Natu inekeleni Jehova unene tuu sho ehulilo tali hedha popepi

“Inekeleni OMUWA sigo aluhe; ote ke tu gamena aluhe.”—JES. 26:4.

1. Eyooloko lini li li po pokati kaapiya yaKalunga naantu yomuuyuni?

OTU li muuyuni moka aantu omamiliyona kaaye shi we kutya olye ye na okwiinekela nenge oshike ye na okwiinekela, tashi vulika molwaashoka oya li yu uvithwa nayi nenge ya yematekwa lwiikando oyindjiyindji. Aapiya yaJehova inaya yooloka ko tuu kaantu mboka! Molwaashoka oyi inekela uunongo wopaKalunga, inaya tula einekelo lyawo muuyuni mbuka nenge ‘maanankondo’ yawo. (Eps. 146:3) Pehala lyaashoka, oyi inekelela Jehova onkalamwenyo yawo nonakuyiwa yawo, ye shi kutya oku ya hole nonokutya oha gwanitha po aluhe Oohapu dhe.—Rom. 3:4; 8:38, 39.

2. Josua okwa li a popi shike kombinga yuuinekelwa waKalunga?

² Josua gwomethimbo lyonale okwa li a popi kombinga yuuinekelwa waKalunga. Oku uka pehulilo lyonkalamwenyo ye, okwa li a lombwele Aaisraeli ooyakwawo a ti: “Kehe gumwe gwomune oku shi shi momutima gwe nomomwenyo gwe kutya OMUWA Kalunga keni okwe mú pe iinima ayihe iiwanawa mbyoka e yi mú uvanekele. Okwa gwanitha euvaneko kehe ndyoka e li mú uvanekele; kape na nando olimwe lya gwile pohi.”—Jos. 23:14.

3. Edhina lyaKalunga otali holola shike kombinga ye?

³ Jehova oha gwanitha po omauvaneko ge, hamolwaashoka owala e hole aapiya ye, ihe ohe shi ningi unene tuu omolwedhina lye. (Eks. 3:14; 1 Sam. 12:22) J. B. Rotherlam okwa yelitha nefalomo lyOmbiimbeli yedhina The Emphasized Bible a ti kutya edhina lyaKalunga otali ti kutya ota vulu okuninga kehe shimwe opo a vule okugwanitha po omauvaneko ge. Ngele otu uvu edhina lye tali popiwa, ohali tu dhimbulukitha kutya Kalunga oha gwanitha po aluhe shoka a popya. Ota vulu okuninga kehe shoka sha pumbiwa, ethimbo kehe pehala kehe. Iha nyengwa kusha nando. Kalunga ota ka kala aluhe metsokumwe neityo lyedhina lye.

4. (a) Jesaja 26:4 ote tu kumagidha tu ninge shike? (b) Oshike tatu ka konakona moshitopolwa shika?

⁴ Ipula to ti: ‘Mbela Kalunga ondi mu shi nawa opo ndi kale nde mu inekela thiluthilu? Mbela onda taalela onakuyiwa neinekelo, ndi shi kutya oye te yi wilike?’ Jesaja 26:4 (KB) ota ti: “Inekeleni Omuwa aluhe, oshoka Omuwa Kalunga Oye emanya lyaaluhe.” Dhoshili, ngashingeyi Kalunga iha yi olunyala moonkalamwenyo dhaantu pashikumithalonga ngaashi a li e shi ningi omathimbo gamwe pethimbo lyOmbiimbeli. Nonando ongaaka, e li “emanya lyaaluhe,” ota vulu okwiinekelwa “aluhe.” Ongiini Kalunga ketu ngoka e shi okwiinekelwa ha kwathele aalongeli ye aadhiginini kunena? Natu tale omikalo ndatu tadhi landula: Ohe tu nkondopaleke uuna tatu kongo ekwatho kuye opo tu kondjithe emakelo, ohe tu ambadhidha uuna tatu ungaunga nokwaahenakonasha nenge tatu patanekwa shu ukilila nohe tu tsu omukumo uuna twa gwililwa po kiimpwiyu. Sho tatu konakona iinima mbika, kala nuushili wankene to vulu okukoleka einekelo lyoye muJehova.

Inekela Kalunga uuna to makelwa wu longe shoka sha puka

5. Shi na ko nasha nokwiinekela muKalunga, omushike unene tatu vulu okumakelwa?

⁵ Inashi gwana owala okwiinekela Jehova uuna tashi ya peuvaneko lye lyOparadisa nenge lyeyumuko, iinima mbyoka twa halelela. Ihe otashi vulika shi kale oshidhigu lela oku mu inekela ngele tashi ya piinima yi na ko nasha neihumbato lyopamikalo, tashi vulika oomwenyo dhetu dhi kale inaadhi tompwa thiluthilu kutya oondjila dhe nosho wo omithikampango dhe odhu uka notadhi tu etele enyanyu enene. Omukwaniilwa Salomo okwa nyola ekumagidho ndika a ti: “Inekela OMUWA nomutima gwoye aguhe noino igameka koondunge dhoye mwene. Mu tseya moondjila dhoye adhihe, nena oondjila dhoye ote dhi yelekanitha.” (Omayel. 3:5, 6) Ndhindhilika kutya oshitya ‘oondjila’ shoka sha longithwa menyolo ndyoka, otashi ulike kutya otu na okukala twi inekela Kalunga mokukalamwenyo kwetu akuhe, ihe katu na owala okukala twi inekela omauvaneko ngoka e tu uvanekela. Ihe ongiini tatu vulu okuulika kutya otwi inekela muKalunga uuna tatu makelwa?

6. Ongiini tatu vulu okukoleka etokolotoko lyetu lyokukala itaatu dhiladhila uuwinayi?

⁶ Okweetha po omikalo omiwinayi ohashi tameke momadhidhilo getu. (Lesha Aaroma 8:5; Aaefeso 2:3.) Ihe ongiini to vulu okukoleka etokolotoko lyoye lyokukala itoo dhiladhila uuwinayi? Tala omikalo ndhika ntano: 1. Konga ekwatho lyaKalunga okupitila megalikano. (Mat. 6:9, 13) 2. Tedhatedha kombinga yiiholelwa yomOmbiimbeli yaamboka ya li inaaya pulakena kuye naamboka ya li ye mu pulakene. Opo ihe ndhindhilika nkene iinima ya li ye ya endele.a (1 Kor. 10:8-11) 3. Dhiladhila kombinga yuupyakadhi wopamadhiladhilo nowopamaiyuvo mboka uulunde tawu vulu oku ku etela nosho wo aaholike yoye. 4. Dhiladhila nkene Kalunga ha kala u uvite ngele gumwe gwomaapiya ye a yono sha kwata miiti. (Lesha Episalomi 78:40, 41.) 5. Dhiladhila nkene omutima gwaJehova hagu kala gu udha enyanyu uuna ta tala aalongeli ye aadhiginini taya tindi okulonga shoka oshiwinayi e taya longo shoka shi li mondjila, kutya nduno omontaneho nenge omeholamo. (Eps. 15:1, 2; Omayel. 27:11) Nangoye oto vulu okuulika einekelo lyoye muJehova.

Inekela Kalunga uuna wa taalelwa kokwaahenakonasha nokomapataneko

7. Jeremia okwa li a taalelwa kemakelo lini, nomathimbo gamwe okwa li ha kala u uvite ngiini?

⁷ Oyendji yomaamwatate ohaya longo miitopolwa iidhigu noonkondo. Omupolofeti Jeremia naye okwa li ha longo moshitopolwa sha tya ngaaka, sha hala okutya, muukwaniilwa waJuda pethimbo lyomasiku gasho gahugunina omadhigu. Einekelo lye muJehova olya li hali makelwa esiku kehe molwaashoka okwa li a tseyitha nevuliko omatumwalaka gaKalunga gepangulo. Pompito yimwe nokuli amushanga gwe omudhiginini, Baruk, okwa li a nyenyeta kutya okwa vulwa. (Jer. 45:2, 3) Mbela Jeremia okwa li a teka omukumo? Eeno, oshikando shimwe, okwa li a polimana. Okwa li a popi a ti: “Esiku nda valwa nali thingwe! . . . Omolwashike nda zi mo moshivalelo shameme, ndi mone iihuna nuudhigu mbu nondi hulithile omwenyo gwandje mohoni?”—Jer. 20:14, 15, 18.

8, 9. Shi na ko nasha naJeremia 17:7, 8 nosho wo Episalomi 1:1-3, oshike tu na okuninga opo tu tsikile okwiimika iiyimati iiwanawa?

⁸ Nonando ongawo, Jeremia ka li a si uunye. Okwa li a tsikile okwiinekela muJehova. Shi li oshizemo, omupolofeti nguka omudhiginini okwa li a mono egwanitho lyoohapu dhaJehova ndhoka a li a nyola muJeremia 17:7, 8 a ti: “Ote yambeke omuntu ngoka i inekela ndje. Okwa fa omuti tagu kokele pomatondokelo gomeya tagu taandeleke omidhi momeya. Itagu tila, nando ombepo ompyu tayi pepe, oshoka omafo gagwo oga ziza. Kagu na mbudhi, nando omvula yaa ko, otagu imi aluhe iiyimati.”

⁹ Ngaashi omuti gwiiyimati gwa ziza nawa “tagu kokele pomatondokelo gomeya” nenge moshikunino hashi tekelwa, Jeremia ka li nando a kala ‘ihi imike we iiyimati.’ Okwa li a tindi okunwethwa mo kaasheki aakolokoshi mboka ya li momudhingoloko gwawo. Pehala lyaashoka, Jeremia okwa li omudhiginini kOnzo ‘yomeya’ gomwenyo nokwa li ha vulika kwaashihe shoka Jehova a li e mu lombwele. (Lesha Episalomi 1:1-3; Jer. 20:9) Jeremia ine tu tulila po tuu oshiholelwa oshiwanawa, unene tuu mboka hatu longele Kalunga miitopolwa iidhigu! Ngele owu li monkalo ya tya ngaaka, tsikila nokwiinekela lela muJehova, ngoka te ke ku pa eidhidhimiko sho to “[uvitha montaneho, NW] edhina lye.”—Heb. 13:15.

10. Omalalekonuuyamba geni tu na, noshike tu na okwiipula?

¹⁰ Jehova okwe tu pa iinima oyindji opo yi tu kwathele momaupyakadhi ngoka hatu tsakaneke monkalamwenyo pethimbo lyomasiku ngaka gahugunina. Limwe lyomomasiloshimpwiyu ngoka Jehova e tu pa, olyo Oohapu dhe, Ombiimbeli, ndjoka ya tolokwa paushili momalaka ogendjigendji. Okwe tu pa iikulya yopambepo ya gwana pethimbo, okupitila mongundu yomupiya omudhiginini nomunandunge. Okwe tu pa ongundu onene yooitaali ooyakwetu mboka hatu kala tu na nayo ekwatathano lyopothingo kokugongala nosho wo kiigongi. Mbela oho longitha ngaa nawa omasiloshimpwiyu ngaka? Ayehe mboka haye shi ningi “otaa ka imba omahambelelo.” Ihe mboka itaaya vulika kuye ‘otaa ka ula nomutima gwa nyanyagulwa e taya lili omolwombepo ya tekauka.’—Jes. 65:13, 14, yelekanitha KB.

Inekela Kalunga uuna to ungaunga niimpwiyu

11, 12. Mokutala komaupyakadhi ngoka ge li muuyuni, uunongo wopakalunga otawu ke tu inyengitha tu ninge shike?

¹¹ Aantu oya taalelwa komaupyakadhi ogendji noonkondo, ngaashi sha li sha hunganekwa. (Mat. 24:6-8; Eh. 12:12) Ngele pwa holoka efundja, shoka aantu haya ningi tango, okumatukila kehala hoka itaaku adhika komeya nenge ya londe kombanda yetungo nenge shaa mpoka puule. Sha faathana, sho uupyakadhi muuyuni tawu indjipala, aantu omamiliyona otaya kongo egameno miinima mbyoka tayi monika ya fa yi li puule ngaashi egameno lyopashimaliwa, omahangano gopapolotika nenge gopalongelokalunga nosho wo uunongononi nuuteknologi. Ihe ayihe mbika kapu na shoka shi na egameno lyolela. (Jer. 17:5, 6) Mepingathano naashoka, aapiya yaJehova oye na egameno lyolela, sha hala okutya, “emanya lyaaluhe.” (Jes. 26:4, KB) Omupisalomi okwa popi a ti: “[Jehova] oye awike ta gamene ndje nota hupitha ndje. Oye epopilongulu lyandje.” (Lesha Episalomi 62:6-9.) Ongiini tatu vulu okuninga Jehova egameno lyetu?

¹² Ngele otwa kala hatu vulika kOohapu dhaJehova ndhoka olundji ihaadhi tsu kumwe nuunongo wopantu, otatu ku ulika kutya otwa kakatela kuye. (Eps. 73:23, 24) Pashiholelwa, aantu mboka ya nwethwa mo kuunongo wopantu otashi vulika ya tye: ‘Omuntu oho si lumwe owala; onkee ano tyapula onkalamwenyo yoye pakuudha.’ ‘Lalakanena eithano ewanawa.’ ‘Ikongela iimaliwa oyindji.’ ‘Landa shika naashiyaka.’ ‘Ka talele po komahala nomahala muuyuni auhe.’ Mepingathano naashoka, uunongo wopaKalunga, otawu tsu kumwe nomayele ngaka taga ti: ‘Mboka taa [lalakanene iinima] yomuuyuni mbuka, naa kale ya fa inaayi itula muyo. Oshoka uuyuni mbuka kau li kokule nokuhula po.’ (1 Kor. 7:31) Sha faathana, Jesus ohe tu kumagidha aluhe tu pitithe komeho iinima yUukwaniilwa nokwiilikolela “omaliko megulu” moka taga ka kala ga gamenwa thiluthilu.—Mat. 6:19, 20.

13. Tu na 1 Johannes 2:15-17 momadhiladhilo, oshike tu na okwiipula?

¹³ Mbela iikala yoye nkene wa tala ko ‘uuyuni’ nosho wo “iinima ayihe yomuuyuni” otayi ulike ngaa kutya owi inekela thiluthilu muKalunga? (1 Joh. 2:15-17) Mbela uuyamba wopambepo nuuthembahenda mboka hawu zi miilonga yUukwaniilwa uuwanawa nowa simana ngaa kungoye shi vulithe iinima mbyoka uuyuni tawu gandja? (Fil. 3:8) Mbela oho kambadhala wu kaleke ‘eho lyoye lya nathangwa’? (Mat. 6:22, NW) Dhoshili, Kalunga ina hala wu kale wu uvite kuu na oshinakugwanithwa, unene tuu ngele owu na uukwanegumbo mboka wu na okusila oshimpwiyu. (1 Tim. 5:8) Ihe okwa tegelela aapiya ye ya kale ye mu inekela thiluthilu, ihe hakwiinekela uuyuni waSatana mboka wu li pokuhula po.—Heb. 13:5.

14-16. Ongiini yamwe ya li ya mono uuwanawa mokukaleka ‘eho lyawo lyanathangwa’ nokupititha komeho iinima yUukwaniilwa?

¹⁴ Tala koshiholelwa shaRichard naRuth, aavali yaanona yatatu. Richard okwa ti: “Omutima gwandje ogwa li tagu lombwele ndje kutya ote vulu okuningila Jehova oshindji. Onda li ndi na onkalamwenyo ombwanawa, ihe onda li ndi uvite kutya onda li owala tandi pe Kalunga iihupe yomiilikolwa yandje, oku shi popya pathaneko. Konima sho twa galikana kombinga yoshinima shoka nokuyalula kutya otashi ke tu pula shi thike peni, otwa tokola ndi ka pule omutonateli gwiilonga yandje ndi kale owala handi longo omasiku gane moshiwike, nonando oshilongo osha li muupyakadhi wopamahupilo. Eindilo lyandje olya li lya taambiwa ko, nonda tameke okuninga iinima mbyoka kaanda li handi ningi nale muule owala womwedhi gumwe.” Ngashingeyi Richard oku uvite ngiini?

¹⁵ Okwa ti: “Oshimaliwa shoka handi mono osha shunwa pevi noopelesenda 20, ihe ngashingeyi ondi na omasiku 50 ga gwedhwa po momvula okukala nuukwanegumbo wandje nokuputudha aanona yandje. Ngashingeyi ohandi longo ethimbo olindji miilonga yomomapya, omakonakonombiimbeli gandje ogi indjipala nondi na ngashingeyi iinakugwanithwa oyindji megongalo yi vulithe yonale. Ruth oha kutha uukwathelikokolindjila omathimbo nomathimbo, molwaashoka ohandi mu kwathele okukala naanona. Onda tokola toko okukala handi ningi ngeyi ngaashi te vulu.”

¹⁶ Roy naPetina mboka ye na okamwanakadhona ke li puyo sigo ongashingeyi, oya li ye na ompito yokushonopeka ethimbo ndyoka ya li haya longitha miilonga yokwiikongela omboloto opo ya vule okukutha ombinga muukalele wethimbo lyu udha. Roy okwa ti: “Ohandi longo omasiku gatatu moshiwike, na Petina oha longo gaali. Otwa tembuka mo megumbo lyetu e tatu ka kala mokafuleta hoka okapu okutonatela. Otwa li aakokolindjila manga inaatu mona aanona yetu nokatwa li twa kanitha ohokwe yuukokolindjila. Sho aanona yetu ya koko, otwa shu na miilonga yethimbo lyu udha. Kapu na omwaalu gwiimaliwa tagu vulu okuyelekwa nomalalekonuuyamba ngoka twa mona.”

“Ombili yaKalunga” nayi gamene oomwenyo dheni

17. Ongiini Omanyolo ge ku hekeleka shi na ko nasha niinima mbyoka tayi ningwa monkalamwenyo waahe yi shi?

¹⁷ Kapu na gumwe gwomutse e shi shi kutya oshike tashi ka ningwa ongula, oshoka “ethimbo neuthilo” otali adha ayehe. (Omuuv. 9:11) Ihe okwaaheshisha kombinga yaashoka twa pumbwa ongula kaku na okuyona po ombili yetu yopamadhiladhilo kunena, ngaashi hashi ningwa olundji kwaamboka kaaye na egameno ndyoka hali zi mokukala nekwatathano lyopahole naKalunga. (Mat. 6:34) Omuyapostoli Paulus okwa nyola a ti: “Inamu kala mu na nando oshimpwiyu shasha, ihe oompumbwe dheni dhi tseyethileni Kalunga momagalikano geni agehe. Ihe indileni aluhe nomwenyo gu udha ehambelelo. Nombili yaKalunga, ndjoka yi vule uunongo auhe wopantu, otayi gamene oomwenyo dheni nomadhiladhilo geni.”—Fil. 4:6, 7.

18, 19. Omomikalo dhini Kalunga he tu hekeleke? Shi thaneka.

¹⁸ Aamwatate naamwameme oyendji mboka ye li moonkalo oondhigu oya mona ombili yokomutima okuza kuJehova. Omumwameme gumwe okwa ti: “Omutandi okwa li a kambadhala lwiikando okutilitha ndje opo ndi zimine ndi tulwe ombinzi. ‘Ngoye mwa ti omolwashike tuu inoo hala okutulwa ombinzi?’ Aluhe osho a li ha popi ngaaka uuna te ya pungame.’ Pethimbo mpono nopomathimbo galwe onda li nda galikana momutima kuJehova nonda mono ombili. Onda li ndu uvite ndi na oonkondo nda fa emanya. Kakele kuunkundi wandje omolwombinzi yandje ndjoka ya li pevi, onda li nda vulu okugandja omatompelo ga yela gopamanyolo opo ndi popile eitaalo lyandje.”

¹⁹ Omathimbo gamwe Kalunga ota vulu a gandje ekwatho lya pumbiwa okupitila momahekeleko gooitaali ooyakwetu nenge miikulya yopambepo yi li pethimbo. Otashi vulika wu uva omumwatate nenge omumwameme ta ti: “Oshitopolwa shika osho naanaa nda li nda pumbwa. Osha fa owala ongame sha nyolelwa!” Eeno, kashi na nduno mbudhi kutya otu li moonkalo dha tya ngiini nenge otwa pumbwa shike, Jehova ote ke tu ulukila ohole ye ngele otwe mu inekela. Kakele kaashono, tse otu li “oonzi” dhe notwa lukilwa edhina lye.—Eps. 100:3; Joh. 10:16; Iil. 15:14, 17.

20. Omolwashike aapiya yaJehova taya ka kala megameno sho uuyuni waSatana tawu ka hanagulwa po?

²⁰ Sho ‘esiku ndyoka Jehova ta ka holola ondjahi ye’ tali hedha popepi neendelelo, iinima ayihe mbyoka uuyuni waSatana wi inekela otayi ka hanagulwa po. Oshingoli, oshisiliveli nosho wo iinima yilwe yi na ongushu itayi ke ya gamena. (Sef. 1:18; Omayel. 11:4) Ngoka oye owala ta ka kala egameno lyetu, “Oye emanya lyaaluhe.” (Jes. 26:4, KB) Onkee ano, natu ulikeni ngashingeyi kutya otwi inekela Jehova thiluthilu mokweenda mevuliko moondjila dhe dhuuyuuki, mokuuvitha etumwalaka lyUukaniilwa we nonando otwa taalelwa kokwaahenakonasha nenge komapataneko noku mu tsika iimpwiyu yetu ayihe. Sho tatu ningi iinima mbika, otatu ka ‘kala shili megameno, niihuna yiiponga itayi ke tu adha.’—Omayel. 1:33.

[Enyolo lyopevi]

Oto vulu okuyelitha?

Ongiini tatu vulu okwiinekela muKalunga

• uuna tatu makelwa tu longe shoka sha puka?

• uuna twa taalelwa kokwaahenakonasha nenge komapataneko?

• uuna tatu ungaunga niimpwiyu?

[Ethano pepandja 15]

Okukakatela komithikampango dhaKalunga otaku eta enyanyu

[Ethano pepandja 17]

‘Omuwa Kalunga Oye emanya lyaaluhe’