Hedha popepi naKalunga

Oto vulu okumona ‘ontseyo yokutseya Kalunga’

JEHOVA KALUNGA okwe shi ninga tashi wapa opo kehe gumwe a vule okumona eliko li na ondilo, nokwa halelela tu li mone. Eliko ndika ihali tu etele uuyamba molupe lwiiniwe, ihe otali ke tu etela uuyamba wulwe mboka itaawu vulu okulandwa niimaliwa ayihe yomuuyuni ya tulwa kumwe, uuyamba mbuka owo ombili yokomwenyo, egwaneno nonkalamwenyo tayi ti sha. Eliko ndika oshike? Oohapu dhomukwaniilwa omunandunge Salomo ndhoka dhi li mOmayeletumbulo 2:1-6 otadhi shi yelitha.

Salomo okwa ti kutya eliko ndika olyo ‘ontseyo yokutseya Kalunga,’ ano tu tye, oshili kombinga yaKalunga nokombinga yomalalakano ge ngoka ga popiwa mOmbiimbeli. (Ovelise 5) Opu na iinima oyindji mbyoka ya kwatelwa mo meliko ndika.

Omalongo goshili. Ombiimbeli otayi gandja omayamukulo komapulo ngaashi: Edhina lyaKalunga olye? (Exodus 15:3, OB-1954) Oshike hashi ningwa po ngele omuntu a si? (Episalomi 146:3, 4) Kombanda yevi otu lile ko shike? (Genesis 1:26-28; Episalomi 115:16) Mbela sho to tala omayamukulo komapulo ngaka ga simana oge na ingapi?

Omayele gopandunge. Ombiimbeli otayi tu lombwele nkene tatu vulu okukala nonkalamwenyo ya dhenga mbanda. Oshike to vulu okuninga po opo ondjokana yoye yi kalelele? (Aaefeso 5:28, 29, 33) Ongiini to vulu okuputudha aanona aavuliki? (Deuteronomium 6:5-7; Aaefeso 6:4) Ongiini to vulu okumona enyanyu monkalamwenyo? (Mateus 5:3; Lukas 11:28) Natu ku pule ishewe, mbela sho to tala omayele ge shi okwiinekelwa kombinga yiinima mbika oge na ingapi?

Ontseyo kutya Kalunga oku li ngiini nosho wo uukwatya we. Ombiimbeli oyo owala tayi vulu oku tu lombwela oshili kombinga yaKalunga. Kalunga okwa tya ngiini? (Johannes 1:18; 4:24) Mbela ohe tu sile ngaa oshimpwiyu? (1 Petrus 5:6, 7) Wumwe womuukwatya we wa tongomana owuni? (Eksodus 34:6, 7; 1 Johannes 4:8) Mbela sho to tala uuyelele womondjila kombinga yOmushiti owu na ingapi?

‘Ontseyo yokutseya Kalunga’ oyi li shili eliko lyondilo. Mbela oto yi mono ngiini? Omayeletumbulo ontopolwa 2 ovelise 4 otage tu nothele ko. Movelise ndjoka Salomo okwa faathanitha ontseyo ndjoka ‘neliko lya holekwa.’ Dhiladhila kwaashika: eliko lya holekwa itali iyeta lyolyene ngele itatu ke li konga. Otu na okuninga oonkambadhala dha mana mo opo tu li mone. Ontseyo yokutseya Kalunga nayo osho yi li ngaaka. Eliko ndika olya fumvikwa mOmbiimbeli. Opo tu li mone otwa pumbwa okuninga oonkambadhala dha mana mo.

Salomo okwe tu lombwela shoka tu na okuninga opo tu mone ‘ontseyo yokutseya Kalunga.’ Oohapu ngaashi “taamba oohapu dhandje” na ‘omutima gwoye nagu ipambe koondunge’ otadhi ulike kutya otu na okukala nomutima gu na ehalo lyokutaamba ko oohapu dhaKalunga. (Ovelise 1, 2) Iitya “ithana,” ‘konga’ na ‘shilila’ otadhi ulike kutya otwa pumbwa okuninga oonkambadhala dha mana mo. (Ovelise 3, 4) Ano opo tu mone eliko ndyoka li li mOmbiimbeli, otu na okukonakona Ombiimbeli twa mana mo, tatu shi ningi nomutima aguhe.—Lukas 8:15.

Ngele otwa ningi oonkambadhala dha tya ngawo, Jehova ote ke tu kwathela tu mone eliko ndyoka. Ovelise 6 otayi ti: “OMUWA ota gandja owino.” Jehova oye owala ta vulu oku ku kwathela wu uve ko lela oshili yomOmbiimbeli. (Johannes 6:44; Iilonga 16:14) Oto vulu okukala nuushili kutya ngele owa kala to kongo mOohapu dhaKalunga nomutima aguhe oto ka mona ‘ontseyo yokutseya Kalunga’ nenge tu tye eliko ndyoka ta li yambapaleke onkalamwenyo yoye kaaku na we.—Omayeletumbulo 2:10-21.a

[Enyolo lyopevi]