Omulumentu ngoka a li o opalela Jehova

OSHIKE hashi ya momadhiladhilo goye ngele to dhiladhila kombinga yaDavid ngoka a popiwa mOmbiimbeli? Mbela oosho a li a sindi omukwiita omutongolume gwAafilisti Goliat? Mbela ethimbo a li a fadhuka po e tayi mombuga omolwomukwaniilwa Saul ngoka a li e mu tonde? Mbela oosho a li a yono naBaseba nuudhigu mboka a li mono molweyono ndyoka? Nenge okuutewo we wa nwethwa mo mboka a nyola membo lyOmbiimbeli lyOmapisalomi?

David okwa li e na uuthembahenda wi ikalakelwa miilonga yaKalunga, okwa li a sindana nokwa li a tsakaneka oonkalo oondhigu. Ihe nonando ongaaka, shoka shihokitha shi na ko nasha naDavid komeho giinima ayihe mbyoka, ooshoka sha popiwa komupolofeti Samuel kutya okwa kala ‘omulumentu o opalela Jehova.’—1 Samuel 13:14.

Ehunganeko lyaSamuel olya li lya gwanithwa manga David a li omugundjuka. Mbela nangoye oto vulu okupopiwa wu li omuntu ngoka o opalela Jehova? Ngele osho, oshike to vulu okwiilonga kuDavid, unene tuu sho a li omugundjuka, shoka tashi vulika shi ku kwathele wu kale wo opalela Jehova? Natu ka taleni shoka tatu ilongo kuDavid.

Oshilonga she nuukwanegumbo moka a za

Uunzapo otawu ulike kutya Isai, he yaDavid nomutekulu gwaRut naBoas, okwa li omupiya omudhiginini gwaJehova. Sho David naamwahe yaheyali nosho wo aamwayinakadhona yaali ya li aagundjuka, he Isai okwa li e ya longo kombinga yOmpango yaMoses. Mulimwe lyomomapisalomi ge, David okwa li i ipopi e li ngaashi omwana gwaJehova omumati ‘gwomupiya gwe okakadhona.’ (Episalomi 86:16, KB) Shika osha li sha ningitha yamwe ya thike pehulithodhiladhilo kutya yina yaDavid ngoka inaa tumbulwa mo mOmbiimbeli, okwa li wo a kwathele David a kale e na uupambepo uuwanawa. Omulongwantu gumwe okwa ti: “David otashi vulika a li u uvu tango kuyina omahokololo giilongankondo yaKalunga naasho a li u ungaunga nale noshigwana she,” mwa kwatelwa ondjokonona yaRut naBoas.

Sho David a li okamatyona, okwa li e na oshinakugwanithwa shokulitha oonzi dhahe. Oshinakugwanithwa shoka otashi vulika sha li she mu pula oowili odhindji, omutenya nuusiku e li oye awike melundu. Kambadhala okukala wa fa wu wete onkalo ndjoka.

Egumbo lyaandjawo yaDavid olya li muBetlehem okandoolopa okashona hoka ka li kohulo yomasilu gondundu yi li miikulundundu yomuJuda. Omapya gu udha omamanya ngoka ge li momudhingoloko gwaBetlehem oga li haga kala ge na eteyo lyiilya ewanawa. Iikunino yomiti dhiiyimati, omiti dhooholivi nomiviinu oya li yi li momasilu nokiikulundundu. Pethimbo lyaDavid, omahala ngoka ga li ihaaga longwa ga li ge li pokati kiituntu otashi vulika ga li guulithilo. Kombinga yilwe okwa li ku na ombuga yaJuda.

Osha li sha nika oshiponga kuDavid okukala omusita gwiimuna pethimbo ndyoka. Miikulundundu moka omo moka David a li a tsakaneke onkoshi nemwanka mbyoka ya li ya hala okulya po onzi ye yimwe yomuusita we.a Omugundjuka nguka ependa okwa li a katukile onkantu iilikama mbika e te yi dhipaga nokuhupitha onzi ye momakana gayo. (1 Samuel 17:34-36) Otashi vulika pethimbo ndyoka monkalamwenyo ye opo David a li a mono uunkulungu wokulongitha oshilongitho shokuumba nomamanya. Popepi nondoolopa moka a li a valelwa opwa li oshitopolwa shaBenjamin. Oondjumbeta dhomezimo ndyoka odha li dhi shi okuumba nomamanya ‘ihaadhi palutha nando.’ David naye ka li ha palutha.—Aatokolihapu 20:14-16; 1 Samuel 17:49.

Okwa li a longitha nawa ethimbo

Olundji okulitha iimuna iilonga hayi longwa omuntu i imwenenena. Ihe David ka li e etha a kale e na ezaza. Pehala lyaashono, okukala e li pehala pwi imwenena osha li she mu pe oompito odhindji opo a tedhatedhe kiinima yimwe mbyoka a li a kwatele momapisalomi ge, iinima yimwe mbyoka tashi vulika a li ha dhiladhila pethimbo a li omugundjuka. Mbela osha li pethimbo ndyoka sho a li oye awike ta dhiladhila okukala po kwomuntu meshito nokiikumithalonga yokegulu ngaashi etango, omwedhi noonyothi, ‘oshilonga shominwe’ (KB) dhaJehova? Mbela okwa li momalundu ngoka ga kundukidha Betlehem sho a li ta dhiladhila kevi ewanawa, koongombe, koondhila nosho wo ‘kiiyamakuti’?—Episalomi 8:3-9; 19:1-6.

Nopwaahe na omalimbililo, oshimoniwa shaDavid e li omusita gwiimuna osha li she mu ningitha a kale e wete kutya Jehova oha sile oshimpwiyu thiluthilu aapiya ye aadhiginini. Onkee ano, okwa li i imbi a ti: “OMUWA oye omusita gwandje; inandi pumbwa sha. Oye ota gondjithile ndje momizile omitalala e ta fala ndje koondombe dhomeya omandjengwa. Nonando ondi na okweenda mesilu lyomilema thokothoko, itandi tila sha, oshoka, OMUWA, ou li pungame. Ondhimbo yoye nolwoondje lwoye ohayi gamene ndje.”—Episalomi 23:1, 2, 4.

Otashi vulika wi ipule kutya oshike tandi ilongo kuDavid. Limwe lyomomatompelo ngoka ga li ga ningitha David a kale e na ekwatathano lyopothingo naJehova nokukala ‘omulumentu e mu opalela’ olyo kutya okwa li ha tedhatedha muule nokwa mana mo kiilonga yaJehova nosho wo kekwatathano lye naye. Mbela shoka osho yamwe taya vulu okupopya ngaaka shi na ko nasha nangoye?

Mbela opu na oshikando shimwe wa li wi inyengithwa opo wu tange nokusimaneka Omushiti konima sho wa li wa konakona nuukeka kiinima mbyoka a shita? Mbela opu na esiku limwe wa li wu uvite omutima gwoye gu udhithwa kohole yokuhola Jehova konima sho wa mono uukwatya we mboka hu ulike uuna tu ungaunga naantu? Opo wu vule okukala wu na olupandu lwokupandula Jehova omolwiinima mbyoka, owa pumbwa okulongitha ethimbo olindji mokutedhatedha pamwe negalikano kOohapu dhe nokeshito lye. Okutedhatedha kwa tya ngaaka otaku ke ku kwathela wu mu tseye lelalela nokukala wu mu hole. Aagundjuka nosho aakuluntu otaya vulu okukala ye na uuthembahenda mbuka. Mokukala kwe akuhe, David okwa li popepi naJehova okuza ngaa muugundjuka we. Otu shi shi ngiini?

David omugwayekwa

Sho omukwaniilwa Saul a li u ulike kutya ka li ta vulu okuwilika oshigwana shaKalunga, Jehova okwa li a lombwele omupolofeti Samuel a ti: “Sigo uunake to kala we ehamenwa Saul? Onde mu ekelehi, kaa kale we omukwaniilwa gwaIsraeli. Ihe ngashingeyi kutha omagadhi gooholivi, u ye kuBetlehem komulumentu edhina lye Isai, oshoka onda hogolola gumwe gwomoyana, a ninge omukwaniilwa.”—1 Samuel 16:1.

Sho Samuel omupolofeti gwaKalunga a thiki muBetlehem, okwa lombwele Isai a gongele oyana ayehe. Mbela oguni gwomuyo Samuel a li ta ka gwayeka a ninge omukwaniilwa? Mokumona Eliab ngoka a li osheeli ta monika nawa, Samuel okwa dhiladhila a ti: ‘Omulumentu oye nguka.’ Ihe Jehova okwa ti kuye: “Ino tala koshuuluko she, sho e na omuthika omule nondjelo ombwanawa. Onde mu tinda, oshoka ite pangula, ngaashi omuntu ta pangula. Omuntu oha tala kombanda, ihe ngame ondi wete momutima.” Momukalo gwa faathana, Jehova okwa tindi Abinadab, Shima osho wo yalwe yomaamwayinamati yane. “Hugunina,” ehokololo olya tsikile tali ti: “Samuel okwa pula Isai a ti: ‘Aamoye oyo mbano ayeke?’ Isai okwa yamukula a ti: ‘Oku na onkelo, ihe oku li kuusita woonzi.’”—1 Samuel 16:7, 11.

Eyamukulo lyaIsai olya li lya hala okutya ‘otashi vulika David haye a li ta kongwa.’ Molwaashoka David oye a li omushona noka li a simana maandjawo, okwa li a pewa iilonga yokulitha oonzi. Ihe oye a li a hogololwa kuKalunga. Jehova oha mono shoka shi li momutima, osha yela kutya okwa li a mono oshinima shimwe shi na ondilo muDavid ngoka a li omushona. Onkee ano, sho Isai a tumu David e ki ithanwe, Jehova okwa lombwele Samuel a ti: “‘Oye nguka, mu gwayeka.’ Samuel okwa kutha omagadhi gooholivi e ta gwayeke David montaneho yaamwayina. Opo tuu mpoka Ombepo yOMUWA oye ya muDavid noya kala muye okuza esiku ndyoka.”—1 Samuel 16:12, 13.

MOmbiimbeli, David ina popiwa kutya okwa li e na oomvula ngapi sho shoka sha li sha ningwa. Ihe nonando ongaaka, konima yethimbo, aamwayinamati yatatu aakuluntu Eliab, Abinadab naShima, oya li ya ka longa metangakwiita lyaSaul. Otashi vulika yalwe mbeyaka yatano ya li aashona okuya pamwe nayo. Otashi vulika kaapu na nando ogumwe gwomuyo a li a gwanitha natango omimvo 20 ndhoka omulumentu kehe a li e na okukala e na opo a ye metangakwiita lyaIsraeli. (Numeri 1:3; 1 Samuel 17:13) Kutya nduno etompelo olini, David okwa li omushona lela sho Jehova a li e mu hogolola. Ihe nonando ongaaka, oshi iwetikile kutya David okwa adhika nale e na uupambepo uuwanawa. Osha yela kutya okwa li e na ekwatathano lyopothingo naJehova ndyoka lya li lye etithwa kokutedhatedha kwaashoka e shi kombinga Ye.

Aagundjuka kunena oya pumbwa okuladhipikwa ya ninge sha faathana. Onkee ano, aavali, mbela ohamu ladhipike ngaa aanona yeni ya tedhatedhe kiinima yopambepo, yo ya kale ye na olupandu lweshito lyaKalunga nokukonakona kwaashoka Ombiimbeli tayi popi kombinga yOmushiti ngoka? (Deuteronomium 6:4-9) Aagundjuka, mbela shika ohamu shi ningi kune yene? Iileshomwa mbyoka ya nyanyangidhwa shi ikolelela kOmbiimbeli ngaashi Oshungolangelo no-Awake!b oya longekidhwa oku mu kwathela.

Okwa li onkulungu mokuhika okaharpa

Ngaashi owala oohapu dhomomapisalomi ogendji gaDavid tadhi tu lombwele shi na ko naasho a li omusita, okwa popya wo kutya okwa li ha hiki oomusika. Odhoshili kutya kapu na nando oyimwe yomoomusika ndhika dha li hadhi imbwa dhi li po sigo okunena. Shoka tu shi osho shoka kutya omutoti gwadho okwa li omwiimbi a dhenga mbanda. Dhoshili, etompelo molwaashoka David a li i ithanwa ko kuusita a ye komukwaniilwa Saul omolwaashoka okwa li onkulungu mokuhika okaharpa.—1 Samuel 16:18-23.c

Openi nuunake David a li a likola uunongo mboka? Otashi vulika pethimbo ndyoka a li a kala momalundu ta tonatele oonzi. Oshi li pandunge okwiitaala kutya nokuli naasho David a li omugundjuka okwa li hi imbile Jehova tashi zi komutima. Kakele kaashono, Jehova okwa li e mu hogolola noku mu pa oshilonga shoka molwaashoka okwa li omudhiginini noku na uupambepo uuwanawa.

Shoka David a li a ningi momimvo dhokomeho oshinima shilwe shi ili. Ihe iikala mbyoka a li e na mbyoka ya li ye mu ndhindhilikitha monkalamwenyo ye ayihe otayu ulikwa moohapu ndhoka tashi vulika a li e na momadhiladhilo kombinga yiimoniwa ye pethimbo a li momalundu ngoka ga dhingoloka Betlehem. Dhiladhila owala sho David ti imbile Jehova ta ti: “Otandi dhimbulukwa omasiku gonale; otandi tedhatedha ayihe mbyoka we yi ninga, notandi dhiladhila iilonga yoye ayihe.” (Episalomi 143:5) Episalomi ndika tali gumu omutima nosho wo omakwawo galwe ogendji ngoka ga nyolwa kuDavid oge li etsomukumo kwaayehe mboka ya hala okukala yo opalela Jehova.

[Omanyolo gopevi]