Evululuko lyaKalunga oshike?
“Oku na natango evululuko [lyEsabati, KB] lyaantu yaKalunga.”—HEB. 4:9.
1, 2. Oshike tatu ilongo muGenesis 2:3 nomapulo geni tatu ka yamukula?
MONTOPOLWA yotango yaGenesis otatu ilongo mo kutya Kalunga okwa li a longekidhile aantu evi muule womasiku gahamano opo ya kale ko. Ngaka kaga li omasiku ngoka ge na uule woowili 24, ihe oga li ethimbo ele noonkondo. Ombiimbeli oya popya kombinga yehulilo lyethimbo kehe ya ti: “Okwa toko kwa ningi ongulohi, nokwa shi kwa ningi ongula.” (Gen. 1:5, 8, 13, 19, 23, 31) Ihe esiku etiheyali olya li lya yooloka ko. Ombiimbeli oya popi kombinga yesiku ndyoka ya ti: ‘Kalunga okwa yambeke esiku etiheyali e te li yapula, oshoka okwa mana eshito lye alihe nokwa vululukwa kiilonga ye.’—Gen. 2:3.
2 Sho embo lyaGenesis lya ti kutya Kalunga ‘okwa vululukwa,’ olya hala okutya, Kalunga okwa li natango ta vululukwa pethimbo ndyoka. Onkee ano, otatu vulu okutya sho Moses a li a nyola embo lyaGenesis momumvo 1513 manga Kristus inaa holoka, Kalunga okwa li ta vululukwa. Natango, konima Kalunga okwa li a popi mOmbiimbeli kutya aantu otaya vulu okuya mevululuko lye, sha hala okutya, okukala ye na ombinga mevululuko lye. Mbela Kalunga oku li ta vululukwa sigo okunena? Ngele ota vululukwa natango, ongiini tatu vulu okuya mevululuko lye? Osha simanenena kutse tu tseye omayamukulo gomapulo ngoka.
Mbela Kalunga oku li ta vululukwa sigo okunena?
3. Ongiini oohapu dhaJesus ndhoka dhi li muJohannes 5:16, 17 tadhi ulike kutya osha li natango esiku etiheyali sho Jesus a li kombanda yevi?
3 Opu na omatompelo gaali kutya omolwashike tatu vulu okutya osha li natango esiku etiheyali sho Jesus a li kombanda yevi nosho wo pethimbo lyAakriste yotango. Etompelo lyotango otu li iwetele mwaashoka Jesus a li a lombwele aatondi ye yamwe. Oya li ye mu geela molwaashoka a aludha aantu mEsabati. Oya li taya dhiladhila kutya osha puka okwaaludha omuntu mEsabati molwaashoka Ompango yaMoses oya ti kutya olya li esiku lyokuvululukwa kiilonga yawo. Jesus okwe ya lombwele a ti: ‘Tate ota longo sigo ongashingeyi, nangame wo otandi longo.’ (Joh. 5:16, 17, KB) Okwa li ta ti naanaa shike? Okwa li ta ti kutya: “Tse naTate otatu longo iilonga yimwe. Tate okwa kala ta longo mEsabati uule woomvula omayuvi nongashingeyi oku li ta longo natango, onkee ano otandi vulu okulonga mEsabati.” Oohapu dhaJesus otadhi ulike kutya olya li natango esiku etiheyali li na ko nasha nevi pethimbo lye, sha hala okutya, esiku lyaKalunga lyevululuko.a
4. Shi ikolelela kwaashoka Paulus a li a popi, otu shi shi ngiini kutya pethimbo lyAakriste yotango osha li natango esiku etiheyali?
4 Opu na etompelo etiyali tali tu ningitha tu tye kutya osha li natango esiku etiheyali sho Jesus a li kombanda yevi nosho wo pethimbo lyAakriste yotango. Omuyapostoli Paulus okwa li a nyola kombinga yevululuko lyaKalunga montumwafo ye ndjoka a li a nyolele Aahebeli. Manga Paulus inaa endulula oohapu ndhoka dhi li muGenesis 2:2, okwa li a nyola montopolwa 4 yontumwafo ye a ti: ‘Tse mbaka twi itaala, otatu yi mo, tu ka vululukwe puKalunga.’ (Heb. 4:3, 4, 6, 9) Shika otashi ulike kutya pethimbo lyaPaulus osha li natango esiku etiheyali. Esiku etiheyali otali hulu uunake?
5. Jehova okwa li a hala okuninga shike mesiku etiheyali, nuunake ta ka gwanitha elalakano lye?
5 Opo tu mone eyamukulo kutya esiku etiheyali otali hulu uunake, otu na okudhimbulukwa kutya Jehova okwa li a hogolola esiku ndyoka li kale lyi ikalekelwa. Genesis 2:3 ota ti: ‘Kalunga okwa yambeke esiku etiheyali e te li yapula.’ Okwa li a yapula esiku ndyoka molwaashoka okwe li hogolola li kale esiku moka a mana elalakano lye li na ko nasha nevi. Elalakano lye olyo kutya aalumentu naakiintu aavuliki ya kale nomwenyo kombanda yevi noye li sile oshimpwiyu nosho wo iinima ayihe mbyoka yi li ko. (Gen. 1:28) Jehova Kalunga naJesus Kristus ngoka e li “omuwa gwEsabati,” ‘otaya longo sigo ongashingeyi,’ opo ya gwanithe po elalakano lyaKalunga li na ko nasha nevi. (Mat. 12:8) Onkee ano, esiku lyaKalunga lyokuvululukwa otali tsikile sigo a mana elalakano lye. Shika otashi ka ningwa pehulilo lyEpangelo lyaKristus lyOmimvo eyuvi.
Inapu kala ‘nando ogumwe itaa vulika’
6. Iiholelwa yini tayi vulu okukala elondodho kutse, noshike tatu vulu okwiilonga mo muyo?
6 Kalunga okwa li a lombwele Adam naEva kutya elalakano lye li na ko nasha nevi olini, ihe inaya vulika kulyo. Aantu yalwe omamiliyona mboka ya ka landula ko nayo inaya vulika wo. Nokuli nAaisraeli mboka ya li oshigwana shaKalunga oya kala nokwaahavulika kuye iikando niikando. Paulus okwa li a londodha Aakriste pethimbo lye kutya yamwe yomuyo otashi vulika ya kale ihaaya vulika ya fa Aaisraeli. Okwa nyola a ti: “Onkee ano tu lalakaneneni okuya mo, tu ka vululukwe puKalunga. Inapu kala nando ogumwe gwomutse itaa vulika ngashika mbeyaka, ndele inaa thika mo we.” (Heb. 4:11) Oohapu dhaPaulus otadhi ulike kutya aantu mboka ihaaya vulika itaya ka ya mevululuko lyaKalunga. Shoka otashi ti shike kutse? Mbela otashi ti kutya ngele otwa ningi shoka tashi tsu ondumbo nelalakano lyaKalunga momukalo gwontumba, itatu ka ya mevululuko lye? Osha simana noonkondo tu kale tu shi eyamukulo kepulo ndyoka, notatu ka popya oshindji kombinga yaashoka moshitopolwa shika. Ihe tango otatu ka kundathana kombinga yoshiholelwa oshiwinayi shAaisraeli nonokutya omolwashike inaaya ya mevululuko lyaKalunga.
‘Itaye ke ya, ya vululukwe pungame’
7. Elalakano lyaJehova olya li shike sho a mangulula Aaisraeli muupika waEgipiti noya li ye na okuninga shike?
7 Momumvo 1513 manga Kristus inee ya, Jehova okwa li a lombwele omupiya gwe Moses kutya elalakano lye li na ko nasha noshigwana shaIsraeli olini. Okwa ti: “Nda kuluka ndi ya mangulule mAaegipiti noku ya tembudha muEgipiti, ya ye kevi lya mbwalangandja, evi lya tondoka omahini nomagadhi goonyushi.” (Eks. 3:8) Jehova okwa li a mangulula Aaisraeli muupika muEgipiti e ya ninge oshigwana she, ngaashi naanaa a li u uvanekele Abraham. (Gen. 22:17) Kalunga okwa li a pe Aaisraeli oompango ndhoka dha li tadhi ke ya kwathela ya vule okukala nombili naye nokupanga uukuume naye. (Jes. 48:17, 18) Okwa li a lombwele Aaisraeli a ti: ‘Ngele otamu vulika kungame e tamu dhiginine ehangano lyandje, otamu ningi aantu yandje mwene. Evi alihe olyandje, ihe ne otamu ka ninga oshigwana shandje sha hogololwa.’ (Eks. 19:5, 6) Onkee ano, Aaisraeli oya li taya vulu okukala oshigwana shaKalunga, ngele owala taya vulika kiipango ye.
8. Aaisraeli oya li ye na oompito dhini, ando oya vulikile kuJehova?
8 Dhiladhila owala koompito ndhoka Aaisraeli ya li ye na. Jehova okwa li e yu uvanekele kutya ngele otaya vulika kuye, ota ka yambeka omapya gawo, iikokola yoomviinu dhawo nosho wo iimuna yawo. Okwa li wo e yu uvanekele kutya ote ke ya gamena kaatondi yawo. (Lesha 1 Aakwaniilwa 10:23-27.) Oya li ye na ompito yokumangululwa muupika wiigwana yilwe, nokuli nomepangelo lyAaroma ndyoka lya li tali pangele iigwana oyindji pethimbo lyaJesus. Jehova okwa li a hala oshigwana shaIsraeli shi tulile po iigwana yilwe oshiholelwa oshiwanawa. Ehalo lye olya li opo ayehe mboka haya vulika kuye ya kale ye shi kutya ote ke ya laleka nuuyamba.
9, 10. (a) Omolwashike sha li sha puka sho Aaisraeli ya li ya hala okushuna kuEgipiti? (b) Mbela ando Aaisraeli oya shunine kuEgipiti, ando oya ka vula ngaa okulongela Jehova momukalo ngoka ye a hala?
9 Aaisraeli oya li ye na ompito yi ikalekelwa yokulongithwa kuJehova a gwanithe po elalakano lye. Okwa li ta vulu oku ya yambeka nosho wo iigwana ayihe kombanda yevi. (Gen. 22:18) Ihe Aaisraeli oyendji kaya li ye wete esimano lyokukala oshigwana shaKalunga nolyokukala ye li oshiholelwa kiigwana yilwe. Oya li ya ti nokuli oya hala okushuna kuEgipiti. (Lesha Numeri 14:2-4.) Ihe ando oya shunine kuEgipiti, ando inaya ka longela Jehova momukalo ngoka a hala, nokukala ye li oshiholelwa kiigwana yilwe. Andola oya shunine ko natango, ando inaya ka kala ya manguluka okuvulika kOmpango yaKalunga, ye ite ke ya dhimina po wo. Sho ya li ya hala okushuna kuEgitipi, oya li owala taya dhiladhila kuuwanawa wawo paumwene. Kaya li taya dhiladhila kombinga yaKalunga nosho wo yelalakano lye. Osha ningitha Kalunga a tye, “onda li nda geela aantu mbeyaka nonda ti: ‘Oyo oya puka aluhe momadhiladhilo gawo. Oyo inaa ilonga nando okutseya oondjila dhandje.’ Ongame onda li nda geya nonda gana kutya: ‘Oyo kaye na mpoka naa ke ya, ya vululukwe pungame.’”—Heb. 3:10, 11; Eps. 95:10, 11.
10 Sho Aaisraeli ya li ya hala okushuna kuEgipiti, osha li euliko kutya inaya lenga omalaleko nuuyamba gaJehova. Pehala lyaashoka, oya li ye na omitse omikukutu noya li ya hala owala iikulya iiwanawa mbyoka yi li muEgipiti. (Num. 11:5) Oya li ya fa Esau ngoka a li inaa lenga uuthemba we wuusheeli e te wu landitha po noshiyaha shiikulya.—Gen. 25:30-32; Heb. 12:16.
11. Mbela Jehova okwa li a lundulula elalakano lye sho Aaisraeli mboka ya zi muupika muEgipiti inaaya vulika kuye?
11 Jehova ina lundulula elalakano lye, nonando Aaisraeli mboka ya li ya tembuka muEgipiti inaya kala aadhiginini kuye. Oyana oya li ya vulika kuye shi vulithe aavali yawo. Omolwevuliko lyawo oya li ya lala Evi lyEuvaneko. Josua 24:31 ota ti: “Oshigwana shaIsraeli osha longele OMUWA. Osho sha li pethimbo lyaawiliki ayehe mboka ya li ya mono yo yene shoka OMUWA e shi ningile Israeli.”
12. Otu shi shi ngiini kutya Aakriste kunena otaya vulu okuya mevululuko lyaKalunga?
12 Aaisraeli mboka aavuliki oya li ya kulupa nokonima oya si. Epipi ndyoka lya ka landula ko ‘inali tseya OMUWA nosho wo iilonga e yi ningile Israeli.’ Onkee ano, ‘olya yono kOMUWA’ nolya tameke okulongela iikalunga. (Aatok. 2:10, 11, yelekanitha KB.) Molwaashoka epipi ndyoka kalya li lya vulika, inali kala we li na ekwatathano naKalunga. Onkee ano, Evi lyEuvaneko kalya li we ehala ‘lyokuvululukwa’ kuyo. Paulus okwa nyola kombinga yepipi ndyoka a ti: “Ando Josua okwa li a thikithile oshigwana mevululuko lyaKalunga, ando Kalunga ina ka popya we komeho evululuko ekwawo.” Opo nduno okwa ti: “Onkee ano oku na natango evululuko lyaantu yaKalunga.” (Heb. 4:8, 9) Aakriste oyo ‘aantu yaKalunga’ mboka Paulus a popi moohapu ndhika. Muyo omwa kwatelwa mboka ya li ya vulika kOmpango yaMoses omanga inaaya ninga Aakriste nosho wo mboka ya li inaaya vulika nando kuyo. Shoka Paulus a li a popi, osha hala okutya, kunena Aakriste otaya vulu wo okuya mevululuko lyaKalunga.
Aakriste yamwe kaya li ya yi mevululuko lyaKalunga
13, 14. (a) Pethimbo lyaMoses Aaisraeli oya li ye na okuninga shike opo ya ye mevululuko lyaKalunga? (b) Pethimbo lyaPaulus Aakriste oya li ye na okuninga shike opo ya ye mevululuko lyaKalunga?
13 Paulus okwa li a nyolele Aakriste Aahebeli molwaashoka yamwe kaya li taya longo metsokumwe nelalakano lyaKalunga. (Lesha Aahebeli 4:1.) Oya li haya ningi shike? Oya li natango haya vulika kiinima yimwe yomOmpango yaMoses. Odhoshili kutya uule woomvula 1 500 lwaampono Aaisraeli oya li ye na okuvulika kOmpango yaMoses opo ya nyanyudhe Kalunga. Ihe sho Jesus a si, kaya li we ya pumbwa okuvulika kuyo. Aakriste yamwe kaya li yu uvite ko oshinima shoka noshe ya ningitha ya kale ye wete kutya oya pumbwa okuvulika natango kiinima yimwe yomOmpango.b
14 Paulus okwa yelithile Aakriste Aahebeli kutya Jesus okwa li omusaaseri omukuluntu e vule ayehe. Okwa li u ulike kutya ehangano epe olya li li vule ndyoka lya ningwa naIsraeli. Oku ulike wo kutya otempeli yaJehova onene “oyi na esimano enene nolya gwana” yi vule ‘yomeshito ndika.’ (Heb. 7:26-28; 8:7-10; 9:11, 12) Paulus okwa li a longitha oshiholelwa shEsabati shoka shi li mOmpango yaMoses opo a yelithe nkene Aakriste taya vulu okuya mesiku lyaJehova lyevululuko. Okwa nyola a ti: “Oku na natango evululuko lyaantu yaKalunga, ongaandyoka lyaKalunga, sho a vululukwa esiku etiheyali. Oshoka shaangoka a yi mo, a vululukwe puKalunga, ota vululukwa, ngashika Kalunga a li a vululukwa kiilonga ye.” (Heb. 4:8-10) Aakriste Aahebeli oya li ye na okuhulitha po okudhiladhila kutya Kalunga ota vulu okukala e ya hokwa ‘omolwiilonga yawo yene,’ sho haya vulika kOmpango yaMoses. Okuza pOpentekoste momumvo 33, Jehova okwa kala a hokwa aantu mboka ye na eitaalo tali longo mekuliloyambo lyaJesus Kristus.
15. Otu shi shi ngiini kutya otwa pumbwa okuvulika kuJehova opo tu ye mevululuko lye?
15 Omolwashike Aaisraeli pethimbo lyaMoses inaaya ya mEvi lyEuvaneko? Omolwaashoka inaya vulika kuJehova. Omolwashike Aakriste yamwe pethimbo lyaPaulus inaaya ya mevululuko lyaKalunga? Omolwaashoka nayo inaya vulika kuJehova. Kaya li yi itaala kutya Jehova okwa hala oshigwana she pethimbo mpoka shi mu longele momukalo gulwe gwi ili, noshi ethe po okuvulika kOmpango yaMoses.
Nkene tatu vulu okuya mevululuko lyaKalunga kunena
16, 17. (a) Ongiini Aakriste taya vulu okuya mevululuko lyaKalunga kunena? (b) Oshike tatu ka kundathana moshitopolwa tashi landula?
16 Aakriste kunena inayi itaala nando kutya oye na okuvulika kOmpango yaMoses opo ya ka hupithwe. Paulus okwa li a lombwele Aaefeso a ti: “Oshoka omwa hupithwa kesilohenda lyaKalunga keitaalo. Ehupitho ndika inali za mune yene, aawe, olyo omagano gaKalunga. Mpaka kape na sha shokwiitangela.” (Ef. 2:8, 9) Ongiini Aakriste kunena taya vulu okuya mevululuko lyaKalunga, sha hala okutya, okukala ye na oshitopolwa mevululuko lye? Dhimbulukwa kutya Jehova okwa li a hogolola esiku lye lyokuvululukwa li kale esiku ndyoka ta ka gwanitha po elalakano lye li na ko nasha nevi nosho wo naantu aavuliki. Ohe tu lombwele elalakano lye nosho wo shoka a hala tu ninge okupitila mehangano lye. Otatu vulu okuya mevululuko lyaJehova ngele ohatu vulika kuye nohatu longo pamwe nehangano lye.
17 Ihe ngele itatu vulika komupiya omudhiginini nomunandunge otu li ompinge nelalakano lyaJehova nosho wo ngele ohatu vulika owala kwaashoka tu wete sha simana. Ngele ohatu ningi shoka shi li ompinge nelalakano lyaJehova, itatu ka kala ookuume ke. Moshitopolwa tashi landula otatu ka kundathana kombinga yiinima mbyoka tayi ulike kutya otu na evuliko. Omatokolo getu miinima mbyoka otage ku ulika ngele otwa ya mevululuko lyaKalunga.
[Omanyolo gopevi]
a Aasaaseri nAalevi oya li haya longo motempeli mEsabati, naashika kasha li tashi tsu ondumbo nOmpango yaMoses. Kalunga okwa li a hogolola Jesus a ninge omusaaseri gwetu omukuluntu. Onkee ano, kasha li sha puka kuJesus a longe mEsabati iilonga mbyoka a li a pewa kuJehova.—Mat. 12:5, 6.
b Katu shi shi ngele opu na Aakriste Aahebeli yamwe mboka ya li ya gandja omayambo mEsiku lyEkwatakanitho, nenge mEsiku lyOkudhima po Omayono noka tu shi ngele oya li ye shi ningi nokuli konima yOpentekoste momumvo 33. Ihe ngele oya li ye shi ningi kaya li yu ulike esimaneko lyekuliloyambo lyaJesus. Otu shi shi kutya Aakriste Aahebeli yamwe oya li natango ya kakatela komithigululwakalo ndhoka dha li dha yama kOmpango yaMoses.—Gal. 4:9-11.
Omapulo gokutedhatedha
• Jehova okwa li a hala okuninga shike mesiku etiheyali?
• Otu shi shi ngiini kutya otu li natango mesiku etiheyali kunena?
• Omolwashike Aaisraeli pethimbo lyaMoses nosho wo Aakriste yamwe pethimbo lyaPaulus inaaya ya mevululuko lyaKalunga?
• Ongiini tatu vulu okuya mevululuko lyaKalunga kunena?
[Oohapu dha simana pepandja 27]
Otatu vulu okuya mevululuko lyaJehova ngele ohatu vulika kuye nohatu longo pamwe nehangano lye
[Omathano pepandja 26]
Aapiya yaKalunga kunena oye na okuninga shike opo ya ye mevululuko lye?