Ilonga sha moohapu dhaKalunga
Jesus Kristus oye lye?
Oshitopolwa shika otashi pendutha omapulo ngoka tashi vulika ho pula notashi ku ulukile mpoka to vulu okwaadha omayamukulo mOmbiimbeli yoye. Oonzapo dhaJehova otadhi ka kala dha nyanyukwa okukundathana nangoye omayamukulo ngaka.
1. Jesus Kristus oye lye?
Mepingathano naantu ooyakwawo, Jesus okwa kala megulu e li omuntu gwopambepo manga inaa valwa e li omuntu kombanda yevi. (Johannes 8:23) Oye oshishitwa shotango shaKalunga nokwa kwathela mokushita iinima yilwe ayihe. Oye awike a shitwa kuJehova shu ukilila nomolwaashoka ti ithanwa ‘omuvalwa awike’ gwaKalunga. Jesus okwa li omupopikalelipo gwaKalunga nomolwaashoka ti ithanwa “Ohapu.”—Johannes 1:1-3, 14; lesha Omayeletumbulo 8:22, 23, 30; Aakolossa 1:15, 16.
2. Omolwashike Jesus a li e ya kombanda yevi?
Kalunga okwa tumu Omwana kombanda yevi mokulundululila omwenyo gwe okuza megulu moshivalelo shomukadhona Omujuda Maria. Onkee ano, Jesus ke na he gwopantu. (Lukas 1:30-35) Jesus okwe ya kombanda yevi (1) okulonga aantu oshili kombinga yaKalunga, (2) okutula po oshiholelwa mokulonga ehalo lyaKalunga nosho wo (3) okugandja omwenyo gwe gwa gwanenena gu li “iikulila.”—Lesha Mateus 20:28; Johannes 18:37.
3. Omolwashike twa pumbwa ekulilo?
Ekulilo olyo ofuto ndjoka hayi futwa opo omuntu a mangululwe muupika. Eso nosho wo uukulupe kaya li oshitopolwa shelalakano lyaKalunga lyopetameko li na ko nasha naantu. Otu shi shi ngiini? Kalunga okwa li a lombwele omulumentu gwotango, Adam, kutya ngele okwa yono, oku na okusa. Ando Adam ka yonene, ando ina sa nando. Nokuli nonando Adam okwa li a kala nomwenyo sigo okonima yomathelemimvo gontumba, okwa li a si okuza esiku ndyoka a yono kuKalunga. (Genesis 2:16, 17; 5:5) Adam okwa taambekidha uulunde koluvalo lwe aluhe nondjambi yawo, eso. Kungawo, eso olye “etwa” muuyuni okupitila muAdam. Shoka osho molwaashoka twa pumbwa ekulilo.—Lesha Aaroma 5:12; 6:23.
4. Omolwashike Jesus a li a si?
Olye ta vulu okufuta ekulilo oku tu mangulula meso? Uuna twa si, ohatu futile po owala oondjo dhetu yene. Omuntu inaa gwanenena ita vulu okukulila aantu ooyakwawo muulunde.—Lesha Episalomi 49:7-9.
Molwaashoka Jesus ina thigulula okwaahagwanenena kuhe gwopanyama, ina sa molwoondjo dhe, ihe omolwoondjo dhayalwe. Kalunga okwa tumu Omwana a se omolwetu shoka shi li euliko lyohole Ye onenenene yokuhola aantu. Jesus okwe tu ulukila wo ohole mokuvulika kuHe nomokugandja omwenyo gwe omolwoondjo dhetu.—Lesha Johannes 3:16; Aaroma 5:18, 19.
5. Ngashingeyi Jesus ota ningi shike?
Jesus sho a aludha aavu, a yumudha aasi nokuhupitha mboka ye li moothina, okwa li u ulike shoka ta ka ningila lwanima aantu ayehe aavuliki. (Lukas 18:35-42; Johannes 5:28, 29) Konima sho Jesus a si, Kalunga okwe mu yumudha e li omuntu gwopambepo. (1 Petrus 3:18) Opo nduno Jesus okwa kala a tegelela kolulyo lwaJehova Kalunga sigo te mu pe oonkondo dhokupangela kombanda yevi alihe e li Omukwaniilwa. (Aahebeli 10:12, 13) Ngashingeyi Jesus ota pangele e li Omukwaniilwa megulu naalanduli ye kombanda yevi otaya tseyitha onkundana ombwanawa muuyuni auhe.—Lesha Daniel 7:13, 14; Mateus 24:14.
Masiku Jesus ota ka longitha oonkondo dhe e li Omukwaniilwa mokuhulitha po omaupyakadhi agehe nosho wo mboka haye ge etitha. Aantu omamiliyona mboka ye na eitaalo tali longo muJesus nohaya vulika kuye otaya ka nyanyukilwa onkalamwenyo moparadisa kombanda yevi.—Lesha Episalomi 37:9-11.