“Onda li nda lalakanena okukala handi dhana uudhano wokwiiyumbila mombanda, ihe onde ki iyadha handi ende mokatemba”
Ngaashi sha hokololwa kuZoya Dimitrova
Sho nda li ndi na oomvula 15, onda li handi nyanyukilwa uudhano wokwiiyumbila mombanda nokuninga iinima yilwe yu ukila hoka, notwa li hatu ka dhana kiilongo yi ili noyi ili. Opo nduno mu 4 Septemba 1970 onda li nda mono oshiponga sha kwata miiti. Onda li nda gu mombanda sho twa li tatu dhana. Kanda li ndi shi shoka sha ningwa po, onda haluka owala ndi idhenga pevi.
ONDA valwa mo 16 Desemba 1952, nonda li nda kala pamwe naavali yandje nosho wo nomumwamemekadhona mondoolopa yedhina Sofia, muBulgaria. Pethimbo mpoka, Bulgaria osha li tashi lelwa kepangelo lyUukomonisi ndyoka lya li tali ladhipike aantu kaaya gandje eitulumo komalongelokalunga nando olya li ngaa lya pitika ga kale mo. Aantu oyendji kaya li yi itaala naanaa muKalunga noyendji mboka ya li ye mu itaala, ihaye shi ulike montaneho. Nonando yaandjetu oya li haya ti kutya oyeitaalo lyOshiortodoks, ngame kanda li oshilyo shelongelokalunga lyontumba nokanda li handi dhiladhila sha kombinga yaKalunga.
Manga nda li okanona, osha li shi iwetikile lela kutya onda li ndi na ohokwe onene momaudhano gomaludhi agehe, ihe unene tuu uudhano wokwiiyumbila mombanda. Esiku limwe kosikola yetu okwa li kwe ya omulumentu ta kongo omukadhona a hala e ke mu dheulile uudhano mboka. Onda li nda hogololwa komudheuli gwetu gwoposikola nonda li ndi na owala oomvula 13 pethimbo mpoka. Onda li nda nyanyukwa noonkondo sho nda li ndi li mohauto yomuhona gwandje ndjoka ya za kuAmerika nonda li nda falwa kongundu yaadheuli ndi ka pulapulwe opo ndi talike ngele onda gwana. Lago enene, ongame nda li nda popilwa kaadheuli mboka. Okuza mpoka onda li nda tameke omadhewo gandje ngoka ga li ga kwata uule woomvula dha konda pumbali noga li ga kwata miiti notaga dhengele. Opo nduno onda li nda mana okudheulwa sho ndi na oomvula 15 nonda li nda tameke okunyanyukilwa onkalamwenyo ndjoka nda kala nda halelela notwa li wo hatu ka dhana komahala ogendji. Petameko, tango otwa li twa dhanene omaudhano getu muBulgaria ashihe nopo nduno otwa li twa ka dhana kiilongo mbyoka ya li tayi pangelwa kuSoviet Union, ngaashi kuAlgeria, Hungaria nokuYugoslavia shonale.
Onda kala handi nyanyukilwa noonkondo uudhano mboka uule woomvula ndatu. Hugunina, onda li nda mono oshiponga ngaashi sha tumbulwa metetekelo, manga twa li tatu dhana muTitov Veles, shomuMakedonia. Pethimbo mpoka, otwa li tatu dhana uudhano wokwiiyumbila mombanda, naatali otwa li twe ya tala ye li pevi. Ngoka hatu dhana pamwe naye okwa li u umbile ndje mombanda tandi idhingoloka ngame ando ndi kwate oshikaha she sho tandi galukile puye. Mupya munene, onda li nda hunutha oshikaha she, nongodhi yokugamena ndje oya li ya tokoka e tandi gwile pevi. Onda li nda gu mombanda oshinano shoometa hamano. Onda li nda falwa koshipangelo meendelelo naasho nda konakonwa onda li nda monika kutya onda teka okwaako, oombati odhindji nosho wo omugongo gwombunda. Onda kala kaandi shi mpo ndi li uule womasiku nokanda li handi dhimbulukwa kutya oshike sha li sha ningwa po. Sho nda ti po hwepo, onda li nda mono kutya nani olutu lwandje olwa sa ombinga yimwe, okuza moshiya sigo okomagulu. Ihe molwaashoka onda li omugundjuka natango, onda li handi yi kiipangelo yi ili noyi ili yaantu mboka ye na omaulema nedhiladhilo kutya otandi ka vula natango okukala handi ende tashi vulika nokuli ndi shune muudhano wandje wonale.
Onda li nda mono epango momandiki gontumba guundjolowele uule woomvula mbali netata dha ka landula ko, nonda li ndi na natango etegameno kutya otandi ka hwepopala. Hugunina, onda li nda zimine kutya kandi na we esiku ndi ka hwepopale nandonando. Ngashingeyi ohandi kala owala mokatemba, nonkalamwenyo yandje oya yooloka ko thiluthilu kwaandjoka nda li nda lalakanena.
Etameko lyonkalamwenyo ompe
Molwaashoka onda li nonkalamwenyo yi ipyakidhila, kanda li tandi vulu okwiidhidhimikila onkalo ompe ndjoka ya li ya holoka po. Onkee ano, onda li nda kwatwa kepolimano, molwaashoka kanda li we ndi na etegameno lyasha. Opo nduno omulumentu gumwe omugundjuka gwedhina Stoyan okwa li e ya pegumbo lyandje mo 1977. Konima sho a lombwele ndje kutya okwa valwa nagumwe ngoka twa li hatu dhana naye muudhano, onda li nde mu ithana nziya e ye megumbo. Pethimbo lyoonkundathana dhetu naye, okwa li a pula ndje ngele natango ondi na ngaa etegameno lyokukala nawa. Onda li nde mu yamukula kutya kandi li na we, molwaashoka onda li nda teka omukumo nonda li nda yemata molwaashoka inaandi vula we okwaadha elalakano lyandje. Sho a lombwele ndje kutya Kalunga oye owala ta vulu okukwathela ndje, onda li nde mu pula nda yemata nda ti: “Ngele oku na Kalunga, omolwashike nee e etha ndi ye monkalo ya tya ngeyi?”
Stoyan naye okwa li ha dhana uudhano wokwiiyumbila mombanda kIilongo yaHangana nopethimbo mpoka okwa adhika opo owala a ningi Onzapo yaJehova. Onkee ano, epulo ndyoka olyo lya li lye mu inyengitha a yelithile ndje kombinga yomauvaneko gOmbiimbeli gahokitha ge na ko nasha nonakuyiwa. Onda li nda nyanyukwa okwiilonga kutya masiku evi otali ka ninga oparadisa. Euvaneko kutya ‘itaku ka kala we eso, oluhodhi, elilo nenge uuwehame’ olya li lya gumu omutima gwandje noonkondo. (Ehololo 21:4) Kanda li tuu nda halelela okukala ishewe ndi na uukolele wopalutu! Onda li nda zimine meendelelo okukala ndi na ekonakonombiimbeli ihaali faula. Hugunina, onda li nda tameke onkalamwenyo ompe molwaashoka onda li nda mono ekankameno lyetegameno lyashili.
Oshiwike kehe onda li handi kala nda tegelela ekonakonombiimbeli lyandje nohokwe. Tango onda li nda konakona naStoyan nokonima yethimbo onaTotka, Onzapo yimwe onambili noonkondo. Omukulukadhi ngoka okwa li a kwathele ndje ndi ninge nziya ehumokomeho lyopambepo nokuza mpono onda li ndi iyapulile Jehova Kalunga. Pethimbo ndyono, mondoolopa yedhina Sofia kamwa li ngoka ta vulu okuninginitha ndje, onkee ano, onda li ndi na okutegelela omumwatate gwokuMakedonia. Mo 11 Septemba 1978 onda li nda ninginithwa megumbo lyandje metemba lyokwiiyogela. Onkee ano, opwa li pwa piti omvula yimwe lwaampono okuza sho nda tameke okukonakona Ombiimbeli. Okukala Onzapo yaJehova ya ninginithwa okwa li kwe etele ndje enyanyu enene, nonkalamwenyo yandje oya li yi na elalakano.
Oshili yOmbiimbeli ndjoka nda li ndi ilongo oya li ya hwama mungame ya fa omulilo gu li meni lyandje. Onkee ano, onda li nda halelela okulombwela kehe gumwe ngoka a li e ya okutalela ndje po kombinga yeitaalo lyandje epe. Mupya munene, kapwa li gumwe a li a pulakene kwaashoka nda li nde mu lombwele, tashi vulika ya li taya dhiladhila kutya omadhiladhilo gandje kage li we pehala omolwoshiponga shoka nda li musho.
Onda li nda yono sha kwata miiti
Konima yethimbo lyontumba, Oonzapo dhaJehova odha li dhi indikwa okuuvitha muBulgaria nomwa li owala Oonzapo oonshona moshilongo ashihe. Kamwa li egongalo hoka tandi vulu okuya omolwokugongala, nokanda li handi endathana naamwatate. Molwaashoka kanda li handi yi kokugongalo nokanda li handi endathana we naamwatate, onda li nda tameke okweendathana naamboka ihaaya kala metsokumwe nomithikampango dhOmbiimbeli naashoka osha li sha ningitha ndje ndi yone eyono lya kwata miiti.
Olundji eiyuvo lyandje olya li lya kala nokunyenyetela ndje, nonda li wo nda nika oluhodhi noonkondo sho kaandi na we ekwatathano naJehova. Lwahugunina, aakuluntugongalo aanahole oya li ya kwathele ndje ndi kale ndi na ekwatathano lyopothingo naJehova nondi mu longele nenyanyu. Ngaashingeyi ondi na uuthembahenda wokulongela Jehova neiyuvo lya yogoka nohandi endathana nehangano lye lya yogoka.
Nonando ondi na omangambeko ohandi nyanyukilwa onkalamwenyo
Oshiponga shoka nda li nda mono oomvula 40 dha piti, osha ningitha ndje ndi kale ihaandi kutha we ombinga momaudhano, ihaandi yi we momalweendo nosha ningitha ndje ndi kale owala handi kala mokatemba. Ihe nonando ongaaka, ihandi kala nda yemata noihandi ipe uusama ngele tandi dhiladhila shi na ko nasha nonakuziwa yandje, nokandi uvite nda fa inaandi pondola monkalamwenyo. Oshili yOmbiimbeli ndjoka ndi ilongo oya li ya kwathele ndje ndi mone kutya onkalamwenyo ndjoka nda li tandi lalakanene kaya li tayi ke etela ndje enyanyu lyashili nosho wo egwaneneno. Onda li nda mono mboka twa li hatu dhana omaudhano pamwe nayo mboka ya li ya tsikile nago kutya lwanima, oya li ya ka tsakaneka iinima yinikitha oluhodhi monkalamwenyo yawo. Mepingathano naashono, ngame onda li nda mono eliko li na ondilo, sha hala okutya, ekwatathano lyopothingo nOmushiti gwandje, Jehova Kalunga. Shoka osha li she etele ndje enyanyu enene ndyoka ando inaandi vula okumona muudhano wokwiiyumbila mombanda.
Kakele kaashono, onda li nda mono enyanyu okumona aantu yalwe oyendji taya mono ontseyo yoshili yOmbiimbeli notaya yapulile oomwenyo dhawo Jehova Kalunga ketu omunahole. Sho nda tameke okukonakona Ombiimbeli mo 1977 muBulgaria omwa li owala Oonzapo dhaJehova oonshona. Nokuli pehulilo lyo 1991 sho Oonzapo dhaJehova dha li dha pewa uuthemba wokuuvitha paveta sho epangelo lyUukomonisi lya li lyu umbwa ko koshipundi, muBulgaria kamwa li natango Oonzapo dha konda pethele. Ihe itashi nyanyudha tuu okumona nkene aauvithi yUukwaniilwa taye ende tayi indjipala neendelelo sigo taya adha oshitsa shopombanda shaauvithi 1 800 mboka ye li mo kunena!
MuBulgaria omu na natango ompumbwe onene yaauvithi, molwaashoka omu na aantu oyendji ya hala okumona ontseyo yOohapu dhaKalunga. Uushili owi iwetikile mokutala komwaalu gwa tongomana 3 914 gwaakali pEdhimbuluko lyEso lyaKristus mo 2010. Ohandi kala nda nyanyukwa okutedhatedha kutya Jehova okwa laleka nuuyamba iilonga yokuuvitha mbyoka tayi longwa muBulgaria. Onda mona wo nkene ehunganeko lyaJesaja 60:22 lya gwanithwa, ndyoka tali ti kutya “aashona” oya ningi “oshigwana oshinankondo.”
Oshinima shimwe ishewe shoka sha li she etele ndje enyanyu enene noitandi shi dhimbwa nando monkalamwenyo yandje osho egandjo lyOmbiimbeli yo-New World Translation of the Holy Scriptures mOshibulgaria. Ombiimbeli ndjika oya li ya piti muAuguste mo 2009 poshigongi shoshitopolwa “Kaleni mwa tonata” shoka sha li sha ningwa muSofia. Onda li nda nyanyukwa noonkondo okumona Ombiimbeli ndjoka melaka lyandje. Osha yela kutya oya li tayi ka kwathela aantu oyendji muBulgaria yi ilonge oshili.
Nonando uulema owa ngambeka ndje okuninga shoka tandi vulu mokuuvitha onkundana ombwanawa yUukwaaniilwa waKalunga, ohandi shi nyanyukilwa okulombwela aashiinda oshili yOmbiimbeli nosho wo kehe gumwe ngoka te ya okutalela ndje po. Pompito yimwe, onda li ndi ithana omushiinda ngoka a adha nda gondja mokatala kandje. Omukulukadhi ngoka okwa li e ya kungame nokonima sho nda li nda kundathana naye omanyolo ogendji taga tsu omukumo, okwa li a zimine mbala okukonakona Ombiimbeli. Okwa li a ningi ehumokomeho sho konima a ninginithwa nokwa ningi omumwameme gwopambepo. Sigo oompano, onda kwathela aantu yane yi iyapulile Jehova.
Okukala pandjigilile pokugongala kwopaKriste pamwe naamwatate naamwameme ye vulithe pethele ohashi etele ndje enyanyu enene noku li etsomukumo kungame, notwa ninga uukwanegumbo wumwe. Ohashi kala eshongo kungame okuya kokugongalo kwegongalo molwaashoka moshilongo shetu kamu na elongekidho lyi ikalekelwa lyokukwathela aakulupe niilema ngele tashi ya poofuto dhiiyenditho. Ihe nando ongaaka, ohandi pandula noonkondo eyakulo lyopahole ndyoka handi pewa komumwatate gumwe omugundjuka. Oha tumbile ndje mohauto ye okuza megumbo noha humbata ndje okuza mohauto ye okuya mOshinyanga shUukwaniilwa noha shunitha ndje kegumbo konima yokugongala. Ohandi pandula Jehova noonkondo sho a pa ndje uuthembahenda wokukala oshitopolwa shuukwanegumbo wopambepo nowu holathane.
Odhoshili kutya ngele tandi ipula nonakuziwa yandje, ondi wete kutya onkalamwenyo yandje oya yooloka ko noonkondo kwaandjoka nda li nda lalakanena sho nda li omugundjuka. Ihe nonando ongaaka, ondi na enyanyu enenenene sho handi longele Jehova nondi na etegameno ekumithi li na ko nasha nonakuyiwa. Ondi hole noonkondo euvaneko ndyoka Kalunga u uvaneka sho a ti kutya meviparadisa “oshitiningili otashi ka nuka ngomenye.” (Jesaja 35:6) Onda tegelela nondjuulukwe noneinekelo esiku tandi ka za mokatemba kandje nokukala ishewe ndi na uukolele.
[Oohapu dha simana pepandja 20]
“Okukala pokugongala kwopaKriste pandjigilile ohaku etele ndje enyanyu enenenene noku li etsomukumo kungame”
[Oohapu dha simana pepandja 21]
“Oshinima shimwe shoka sha li oshindhindhilikwedhi monkalamwenyo yandje osho kutya Ombiimbeli yo-New World Translation of the Holy Scriptures oya tolokwa mOshibulgaria”
[Ethano pepandja 19]
Onda li nda tameke okukala handi dhana uudhano mboka manga nda li ndi na oomvula 15