Ilonga sha mOohapu dhaKalunga

Ongiini tamu vulu okukala mwa nyanyukwa megumbo lyaandjeni?

Moshitopolwa muka omu na omapulo ngoka tashi vulika wi ipulile esiku limwe notashi ku ulukile mpoka to vulu okwaadha omayamukulo mOmbiimbeli yoye. Oonzapo dhaJehova otadhi ka kala dha nyanyukwa okukundathana nangoye omayamukulo ngaka.

1. Omolwashike ondjokana ya simana opo mu kale mwa nyanyukwa maandjeni shi vulithe owala okukala pamwe inaamu hokana?

Jehova, ngoka e li Kalunga omunyanyukwi, oye mwene a tota po ondjokana. Ondjokana oya simana molwaashoka ihayi ningitha owala aantu ya kale ye na uukuume ihe ohayi shi ningi wo oshipu opo uunona wu tekulilwe momudhingoloko gu li nawa. Kalunga okwa tala ko ngiini ondjokana? Okwa hala yi kalelele, nokwa hala omulumentu nomukiintu ya kale ya hokana paveta. (Lukas 2:1-5) Okwa hala wo aasamane naakulukadhi ya kale ya dhiginina egano lyondjokana noya kale yi inekelathana. (Aahebeli 13:4) Jehova ota pitike owala Aakriste ya hengathane ngele gumwe gwomaaihokani okwa hondele.—Lesha Mateus 19:3-6, 9.

2. Omusamane nomukulukadhi oye na okwiihumbatelathana ngiini?

Jehova okwa shiti omulumentu nomukiintu opo ya kwathathane mondjokana. (Genesis 2:18) Molwaashoka omusamane oye omutse gwegumbo, oku na okutula po oshiholelwa mokusila oshimpwiyu aanegumbo lye painiwe nokulonga aanegumbo lye kombinga yaKalunga. Oku na okukala e hole omukulukadhi gwe tagu pu mo. Omusamane nomukulukadhi oye na okukala ye holathana noya simanekathana. Molwaashoka omusamane nomukulukadhi ayehe inaya gwanenena, oye na okwiilonga okudhiminathana po opo ya kale ya nyanyukwa mondjokana yawo.—Lesha Aaefeso 4:31, 32; 5:22-25, 33; 1 Petrus 3:7.

3. Mbela ngele omu wete kaamu na enyanyu mondjokana yeni, omu na okutopoka?

Ngele ngoye nakuume koye kopandjokana omu na uupyakadhi wontumba, kambadhaleni mu kale hamu ihumbatelathana nohole. (1 Aakorinto 13:4, 5) Oohapu dhaKalunga itadhi ti kutya etopoko olyo ekandulopo lyomukundu. Mpoka onkalo ya nayipalelela, Omukriste oye mwene e na okutokola ngele oshi li ngaa pandunge ya topoke nenge hasho.—Lesha 1 Aakorinto 7:10-13.

4. Aanona, Kalunga okwe mu halela shike?

Kalunga okwa hala mu kale mwa nyanyukwa. Ohe mu pe omayele gopandunge kaaku na we kombinga yankene tamu vulu okunyanyukilwa onkalamwenyo mu li aagundjuka. Okwa hala mu mone uuwanawa muunongo nomontseyo yaavali yeni. (Aakolossa 3:20) Jehova oha kala a nyanyukwa ngele tamu vulika kuyo.—Lesha Omuuvithi 11:9–12:1; Mateus 19:13-15; 21:15, 16.

5. Aavali, ongiini aanona yeni taya vulu okumona enyanyu?

Omu na okulonga nuudhiginini opo mu pe aanona yeni iikulya, ehala lyokukala niizalomwa. (1 Timoteus 5:8) Ihe opo ya kale ya nyanyukwa, omwa pumbwa wo oku ya longa ya kale ye hole Kalunga nokwiilonga kuye. (Aaefeso 6:4) Sho to ulike kutya owu hole Kalunga, otashi vulu okunwetha mo omumwoye. Ngele oho gandja omayele gi ikolelela kOohapu dhaKalunga otashi vulu okuningitha okanona koye ka kale ke na etaloko ewanawa.—Lesha Deuteronomium 6:4-7; Omayeletumbulo 22:6.

Aanona ohaya kala yu uvite nawa ngele oho ya tsu omukumo noho ya pandula. Ohaya kala wo ya pumbwa epukululo negeeloputudho. Edheulo lya tya ngaaka ohali ya gamene kaayi ihumbate momukalo ngoka tagu ke ya ningitha ya kale kaaye na enyanyu. (Omayeletumbulo 22:15) Ihe nonando ongawo, egeeloputudho kali na okugandjwa nonyanya.—Lesha Aakolossa 3:21.

Oonzapo dhaJehova odha nyanyangidha omambo ngoka ga nuninwa okukwathela aavali naanona. Omambo ngaka oga kankamena kOmbiimbeli.—Lesha Episalomi 19:7, 11.

Opo wu mone uuyelele wa gwedhwa po, tala ontopolwa 14 yembo ndika Omalongo gashili gOmbiimbeli ogeni naanaa?, lya nyanyangidhwa kOonzapo dhaJehova.