Natu kaleni hatu nyanyukilwa pamwe!
OKUKALA omuntu wu uvite elago nosho wo enyanyu oyi li iinima yimwe mbyoka iidhigu okumona. Aantu oyendji ohaya kala ye wete shi li oshidhigu okukatala ko yalwe momukalo omwaanawa. Onkalamwenyo yokunena unene tuu miilando iinene, ohayi ningitha aantu yi itongole ko kuyalwe noku ki ikalela.
Alberto Oliverio omutseyinawa miinima yi na ko nasha nonkalathano yaantu, okwa ti: “Aantu oyendji otaya si ezaza, unene tuu mboka haya kala momahala ngoka ga tungwa gi ilile. Olundji ohashi tu ningitha tu kale kaatu na ko nasha naaniilonga ooyakwetu naashiinda nenge naaniilonga yomositola ndjoka yi li popepi natse.” Okukala monkalo ya tya ngaaka olundji ohaku eta epolimano.
Onkalo nosho wo ombepo ndjoka hayi kala yi niwe kAakriste ooyakwetu oya yooloka. Omuyapostoli Paulus okwa nyola a ti: “Nyanyukweni aluhe.” (1 Tes. 5:16) Otu na omatompelo ogendji gokukala twa nyanyukwa nokunyanyukilwa pamwe nayakwetu. Ohatu longele Omukombandambanda, Jehova Kalunga; otu uvite ko etumwalaka lyOmbiimbeli lyoshili; otu na etegameno lyoku ka hupa nokumona omwenyo gwaaluhe; notatu vulu wo okukwathela yalwe ya mone omalaleko nuuyamba ga faathana.—Eps. 106:4, 5; Jer. 15:16; Rom. 12:12.
Okunyanyukilwa pamwe nayalwe ohaku ndhindhilikitha mo Aakriste yashili. Onkee ano, itashi kumitha sho Paulus a nyolele Aafilippi a ti: “Onda nyanyukwa notandi ka nyanyukwa pamwe nane amuhe. Nane wo nyanyukweni pamwe nangame.” (Fil. 2:17, 18) Sho Paulus a popi oohapu ndhoka oonshona, okwa popi lwiikando iyali shi na ko nasha nokunyanyukilwa pamwe nayakwetu.
Dhoshili, Aakriste oya pumbwa okukala ya kotoka kaaya kwatwe kegamo lyokwiitongola ko kuyalwe. Kehe ngoka ti itongola ko kooitaali ooyakwawo oti iyimbi okunyanyukilwa pamwe nayo. Ongiini nduno tatu vulu okulandula ekumagidho lyaPaulus tu ‘nyanyukwe natango mOmuwa’ pamwe naamwatate?—Fil. 3:1, KB.
Nyanyukwa pamwe nooitaali ooyakweni
Sho Paulus a li a nyolele ontumwafo ye Aafilippi, otashi vulika a li mondholongo muRoma omolwiilonga ye yokuuvitha. (Fil. 1:7; 4:22) Ihe shoka inashi shunitha pevi uukalele we. Mepingathano naashono, okwa li a nyanyukwa okulongela Jehova ngaashi ta vulu ‘nokutilwahi ngaashi oshikunwayambo.’ (Fil. 2:17, NW) Iikala yaPaulus otayi ulike kutya enyanyu ihali etwa koonkalo moka omuntu e li. Kakele kokukala mondholongo, okwa ti: ‘Otandi ke shi nyanyukilwa wo komeho.’—Fil. 1:18.
Paulus okwa li a toto egongalo muFilippi nokwa li e hole lela aamwahe. Okwa li e shi kutya okunyanyukilwa pamwe nayalwe mokulongela Jehova okwa li ta ku ke mu ladhipika wo. Onkee ano, okwe ya lombwele a ti: “Aamwameme, ngame onda hala, mu kale mu shi shi kutya iinima mbyoka ya ningilwa ndje, oya kwathele lela mokutaandelitha evaangeli. Nokuli etanga alihe lyaalangeli yuuwa naambala yalwe ooyakwawo yaamuka oye shi shi ngashingeyi kutya ngame onda tulwa mondholongo molwaashoka ndi li omumati gwaKristus.” (Fil. 1:12, 13) Sho Paulus a li a hokololele aamwahe oshimoniwa she tashi tsu omukumo osha li she mu etele enyanyu nokwa nyanyukilwa pamwe nayo. Aafilippi nayo oye na okukala ya li ya nyanyukwa pamwe naPaulus. Okuninga ngaaka, okwa li taku ya kwathele kaaya teke omukumo omolwiinima mbyoka Paulus a li ta ningilwa. Pehala lyaashono, oya li ya pumbwa okuholela oshiholelwa she. (Fil. 1:14; 3:17) Aafilippi oya li ya tsikile okukwatela Paulus momagalikano gawo noku mu kwathela nosho wo oku mu ambidhidha nakehe shoka taya vulu.—Fil. 1:19; 4:14-16.
Mbela ohatu ulike ngaa ombepo yenyanyu ya fa ndjoka yaPaulus? Mbela ohatu kambadhala ngaa okukala tu na etaloko li li nawa shi na ko nasha noonkalo dhetu monkalamwenyo nosho wo nuukalele wetu? Uuna tatu endathana naamwatate, oshi li nawa tu kale tatu nyanyukilwa iilonga yetu yokuuvitha. Inatu pumbwa tu kale tu na oshimoniwa sha dhenga mbanda opo tu tameke okweendathana nayo. Otashi vulika twa li twa pendutha ohokwe maantu ya pulakene ketumwalaka lyUukwaniilwa omolwefalomo tali ti sha nenge nkene twa li twa tompathana nayo. Otashi vulika twa ninga oonkundathana tadhi pondola nomunegumbo kombinga yovelise yontumba yOmbiimbeli. Nenge otashi vulika aantu yomoshitopolwa moka hatu longele ye shi iilonga yOonzapo dhaJehova, naashika osha gandja uunzapo. Okulombwelathana iimoniwa ya tya ngaaka oku li omukalo gwokunyanyukwa pamwe.
Aapiya yaJehova oyendji oya ninga omaiyambo notaya tsikile natango opo ya gwanithe po iilonga yokuuvitha. Aakokolindjila, aatonateli aayendi, Aabetel, aatumwa, naapiya yopaigwana ohayi igandja miilonga yethimbo lyu udha nohaya kala ya nyanyukwa sho taye shi ningi. Mbela ohatu nyanyukilwa ngaa pamwe nayo? Onkee ano, natu pandule ‘aalongi ooyakwetu mboka omolwuukwaniilwa waKalunga.’ (Kol. 4:11, KB) Uuna tu li pamwe nayo pokugongala kwegongalo nenge piigongi iinene yopaKriste, otatu vulu oku ya ladhipika. Otatu vulu wo okuholela uulaadhi wawo. Otatu vulu okukonga “ompito” tu pulakene kiimoniwa yawo nosho wo koohapu dhawo tadhi tungu moku ya hiya tu lye pamwe nayo komagumbo getu.—Fil. 4:10.
Nyanyukilwa pamwe naamboka ye li momamakelo
Okwiidhidhimikila omahepeko nokusinda omamakelo okwa li kwa koleke Paulus a kale a tokola toko okukala omudhiginini kuJehova. (Kol. 1:24; Jak. 1:2, 3) Okukala e shi kutya aamwahe muFilippi oya li taya ka adhika komamakelo ga faathana nonokutya otaya ka ladhipikwa omolweidhidhimiko lye, oshe mu pe etompelo lyokukala a nyanyukwa nokunyanyukilwa pamwe nayo. Onkee ano, okwa nyola a ti: “Ne omwa pewa ohenda yokuyakula Kristus, haku mu itaala akuke, ihe nokuhepekwa wo omolwe. One wo otamu vulu okukondja pamwe nangame. Olugodhi ndoka olwo naanaa ndoka mwa li mwa mono ndje ndi lu na, nosigo onena omu uvite ndje ndi lu na.”—Fil. 1:29, 30.
Sha faathana, nokunena Aakriste ohaya patanekwa omolwokuuvitha. Omathimbo gamwe omapataneko ngaka ohaga ningwa nonyanya, ihe olundji ohaga ningwa miineya. Otashi vulika ga ningwe momukalo gwomalundilo kaashunimonima, okutondwa kiilyo yuukwanegumbo, okushekwa kaalongi pamwe nangoye nenge kaanasikola ooyakweni. Jesus okwa li a londodha kutya omamakelo ga tya ngaaka kage na oku tu halutha go kage na wo oku tu teya omukumo. Pehala lyaashono, otu na omatompelo gokukala twa nyanyukwa. Okwa ti: “One aanelago, aantu ngele taye mú sheke, taye mú tidhagana, taye mú popile muuwinayi auhe nokufundja omolwandje. Nyanyukweni, ligoleni pombanda, oshoka ondjambi yeni onene yi li megulu.”—Mat. 5:11, 12.
Katu na okukala twa tila nenge twa mbandapala uuna tu uvu kutya aamwatate otaya hepekwa miilongo yontumba. Pehala lyaashono, otu na okunyanyukwa omolweidhidhimiko lyawo. Otatu vulu oku ya galikanena, tatu pula Jehova e ya kwathele ya kale ye na eitaalo noyi idhidhimike. (Fil. 1:3, 4) Nonando otatu vulu owala okuninga oshishona shi na ko nasha naamwatate mboka, otatu vulu okukwathela mboka ye li momagongalo getu ye li momaupyakadhi. Otatu vulu okuulika ohokwe muyo noku ya ambidhidha. Otatu vulu okukonga oompito tu nyanyukilwe pamwe nayo moku ya hiya iikando yontumba ye ye tu ninge pamwe nayo Elongelokalunga lyUukwanegumbo, moku ya pamwe nayo miilonga yokuuvitha nosho wo mokunyanyukilwa pamwe nayo.
Otu na omatompelo ogendji gokunyanyukilwa pamwe. Natu kondjitheni ombepo yokwiitongola ko kaamwatate e tatu kala aluhe hatu nyanyukilwa pamwe nayo. Mokuninga ngaaka, itatu ka kaleka po owala ohole nosho wo uukumwe megongalo, ihe otatu ka nyanyukilwa uumwayinathana wopaKriste pakuudha. (Fil. 2:1, 2) Eeno, Paulus ote tu ladhipike ta ti: “Kaleni aluhe mwa nyanyukwa mokukala mOmuwa. Otandi shi tumbula natango: nyanyukweni!”—Fil. 4:4.
[Ethano pepandja 6]
Globe: Courtesy of Replogle Globes