Jehova oye “Kalunga, ngoka oluthithiya lwombili”
“Kalunga, ngoka oluthithiya lwombili yetu, na kale nane amuhe.”—ROM. 15:33.
1, 2. Onkalo yini tayi hokololwa montopolwa 32 nosho wo 33 yaGenesis, noshizemo osha li shike?
ESAU okwa li u uvu kutya omukwanambwiyu omukwawo, Jakob, ota galukile kegumbo. Oya li taya ka tsakanena lwopuPenuel popepi nolusilu lwaJabbok, kuuzilo womulonga gwaJordan. Nonando opwa li pwa pita oomvula 20 sho Esau a landitha po uuthemba we wuusheeli kumumwayina, Jakob okwa li a tila kutya otashi vulika mumwayina e mu dhipage omolwondjahi. Esau okwa yi a ka tsakaneke mumwayina ngoka ya kala ya topoka ethimbo ele e li naalumentu 400. Jakob sho e shi uvu, okwa tumine Esau omagano, ngoka ga li iimuna yi vulithe 550. Oshikando kehe Jakob ta tumu omupiya gwe, omupiya ngoka oku na okulombwela Esau kutya iimuna omagano ge ga zi kuJakob.
2 Hugunina oya tsakanene. Sho Jakob te ende nomukumo u uka kuEsau okwi inyongamene pevi, halumwe aluke, ihe olwiikando iheyali. Jakob okwa ningi oshinima sha simanenena opo a nengeneke omutima gwaEsau. Jakob okwa li a galikana kuJehova opo e mu hupithe miikaha yaEsau. Mbela Jehova okwa li ngaa e mu yamukula? Eeno. Ombiimbeli otayi tu lombwele kutya “Esau okwa matuka e mu tsakaneke, okwe mu papatele momaako ge e te mu thipi komilungu.”—Gen. 32:11-20; 33:1-4.
3. Oshike tatu ilongo mehokololo lyaJakob naEsau?
3 Ehokololo lyaJakob naEsau otali tu longo kutya otu na okuninga oonkambadhala dha mana mo notadhi longo opo tu kandule po omaupyakadhi ngoka tashi vulika ga teye po ombili ndjoka tatu nyanyukilwa megongalo. Jakob okwa li a hala a pange ombili naEsau, nonando Jakob ka li a yona sha she noka li a gwana oku mu pa ombili. Esau oye mwene a li a dhina uuthemba we wuusheeli nokwa li e wu landitha po noshiyaha shomakunde. (Gen. 25:31-34; Heb. 12:16) Jakob okwe tu tulila po oshiholelwa oshiwanawa shaashoka tu na okuninga opo tu kaleke po ombili pokati ketu nAakriste ooyakwetu. Otashi ulike wo kutya Kalunga kashili oha yamukula omagalikano getu uuna tatu mu pula tu pange ombili. MOmbiimbeli omu na iiholelwa oyindji yilwe mbyoka tayi tu kwathele nkene tu na okupanga ombili.
Oshiholelwa sha dhenga mbanda okulandulwa
4. Kalunga okwa li a ningi po shike opo aantu ya vule okuhupithwa muulunde neso?
4 Jehova, “Kalunga, ngoka oluthithiya lwombili” oye oshiholelwa sha dhenga mbanda shokupanga ombili. (Rom. 15:33) Dhiladhila kwaashoka Jehova e tu ningila opo tu kale tu na ekwatathano ewanawa naye. Tu li oluvalo olulunde lwaAdam naEva, otwi ilongela okupewa “ondjambi yuulunde.” (Rom. 6:23) Omolwohole ye onene, Jehova okwa li a tumu Omwana omuholike okuza megulu a valwe e li omuntu a gwanenena omolwehupitho lyetu. Omwana okwa li i igandja nehalo ewanawa, nokwe etha a dhipagwe kaatondi yaKalunga. (Joh. 10:17, 18) Kalunga kashili okwa li a yumudha Omwana omuholike, ngoka konima a gandja ongushu yombinzi ye ya tika kuHe, ndjoka yi li iikulila okuhupitha aalunde mboka yi itedhulula ya vule okuhupithwa meso lyaaluhe.—Lesha Aahebeli 9:14, 24.
5, 6. Ombinzi yaJesus ndjoka ya tika oya ningitha aantu aalunde ya kale ye na ekwatathano lini naKalunga ndyoka lya li lya teka po?
5 Ongiini ekuliloyambo ndyoka Omwana gwaKalunga a gandja lya ningitha aantu aalunde ya kale ye na ekwatathano naKalunga ndyoka lya li lya teka po? Jesaja 53:5 ota ti: “Egeelo olye mu ya, opo tu mone ombili, notwa aludhwa kiilalo ye.” Pehala lyokukala twa talika ko tu li aatondi yaKalunga, aantu aavuliki otaya vulu okukala ye na ekwatathano ewanawa naye. “Otwa mangululwa notwa dhiminwa po oondjo dhetu omolweso lyaKristus.”—Ef. 1:7.
6 Ombiimbeli otayi ti: “Osho sho opalela He, [muKristus] mu kale okuudha akuhe.” Shika oshi li ngaaka molwaashoka Kristus oye thimba yi na ongodhi mokugwanithwa kwelalakano lyaKalunga. Elalakano lyaJehova olini? Olyo ‘okuhanganitha ayihe muye omolwombinzi’ yaJesus Kristus ndjoka ya tika. “Iinima ayihe” mbyoka Kalunga a panga nayo ombili oyi li “iinima ayihe yokombanda yevi noyomegulu.” Mbela iinima mbyoka oolye?—Lesha Aakolossa 1:19, 20, yelekanitha KB.
7. “Iinima yomegulu” nosho wo “iinima yokombanda yevi” mbyoka yi na ekwatathano ewanawa naKalunga oyo oolye?
7 Ekuliloyambo olye shi ninga tashi vulika opo Aakriste aagwayekwa mboka ‘ya ningwa aayuuki’ ye li oyana yaKalunga ‘ya kale nombili naye.’ (Lesha Aaroma 5:1.) Oyo taya popiwa ye li “iinima yomegulu” molwaashoka oye na etegameno lyoku ka kala megulu ‘notaa ka pangela ombanda yevi’ nokulonga ye li aayambi yaKalunga. (Eh. 5:10) “Iinima yokombanda yevi,” oyo aantu mboka yi iyela ombedhi mboka taya ka kala nomwenyo gwaaluhe kombanda yevi masiku.—Eps. 37:29.
8. Okutedhatedha koshiholelwa shaJehova otaku ke ku kwathela ngiini, uuna megongalo mu na oonkalo dhontumba ndhoka tadhi yono po uukumwe?
8 Paulus okwa li a nyolele Aakriste aagwayekwa muEfeso ta pandula nomutima aguhe ekuliloyambo ndyoka Jehova a gandja a ti: “Kalunga, nguka u udha esilohenda, . . . okwe tu tula omwenyo pamwe naKristus. Okwe shi tu ningile, manga twa li twa sa pambepo omolwokwaavulika kwetu kuye. Ne omwa hupithwa kesilohenda lyaKalunga.” (Ef. 2:4, 5) Kutya nduno otu na etegameno lyoku ka kala nomwenyo megulu nenge okombanda yevi, atuheni otu na oshikolo kuKalunga omolwohenda ye nesilohenda inaali longelwa ndyoka e tu ulukila. Omitima dhetu otadhi hunga omolwolupandu okutala kwaashoka Jehova a ninga tashi vulika opo aantu ya kale ye na ekwatathano ewanawa naye. Ngele opu na oonkalo dhontumba ndhoka tadhi yono po uukumwe megongalo, mbela okutedhatedha koshiholelwa shoka Kalunga e tu tulila po itaku ke tu inyengitha tu pange ombili nayalwe?
Ilonga moshiholelwa shaAbraham naIsak
9, 10. Omukalo ngoka Abraham a li u ungaunga noontamanana ndhoka dha li pokati kaasita ye noyaLot otagu ulike ngiini kutya oku shi okupanga ombili?
9 Ombiimbeli otayi popi kombinga yatatekulululwa Abraham tayi ti: “‘Abraham okwi itaale Kalunga, nomolweitaalo lye Kalunga okwe mu tala omuyuuki.’ Osho ngaaka Abraham okwi ithanwa kuume kaKalunga.” (Jak. 2:23) Abraham okwa li u ulike eitaalo lye mokukala hu ungaunga nayalwe nombili. Pashiholelwa, sho iimuna ye ya li yi indjipala, opwa li oontamanana pokati kaasita ye naamboka yomwanagona Lot. (Gen. 12:5; 13:7) Opo ya kandule po uupyakadhi mboka, Abraham naLot oya li ye na okutopoka. Abraham okwa li u ungaunga ngiini nonkalo ndjoka ya kwata miiti? Nonando oye a li omukuluntu nokwa li e na ekwatathano ewanawa naKalunga, ina lombwela omwanagona Lot shoka e na okuninga, pehala lyaashoka oku ulike kutya oku shi okupanga ombili.
10 Abraham okwa lombwele omwanagona a ti: “‘Tse aakwanezimo. Inapu kala oontamanana pokati kaasita yandje noyoye.’” Okwa tsikile ko a ti: “‘Natu topokeni nombili. Hogolola ombinga yoshilongo ndjoka wa hala. Ngele to gama kombinga yimwe, ngame ote gama kombinga oonkwawo.’” Lot okwa hogolola oshitopolwa shoka shi na uulithilo uuwanawa, ihe Abraham ka li e mu kwatele onkone. (Gen. 13:8-11) Konima yethimbo sho Lot a li a kwatwa po komatangakwiita gaatondi ye, Abraham okwa li a thikama nziya a ka hupithe omwanagona.—Gen. 14:14-16.
11. Ongiini Abraham a li a lalakanene ombili naashiinda she Aafilisti?
11 Abraham okwa li wo e na ombili nAafilisti mboka ya li aashiinda she sho a li muKaanana. Aafilisti oya “yugile” ko omuthima ngoka gwa li gwa hupwa kaapiya yaAbraham puBeersheba. Mbela Abraham ngoka a li a sindi aakwaniilwa yane mboka ya li ya kwata po omwanagona okwa ningi po shike? Pehala lyokukondja a yuge ko omuthima gwe, okwa mwenene oshinima shoka. Konima yethimbo omukwaniilwa gwAafilisti okwa li a talele po Abraham a ninge ehangano lyombili naye. Sho omukwaniilwa a pula Abraham a gane kutya ota ka kala nombili noluvalo lwomukwaniilwa gwAafilisti, opo owala Abraham a popi kombinga yomuthima gwe ngoka. Onkundana ndjoka oya halutha omukwaniilwa, nokwe mu shunithile omuthima gwe. Abraham okwa tsikile okukala nombili mevi ndyoka lyaakwiilongo.—Gen. 21:22-31, 34.
12, 13. (a) Ongiini Isak a li a landula oshiholelwa shahe? (b) Jehova okwa li a yambeke ngiini Isak omolwiikala ye yombili?
12 Isak omwanamati gwaAbraham naye okwa li a holele iikala yombili yahe. Shika oshi iwetikile momukalo moka a li u ungaunga nAafilisti. Omolwondjala ndjoka ya li moshilongo, Isak okwa tembuka pamwe nuukwanegumbo we muBeer-Lahai-Roi oshitopolwa shi li kuumbangalantu mombuga yaNegeb e ta yi kuGerar oshitopolwa shAafilisti shoka shi na evi ewanawa. Jehova okwa li a yambeke Isak niikunomwa oyindji nosho wo niimuna oyindji. Aafilisti oya li ye mu tsila ondumbo. Molwaashoka kaya li ya hala Isak a kale a hepuluka ngaashi he, Aafilisti oya li ya file po omuthima ngoka gwa hupwa kaapiya yaAbraham moshitopolwa shoka. Omukwaniilwa gwAafilisti okwa lombwele Isak ‘a ze mo moshilongo shawo.’ Molwaashoka Isak okwa li omunambili okwa ningi ngaashi a lombwelwa.—Gen. 24:62; 26:1, 12-17.
13 Konima sho Isak a tembukile kokule, aasita ye oya hupu omuthima gulwe. Ihe aasita Aafilisti oya li ya ti kutya omeya ogawo. Ngaashi owala he Abraham, Isak ina kondjela omuthima ngoka. Pehala lyaashoka, okwa lombwele aasita ye ya hupe omuthima gulwe. Natango Aafilisti oya ti kutya ogwawo. Opo a kaleke po ombili, Isak okwa ka yunga ontanda kehala lilwe. Sho a yi hoka, aapiya ye oya hupu omuthima gulwe, Isak nokwe gu luku Rehobot. Mokweendela ko kwethimbo okwa li a tembukile koshitopolwa shi na evi ewanawa shaBeersheba, naJehova okwe mu yambeke nokwe mu lombwele a ti: “Ino tila, oshoka ondi li pungoye. Otandi ku yambeke e tandi ku pe oluvalo olwindji omolwomuntu gwandje Abraham.”—Gen. 26:17-25.
14. Isak okwa li u ulike ngiini kutya okwa hala okupanga ombili sho omukwaniilwa gwAafilisti a li a hala okuninga naye ehangano lyombili?
14 Isak okwa li ta vulu lela okukondjela omithima adhihe ndhoka dha hupwa kaapiya ye. Konima yiinima mbyoka omukwaniilwa gwAafilisti pamwe nomalenga ge oye ya okutalela po Isak puBeersheba noya li ya hala okuninga naye ehangano lyombili. Oya ti kuye “ngashingeyi otu shi shi kutya OMUWA oku li nangoye.” Ihe opo a kaleke po ombili, Isak okwa li a tembuka lwiikando yi vulithe pushimwe, pehala lyokukondja. Poshikando mpoka oku ulike natango kutya ye omunambili. Ombiimbeli otayi ti: “Isak okwe ya hangele oshituthi, oyo noya li e taa nu. Ongula yoontundumene oya ningi euvathano e taye li koleke negano. Isak okwe ya laleke . . . nombili.”—Gen. 26:26-31.
Ilonga sha moshiholelwa shaJosef
15. Omolwashike aamwahe yaJosef ya li ihaaya popi naye oohapu dhombili?
15 Ombiimbeli otayi ti omwanamati gwaIsak, Jakob “okwa li omumweni.” (Gen. 25:27) Ngaashi sha kundathwanwa metetekelo, Jakob okwa li a hala okupanga ombili nomumwayina, Esau. Nopwaahe na omalimbililo, Jakob uukwatya mbuka uuwanawa okwa li e wu ilongo kuhe, Isak. Mbela oyanamati yaJakob oya li ngaa yi ilongo sha kuye? Moyanamati ayehe 12, Jakob okwa li e hole Josef noonkondo. Josef okwa li omuvuliki, ha simaneke he nokwa li he mu sile oshimpwiyu nawa. (Gen. 37:2, 14) Ihe aamwahe yaJosef aakuluntu oya li ye mu tonde, yo ihaya popi naye oohapu dhombili. Omolwonyanya yawo oya li ye mu landitha po e li omupika e taya kengelele he i itaale kutya omwana okwa lika po koshilikama.—Gen. 37:4, 28, 31-33.
16, 17. Omukalo ngoka Josef u ungaunga naamwahe otagu ulike ngiini kutya okwa li a hala okupanga ombili nayo?
16 Jehova okwa li pamwe naJosef. Mokweendela ko kwethimbo Josef okwa ningi elenga ekuluntu lyaAegipiti a landula Farao. Molwaashoka muKaanana omwa li ondjala ya geya, aamwahe yaJosef oya yi kuEgipiti ya ka lande iilya, ihe inaya dhimbulula Josef molwaashoka okwa li a zala oonguwo dhe dhuulenga. (Gen. 42:5-7) Kasha li tuu oshipu kuJosef u ungaunge naamwahe nonyanya ngaashi ya li hayu ungaunga naye nosho wo nahe! Pehala lyoku ya kwatela onkone, Josef okwa li a panga ombili nayo. Sho a mono kutya aamwahe oyi iyela ombedhi, okwe yi ihololele e ta ti: “Inamu shi ningila omwenyo omwiinayi, nenge mwi ipe oombedhi, sho mwa landitha ndje po. Kalunga mwene okwa tetekelitha ndje huka, opo a hupithe oomwenyo dheni nodhaantu yalwe.” Opo nduno okwa thipi aamwahe ayehe komilungu nokwa lilile mothingo yakehe gumwe.—Gen. 45:1, 5, 15.
17 Konima yeso lyahe yawo, Jakob, aamwahe yaJosef oya li taya dhiladhila kutya otashi vulika e ya galulile uuwinayi. Sho ya lombwele Josef shoka yu uvite, Josef “okwa lili” nokwa ti kuyo: “Itamu pumbwa okutila. Otandi mú sile oshimpwiyu pamwe naana yeni.” Osho ngaaka Josef ngoka a li omunambili e ya “ngungumaneke noohapu dhombili ndhoka dha talaleke oomwenyo dhawo.”—Gen. 50:15-21.
“Osha nyolwa, shi tu longe”
18, 19. (a) Uuwanawa washike wa mona sho wa konakona iiholelwa yi na ko na sha nokupanga ombili mbyoka ya kundathanwa moshitopolwa shika? (b) Otatu ka kundathana shike moshitopolwa tashi landula?
18 Omuyapostoli Paulus okwa nyola a ti: “Ashihe shoka sha nyolwa mOmanyolo, osha nyolwa, shi tu longe, opo tu kale tu na etegameno ta li zi mokwiidhidhimika notu mone omukumo.” (Rom. 15:4) Uuwanawa washike twa mona mokukonakona oshiholelwa sha dhenga mbanda shaJehova nosho wo momahokololo gOmbiimbeli kombinga yaAbraham, Isak, Jakob naJosef?
19 Mbela okutedhatedha nolupandu kwaashoka Jehova a ninga opo a galulile po ekwatathano ndyoka lya li lya teka po pokati ke naantu aalunde kaku na oku tu inyengitha tu lalakanene okupanga ombili nayalwe? Oshiholelwa shaAbraham, Isak, Jakob naJosef otashi ulike kutya aavali otaya vulu okunwetha mo oyana momukalo omwanawa. Iiholelwa yawo otayi ulike wo kutya Jehova oha yambeke mboka haya kambadhala okupanga ombili. Itashi kumitha sho Paulus a popi Jehova e li “Kalunga, ngoka oluthithiya lwombili.” (Lesha Aaroma 15:33; 16:20.) Moshitopolwa tashi landula otatu ka konakona kutya omolwashike Paulus a li a tsu omuthindo ompumbwe yetu yokulalakanena ombili nongiini tatu vulu okupanga ombili.
Owi ilonga shike?
• Jakob okwa li a ningi shike sho e li pokutsakanena naEsau opo a pange ombili naye?
• Shoka Jehova a ninga opo a pange ombili naantu oshe ku guma ngiini?
• Moshiholelwa shokupanga ombili shaAbraham, Isak, Jakob naJosef owi ilonga mo shike?
[Omathano pepandja 23]
Jakob okwa li a katuka onkatu yini ya simanenena opo a pange ombili naEsau?