Oshungolangelo ompe yOshiingilisa sha pupalekwa
OTWA nyanyukwa oku mu tseyithila kutya opwa nyanyangidhwa Oshungolangelo ompe yOshiingilisa sha pupalekwa. Oshifo shika oshipe otashi ka ningwa omalolelo uule womvula yimwe, nongele otashi kwathele shili aantu, otashi ka tsikilwa okukala hashi nyanyangidhwa. Oshifo shika otashi ka kala hashi tuminwa komagongalo oshita naashoka twa kala hatu mono shito.
Oshi li sha simana lela opo kehe gumwe a kale u uvite ko uuyelele mboka wu li mOshungolangelo ndjoka hatu konakona oshiwike kehe. Shika osha pumbiwa molwaashoka “omupiya omudhiginini nomunandunge” kunena oha longo oshigwana shaKalunga okupitila mekonakono lyOshungolangelo. (Mat. 24:45, KB) Ihe omolwashike Oshungolangelo ndjoka ya pupalekwa ya pumbiwa?
Aamwatate naamwameme oyendji muuyuni auhe ohaya kala pokugongala kwOshiingilisa, ihe haaluhe haya kala yu uvite ko Oshiingilisa shoka hashi longithwa mOshungolangelo. Ihaye shi uvu ko omolwomatompelo gontumba. Pashiholelwa, Oshingiilisa ohashi longithwa miilongo oyindji yomuAfrika, muAsia nokUumbugantu wEfuta lya Mwena. Aamwatate miilongo mbyoka ohaya longitha Oshiingilisa pokugongala nomuukalele, ihe otashi vulika haya popi omalaka galwe komagumbo. Niishewe Oshiingilisa shoka hashi popiwa miilongo moka, otashi vulika shi kale sha yooloka ko kwaashoka hashi longithwa mOshungolangelo yOshiingilisa ndjoka ya kala hayi longithwa shito. Aamwatate naamwameme yamwe oye li oontauki miilongo moka taya vulu owala okukala pokugongala kwOshiingilisa. Ihe oshi li oshidhigu kuyo yu uve ko Oshungolangelo molwaashoka Oshiingilisa kashi shi elaka lyawo lyuuvalelwa mo. Aagundjuka yamwe mboka haya popi unene elaka lyOshiingilisa, omathimbo gamwe ohaya mono oshidhigu okuuva ko Oshungolangelo.
Nonando oshifo shika ohashi longitha Oshiingilisa sha pupalekwa okuyelekanitha naashoka shi li mwaashoka sha kala hashi piti shito, iifo ayihe iyali otayi longo ooshili dhOmbiimbeli dha faathana. Ayihe otayi ka kala yi na uutendo wu thike pamwe, omapulo, omathano nomapulo geendululo ga faathana. Shika otashi ti kutya kehe gumwe ota vulu okuhogolola oshifo shoka a hala okukonakona nokulongitha pekonakono lyOshungolangelo. Opo wu mone eyooloko pokati kiifo mbyoka iyali, tala oshiholelwa shoka shi li pevi sha kuthwa mokatendo okatiyali koshitopolwa shotango shokukonakonwa moshifo shika.
Otu na uushili kutya oshifo shika shOshiingilisa sha pupalekwa otashi ka kala oshipu kaamwatate naamwameme mwa kwatelwa aagundjuka okwiilongekidhila ekonakono lyOshungolangelo oshiwike kehe. Jehova oku hole “uukumwe auhe waamwatate” notatu mu pandula sho ta longitha “omupiya omudhiginini nomunandunge” oku tu pa shoka twa pumbwa pethimbo lyo opala.—1 Pet. 2:17, NW.
Olutuwiliki lwOonzapo dhaJehova