ya tseye shike?
15 Oshinakugwanithwa shetu kashi shi owala okulombwela aantu kutya ngele oya galukile kuKalunga, ote ke ya kwathela nomaupyakadhi gawo agehe notaya ka kala ya pepelelwa. Aantu oyendji osho haya kala ya tegelela ngele ya yi kongeleka, noongeleka odhi na ehalo lyokugwanitha po ehalo ndyoka. (2 Tim. 4:3, 4) Shoka hasho elalakano lyuukalele wetu. Onkundana ombwanawa ndjoka tatu uvitha oyo kutya Jehova oku na ehalo okudhima po oondjo dhetu okupitila muKristus. Onkee ano, oohandimwe otaya vulu ishewe okupanga uukuume nosho wo okuhanganithwa naKalunga. (Rom. 5:10; 8:32) Ihe “ethimbo lyo opala lyokutaamba esilohenda lyaKalunga” otali endelele lyu uka pehulilo.
“Kaleni mwa hwama mombepo”
16. Oshike sha li sha kwathele Paulus a kale e na omukumo nosho wo uulaadhi?
16 Ihe mbela ongiini tatu vulu okukokeka nokukakatela uulaadhi wetu kelongelokalunga lyashili? Oyendji otashi vulika ya kale ye na ohoni nenge ihaaya popyapopya unene nohaye shi mono oshidhigu okuulukila yalwe omaiyuvo gawo nenge ya kale ye na ookuume. Ihe oshi li nawa okudhimbulukwa kutya okuulika uulaadhi kashi shi owala euliko lyokombanda lyomaiyuvo nenge lyenyanyu nenge lyi ikwatelela kuukwatya wagumwe. Paulus sho a li ta ladhipike Aakriste ooyakwawo okwa li u ulike nkene ye na okukokeka nokukakatela uulaadhi sho a ti: “Kaleni mwa hwama mombepo.” (Rom. 12:11, KB) Ombepo yaJehova oya li ya dhana onkandangala ya simana mokutsa aayapostoli omukumo neidhidhimiko miilonga yawo yokuuvitha. Okuza ethimbo ndyoka Jesus a li e mu ithana muupongekwa we wahugunina nomokuhepekelwa eitaalo lye muRoma uule woomvula dhi vulithe po 30, uulaadhi waPaulus kawa li nando wa tengauka. Okwa li aluhe ha kongo ekwatho kuJehova ngoka he mu pe oonkondo ndhoka a pumbwa okupitila mombepo ye ondjapuki. Paulus okwa popi a ti: “Ngame otandi vulu shaa shoka, oshoka Kristus ota koleke ndje.” (Fil. 4:13) Okwiilonga sha miiholelwa ye itaku ke tu etela tuu uuwanawa owundji!
17. Ongiini tatu vulu okukala twa “hwama mombepo”?
17 Oshitya shoka sha tolokwa “ehwamo” paulelalela otashi ti “okufuluka.” (Kingdom Interlinear) Opo omeya ga kale taga fuluka mokaketitha, otwa pumbwa okukala tatu ga hohele. Sha faathana, opo tu kale twa “hwama mombepo,” otwa pumbwa oonkondo dhombepo yaKalunga ethimbo kehe. Opo tu dhi mone, otu na okulongitha omasiloshimpwiyu agehe ngoka Jehova he tu nkondopaleke nago pambepo. Shoka otashi ti kutya otu na okutala ko ekonakono lyuukwanegumbo nosho wo okugongala ku li kwa simanenena, nokukala tu na ekonakono lyopaumwene nolyuukwanegumbo lyopandjigilile, hatu galikana nokugongala pamwe nAakriste ooyakwetu. Shoka otashi ke tu kwathela tu kale twa hwama opo tu vule okukala tatu “fuluka” shoka tashi ke tu kaleka twa “hwama mombepo.”—Lesha Iilonga 4:20; 18:25.
18. Tu li Aakriste yi iyapulila Jehova, okushike tu na okukala tu ukitha eitulomo lyetu?
18 Omuntu ngoka i iyapulila sha oha kala u ukitha eitulomo lye koshinima shoka noiha ngwangwana mbala nenge a se uunye oku shi lalakanena. Tu li Aakriste twi iyapulila Jehova, elalakano lyetu olyo okulonga shaa shoka a hala tu longe, nokuli ngaashi Jesus a li e shi ningi. (Heb. 10:7) Kunena, ehalo lyaJehova olyo kutya aantu oyendji ngaashi tashi vulika ya hangane naye. Onkee ano, natu holele Jesus naPaulus mokulonga nuudhiginini oshilonga shoka sha simanenena noshe endelela, shoka tashi longwa kunena.
Oto dhimbulukwa?
• Paulus nAakriste aagwayekwa yalwe oya li yi inekelelwa “oshilonga shokuhanganitha aantu” naKalunga shini?
• Ongiini oshihupe shaagwayekwa sha li sha longitha “ethimbo lyo opala lyesilohenda lyaKalunga” nawa?
• Ongiini aauvithi Aakriste taya vulu okukala ya “hwama mombepo”?
[Ethano pepandja 20]
Paulus ka li nando a dhimbwa sho Omuwa Jesus Kristus a li e mu ihololele