Kalunga okwe tu hololele kutya oku tu hole

‘Esilohenda otali pangele li na uuyuuki, li tu fale momwenyo gwaaluhe omolwaJesus Kristus, Omuwa gwetu.’—ROM. 5:21.

1, 2. Omagano geni gopaali tatu ka konakona, nomagano geni ogo ge vule omakwawo?

OMUPOLOFESOLI gwokoUniveesiti yaMelbourne, Australia, okwa nyola a ti: “Oompango dhEpangelo lyaRoma odhi li omagano ngoka ge na ongushu tayi kalelele kokukala po kwaantu.” Ihe Ombiimbeli otayi longo kutya Kalunga okwe tu pa omagano ge na ongushu yi vule mpoka nogopahole. Omagano ngaka ogo tage shi ningitha tashi wapa opo omuntu a kale a hokiwa kuKalunga noku kale e na omuthika omwaanawa naye nokukala e na etegameno lyoku ka hupithwa nolyokumona omwenyo gwaaluhe.

² Opwa li iinima yopampangu yi na ko nasha nankene Kalunga a li a gandja omagano ngaka. MAaroma ontopolwa 5, omuyapostoli Paulus ina popya kutya iitegelelwa mbyoka iidhigu nenge kutya opu na omusholondondo omuleeleka gwiitegelelwa ya tya ngaaka. Pehala lyaashono, okwa tameke neshilipaleko ndika linyanyudha a ti: “Sho twa ningwa aayuuki koshipala shaKalunga molweitaalo, otu na ombili naKalunga omolwOmuwa gwetu Jesus Kristus.” Mboka haya mono omagano okuza kuKalunga ohayi inyengithwa ya kale wo ye mu hole. Paulus oye gumwe gwomwaamboka. Okwa li a nyola a ti: “Ohole yaKalunga oya tililwa moomwenyo dhetu kOmbepo Ondjapuki.”—Rom. 5:1, 5.

3. Omapulo geni haga pulwa aluhe?

³ Ihe omolwashike nduno omagano ngaka gopahole ga li ga pumbiwa? Ongiini Kalunga a li a vulu oku ga gandja naanaa momukalo gwa faathana naangoka ga li ga kanithwa? Kehe gumwe pauhandimwe okwa tegelelwa a ninge shike opo a kale a gwana oku ga pewa? Natu ka konakoneni omayamukulo taga mbilipaleke nokutala nkene taga tsu omuthindo ohole ndjoka Kalunga e tu ulukila.

Ohole yaKalunga otayi kondjithathana nuulunde

4, 5. (a) Jehova okwa li u ulike ohole ye momukalo omunene guni? (b) Uuyelele wuni tawu vulu oku tu ningitha tu uve ko Aaroma 5:12?

⁴ Mokuulika ohole ye onene, Jehova okwa li a tumu Omwana awike a kwathele aantu. Paulus okwe shi popi momukalo nguka a ti: “Kalunga okwe tu hololele kutya oku tu hole, Kristus sho a si peha lyetu, manga twa li aalunde.” (Rom. 5:8) Dhiladhila kombinga yoshinima shimwe sha popiwa menyolo moka tashi ti: “Manga twa li aalunde.” Aantu ayehe oya pumbwa okutseya kutya osha li she ende ngiini opo tu ninge aalunde.

⁵ Paulus okwa li a popi paufupi kombinga yoshinima shika, sho a tameke noohapu ndhika tadhi ti: “Uulunde owe etwa muuyuni komuntu gumwe, nuulunde we owe etelele eso. Onkee ano eso olya taandele maantu ayehe, oshoka ayehe oya yono.” (Rom. 5:12) Otatu vulu okuuva ko oshinima shika molwaashoka Kalunga okwe tu pa uuyelele wu na ko nasha nankene onkalamwenyo yaantu ya tameka. Jehova okwa li a shiti aantu yaali, Adam naEva. Aantu yotango, sha hala okutya, ookukulululwa nayo oya li ya gwanenena ngaashi Omushiti gwawo. Kalunga okwa li owala e ya ngambeka kaaya ninge oshinima shimwe nokwa li e ya lombwele kutya ngele inaya vulika kompango ndjoka otashi ke ya etela eso. (Gen. 2:17) Ihe oya li ya katuka kaashi li pandunge, inaaya vulika kelombwelo lyaKalunga ndyoka li li pandjele, nokungawo oya li ye mu ekelehi e li Omugandjimpango nosho wo Omupangeliawike.—Deut. 32:4, 5.

6. (a) Omolwashike oluvalo lwaAdam lwa li lwa tameke okusa manga Kalunga a li inaa gandja Ompango yaMoses nokonima sho ya gandjwa? (b) Oshike tashi vulu okuyelekanithwa nomukithi ngoka gwa thigululwa?

⁶ Adam okwa li owala a kala e na aanona konima sho a yona nale nokwa taandeleke uulunde niilanduliko yawo maantu ayehe. Dhoshili, kaya li ya yono oshipango shaKalunga ngaashi Adam a li a ningi, onkee kaya li ya geelwa omolweyono lya fa lyaAdam; yo inaya pewa wo omulandu gwoompango ndjoka ya li ya pewa Adam. (Gen. 2:17) Nonando ongawo, oluvalo lwaAdam olwa thigulula uulunde. Kungawo uulunde neso oya pangele sigo okethimbo sho Kalunga a li a pe Aaisraeli omulandu gwoompango ndhoka dha li dhu ulike thiluthilu kutya oyo aalunde. (Lesha Aaroma 5:13, 14.) Iilanduliko yuuthigululwalunde otayi vulu okuyelekanithwa nomikithi dhontumba ndhoka tashi vulika tu thigulule kaavali yetu. Nokuli nonando aanona yamwe muukwanegumbo otashi vulika ya thigulule omukithi kaavali yawo, haayehe hashi vulika ye gu thigulule. Ihe shoka hasho shi li ngaaka shi na ko nasha nuulunde. Atuheni otwa thigulula uulunde kuAdam nomolwaashoka atuheni otu na okusa. Mbela onkalo ndjoka ondhigu oyi na ngaa esiku yi ka kandulwe po?

Shoka Kalunga a li a gandja okupitila muJesus Kristus

7, 8. Ongiini oonkatu dhaalumentu yaali ya gwanenena dha li dhe etitha po iizemo ya yoolokathana?

⁷ Jehova okwa li a ningi po sha pahole opo a pithe aantu miilanduliko yuuthigululwalunde. Paulus okwa li a yelitha kutya shika osha li owala sha vulu okuningwa okupitila momuntu gulwe a gwanenena ngoka e ke ya konima, sha hala okutya, Adam omutiyali. (1 Kor. 15:45) Ihe aalumentu mbaka yaali ya gwanenena oya li ya katuka oonkatu dha yoolokathana, nakehe onkatu oya li ye eta iizemo ya yoolokathana noonkondo. Ngiini mbela?—Lesha Aaroma 5:15, 16.

⁸ Paulus okwa li a nyola a ti: “Mbaka yaali inaa faathana, oshoka omagano gesilohenda lyaKalunga itaga vulu okuyelekwa nokuyona kwaAdam.” Adam okwa li e na ondjo omolwokuyona hoka nokwa li a pewa pauyuuki egeelo lya kwata miiti, sha hala okutya, okwa si. Ihe haye owala a li e na okusa. Otatu lesha taku ti: ‘Okuyona kwagumwe ngoka okwe etele aantu ayehe epangulo.’ Egeelo ndyoka lya li lya pewa Adam pauyuuki olya guma wo oluvalo lwe inaalu gwanenena natse twa kwatelwa mo. Nonando ongawo, otatu vulu okukala tu na omukumo mokukala tu shi kutya omulumentu a gwanenena, Jesus, okwa li a vulu okweetitha po oshizemo sha yooloka. Oshizemo osha li shashike mbela? Eyamukulo otu li wete mwaashoka sha popiwa kuPaulus kombinga ‘yokumangululwa kwaantu ayehe e taa pewa omwenyo.’—Rom. 5:18.

9. Kalunga okwa li a ningi shike lelela sho a mangulula aantu ayehe e taa pewa omwenyo, ngaashi sha popiwa mAaroma 5:16, 18?

⁹ Omautumbulilo gOshigreka “okumangululula omuntu” nosho wo ‘okumangulula aantu ayehe e taa pewa omwenyo’ otaga gandja eityo lyashike? Omutoloki gumwe gwOmbiimbeli okwa nyola kombinga yomautumbulilo ngoka a ti: “Omufethelamo ngoka otagu ulike kiinima yopaveta. Otagu ulike kokulundulula kwaKalunga etaloko lye shi na ko nasha nomuntu, ihe itagu ulike kokulundulula kwomuntu iikala ye yomomutima . . . Omufethelamo otagu thaneke Kalunga e li omupanguli ngoka a tokola kutya ngoka ta tamanekwa ke na ondjo, oku shi popya pathaneko. Onkee ano, Kalunga okwa mangulula omutamanekwa ngoka.”

10. Jesus okwa li a ningi shike shoka sha li she shi ningi tashi wapa opo aantu ya vule okukala aayuuki?

¹⁰ ‘Omupanguli gwuuyuni auhe’ omuyuuki okwa li a tokola kutya omuntu omulunde ke na ondjo yasha pakankameno lyashike? (Gen. 18:25) Mokukatuka kwe onkatu ya simanenena, Kalunga okwa li a tumu pahole Omwana awike kombanda yevi. Jesus okwa li a longo ehalo lyaHe thiluthilu, kakele kokumakelwa, kokuhepekwa nosho wo okumonithwa iihuna. Okwa li a kakatele uudhiginini we nokuli sigo omokusa komuti gwomahepeko. (Heb. 2:10) Mokuyamba po omwenyo gwe gwopantu gwa gwanenena, Jesus okwa li a gandja ekulilo ndyoka lya li tali vulu okukulila oluvalo lwaAdam muulunde neso.—Mat. 20:28; Rom. 5:6-8.

11. Ekulilo oli na ongushu yi thike peni?

¹¹ Paulus shika okwe shi ithana menyolo lilwe “iikulila ya gwana po.” (1 Tim. 2:6, NW) Oshike sha li she yi ningitha yi kale ya gwana po? Adam okwa li e etele aantu omamiliyona eyuvi mboka ye li oluvalo lwe, okwaahagwanenena nosho wo eso. Odhoshili kutya Jesus e li omuntu a gwanenena, oye a li ta vulu okuningitha aantu omamiliyona eyuvi ya kale ya gwanenena.a Onkee ano, osha li shu uvitiwe ko nawa kutya omwenyo gwaJesus nosho wo oomwenyo dhaamboka taya ka ninga anuwa oluvalo lwe lwa gwanenena oya ninga eyambo lya yeleka omwenyo gwaAdam nosho wo gwoluvalo lwe inaalu gwanenena. Ihe Ombiimbeli inayi popya kutya mboka taya vulu okuninga oluvalo lwaJesus oya ninga oshitopolwa shekulilo. Aaroma 5:15-19 oya popya kutya eso ‘lyomuntu gumwe’ owala lya mangulula aantu. Eeno, onkalamwenyo yaJesus ya gwanenena oya li yi thike pwaandjoka yaAdam. Eitulomo oli na okuukithwa kuJesus Kristus awike. Osha ningwa tashi wapa opo aantu yoludhi kehe ya vule okumona omagano nomwenyo ‘omolwoshilonga shimwe shuuyuuki’ shaJesus, sha hala okutya, okuvulika kwe nosho wo okukakatela kwe uudhiginini sigo eso. (2 Kor. 5:14, 15; 1 Pet. 3:18) Shoka osha li she ende ngiini?

Ohatu dhiminwa po pakankameno lyekuliloyambo

12, 13. Omolwashike mboka ya ningwa aayuuki ya pumbwa okusilwa ohenda kuKalunga noya pumbwa ohole ye?

¹² Jehova Kalunga okwa li a taamba ko ekuliloyambo ndyoka Omwana a li a gandja. (Heb. 9:24; 10:10, 12) Nonando ongawo, aalongwa yaJesus kombanda yevi mwa kwatelwa aayapostoli ye aadhiginini, oya kala inaaya gwanenena. Nonando oya li ya kambadhala okuhenuka okulonga uuwinayi, haaluhe ya li ye shi pondola. Omolwashike mbela? Omolwaashoka oya thigulula uulunde. (Rom. 7:18-20) Ihe Kalunga okwa li ta vulu okuninga sha kombinga yaashoka nokwa li e shi ningi. Okwa li a taamba “iikulila ya gwana po” nokwa li e na ehalo lyoku yi longitha molwaapiya ye.

¹³ Itashi ti kutya Kalunga oku na ongunga yokudhimina po aayapostoli nosho wo aantu yalwe pakankameno lyekuliloyambo molwaashoka oya longa uuwanawa wontumba. Pehala lyaashono, Kalunga okwa li i inyengithwa kohenda nokohole ye onene a dhimine po aantu pakankameno lyekulilo. Okwa li a hogolola okutokola kutya aayapostoli nayalwe kaye na ondjo e ta kala e ya tala ko kutya oya mangululwa mo muulunde mboka ya thigulula. Paulus okwe shi popi sha yela a ti: “Omwa hupithwa kesilohenda lyaKalunga keitaalo. Ehupitho ndika inali za mune yene, aawe, olyo omagano gaKalunga.”—Ef. 2:8.

14, 15. Ondjambi yini ya li ya longekidhilwa mboka Kalunga a ningi aayuuki, ihe oya pumbwa okuninga shike natango?

¹⁴ Dhiladhiladhila komagano ngoka Omunankondoadhihe a gandja okudhima po oondjo dhomuntu ndhoka a thigulula nosho wo uuwinayi mboka a longa. Omuntu kehe okwa longa omayono ogendji manga inaa ninga Omukriste, ihe nonando ongawo Kalunga ota vulu okudhima po omayono ngoka pakankameno lyekulilo. Paulus okwa li a nyola a ti: “Esilohenda lyaKalunga olyo okumangulula omuntu konima yokuyona okwindji.” (Rom. 5:16) Opo aayapostoli nayalwe ya mone omagano ngaka (ya ningwe aayuuki) oye na okutsikila okulongela Kalunga kashili ye na eitaalo. Otaya ka pewa ondjambi yini monakuyiwa? “Shoka sha ningwa kwaanguka gumwe, Jesus Kristus, osho oshinene. Omolwe ayehe mboka taa pewa eudho lyesilohenda lyaKalunga nomagano guuyuuki we, otaa ka pangela mokukalamwenyo kwawo.” Dhoshili, omagano guuyuuki ohaga longo momukalo gwi ili. Omagano ngoka otaga ka tya omwenyo.—Rom. 5:17; lesha Lukas 22:28-30.

¹⁵ Mboka taya pewa omagano ngoka, oya ningwa aayuuki, ya ningi oyana yaKalunga yopambepo. Ye li aathigululi pamwe naKristus, oye na etegameno lyokuyumudhilwa megulu ye li oyana yaKalunga yopambepo ya ka ‘pangele’ pamwe naJesus Kristus.—Lesha Aaroma 8:15-17, 23.

Kalunga oku ulukila wo yalwe ohole ye

16. Ongiini mboka ye na etegameno lyoku ka kala kombanda yevi taya vulu okumona omagano?

¹⁶ Haantu ayehe mboka ye na eitaalo tali longo nohaya longele Kalunga ye li Aakriste aadhiginini ya tegelela oku ka ‘pangela’ pamwe naKristus megulu. Oyendji oye na etegameno lya kankamena kOmbiimbeli lya faathana naandyoka lya li lyi niwe kaalongeli yaKalunga mboka ya tetekela Aakriste. Oye na etegameno lyoku ka kala sigo aluhe moparadisa kombanda yevi. Mbela ngashingeyi otaya vulu ngaa nokuli okumona omagano gopahole gaKalunga nokukala ya talika ko aayuuki ye na etegameno lyokukala nomwenyo kombanda yevi? Pakankameno lyaashoka Paulus a li a nyolele Aaroma, eyamukulo olyo kutya otashi vulika.

17, 18. (a) Omolweitaalo ndyoka Abraham a li e na Kalunga okwa li e mu tala ko ngiini? (b) Jehova okwa li a vulu okutala ko Abraham e li omuyuuki pakankameno lyashike?

¹⁷ Paulus okwa li a popi kombinga yoshiholelwa sha simanenena, shaAbraham, omulumentu e na eitaalo ngoka a li ko manga Jehova inaa gandja oompango kAaisraeli nomanga Kristus inee egulula ondjila yoku ka kala megulu. (Heb. 10:19, 20) Otatu lesha taku ti: “Kalunga oku uvanekele Abraham, uuyuni u ninge we nowoluvalo lwe. Euvaneko ndika inali ningwa ando molwaasho Abraham a gwanitha ompango, ihe omolwaasho i itaala, naKalunga okwe mu tala omuyuuki.” (Rom. 4:13; Jak. 2:23, 24) Onkee ano, Kalunga okwa tala ko omudhiginini Abraham e li omuyuuki.—Lesha Aaroma 4:20-22.

¹⁸ Shoka itashi vulu okutya kutya sho Abraham a kala ta longele Jehova uule woomvula dha konda pomilongo ina yona sha. Shoka hasho sha li she mu ningi omuyuuki. (Rom. 3:10, 23) Ihe paunongo we mboka inaawu ngambekwa, Jehova okwa li a tala ko Abraham e li omuyuuki pakankameno lyeitaalo lye endhindhlikwedhi nomolwiilonga ye yeitaalo. Abraham okwa li e na eitaalo tali longo ‘moluvalo’ lu uvanekwa ndoka lwa li talu ka za moluvalo lwe. Oluvalo ndoka olwa ka ninga Mesiasa nenge Kristus. (Gen. 15:6; 22:15-18) Onkee ano, pakankameno ‘lyekulilo lyaJesus Kristus,’ Omupanguli omunenenene ota vulu okudhima po omayono ngoka ga li ga longwa monakuziwa. Kungawo, Abraham naantu yalwe mboka ya li ye na eitaalo mboka ya tetekele ethimbo lyAakriste oye na etegameno lyoku ka yumudhwa.—Lesha Aaroma 3:24, 25; Eps. 32:1, 2.

Nyanyukilwa okukala wu na omuthika omwaanawa naKalunga ngashingeyi

19. Omolwashike etaloko lyaKalunga li na ko nasha naAbraham li na okukala tali nyanyudha oyendji?

¹⁹ Uushili kutya Kalunga kohole okwa li a tala ko Abraham e li omuyuuki owu na okwiinyengitha omitima dhAakriste yashili kunena. Jehova ka li e mu tala ko omuyuuki meityo ndyoka ha tala ko mboka a gwayeke nombepo ya ka ‘pewe wo pamwe naKristus ashihe shoka e shi ya pungulila.’ Aantu ya ngambekwa yomongundu ndjoka oye li ‘aaithanwa aayapuki’ noya taambiwa ko ye li “aana yaKalunga.” (Rom. 1:7, KB; 8:14, 17, 33) Mepingathano naashoka, Abraham okwa li a ningi “kuume kaKalunga,” naashoka osha li sha ningwa manga ekuliloyambo inaali gandjwa. (Jak. 2:23; Jes. 41:8) Ongiini nduno kombinga yAakriste yashili mboka ye na etegameno lyoku ka kala mOparadisa kombanda yevi ndjoka tayi ka etululwa?

20. Kalunga okwa tegelela shike kwaamboka a tala ko kunena ye li aayuuki, ngaashi a li a tala ko Abraham?

²⁰ Mbaka kaya li ya pewa ‘omagano guuyuuki’ goku ka kala megulu ‘molwomagano gesilohenda mokuningwa aayuuki, sho Jesus Kristus e ya kulile.’ (Rom. 3:24; 5:15, 17) Kakele kaashono, oye na eitaalo lya kola muKalunga nomekulilo ndyoka a gandja, nohayu ulike eitaalo lyawo okupitila miilonga yawo iiwanawa. Shimwe shomiilonga mbyoka osho ‘okuuvitha uukwaniilwa waKalunga nokuhokolola Omuwa Jesus Kristus.’ (Iil. 28:31, yelekanitha KB.) Kungawo, Jehova ota vulu oku ya tala ko ye li aayuuki ngaashi naanaa a li a tala ko Abraham. Omagano ngoka haya pewa, sha hala okutya, uukuume naKalunga, oga yooloka ko ‘komagano guuyuuki’ ngoka aagwayekwa haya pewa. Nonando ongawo, ohaya taamba ko omagano ngoka nomutima aguhe.

21. Uuwanawa washike tatu vulu okumona mohole yaJehova nomuyuuki we?

²¹ Ngele owa hala oku ka kala nomwenyo sigo aluhe kombanda yevi, owu na okutseya kutya ompito ndjika ino yi pewa komupangeli gwopantu ngoka kee shi okwiinekelwa. Pehala lyaashono, otashi ulike elalakano lya dhenga mbanda lyOmunamapangelo agehe. Jehova okwa katuka oonkatu tadhi tsikile opo a gwanithe po elalakano lye ndyoka, noonkatu ndhoka a katuka odhi li metsokumwe nuuyuuki washili. Kakele kaashono, oonkatu ndhoka a katuka odhu ulika ohole onene ye. Osho molwaashoka Paulus a li a vulu okutya “Kalunga okwe tu hololele kutya oku tu hole, Kristus sho a si peha lyetu, manga twa li aalunde.”—Rom. 5:8.

[Enyolo lyopevi]

Oto dhimbulukwa?

• Oluvalo lwaAdam olwa li lwa thigulula shike, noshizemo osha li shike?

• Ongiini ekulilo lya gwana po lya li lya gandjwa, nomeityo lini lya gwana po?

• Omagano gokukala twa ningwa aayuuki oge ku etela etegameno lyashike?

[Ethano pepandja 13]

Omulumentu a gwanenena Adam okwa li a longo uulunde. Jesus omulumentu a gwanenena okwa li a gandja “iikulila ya gwana po”

[Ethano pepandja 15]

Kashi shi tuu onkundana ombwanawa sho tatu vulu okuningwa aayuuki okupitila muJesus!