Mbela oho nyanyukilwa ngaa shili okukonakona Oohapu dhaKalunga?

LORRAINE ota ti: “Sho nda tameke okulesha Ombiimbeli pandjigilile, onda li handi mono shi li omutengi pehala lyoku yi nyanyukilwa. Osha li oshidhigu oku yi uva ko, onkee ano, olundji onda li handi kanitha eitulomo.”

Yalwe oya zimina kutya nayo sho ya tameke okulesha Ombiimbeli kaya li haye yi nyanyukilwa. Ihe oya tsikile noku shi ninga molwaashoka oya li ye shi shi kutya oshu uka okulesha Omanyolo Omayapuki. Marc ota ti: “Oshipu okweetha omaipyakadhilo gontumba ga ye moshipala elesho lyOmbiimbeli nosho wo ekonakono lyopaumwene. Osha li sha pula ndje ndi galikane nopwaahe na ezimbuko nosho wo okuninga oonkambadhala ndi leshe Ombiimbeli esiku kehe.”

Oshike to vulu okuninga opo wu kale wu na olupandu lwomuule lwOohapu dhaKalunga, Ombiimbeli? Ongiini to vulu okunyanyukilwa oku yi lesha? Tala omaetopo taga landula.

Omalalakano gokukonakona Ombiimbeli nomikalo moka wu na oku shi ninga

Galikana tango manga inoo tameka okulesha Ombiimbeli nokukala wu na omadhiladhilo ge li pehala. Pula Jehova e ku kwathele wu kale wa hala okukonakona Oohapu dhe. Mu pula a patulule omadhiladhilo goye nomutima gwoye wu uve ko uunongo we muule. (Eps. 119:34) Ngele ekononakonombiimbeli lyoye ito li ningi momukalo nguka, otashi vulika wu li ninge itoo dhiladhila notashi vulika wu kanithe ehalo lyokutsikila oku li ninga. Lynn ota ti: “Omathimbo gamwe ohandi lesha tandi endelele nohandi palutha iitsa ya simana. Olundji, ihandi uvu ko nawa omanenedhiladhilo. Ohandi galikana Jehova a pe ndje uukwatya weipangelo mwene nokuli shika ohashi kwathele omadhiladhilo gandje kaaga falwafalwe.”

Kala wa lenga shoka ho ilongo. Dhimbulukwa kutya okuuva ko nokutula miilonga ooshili dhOmbiimbeli otashi ti omwenyo gwoye. Onkee ano, ninga oonkambadhala wa mana mo opo wu mone iitsa mbyoka wa pumbwa okutula miilonga. Chris ota ti: “Ohandi kongo shoka tashi kwathele ndje ndi dhimbulule iikala nomagamo omawinayi ngoka ndi na. Ohashi talaleke okumona nkene Ombiimbeli niileshomwa yetu oyindji yi na uuyelele mboka tawu etele ndje uuwanawa paumwene nokuli nando aanyoli kaye shi ndje.”

Itulila po omalalakano ngoka to vulu okwaadha. Kambadhala wu ilonge sha oshipe kombinga yaantu mboka ya popiwa mOmbiimbeli. Oto vulu okumona ooshili oohokithi kombinga yoyendji yomuyo mokutala mo-Insight on the Scriptures nenge mo-Watch Tower Publications Index. Sho to tseya aalumentu naakiintu mboka ya popiwa mOmbiimbeli ye li aantu yolela ye na omaukwatya nomaiyuvo, otaya ka kala yolela momadhiladhilo goye.

Tala kutya omomikalo omipe dhini to vulu okutompathana to longitha Omanyolo. (Iil. 17:2, 3) Sophia ngele ta konakona oha kala e shi na momadhiladhilo. Okwa ti: “Ohandi ilongo nelalakano lyokukokeka omikalo omipe dhokutompathana naantu muukalele nopomathimbo galwe opo ndi kale handi popi ooshili kombinga yOmbiimbeli momukalo gwa yela. Oshungolangelo oyo oshilongitho sha dhenga mbanda mokuninga ngaaka.”—2 Tim. 2:15.

Kala wa fa wu wete iiningwanima yomOmbiimbeli tayi ningwa. Aahebeli 4:12 otaya ti: “Oohapu dhaKalunga odhi na omwenyo.” Sho to lesha Omanyolo, kaleka etumwalaka lyaKalunga momadhiladhilo mokukala wa fa wu wete shoka sha li shi wetike kaantu mboka ya popiwa mOmbiimbeli. Kambadhala okuuva shoka ya li hayu uvu nokukala wu uvite shoka ya li haya kala yu uvite. Faathanitha iimoniwa yawo noonkalo dhokondandalunde ndhoka wa tsakaneka monkalamwenyo yoye. Ilonga komukalo gwawo nkene ya li yu ungaunga noonkalo. Shika otashi ka hwepopaleka euvoko lyoye noku ku kwathela wu koneke omahokololo gomOmbiimbeli.

Longitha ethimbo lya gwana mokukonakona Omanyolo omadhigu nomokukonakona omafatululo gago opo wu ga uve ko nawa. Longitha ethimbo lya gwana mekonakono kehe. Otashi vulika wi itse epulo tali hokitha noonkondo ndyoka tali pula wu konge uuyelelele wa gwedhwa po. Konga omaityo giitya mbyoka kuushi, tala omanyolo gopevi, nosho wo omaulikokwatakanitho ngoka ge li mOmbiimbeli. Mpoka ngaa pu thike okuuva ko nokutula miilonga shoka ho lesha opo ngaa tapu ka kala pu thike okunyanyukilwa okukonakona Oohapu dhaKalunga. Oto ka vula okupopya ngaashi omupisalomi ngoka a ti: “Iipango yoye [Jehova] oyo uuthiga wandje sigo aluhe, oyo enyanyu momutima gwandje.”—Eps. 119:111.

Yanda okukonakona to endelele. Itulila po ethimbo lye eleka lyokuninga ekonakono lyopaumwene. Itulila po wo ethimbo lyokwiilongekidhila okugongala. Raquel ota ti: “Olundji ohandi kala nda gwiililwa po kiimpwiyu nohashi ningitha ndje ndi kale itee gandja eitulomo kekonakono lyandje. Onkee ano, ohandi mono kutya okukonakona okathimbo okafupi ohaku etele ndje uuwanawa. Shika ohashi kwathele ndje ndi mone uuwanawa owundji mekonakonombiimbeli lyandje.” Chris ota ti: “Ngele onda ningi ekonakono tandi endelele, eiyuvo lyandje ohali nyenyetele ndje molwaashoka ohandi likola po owala oshishona. Olundji uuyelele ihawu gumu omutima gwandje.” Onkee ano, ninga ekonakono lyoye nethimbo.

Kokeka ehalo lyokukala wa sa enota lyoohapu dhaKalunga. Omuyapostoli Petrus okwa ti: “Kaleni onguuhanona mwa sa enota aluhe lyomahinihini gopambepo. Ngele tamu ga nu, otamu koko e tamu hupithwa.” (1 Pet. 2:2) Aanona inaya pumbwa okukala ya sa enota lyomahini. Ehalo ohali ya paunshitwe. Ihe Omanyolo otaga popi kutya otu na okukala twa sa enota lyokulesha Oohapu dhaKalunga. Ngele owa kala ho lesha epandja limwe lyOmbiimbeli kehe esiku, oto ka kala wa sa enota lyoku yi lesha. Shoka tashi vulika shi kale tashi monika sha fa oshidhigu petameko ohashi ka kala tashi nyanyudha.

Tedhatedha kiitopolwa yopamanyolo mbyoka wa lesha. Uuwanawa owundji ohawu zi wo mokutedhatedha kwaashoka wa lesha. Shika otashi ke ku kwathela wu kwatakanithe iikundathanwa yopambepo mbyoka wa konga uuyelele wayo. Kungawo oto ka mona uunongo wa dhenga mbanda wopambepo, sha hala okutya, eliko linyanyudha.—Eps. 19:14; Omayel. 3:3.

Okulongitha nawa ethimbo mokukonakona

Otashi pula oonkambadhala okukala tu na omukalondjigilile omwaanawa gwokukonakona, ihe omayambeko ogendjigendji. Euvoko lyoye lyOmanyolo otali ka hwepopala. (Heb. 5:12-14) Oondunge dhokuyoolola nuunongo mboka wa mona mOohapu dhaKalunga dha nwethwa mo ohawu ku e tele enyanyu, uuwanawa, nombili. Uunongo mboka wu li mOohapu dhaKalunga dha nwethwa mo owo “omuti gwomwenyo” kwaamboka taye wu dhiginine noku wu tula miilonga.—Omayel. 3:13-18.

Okukonakona muule Oohapu dhaKalunga otaku vulu oku ku ningitha wu kale omunandunge. (Omayel. 15:14) Shika otashi ke ku kwathela wu gandje omayele taga zi komutima ga kankamena thiluthilu kOmbiimbeli. Ngele owe etha omotokolo goye ga wilikwe kwaashoka to lesha mOmanyolo nosho wo miileshomwa ‘yomupiya omudhiginini nomunandunge’ oto ka mona etalaleko mOohapu dhaKalunga dha nwethwa notadhi ke ku koleka. (Mat. 24:45, KB) Oto ka kala wu na etaloko lyu uka, wu na omukumo noto ku ulika kutya oto wilikwa kOmanyolo. Kakele kaashono, oto ka pondola mukehe shimwe shoka sha kwatela mo ekwatathano lyoye naKalunga.—Eps. 1:2, 3.

Ohole yokuhola Kalunga nomutima aguhe otayi ke ku inyengitha wu lombwele yalwe eitaalo lyoye. Shika nasho otashi vulu oku ku etela uuwanawa owundji. Sophia oha ningi oonkambadhala a dhimbulukwe nokulongitha Omanyolo ngoka taga pendutha ohokwe yaantu nohage mu kwathele a pondole muukalele. Okwa ti: “Ohashi nyanyudha uuna to mono aantu tayi inyenge koohapu dhOmbiimbeli.”

Ihe uuwanawa wa tongomana kaaku na we mboka hawu zi mokunyanyukilwa okukonakona Oohapu dhaKalunga owo okukala nekwatathano lyopothingo naJehova. Ekonakonombiimbeli ohali ku ningitha wu tseye omithikampango dhe, nowu kale wu na olupandu lwohole ye, lwokugandja kwe nehalo ewanawa nosho wo lwuuyuuki we. Kapu na omalalakano galwe ga simanenena ge vule ngoka. Itula mo mokukonakona Oohapu dhaKalunga. Ngele to shi ningi, oto longitha nawa ethimbo.—Eps. 19:7-11.

[Oshimpungu/Omathano pepandja 5]

OKULESHA OOHAPU DHAKALUNGA: OMALALAKANO NOMIKALO DHOKU SHI NINGA

▪ Galikana tango manga inoo tameka okulesha Ombiimbeli nokukala wu na omadhiladhilo ge li pehala.

▪ Kala wa lenga shoka ho ilongo.

▪ Itulila po omalalakano ngoka to vulu okwaadha.

▪ Tala kutya omomikalo omipe dhini to vulu okutompathana to longitha Omanyolo.

▪ Kala wa fa wu wete iiningwanima yomOmbiimbeli tayi ningwa.

▪ Longitha ethimbo lya gwana mokukonakona Omanyolo omadhigu nomokukonakona omafatululo gago opo wu ga uve ko nawa.

▪ Yanda okukonakona to endelele.

▪ Kokeka ehalo lyokukala wa sa enota lyoohapu dhaKalunga.

▪ Tedhatedha kiitopolwa yopamanyolo mbyoka wa lesha.

[Ethano pepandja 4]

Uuna to lesha ehokolo lyOmbiimbeli, kala wa fa wu iwete wu li monkalo ya fa ndjoka