Omayamukulo gomapulo omulongo kombinga yomilalo

1 Mbela oshoshili kutya Adam naEva oya li ya tidhwa moshikunino molwaashoka ya li ya yi momilalo?

▪ Eyamukulo: Aantu oyendji ohaya dhiladhila kutya omuti gwi indikwa gwomoshikunino shaEden kagwa li shili omuti, ihe Adam naEva oya li yi indikwa okuya momilalo. Ihe Ombiimbeli hasho tayi ti.

Dhiladhila kwaashika: Nokuli manga Eva inaa shitwa, Kalunga okwa adhika a lombwela nale Adam kaa lye oshiyimati ‘shokomuti gwokutseya uuwanawa nuuwinayi.’ (Genesis 2:15-18) Itashi vulika elombwelo ndyoka li kale kombinga yomilalo molwaashoka pethimbo mpoka Adam okwa li owala oye awike. Ishewe, Kalunga okwa li a pe Adam naEva oshipango sha yela ya ‘valathane, no yi indjipale nokuudhitha evi alihe.’ (Genesis 1:28) Mbela otashi wapa ngaa Kalunga omunahole a lombwele aaihokani yotango yu ‘udhithe evi alihe’ ye te ya tokolele eso sho ya vulika kelombwelo lye ngele oya li owala taya vulu okuudhitha evi okupitila momilalo?—1 Johannes 4:8.

Oshikwawo, sho Eva a li oye awike opo ‘a li a toonona ko iiyimati yi indikwa e ta li. Konima yaashono okwa pe wo omulume, naye wo okwa li.’—Genesis 3:6, yelekanitha NW.

Shahugunina, Adam naEva kaya li ya geelwa sho ya vala aanona. (Genesis 4:1, 2) Uushili owu iwetikile kutya Adam naEva kaya li ya tidhwa mo moshikunino molwaashoka ya yi momilalo, ihe omolwaasho ya li oshiyimati sho sheneshene shoka sha li shi indikwa.

2 Mbela Ombiimbeli oyi indika aantu kaaya nyanyukilwe omilalo?

▪ Eyamukulo: Embo lyotango lyOmbiimbeli otali tu ulukile kutya Kalunga oye a li a shiti aantu, “omulumentu nomukiintu.” Kalunga okwa ti kutya eshito lye ‘olyo opala lela.’ (Genesis 1:27, 31) Konima yoomvula dhontumba, omunyoli gwOmbiimbeli gumwe okwa li a nwethwa mo kuKalunga a nyolele aasamane omalombwelo ngaka taga ti: ‘Nyanyukilwa omukulukadhi gwoye wa za naye kuufuko. . . . Omagundji ge nage ku kolithe aluhe.’ (Omayeletumbulo 5:18, 19, yelekanitha NW.) Mbela oohapu ndhoka otadhi ulike kutya Ombiimbeli oyi indika aantu kaaya nyanyukilwe omilalo?

Kakele kokushita aantu taya vulu okumona aanona, Kalunga okwa li a shiti aantu ye na iilyo yoluvalo momukalo ngoka aaihokani taya vulu oku yi longitha mokuulukilathana ohole momukalo tagu ya nyanyudha ayehe. Okuya momilalo ohaku gwanitha po oompumbwe dhopalutu nodhopamaiyuvo dhaalumentu naakiintu ya hokanathana noye na ekwatathano lyopothingo nolyopahole.

3 Mbela Ombiimbeli oya pitika omulumentu nomukiintu ya kale pamwe inaaya hokana paveta?

▪ Eyamukulo: Ombiimbeli otayi ti kutya “Kalunga ota ka pangula mboka ye hole oluhondelo.” (Aahebeli 13:4) Oshitya oluhondelo, mOshigreka por·neiʹa, otashi ti okulongitha iilyo yoluvalo momukalo ngoka haagwo yu uthilwa.a Onkee ano, osha puka koshipala shaKalunga ngele omulumentu nomukiintu taya kala haya zi pamwe nonando oye li popepi nokuhokana.

Nonando otashi vulika omulumentu nomukiintu ye holathane tagu pu mo, Kalunga okwa tegelela ya kale ya hokana opo nawa ya vule okuya momilalo. Kalunga oye e tu shita tu na uukwatya wohole. Ohole oyo uukwatya waKalunga wa tongomana. Onkee ano, oku na omatompelo omawanawa sho a gandja elombwelo kutya omulumentu nomukiintu otaya vulu owala okuya momilalo ngele ya hokana, ngaashi oshitopolwa tashi landula tashi ke shi yelitha.

4 Mbela Ombiimbeli oya pitika omusamane a hokane aakulukadhi ye vule pugumwe?

▪ Eyamukulo: Opu na ethimbo ndyoka Kalunga a li e etha aalumentu ya hokane aakulukadhi ye vule pugumwe. (Genesis 4:19; 16:1-4; 29:18–30:24) Ihe Kalunga ha ye a li a toto po oshinima shoka shokukala naakulukadhi ye vule pugumwe. Okwa li owala a pe Adam omukulukadhi gumwe awike.

Kalunga okwa li a pe Jesus Kristus uuthemba a dhike po ishewe omuthikampango Gwe gwopetameko kutya omulumentu oku na owala okukala e na omukulukadhi gumwe. (Johannes 8:28) Sho Jesus a li a pulwa kombinga yondjokana, okwa ti: “‘Petameko Omushiti okwe ya shiti omulumentu nomukiintu . . .  Onkee ano, omulumentu e na okuthiga po he nayina e ti ihanganitha nomukiintu gwe, ayehe yaali e taa ningi omuntu gumwe.’”—Mateus 19:4, 5.

Omulongwa gwaJesus gumwe okwa li a nwethwa mo kuKalunga a nyole oohapu ndhika tadhi ti: “Omulumentu kehe oku na okukala e na omukiintu gwe ye mwene, nomukiintu kehe oku na okukala e na omulumentu gwe mwene.” (1 Aakorinto 7:2) Ombiimbeli oya popi wo ya ti kutya opo omulumentu Omukriste a hokana a pewe uuthembahenda wi ikalekelwa megongalo, oku na okukala “omulumentu . . . e na omukiintu gumwe awike.”—1 Timoteus 3:2, 12.

5 Mbela osha puka ngele aaihokani taya longitha iingambeki yoluvalo?

▪ Eyamukulo: Jesus ka li a lombwele aalanduli ye ya mone aanona. Yo naalongwa ye yopetameko nayo kaya li ya gandja elombwelo kAakriste ya mone aanona. Ombiimbeli kayi na mpoka yi indika aantu ya longithe iingambeki yoluvalo.

Onkee ano, aaihokani oya manguluka okutokola kuyo yene ngele otaya ka kala ye na aanona nenge hasho. Otaya vulu wo okutokola kutya oya hala okukala ye na aanona yangapi nosho wo kutya oya hala oku ya mona uunake. Ngele omusamane nomukulukadhi oya tokola okulongitha oshingambeki sholuvalo shoka ihaashi kutha mo ela, shoka oshi li etokolo lyawo lyopaumwene.b Kapu na ngoka e na oku ya pa uusama sho taya longitha oshingambeki shoka.—Aaroma 14:4, 10-13.

6 Mbela okwiikutha epunda okwa puka?

▪ Eyamukulo: Omwenyo ogu li oshinima shi na ondilo momeho gaKalunga nokwa tala ko okanona hoka inaaka valwa natango ke li omuntu. (Episalomi 139:16) Kalunga okwa popya kutya ngele omuntu okwe ehameke okanona hoka inaaka valwa natango oku na okugeelwa. Onkee ano, kuye okukutha mo epunda oku li lela edhipago.—Eksodus 20:13; 21:22, 23.

Ongiini nduno ngele opwa holoka ombaadhilila onkalo ya kwata miiti pethimbo okanona taka valwa ndjoka tayi ningitha aaihokani ya hogolole po kutya otaya ka hupitha omwenyo gwokanona nenge ogwayina? Ngele onkalo ndjoka oya holoka po, aaihokani oye na okutokola kutya omwenyo guni ye na okuhupitha.c

7 Mbela Ombiimbeli oya pitika ehengathano?

▪ Eyamukulo: Eeno, Ombiimbeli oya pitika ehengathano. Ihe, Jesus okwa popya kutya aaihokani otaya vulu owala okuhengathana pakankameno lyoshinima shimwe, sho e shi popi noohapu ndhika tadhi ti: ‘Oongoka ta henge po omukiintu gwe omolwoshinima shilwe shaashi oluhondelo [okuya momilalo pondje yondjokana] e ta hokana gulwe, oye ota hondele.’—Mateus 19:9.

Kalunga ita hokwa ngoka ta henge po mukwawo kaashi li pamulandu gwOmbiimbeli. Ota geele mboka taya henge po ookuume kawo kopandjokana omolwoshinima shanathangwa, unene tuu ngele taye shi ningi nelalakano lyokukonga po ookuume yalwe.—Maleaki 2:13-16; Markus 10:9.

8 Mbela Kalunga okwa hokwa uushenge?

▪ Eyamukulo: Ombiimbeli oyi indika thiluthilu oluhondelo, ndoka lwa kwatela mo uushenge. (Aaroma 1:26, 27; Aagalati 5:19-21) Manga Ombiimbeli ya popya shu ukilila kutya Kalunga ita hokwa okukalamwenyo kwa tya ngaaka, otu shi shi wo kutya ‘Kalunga okwa kala e hole uuyuni, sho a gandja Omwana awike, opo shaangoka te mu itaale kaa kane, ihe a kale e na omwenyo gwaaluhe.’—Johannes 3:16.

Nonando Aakriste inaya hokwa uushenge, ohayu ungaunga nohenda nomuntu kehe. (Mateus 7:12) Kalunga okwa hala tu kale twa ‘simaneka aantu ayehe.’ Onkee ano, Aakriste yashili iha yu ulukile yalwe uutondwe, kutya nduno omashenge.—1 Petrus 2:17.

9 Mbela osha puka aantu ya tuminathane omathano giipala, oo-SMS dhiipala nokupopya kombinga yomilalo moongodhi nomOintaneta?

▪ Eyamukulo: Ombiimbeli inayi popya lela kombinga yiinima mbika kondandalunde. Ihe otayi ti: “Itashi vulika mokati keni tamu uvika oluhondelo niilonga ya nyata yoludhi kehe nolwiho. Osho wo inashi opala, ngele ne otamu popi oohapu tadhi sitha ohoni, omategu guugoya nenge oohapu dha nyata.” (Aaefeso 5:3, 4) Okutuminathana omathano, oo-SMS nokupopya kombinga yomilalo dha nyata okupitila moongodhi nomOintaneta ohaku ningitha aantu ya kale ya hala okuya momilalo yo inaaya hokana. Okuninga ngaaka ohaku ningitha aantu ya kale yi ihole yo yene noya pititha owala komeho omahalo gawo yene pehala lyoku ya kwathela ya kale ye na eipangelo.

10 Ombiimbeli otayi ti ngiini kombinga yokwiidhanena kiilyo yoluvalo?

▪ Eyamukulo: Ombiimbeli inayi popya kondandalunde kombinga yokwiidhanena kiilyo yoluvalo, oshinima shoka hashi ningwa komuntu nelalakano lyokwiigwanithila po omahalo gopamilalo ye mwene. Ihe, Oohapu dhaKalunga otadhi londodha Aakriste tadhi ti: ‘Dhipageni ano uuhalu weni wopavi mboka tau longo mune ngashika oluhondelo, iipala nuuholume.’—Aakolossa 3:5.

Okwiidhanena kiilyo yoluvalo ohaku ningitha omuntu a kale owala a pititha komeho omahalo ge mwene shi na ko nasha nomilalo nokukale e na etaloko lya puka shi na ko nasha nadho. Ombiimbeli otayi tu shilipaleke kutya Kalunga ota vulu okugandja “oonkondo dhi vule dhopaunshitwe” kwaamboka taya ningi oonkambadhala opo ya sinde uunkundi mbuka.—2 Aakorinto 4:7, NW; Aafilippi 4:13.

[Omanyolo gopevi]