Omaukwanegumbo gopaKriste, ‘kaleni mwa tonata’

“Tu kaleni twa tonata notu na eidhiliko.”—1 TES. 5:6.

1, 2. Opo uukwanegumbo wu shi pondole mokukala wa tonata pambepo, owa tegelelwa wu ninge shike?

OMUYAPOSTOLI PAULUS okwa li a nyolele Aakriste yokuTessalonika ta popi “esiku enene netilithi lyOMUWA,” a ti: “Aamwameme, ne kamu [li momilema, KB] esiku ndyoka li mú adhe ando ohaluka ngaashi omufuthi. One amuhe aantu yomuuyelele noyomomutenya. Otse katu shi aantu yomuusiku nenge yomomilema.” Paulus okwa gwedha ko a ti: “Onkee ano inatu kaleni twa kotha ngaashi yalwe; tu kaleni twa tonata notu na eidhiliko.”—Joel 2:31; 1 Tes. 5:4-6.

² Omayele gaPaulus ngoka a li a pe Aatessalonika otago opalele unene tuu kAakriste mboka ye li pethimbo ‘lyehulilo lyuuyuni.’ (Dan. 12:4) Sho ehulilo lyonkalelo ye tali hedha popepi, Satana okwa tokola toko okugamuna ko aalongelikalunga yashili oyendji ngaashi ta vulu kokulongela Kalunga. Onkee ano, otatu ningi nawa ngele tatu kaleke momadhiladhilo ekumagidho lyaPaulus ndyoka tali tu kumagidha tu kale twa tonata pambepo. Opo uukwanegumbo wopaKriste wu shi pondole mokukala wa tonata, osha simana opo oshilyo kehe shi humbate oshinakugwanithwa shasho shopamanyolo. Aasamane, aakulukadhi nosho wo aagundjuka ohaya dhana nduno onkandangala yini mokukwathela omaukwanegumbo gawo ga ‘kale ga tonata’?

Aasamane, holeleni “omusita ngo omwaanawa”

3. Shi ikolelela kuTimoteus gwotango 5:8, oshinakugwanithwa shomulumentu e li omutse gwuukwanegumbo osha kwatela mo shike?

³ Ombiimbeli otayi ti: “Omulumentu oye omutse gwomukulukadhi.” (1 Kor. 11:3) Oshinakugwanithwa shomulumentu e li omutse gwuukwanegumbo osha kwatela mo shike? Omanyolo oga popya oshinima shimwe shoka omutse gwuukwanegumbo gu na okuninga taga ti: “Ngele ope na omuntu ngoka itaa sile aanezimo lye oshimpwiyu, unene aanegumbo lye, oye okwi idhimbike eitaalo nomwiinayi e vulike komupagani.” (1 Tim. 5:8) Dhoshili, omulumentu oku na okusila oshimpwiyu uukwanegumbo we painiwe. Ihe opo a kwathele uukwanegumbo we wu kale wa tonata pambepo, oku na okuninga oshindji kaashi shi owala okumona iimaliwa yoku wu ambidhidha. Okwa pumbwa oku wu tunga pambepo, okukwathela ayehe muukwanegumbo ya koleke ekwatathano lyawo naKalunga. (Omayel. 24:3, 4) Shika ongiini ta vulu oku shi ninga?

4. Oshike tashi vulu okukwathela omulumentu a pondole mokutunga uukwanegumbo we pambepo?

⁴ Molwaashoka “omulumentu oye omutse gwomukiintu, ngaashi Kristus wo Oye omutse gwegongalo,” omulumentu a hokana oku na okukonakona nokuholela uukwamutse mboka Jesus ha longitha mokuwilika egongalo. (Ef. 5:23, KB) Tala nkene Jesus a li a hokolola ekwatathano lye naalanduli ye. (Lesha Johannes 10:14, 15.) Oshike tashi vulu okukwathela omulumentu ngoka a hala okutunga uukwanegumbo we pambepo a pondole? Konakona shoka Jesus a popya naashoka a ninga e li “omusita ngo omwaanawa” e to ‘landula ondjila ndjoka a li e yi ende.’—1 Pet. 2:21.

5. Ontseyo yini Omusita Omwaanawa e na kombinga yegongalo?

⁵ Oku shi popya pathaneko, ekwatathano ndyoka hali kala pokati komusita noonzi dhe olya kankamena kontseyo nosho wo keinekelo. Omusita oku shi ashihe kombinga yoonzi dhe noonzi odhi mu shi nodhe mu inekela. Oonzi odhi shi ewi lye nohadhi vulika kuye. Jesus okwa ti: “Ngame oonzi dhandje ondi dhi shi nadho odhi shi ndje.” Jesus egongalo oku li shi nawanawa. Oshitya shOshigreka shoka sha tolokwa mpaka “shi” otashi ti “okutseya nawa omuntu pauhandimwe.” Eeno, Omusita Omwaanawa oku shi oonzi dhe pauhandimwe. Oku shi oompumbwe dhadho pauhandimwe, uunkundi wadho naashoka tadhi vulu okuninga. Omuholelwa gwetu ke na shoka kee shi nokee wete kombinga yoonzi dhe. Oonzi odhi shi nawa omusita gwadho nodhi inekela ewiliko lye.

6. Ongiini omusamane ta vulu okuholela Omusita Omwaanawa?

⁶ Opo a longithe uukwamutse we mokuholela Kristus, omusamane oku na okwiilonga okukala i itala ko e li omusita nokutala ko mboka ye li mesiloshimpwiyu lye ye li oonzi. Oku na okukambadhala okukala e shi nawa uukwanegumbo we. Mbela omusamane ota vulu ngaa okukala e wu shi nawa? Eeno, ngele oha popi nawa niilyo yuukwanegumbo we ayihe, ha pulakene komaipulo gayo, ha kwatele komeho omaipyakidhilo guukwanegumbo noha ningi omatokolo ga dhiladhilwa nawa ga kwatela mo iinima ngaashi ekonakono lyuukwanegumbo, okukala pokugongala, iilonga yomomapya, okuthuwa po nosho wo omainyanyudho. Uuna omusamane Omukriste ti ilongo nuukeka shoka Oohapu dhaKalunga tadhi ti nokutseya iilyo yuukwanegumbo we nawa, uukwanegumbo we otawu kala wi inekela uukwamutse we nota ka kala a nyanyukwa oku wu mona wa hangana melongelokalunga lyashili.

7, 8. Ongiini omusamane ta vulu okuholela Omusita Omwaanawa mokuulukila mboka ha sile oshimpwiyu ohole?

⁷ Omusita omwaanawa oku hole wo oonzi dhe. Uuna tatu konakona omahokololo gomOmavaangeli gonkalamwenyo yaJesus nuukalele we, omitima dhetu ohadhi inyengithwa kolupandu okupandula ohole ndjoka a li u ulukile aalongwa ye. Okwa li nokuli a ‘gandja omwenyo gwe omolwoonzi dhe.’ Aasamane oye na okuholela Jesus mokuulukila ohole mboka haya sile oshimpwiyu. Pehala lyokupangela omukulukadhi gwe nonyanya, omusamane ngoka a hala okuhokiwa kuKalunga oha tsikile okukala e hole omukiintu gwe “naanaa ngashika Kristus e hole egongalo lye.” (Ef. 5:25) Oohapu dhe odhi na okukala dhohenda nodhombili, molwaashoka omukulukadhi okwa gwana okusimanekwa.—1 Pet. 3:7.

⁸ Omutse gwuukwanegumbo ogu na okukala gwa dhiginina omakotampango gopakalunga ngele tagu dheula oyana aagundjuka. Ihe nonando ongaaka, kagu na okukala ihaagu ulukile oyana ohole. Egeeloputudho lya pumbiwa oli na okugandjwa pahole. Aagundjuka yamwe otashi vulika haya kwata ethimbo ele opo yu uve ko oshinima ye vulithe yalwe. Moshinima sha tya ngaaka, he oku na okukala e na eidhidhimiko enene. Uuna aalumentu taya landula aluhe oshiholelwa shaJesus, otaya ningi egumbo ehala lyegameno. Omaukwanegumbo gawo otaga ka nyanyukilwa egameno lyopambepo ndyoka omupisalomi i imba kombinga yalyo.—Lesha Episalomi 23:1-6.

9. Ngaashi tatekulululwa Noowa, aasamane Aakriste oye na oshinakugwanithwa shini, noshike tashi ke ya kwathela oku shi humbata?

⁹ Tatekulululwa Noowa okwa li ko pethimbo lyehulilo lyuuyuni wopethimbo lye. Ihe Jehova sho a tumine uuyuni waakenakonasha naye eyelu, okwa li e mu ‘hupitha pamwe nooyakwawo yaheyali.’ (2 Pet. 2:5) Noowa okwa li e na oshinakugwanithwa shokukwathela uukwanegumbo we wu hupe mEyelu. Omitse dhuukwanegumbo wopaKriste odhi li monkalo ya fa ye momasiku ngaka gahugunina. (Mat. 24:37) Inashi simanenena tuu dhi konakone oshiholelwa ‘shomusita omwaanawa’ nokukambadhala dhi mu holele!

Aakulukadhi, ‘tungeni omagumbo geni’

10. Okuvulika kwomukulukadhi komusamane gwe otaku ti shike?

¹⁰ Omuyapostoli Paulus okwa nyola a ti: “Aakiintu, vulikeni kaalumentu yeni, ngaashi hamu vulika kOmuwa.” (Ef. 5:22) Oohapu ndhoka itadhi popi nando kutya aakiintu oye li pondondo inaayi simana. Manga Kalunga kashili inaa shita omukiintu gwotango, Eva, okwa li a popi a ti: “Inashi opala, omuntu i ikalele oye awike. Otandi mu shitile omukwathi e mu opalela.” (Gen. 2:18) Onkandangala ndjoka “omukwathi” o opalela ta dhana oyo okukala ta kwathele omusamane gwe sho ta gwanitha po iinakugwanithwa yuukwanegumbo we, sha hala okutya, e li lela omuntu ngoka e shi okusimanekwa.

11. Omukiintu ngoka e shi okuholelwa oha ‘tungu egumbo’ lye ngiini?

¹¹ Omukulukadhi e shi okuholelwa ohu ungaunga nawa nuukwanegumbo we. (Lesha Omayeletumbulo 14:1.) Mepingathano nomukiintu egoya, ngoka ihaa simaneke elongekidho lyuukwamutse, omukiintu omunandunge oha simaneke elongekidho ndika. Pehala lyokuulika iikala yokwaahavulika nosho wo emanguluko lyomuuyuni, oku na okuvulika kukuume ke kopandjokana. (Ef. 2:2) Omukulukadhi ngoka kee na oondunge oha popile muuwinayi omusamane gwe, omanga omukiintu omunandunge ha longele kumwe nomusamane gwe opo a kaleke po esimaneko ndyoka ta simanekwa nalyo koyana nokuyalwe. Omukulukadhi a tya ngaaka iha kala owala a kotokela okwaahapangela uukwamutse womusamane gwe moku mu ningila nayi. Opu na wo oshinima shi na ko nasha nomahupilo. Omukiintu egoya otashi vulika a kale ha halakanitha iinima mbyoka yi ikongela nuudhigu. Omukulukadhi ngoka ha ambidhidha omusamane gwe hasho ha ningi ngawo. Oha longele kumwe nomusamane gwe miinima yi na ko nasha niimaliwa. Omukalo gwe gwokuninga iinima ohagu ndhindhilikilwa kokuungaunga niinima nomaengweno noku yi kwata nawa. Iha thiminike omusamane gwe a longe ethimbo lya gwedhwa po.

12. Oshike omukulukadhi ta vulu okuninga opo a kwathele uukwanegumbo we wu ‘kale wa tonata’?

¹² Omukulukadhi e shi okuholelwa oha kwathele uukwanegumbo we wu ‘kale wa tonata’ mokuyambidhidha omusamane gwe mokulonga oyana kombinga yaJehova. (Omayel. 1:8) Oha ambidhidha nuudhiginini elongekidho lyEkonakono lyUukwanegumbo. Kakele kaashono, oha ambidhidha omusamane gwe uuna ta gandja omayele negeeloputudho koyana. Ina yooloka ko tuu komukulukadhi ngoka ihaa longele kumwe nomusamane gwe, ngoka oyana haya mono iilanduliko iiwinayi yopalutu noyopambepo!

13. Omolwashike sha simana komukulukadhi opo a ambidhidhe omusamane gwe mokukutha ombinga momaipyakidhilo gegongalo?

¹³ Omukulukadhi ngoka ha ambidhidha omusamane gwe oha kala e uvite ngiini mokumona omusamane gwe ta dhana onkandangala ya simana megongalo lyopaKriste? Iha kala tuu a nyanyukwa! Kutya nduno omusamane gwe omuyakuligongalo, omukuluntugongalo nenge tashi vulika oshilyo shOkomitiye yOkukwatathana nIipangelo nenge shOkomitiye yOkutunga yomOshitopolwa, oha kala a nyanyukilwa uuthembahenda mboka e na. Opo omukulukadhi a kale ta ambidhidha omusamane gwe nehalo ewanawa okupitila moohapu nomiilonga, osha yela kutya oku na okuninga omaiyambo. Ihe oku shi kutya okukutha ombinga kwomusamane gwe momaipyakidhilo gegongalo otaku kwathele uukwanegumbo awuhe wu kale wa tonata pambepo.

14. (a) Oshike tashi vulika shi kale eshongo komukulukadhi ngoka ha ambidhidha omusamane gwe, nongiini ta vulu okusinda eshongo ndyoka? (b) Ongiini omukulukadhi ha humitha komeho onkalonawa yuukwanegumbo awuhe?

¹⁴ Okukala omukiintu e shi okuholelwa mokuyambidhidha onkandangala ndjoka omusamane ta dhana otaku vulu okukala eshongo komukulukadhi uuna omusamane gwe a ningi omatokolo ngoka itaa tsu kumwe nago. Nokuli ohu ulike ‘ombepo yombili noyengungumano’ noha longele kumwe nomusamane gwe opo a ninge shoka a tokola. (1 Pet. 3:4) Omukulukadhi e li nawa oha kambadhala okulandula iiholelwa iiwanawa yaakiintu yonale aatilikalunga, ngaashi Sara, Rut, Abigajil naMaria yi na yaJesus. (1 Pet. 3:5, 6) Oha holele wo oonekulu aakokole yokunena mboka ye na “okukalamwenyo kwa yapuka.” (Tit. 2:3, 4) Sho tu ulike ohole nesimaneko komusamane gwe, omukulukadhi e shi okuholelwa oha humitha komeho noonkondo okupondola kwondjokana yawo nosho wo onkalonawa yuukwanegumbo awuhe. Egumbo lye oli li ehala lyehekeleko nolyegameno. Komulumentu ngoka e na uupambepo uuwanawa, omukulukadhi ngoka ha ambidhidha omusamane gwe oku na ongushu kuye.—Omayel. 18:22.

Aagundjuka, ‘kalekeni omeho geni kiinima mbyoka kaayi wetike’

15. Ongiini aagundjuka taya vulu okulongela kumwe naavali yawo opo uukwanegumbo wawo wu ‘kale wa tonata’?

¹⁵ Ongiini ne aagundjuka tamu vulu okulongela kumwe naavali yeni opo uukwanegumbo waandjeni wu ‘kale wa tonata’ pambepo? Dhiladhileni kondjambi ndjoka Jehova e mu uvanekela. Otashi vulika okuza kuunona weni, aavali yeni ya li ye mu ulukile omathano ngoka tagu ulike nkene onkalamwenyo yomOparadisa tayi ka kala. Sho mwa koko, otashi vulika ya li ya longitha Ombiimbeli nosho wo iileshomwa yopaKriste oku mu kwathela mu kale mwa fa mu wete nkene okukala nomwenyo sigo aluhe taku ka kala ku li muuyuni uupe. Okukaleka omeho geni ga tala kiilonga yokulongela Jehova noku yi ilongekidhila monkalamwenyo yeni otashi ke mu kwathela mu ‘kale mwa tonata.’

16, 17. Oshike aagundjuka taya vulu okuninga opo ya matuke nomupondo methigathano lyokumona omwenyo?

¹⁶ Aagundjuka, kalekeni momadhiladhilo oohapu dhomuyapostoli Paulus ndhoka tadhi adhika mAakorinto yotango 9:24. (Lesha.) Kaleni tamu matuka methigathano lyoku ka mona omwenyo mu na elalakano lyoku ka sindana. Hogololeni onkalamwenyo ndjoka tayi ke mu petha ondjambi yomwenyo gwaaluhe. Aantu oyendji oye etha okulalakanena iinima yopamaliko ku ya imbe okukaleka omeho gawo ga tala kondjambi. Shoka inashi nika tuu uusama! Okulalakanena onkalamwenyo yomaliko itaku eta enyanyu lyashili. Iinima mbyoka iimaliwa hayi vulu okulanda oyopokathimbo. Ihe ‘kalekeni omeho geni kiinima mbyoka kaayi wetike.’ Omolwashike? Omolwaashoka “shoka itaashi vulu okumonika, otashi kala aluhe.”—2 Kor. 4:18.

¹⁷ ‘Iinima kaayi wetike’ oya kwatela mo omayambeko gUukwaniilwa. Unganeka onkalamwenyo yoye momukalo ngoka tagu ke ku kwathela wu ka mone omayambeko ngoka. Enyanyu lyashili ohali zi mokulongitha onkalamwenyo yoye mokulongela Jehova. Okulongela Kalunga kashili ohaku eta oompito dhokwaadha omalalakano gethimbo efupi nosho wo gethimbo ele.a Okwiitulila po omalalakano gopambepo ge li pandjele otaku vulu oku ku kwathela wu kale to gandja eitulomo kokulongela Kalunga nelalakano lyokumona ondjambi yomwenyo gwaaluhe.—1 Joh. 2:17.

18, 19. Ongiini omugundjuka ta vulu okutseya ngele oshili okwe yi ninga ye mwene?

¹⁸ Aagundjuka, onkatu yotango ndjoka mu na okukatuka mondjila tayi fala komwenyo oyo okuninga oshili yeni yene. Mbela onkatu ndjoka omwe yi katuka nale? Ipula to ti: ‘Mbela ondi li omuntu e na uupambepo uuwanawa nenge ohandi kutha owala ombinga momaipyakidhilo gopambepo molwaavali yandje? Mbela ohandi kokeke ngaa omaukwatya ngoka taga ningitha ndje ndi kale nda hokiwa kuKalunga? Mbela ohandi ningi ngaa oonkambadhala ndi kale aluhe he kutha ombinga momaipyakidhilo ge na ko nasha nelongelokalunga lyashili, ngaashi okugalikana ihaaku faula, okukonakona, okuya kokugongala nosho wo okuya miilonga yomomapya? Mbela otandi hedha ngaa popepi naKalunga mokukoleka ekwatathano lyandje naye?’—Jak. 4:8.

¹⁹ Tedhatedheni koshiholelwa shaMoses. Nonando okwa li a putukila meputuko kaali shi lyawo, okwa li a hogolola okukala a tseyika e li omulongeli gwaJehova pehala lyokukala a tseyika omwanamati gwomukadhona omwana gwaFarao. (Lesha Aahebeli 11:24-27.)Aagundjuka Aakriste, nane wo omwa pumbwa okukala mwa tokola toko okulongela Jehova nuudhiginini. Moku shi ninga, otamu ka mona enyanyu lyashili, onkalamwenyo dhingi ngashingeyi nosho wo etegameno lyokumona “okukalamwenyo kwashili.”—1 Tim. 6:19.

20. Methigathano lyomwenyo, oolye haya pewa ondjambi?

²⁰ Momaudhano gonale, omumatuki owala gumwe a li ha sindana methigathano. Shika hasho shi li ngawo methigathano lyokumona omwenyo. Kalunga okwa hala “aantu ayehe ya hupithwe noya tseye oshili.” (1 Tim. 2:3, 4) Aantu oyendji oya matuka nale nomupondo methigathano ndyoka, noyendji otaya matuka pamwe nangoye. (Heb. 12:1, 2) Ondjambi otayi ka pewa ayehe mboka inaaya sa uunye. Onkee ano, kala wa tokola toko okusindana.

21. Oshike tashi ka konakonwa moshitopolwa tashi landula?

²¹ “Esiku ndyoka enene netilithi lyOMUWA” itali vulu okuyandwa. (Mal. 4:5) Esiku ndyoka kali na okwaadha omaukwanegumbo gopaKriste ombaadhilila. Osha simanenena opo ayehe muukwanegumbo ya humbate iinakugwanithwa yawo yopamanyolo nuudhiginini. Mbela oshike ishewe to vulu okuninga opo wu kale wa tonata pambepo nokukoleka ekwatathano lyoye naKalunga? Oshitopolwa tashi landula otashi ka kundathana iinima itatu mbyoka ya guma onkalonawa yopambepo yuukwanegumbo awuhe.

[Enyolo lyopevi]

Owi ilonga shike?

• Omolwashike sha simanenena omaukwanegumbo gopaKriste ga ‘kale ga tonata’?

• Ongiini omusamane ta vulu okuholela Omusita Omwaanawa?

• Oshike omukiintu e shi okuholelwa ta vulu okuninga opo a yambidhidhe omusamane gwe?

• Ongiini aagundjuka taya vulu okukwathela uukwanegumbo waandjawo wu kale wa tonata pambepo?

[Ethano pepandja 9]

Omusamane ngoka e na uupambepo uuwanawa oha kala a lenga omukulukadhi gwe ngoka he mu ambidhidha