Jehova oku ku shi ngaa?
“Omuwa oku ya shi mboka ye.”—2 TIM. 2:19.
1, 2. (a) Jesus okwa li e na ko nasha nashike? (b) Omapulo geni tu na okwiipula?
ESIKU limwe Omufarisayi okwe ya kuJesus e te mu pula ta ti: “Oshipango oshinene shomompango oshini po?” Jesus okwe mu yamukula a ti: “Hola Omuwa Kalunga koye komutima gwoye aguhe nokomwenyo gwoye aguhe nokomadhiladhilo goye agehe.” (Mat. 22:35-37) Jesus oku hole He gwomegulu noonkondo nokwa li a kala metsokumwe noohapu ndhoka. Okwa li wo e na ko nasha nekwatathano lye naJehova nokwa li e shi ulike sho a kala omudhiginini monkalamwenyo ye ayihe. Onkee ano, okathimbo manga Jesus inaa sa, okwa popi kutya Kalunga oku shi kutya ye oha vulika nuudhiginini kiipango Ye. Kungawo, Jesus okwa kala mohole yaJehova.—Joh. 15:10.
2 Aantu oyendji kunena ohaya ti kutya oye hole Kalunga. Nopwaahe na omalimbililo, natse otwi ikwatela mo maantu mboka. Ihe opu na omapulo ga simana ngoka tu na okwiipula: ‘Mbela Jehova oku shi ndje ngaa? Okwa tala ndje ko ngiini? Mbela Jehova okwa tala ndje ko ngaa ndi li gwe?’ (2 Tim. 2:19) Kashi li tuu uuthembahenda okutedhatedha kekwatathano lyopothingo ndyoka tatu vulu okukala tu na nOmupangeli gweshito alihe!
3. Omolwashike yamwe haya kala tayi ipula ngele otaya vulu ngaa okukala yaJehova, noshike tashi ya kwathele ye ekelehi okudhiladhila hoka?
3 Oshi li oshidhigu kuyamwe nokuli mboka ye hole Jehova noonkondo okudhiladhila kutya ota vulu okukala kuume kawo. Yamwe oyu uvite kutya kaye na ongushu yasha, nohaya kala tayi ipula ngele otaya vulu ngaa okukala yaJehova. Oshi li nawa okutseya kutya Jehova ohe tu tala ko momukalo gwa yooloka. (1 Sam. 16:7) Omuyapostoli Paulus okwa lombwele Aakriste ooyakwawo a ti: “Ngoka e hole Kalunga, okwa tseyika wo kuKalunga.” (1 Kor. 8:3) Okukala wu mu hole oku li oshitegelelwa sha simana opo a kale e ku shi. Tala komapulo ngaka: Omolwashike to lesha oshifo shika? Omolwashike to kambadhala okulongela Jehova nomutima gwoye aguhe, nomwenyo gwoye aguhe, nomadhiladhilo goye agehe nosho wo noonkondo dhoye adhihe? Ngele owi iyapulila Kalunga nowa ninginithwa, oshike she ku inyengitha wu katuke oonkatu ndhoka? Ombiimbeli otayi popi kutya Jehova ngoka ha konakona omitima, oye he eta mboka ya fa omaliko kuye. (Lesha Haggai 2:7; Johannes 6:44.) Onkee ano, oto vulu okuthika pehulithodhiladhilo kutya oho longele Jehova molwaashoka okwe ku eta kuye. Ayehe mboka e eta kuye ke na esiku e ya ethe ngele oya kala aadhiginini. Ohe ya tala ko ye na ondilo momeho ge, noku ya hole noonkondo.—Eps. 94:14.
4. Omolwashike tu na okukala aluhe hatu dhiladhila kombinga yankene ekwatathano lyetu naKalunga li li oshinima shi na ondilo?
4 Ngele Jehova e tu eta kuye, otu na okukala tu na ko nasha nokukala aluhe mohole ye. (Lesha Judas 20, 21.) Dhimbulukwa kutya otatu vulu okufalwafalwa nenge tu iteke Kalunga, ngaashi Ombiimbeli tayi ti. (Heb. 2:1; 3:12, 13) Pashiholelwa, Paulus okwa popi Himeneus naFiletus omanga inaa popya oohapu ndhoka dhi li muTimoteus omutiyali 2:19. Aalumentu mboka yaali oya li haya longele Jehova nale, ihe konima oya zi mo moshili. (2 Tim. 2:16-18) Dhimbulukwa wo kutya megongalo lyaGalati namo omwa li yamwe mboka ya li ye shiwike kuKalunga, ihe inaya kala muuyelele wopambepo mboka ya li haya nyanyukilwa. (Gal. 4:9) Onkee ano, natu kale twa lenga ekwatathano lyetu naKalunga ndyoka li li oshinima shi na ondilo.
5. (a) Omaukwatya gamwe ngoka Kalunga ha kala a lenga ogeni? (b) Otatu ka kundathana iiholelwa yini?
5 Opu na omaukwatya gamwe ngoka Jehova a lenga unene. (Eps. 15:1-5; 1 Pet. 3:4) Eitaalo neifupipiko olya li lya ndhindhilikitha mo yamwe mboka ya li ye shiwike kuKalunga. Ngashingeyi natu ka taleni kiiholelwa yaalumentu yaali mboka ya li ye holike kuJehova omolwuukwatya wawo mboka. Otatu ka kundathana wo oshiholelwa shomulumentu gumwe ngoka a li ta dhiladhila kutya okushiwike kuKalunga, ihe omolwiikala ye yuuntsa Jehova okwe mu ekelehi. Iiholelwa mbyoka otayi vulu oku tu longa iiyilongomwa ya simana.
He yaamboka yi itaala
6. (a) Ongiini Abraham a li u ulike kutya oku na eitaalo momauvaneko gaJehova? (b) Jehova okwa li e shi Abraham ngiini?
6 Abraham omulumentu ngoka a li ‘i inekela OMUWA.’ Onkee ano, oshe eleka sho ti ithanwa “he yopambepo yaayehe mboka yi itaala.” (Gen. 15:6; Rom. 4:11) Omolweitaalo Abraham okwa li a thigi po egumbo lye, ookuume ke nosho wo iiniwe ye e tayi koshilongo shokokule. (Gen. 12:1-4; Heb. 11:8-10) Ihe eitaalo lye olya kala lya kola, nokuli nokonima sho pwa pita omimvo odhindji. Shika osha li shi iwetikile sho a “gandja omwana Isak, a ninge eyambo,” mokuvulika kelombwelo lyaJehova. (Heb. 11:17-19) Abraham okwa li u ulike kutya oku na eitaalo momauvaneko gaJehova, na Jehova okwa li e mu tala ko i ikalekelwa, nokwa li e mu shi nawa lela. (Lesha Genesis 18:19.) Jehova ka li owala e shi kutya oku na omuntu gwedhina Abraham; okwa li e mu hole e li kuume ke.—Jak. 2:22, 23.
7. Oshike oshindhindhilikwedhi kombinga yegwanitho lyomauvaneko gaJehova, naashika osha li sha gumu ngiini Abraham?
7 Shoka oshindhindhilikwedhi osho kutya Abraham ka li a pewa evi ndyoka a li u uvanekelwa a thigulule. Ye ina mona oluvalo lwe sho talu indjipala ‘lwa fa ehekevi lyomooha dhefuta.’ (Gen. 22:17, 18) Nonando ina mona omauvaneko ngoka sho taga gwanithwa okwa kala e na eitaalo lya kola muJehova. Okwa li e shi kutya ngele Kalunga okwa popi sha, ohashi kala sha fa sha gwanithwa nale. Eeno, onkalamwenyo yaAbraham ayihe oya li yu ulike shili kutya oku na eitaalo. (Lesha Aahebeli 11:13.) Mbela Jehova oku tu shi ngaa tu na eitaalo lya fa lyaAbraham?
Okukala twa tegelela Jehova oku li euliko kutya otu na eitaalo
8. Iinima yini yi li mondjila aantu yamwe ya halelela ye yi gwanithilwe?
8 Otashi vulika pu na iinima yontumba mbyoka twa halelela okumona tayi gwanithwa. Oshi li paunshitwe noshi li mondjila okukala wa hala oku ya mondjokana, okukala wu na aanona nowu na uukolele. Ihe oyendji yomutse otashi vulika tu kale inaatu gwanithilwa nando oshimwe shomiinima mbyoka twa hala. Ngele osho shi li ngawo, omukalo ngoka hatu ungaunga nonkalo kehe otagu ulike kutya eitaalo lyetu oli thike peni.
9, 10. (a) Yamwe ohaya ningi shike opo ya gwanithe po omahalo gawo? (b) Owu uvite ngiini shi na ko nasha nokugwanithwa kwomauvaneko gaKalunga?
9 Osha nika uusama ngele omuntu okwa kambadhala okugwanitha po omahalo ge momukalo ngoka gu li ompinge nuunongo wopakalunga. Shoka otashi ka yona po uupambepo we. Pashiholelwa, yamwe oya hogolola omapango ngoka taga kondjithathana noompango dhaJehova. Yalwe oya konga iilonga mbyoka tayi ya kaleke kokule nomaukwanegumbo gawo nenge nokugongala. Ongiini shi na ko nasha nokukala wu na iihole nagumwe ngoka kee shi omwiitaali? Ngele Omukriste okwe shi ningi, mbela otu ulike ngaa kutya okwa hala okukala e shiwike kuJehova? Andola Jehova okwa kala u uvitile ngiini Abraham, ando okwa li inii idhidhimika nokukala a tegelela omauvaneko gaKalunga ga gwanithwe? Andola oshike sha ningwa po ando Abraham okwi inekelele moondunge dhe mwene e ta kalelele moshitopolwa moka, nokwiikongela edhina, pehala lyokukala i inekela muJehova? (Yelekanitha Genesis 11:4.) Mbela ando Jehova okwa tsikile ngaa nokukala e mu hole noku mu shi?
10 Oshike wa halelela okumona tashi gwanithwa? Mbela owu na ngaa eitaalo lya kola wu tegelele Jehova ngoka u uvaneka kutya ota ka gwanitha po oompumbwe dhoye? (Eps. 145:16) Ngaashi owala sha li sha ningilwa Abraham, omauvaneko gamwe ngoka Kalunga u uvaneka otashi vulika kaaga gwanithwe nziya ngaashi twa hala. Ihe Jehova okwa lenga natango eitaalo lyetu ndyoka tu na lya fa lyaAbraham nosho wo sho tatu kala metsokumwe nalyo. Ngele otatu shi ningi, nena ote ke tu pa ondjambi shili.—Heb. 11:6.
Oshiholewa sha gumwe ngoka a li omwiifupipiki nagumwe ngoka a li e na uuntsa
11. Uuthembahenda wuni Kora a li e na, naashoka otashi ulike kutya okwa li a tala ko Kalunga ngiini?
11 Moses naKora oya li ya katuka momikalo dha yoolokathana noonkondo ngele tashi ya pokusimaneka elongekidho nomatokolo gaJehova. Oonkatu dhawo odha li dha ningitha Jehova e ya tale ko momikalo dha yoolokathana. Kora okwa li Omulevi gwoludhi lwAakwakehat, nokwa li e na uuthembahenda owundji, mboka wa li wa kwatela mo okumona nkene Jehova a hupitha oshigwana she mEfuta Etiligane, okwa li wo a longithwa a pangule Aaisraeli mboka ya tsu ondumbo naJehova pOndundu Sinai, nokwa li a dhana onkandangala mokuhumbata oshikethahangano. (Eks. 32:26-29; Num. 3:30, 31, KB) Osha yela kutya okwa kala omudhiginini uule womimvo odhindji nokwa li a simanekwa kAaisraeli oyendji.
12. Ngaashi shu ulikwa pepandja 28, uuntsa waKora owa li wa gumu ngiini ekwatathano lye naKalunga?
12 Ihe manga oshigwana shaIsraeli shi li mondjila shu uka kEvi lyEuvaneko, Kora okwa li e wete pu na uupyakadhi kombinga ya nkene tashi wilikwa kuKalunga. Opo nduno aalumentu 250 aawiliki ya simana oya li ya gama kombinga ye nonkambadhala yoku eta po elunduluko. Kora nosho wo yalwe oye na okukala ya li ye na uushili kutya oye na ekwatathano ewanawa naJehova. Oya lombwele Moses ya ti: “Omwa pitilila unene! Iilyo ayihe yegongalo oyOMUWA, nOMUWA oku li pamwe natse atuhe.” (Num. 16:1-3) Mbyoka kaya li tuu iikala yuuntsa noyeinenepeko ya pitilila! Moses okwe ya lombwele a ti: “OMUWA ota ka ulika, olye ngoka gwe.” (Lesha Numeri 16:5.) Esiku lya landula Kora nosho wo ayehe mboka ya li taye mu ambidhidha muunashipotha we oya dhipagwa.—Num. 16:31-35.
13, 14. Omomikalo dhini Moses a li u ulike kutya ye omwiifupipiki?
13 Mepingathano naashono, Moses okwa li “omulumentu omwiifupipiki e vule aantu ayehe kombanda yevi.” (Num. 12:3) Okwa li e shi u ulike sho a tokola toko a landule ewiliko lyaJehova. (Eks. 7:6; 40:16) Ombiimbeli inayi popya kutya olundji Moses okwa li ha kala ta tsu ondumbo naJehova nenge a kale a geya molwaashoka e na okulandula omalombwelo gaJehova. Pashiholelwa, Jehova okwa li a gandja omalombwelo nkene etsalihangano li na okutungwa, okwa popi kombinga yuunima uushona ngaashi omalwaala goongodhi nosho wo kutya oombululu ngapi dhi na okukala komalapi gotenda. (Eks. 26:1-6) Ngele omutonateli gwopantu mehangano ohe ku pe omalombwelo ga kwatela mo uunima owundji, omathimbo gamwe otashi vulika wu kale wu wete te ku ningile nayi. Jehova oku li omutonateli a gwanenena ngoka ha pe aapiya ye iinakugwanithwa nehalo ewanawa nokwe yi inekela. Uuna ta gandja omalombwelo ogendji, ohe shi ningi netompelo ewanawa. Moses ka li e wete Jehova te mu ningile nayi sho e mu pe omalombwelo ngoka noka li e wete a fa te mu thiminike nenge a fa ta ngambeke emanguluko lye. Pehala lyaashono, Moses okwa li a shilipaleke kutya aaniilonga ayehe otaya “gwanitha ashihe shoka” Kalunga e ya lombwele. (Eks. 39:32) Moses ka li tuu shili omwiifupipiki! Okwa li e wete kutya iilonga oyaJehova, nosho wo kutya okwa li owala ta longithwa kuye opo iilonga mbyoka yi longwe.
14 Eifupipiko lyaMoses olya li wo li iwetikile sho a li monkalo ndjoka ya li ye mu yemateka. Pompito yimwe, okwa li a nyengwa okwiipangela noina yapulitha Kalunga sho a li tu ungaunga noshigwana shoka tashi mu nyenyetele. Jehova okwa li e mu lombwele kutya ita ka fala oshigwana shaIsraeli mEvi lyEuvaneko omolwoshinima shoka a ningi. (Num. 20:2-12) Ye nomumwayina Aaron, oya li yi idhidhimikile okunyenyeta kwAaisraeli uule womimvo odhindji. Ihe omolwepuko ndyoka a li a ningi oshikando shimwe, ka li a yi mevi ndyoka a kala a tegelela okuya ethimbo ele. Moses okwa li inyenge ngiini? Nonando oshi shi okuuviwa ko sho a li u uvite nayi, okwa zimine etokolo lyaJehova neifupipiko. Okwa li e shi kutya Jehova oKalunga omuyuuki noondjila dhe adhihe odhu uka. (Deut. 3:25-27; 32:4) Ngele to dhiladhila Moses kunena, mbela mungoye iha mu ya ethano kutya okwa li e shiwike kuJehova.—Lesha Eksodus 33:12, 13.
Opo tu vulike kuJehova otu na okukala aaifupipiki
15. Oshike tatu vulu okwiilonga mwaashoka Kora a ningi omolwuuntsa we.
15 Nkene hatu inyenge komalunduluko ngoka haga ningwa momagongalo gopaKriste muuyuni auhe nosho wo komatokolo ngoka ga ningwa kwaamboka taya kwatele komeho ohaku nwetha mo okukala kwetu tu shiwike kuJehova. Kora nongundu ye oya li yi iteka Kalunga molwaashoka oya li yi iyinekela sha pitilila, ye na uuntsa noya li ya kanitha eitaalo. Nonando Kora okwa li ta dhiladhila kutya onkatse Moses oyo owala ya li tayi ningi omatokolo gayo yene, paushili wowene Jehova oye a li ta wilike oshigwana. Kora okwa li a dhimbwa oshinima shoka nokwa li a ndopa okukala omudhiginini kwaamboka Kalunga ta longitha. Osha li shi li pandunge a tegelele Jehova oye a yelithe oshinima nawa nenge a ninge omalunduluko ngele osha li sha pumbiwa shili. Hugunina, Kora okwa yono po ondjokonona ye yiilonga yuudhiginini omolwuuntsa we.
16. Okulandula oshiholelwa sheifupipiko shaMoses ota ku ka guma ngiini okukala kwetu tu shiwike kuJehova?
16 Ehokololo ndyoka otali gandja elondodho lya kwata miiti kaakuluntugongalo nosho wo kuyalwe megongalo kunena. Okukala twa tegelela Jehova u ukithe iinima nokulandula omalombwelo gaamboka ya langekwa po ye tu wilike otashi pula eifupipiko. Mbela ohatu ulike ngaa eifupipiko nomwenyo omwaanawa twa fa Moses? Mbela itatu vulu okutaamba ko ondondo yaamboka haye tu kwatele komeho nokuvulika kewiliko ndyoka haye tu pe? Mbela ohatu pangele ngaa omaiyuvo getu uuna twa yematekwa? Ngele osho, Jehova ota ka kala e tu shi nawa shili. Eifupipiko nokuvulika kwetu otayi ke tu ningitha tu kale twa hokiwa kuye.
Jehova oku shi mboka ye
17, 18. Oshike tashi vulu oku tu kwathela tu tsikile okukala tu shiwike kuJehova?
17 Oshi li nawa tu kale hatu holele mboka Jehova e eta kuye naamboka eshi nawa shili. Abraham naMoses oya li inaaya gwanenena noya li wo haya ningi omapuko ye tu fa. Ihe nonando ongaaka, Jehova okwa li e ya shi nawa kutya yo oye li aantu ye. Oshiholelwa shaKora otashi ulike kutya otashi vulika tu ye kokule naJehova, nokungawo ota ka kala inee tu hokwa. Oshi li nawa opo kehe gumwe i ipule ta ti: ‘Jehova oha tala ndje ko ngiini? Oshike tandi vulu okwiilonga miiholelwa yopaMbiimbeli mbika?’
18 Otashi hekeleke noonkondo okutseya kutya mboka Jehova e eta kuye noye li aadhiginini ohe ya tala ko ye li ye. Tsikila okukokeka uukwatya ngaashi eitaalo, eifupipiko nosho wo omaukwatya galwe ngoka tage ku ningitha wu kale wa hokiwa kuKalunga. Okukala tu shiwike kuye oshi li uuthembahenda mboka tawu tu etele enyanyu monkalamwenyo ngashingeyi nosho wo omayambeko kaage shi okuyelekwa nasha monakuyiwa.—Eps. 37:18.
Oto dhimbulukwa?
• Oto vulu okukala wu na ekwatathano lya tya ngiini naJehova?
• Ongiini to vulu okuholela eitaalo lyaAbraham?
• Oshike tatu vulu okwiilonga kuKora nosho wo kuMoses?
[Ethano pepandja 26]
Mbela otu na eitaalo lya fa lyaAbraham kutya Jehova ota ka gwanitha omauvaneko ge agehe?
[Ethano pepandja 28]
Kora ka li a hala okuvulika neifupipiko kewiliko lyaJehova
[Ethano pepandja 29]
Mbela owu shiwike kuJehova kutya oho vulika nokulandula ewiliko lye?