‘Aakwiilongo’ muuyuni wa kolokosha
‘Meitaalo oyo ya dhimbulula kutya oyo oondjendi naakwiilongo moshilongo.’—HEB. 11:13, yelekanitha NW.
1. Jesus okwa ti shike kombinga yAakriste yashili shi na ko nasha nuuyuni mbuka?
JESUS okwa popi kombinga yaalongwa ye a ti: ‘Yo oye li muuyuni.’ Okwa gwedha ko a ti: “Oyo kaye shi yomuuyuni, ngashika nangame kandi shi gwomuuyuni.” (Joh. 17:11, 14) Kungawo, Jesus oku ulike sha yela kutya aalanduli ye yashili kaye shi ‘yomuuyuni mbuka’ tawu pangelwa kuSatana ngoka e li kalunga kawo. (2 Kor. 4:4) Nonando oye li muuyuni mbuka wa kolokosha, kaye shi oshitopolwa shawo. Oye li “oondjendi naakwiilongo.”—1 Pet. 2:11.
Oya kala ‘aakwiilongo’
2, 3. Omolwashike taku tiwa kutya Henok, Noowa, Abraham naSara oya li “oondjendi naakwiilongo”?
2 Aapiya yaJehova yonale aadhiginini oya li ya yooloka ko kaantu mboka yomuuyuni waakaanakalunga moka ya li. Manga Eyelu inaali ya, Henok naNoowa oya li ya “kala mekwatathano naKalunga” kashili. (Gen. 5:22-24; 6:9-10) Oya li yu uvitha nuulaadhi pethimbo lyawo kutya Kalunga ota ka hanagula po aakolokoshi. (Lesha 2 Petrus 2:5; Judas 14, 15.) Molwaashoka Henok okwa li e na ekwatathano naKalunga muuyuni wa kolokosha, “okwa li a hokiwa kuKalunga,” na Noowa ka li “e na uusama, okwa li omuyuuki pethimbo lye.”—Heb. 11:5; Gen. 6:9-10.
3 Otatu vulu wo okwiilonga sha moshiholelwa shaAbraham naSara mboka ya li ya vulika kuKalunga sho e ya lombwele ya tembuke mo muUr shaKaldea ya ka kale oondjendi mevi kaali shi lyawo. (Gen. 11:27, 28; 12:1) Omuyapostoli Paulus okwa nyola a ti: “Eitaalo olyo lya longitha Abraham, a vulike, uuna ndoka Kalunga e mu ithana, nokwa tembukile koshilongo shoka Kalunga u uvaneke oku shi mu pa. Oye okwa tembuka mo moshilongo shaandjawo, ye ina tseya [mpoka] ta yi. Koonkondo dheitaalo okwa kala a fa omukwiilongo moshilongo shoka Kalunga e shi mu uvanekela. Oye okwa kala momatsali gowala, nosho wo Isak naJakob, mboka Kalunga e ya uvanekela euvaneko tuu ndyoka.” (Heb. 11:8, 9) Paulus okwa popi shi na ko nasha naapiya yaJehova aadhiginini a ti: “Ootatekulu mbaka ayehe oya sile meitaalo. Oyo inaa mona iinima mbyoka Kalunga e yi ya uvanekela, ihe oye yi talele kokule noye yi [nyanyukilwa]. Oya dhimbulula kutya oyo oondjendi naakwiilongo [moshilongo, NW].”—Heb. 11:13.
Elondodho kAaisraeli
4. Aaisraeli oya li ya pewa elondodho lini manga inaaya tula mevi lyawo?
4 Oluvalo lwaAbraham olwa li lwi indjipala, na Kalunga okwa li e lu unganeke lu kale oshigwana shaIsraeli nokwe shi pe oompango nosho wo evi. (Gen. 48:4; Deut. 6:1) Osha li shi na okukala shi shi kutya Jehova oye Mwene gwevi moka sha li. (Lev. 25:23) Aaisraeli oya li owala ya fa omuntu a thigilwa egumbo e li keelele. Oya li wo ye na okudhimbulukwa kutya “omuntu iha kala e na omwenyo koshikwiila ashike” nokaya li ye na okweetha iinima yopamaliko yi ya dhimbithe Jehova. (Deut. 8:1-3) Manga inaaya tula mevi lyawo, Aaisraeli oya li ya pewa elondodho tali ti: “Uuna OMUWA Kalunga koye te ku fala mevi ndyoka e li uvanekele oohokulu Abraham, Isak naJakob, oto ka pewa iilando iinene noyo opala mbyoka inoo yi tunga. Oto ka pewa omagumbo gu udha omaliko omawanawa inoo ga pungula mo, omithima inoo dhi hupa, iitsambe yomiviinu niikunino yomiolivi inoo dhi tsika. OMUWA nge te ku fala mevi ndyoka, noto kala u na ayihe wa hala okulya, kotoka tuu, waa dhimbwe OMUWA ngoka e ku tembudha muEgipiti, moka wa li omupika.”—Deut. 6:10-12.
5. Omolwashike Jehova e ekelehi Aaisraeli, noshigwana oshipe shini a hogolola?
5 Aaisraeli kaya li ya vulika kelondodho lyaJehova. Pethimbo lyaNehemia, ongundu yAalevi oya li ya sa ohoni omolwuuwinayi mboka wa li tawu ningwa kAaisraeli sho ya yi mEvi lyEuvaneko. Konima sho ya yi mo oyi ilikolele omagumbo guuzeko noya li ye na iikulya ya gwana nomaviinu, “oya li ashihe shoka ya hala e taa ondoka.” Oya li ya tsu ondumbo naKalunga e taya dhipaga aapolofeti mboka ha tumu ye ya londodhe. Jehova okwe ye ethele miikaha yaatondi yawo. (Lesha Nehemia 9:25-27; Hos. 13:6-9) Pethimbo lyepangelo lyAaroma, Aaisraeli oya li ya dhipaga Mesiasa omuuvanekwa. Opo nduno Jehova okwe ye ekelehi e ta kala a hokwa oshigwana oshipe, Israeli shopambepo.—Mat. 21:43; Iil. 7:51, 52; Gal. 6:16.
“Onde mú hogolola mo muuyuni”
6, 7. (a) Jesus okwa yelitha shike kombinga yaalanduli ye nosho wo yuuyuni? (b) Omolwashike Aakriste yashili ya li kaaye shi oshitopolwa shuuyuni waSatana?
6 Ngaashi sha popiwa metetekelo, Jesus Kristus ngoka e li Omutse gwegongalo lyopaKriste okwa li e shi yelitha kutya aalanduli ye kaye shi oshitopolwa shuuyuni waSatana. Jesus manga inaa sa, okwa li a lombwele aalongwa ye a ti: “Ando mwa li yomuuyuni, nena ando uuyuni ou hole aantu yawo. Ihe ngame onde mú hogolola mo muuyuni; omolwaasho uuyuni u na oku mú tonda.”—Joh. 15:19.
7 Sho Aakriste ya taandele muuyuni auhe, mbela oya li oshitopolwa shuuyuni nohaya landula omikalo dhawo? Aawe. Oya li yi iyoolola ko kuuyuni waSatana shaa mpoka ye li. Oomvula 30 lwaampono konima yeso lyaKristus, omuyapostoli Petrus okwa li a nyolele Aakriste mboka ya li ya kala miitopolwa yi ili noyi ili yaRoma a ti: “Aaholike, one oondjendi naakwiilongo muuyuni mbuka. Onkee otandi mú kumagidha, inamu etha, mu pangelwe kuuhalu wopantu mboka tau hindi aluhe omwenyo. Kaleni wo mu na omikalo omiwanawa mokati kaapagani.”—1 Pet. 1:1; 2:11, 12.
8. Omunandjokonona gumwe okwa hokolola ekwatathano lyAakriste yonale nuuyuni a ti ngiini?
8 Omunandjokonona Kenneth Scott Latourette okwa li e shi koleke kutya Aakriste mboka ya li ko omimvo ethele dha pita oya li yi ihumbata ye li “oondjendi naakwiilongo” pethimbo lyepangelo lyAaroma, sho a ti: “Osha tseyika apuhe kutya Aakriste yonale oya li yi idhidhimikile omahepeko omadhigu . . . Oya li ya lundilwa momikalo dhi ili nodhi ili. Molwaashoka kaya li haya kutha ombinga miituthi yoshipagani, Aakriste oya li ya lundilwa kutya inayi itaala Kalunga. Oya li hayu ulwa kutya oye tonde aantu, omolwokwiidhilika kwawo iinima yopankalathano, ngaashi iituthi yoshipagani, omainyanyudho gaapuhe ngoka Aakriste ya li ya tala ko kutya oge li omaitaalo nomikalo dhoshipagani noga kwatela mo omilalo dha nyata.”
Inatu itula mokulongitha iinima yuuyuni
9. Tu li Aakriste yashili, ohatu ulike ngiini kutya katu “tonde aantu”?
9 Onkalo oya tya ngiini kunena? Otu li “methimbo ndika ewinayi,” ihe nonando ongaaka, otwa yooloka ko kuuyuni ngaashi Aakriste yonale. (Gal. 1:4) Omolwoshinima shoka aantu oyendji ihaye tu uvu ko noye tu tonde. Ihe tse katu “tonde aantu” nando. Molwaashoka otu ya hole, ohatu uvitha egumbo negumbo, opo tu thike komuntu kehe ‘nonkundana ombwanawa yuukwaniilwa waKalunga.’ (Mat. 22:39; 24:14, NW) Ohatu shi ningi molwaashoka otu na uushili kutya Uukwaniilwa waKalunga mboka wu li epangelo tali wilikwa kuKristus, masiku otawu ka hulitha po omapangelo gaantu inaaya gwanenena, notawu ke eta po uuyuni uupe wuuyuuki.—Dan. 2:44; 2 Pet. 3:13.
10, 11. (a) Omolwashike ihaatu kala twa pwila miinima yuuyuni mbuka? (b) Aakriste mboka ya tonata kaye na okukala yi itula miinima yini?
10 Molwaashoka otu shi kutya uuyuni mbuka waSatana owu li pokuhula po, tu li aapiya yaJehova otu shi kutya ndika halyo ethimbo lyokukala twa thuwa. Ohatu pulakene koohapu dhaPaulus ndhoka tadhi ti: “Aamwameme, onda hala okutya: Ethimbo lyokukalamwenyo kwetu olyo efupi. Onkee ano . . . mboka taa ilandele sha, naa kale ya fa inaayi ilikolela sha. Mboka taa [longitha iinima, NW] yomuuyuni mbuka, naa kale ya fa inaayi itula muyo. Oshoka uuyuni mbuka kau li kokule nokuhula po.” (1 Kor. 7:29-31) Aakriste kunena ohaya longitha ngiini iinima yopauteknologi yuuyuni? Ohaye yi longitha mokutaandelitha etumwalaka lyOmbiimbeli muuyuni momalaka ogendji. Ihaya kala owala ya pwila mokwiikongela uuhupilo. Ohaya landa iinima mbyoka ya pumbwa lela nohaya longitha omayakulo ngoka uuyuni hawu gandja. Ihe ihaya kala yi itula miinima yuuyuni ngaashi okukala ya lenga omaliko nosho wo omaithano gawo.—Lesha 1 Timoteus 6:9, 10.
11 Aakriste mboka ya tonata ihaya lalakanene elongo lyopombanda ndyoka tali popilwa kuuyuni mbuka. Aantu oyendji muuyuni oya tala ko elongo lyopombanda olyo oshipatululo shonkalamwenyo. Ihe tse Aakriste otu na omalalakano gi ili, molwaashoka otu li aakwiilongo. Ohatu yanda okukala tu “hole komeho.” (Rom. 12:16; Jer. 45:5) Molwaashoka otu li aalanduli yaJesus ohatu pulakene kelondodho lye tali ti: “Angaleni ne mu ikotokele kombinga yuuhalu weliko, oshoka okukalamwenyo kwomuntu kombanda yevi itaku lelepekwa kowindji weliko lye.” (Luk. 12:15) Aagundjuka Aakriste otaya ladhipikwa ya mone elongo lyopetameko ndyoka tali ya kwathele ya vule okwiikwathela monkalamwenyo opo ya lalakanene okulongela Jehova ‘nomutima gwawo aguhe nomwenyo gwawo aguhe nomadhiladhilo gawo agehe nonoonkondo dhawo adhihe.’ (Luk. 10:27) Ngele taye shi ningi, otaya kala ‘aayamba koshipala shaKalunga.’—Luk. 12:21; lesha Mateus 6:19-21.
Omadhiladhilo getu inaga luudhikwa kiimpwiyu yuuyuni
12, 13. Okupulakena koohapu dhaJesus ndhoka dhi li muMateus 6:31-33 oshe tu yoolola ko ngiini kuuyuni?
12 Iikala yaapiya yaJehova oya yooloka ko kaantu yomuuyuni, ngele tashi ya piinima yopamaliko. Jesus okwa lombwela aalanduli ye a ti: “Inamu kala mu na oshimpwiyu mu tye: ‘Otatu li shike?’ nenge: ‘Otatu nu shike?’ nenge: ‘Otatu zala shike?’ Ayihe mbika otayi lalakanenwa kaapagani. Oshoka Ho yeni yomegulu oku shi shi kutya omwa pumbwa mbika ayihe. Tangotango kongeni [uukwaniilwa waKalunga, KB] nuuyuuki we, nena mbika ayihe otamu yi gwedhelwa ko.” (Mat. 6:31-33) Ooitaali ooyakwetu oyendji oye shi mona kutya Tate yetu gwomegulu ohe tu pe shoka twa pumbwa.
13 Ombiimbeli otayi ti: “Uukriste owo shili eliko enene, ihe ongele wa gwana naashoka u shi na.” (1 Tim. 6:6) Aantu muuyuni inaayi itaala nando oshinima shoka. Pashiholelwa, ngele aagundjuka ya yi mondjokana, ohaya kala ya hala iinima ayihe mepathimo lyeho, egumbo niipumbiwa yalyo ayihe yuuzeko, ohauto yondilo nosho wo iilongitho yopashinanena mbyoka tayi endele pamwe nethimbo. Ihe Aakriste mboka ye li aakwiilongo hasho ye li ngaaka, ihaya laalele iinima mbyoka itaaya vulu okwaadha. Shoka shi shi okupandulwa osho kutya yamwe oye etha po iinima mbyoka opo ya longithe ethimbo lyawo noonkondo miilonga yaJehova, ye li aauvithi yUukwaniilwa aalaadhi. Yalwe oye li aakokolindjila, aabetel, aatonateli aayendi nosho wo aatumwa. Otatu pandula noonkondo ooitaali ooyakwetu mboka sho taya longo nuudhiginini miilonga yaJehova.
14. Oshike tatu ilongo meyele lyaJesus lyomukuni?
14 Jesus meyele lye lyomukuni okwa ti kutya “oshimpwiyu shuuyuni mbuka nefundjaleko lyuuyamba” otayi vulu okuthiminika oohapu dhaKalunga moomwenyo dhetu e tatu kala itaatu imike iiyimati. (Mat. 13:22) Okukala tu li oondjendi muuyuni mbuka otaku tu kwathele kaatu ye momwigo ngoka. Otatu ka kaleka eho lyetu ‘lyanathangwa’ mokukala tatu gandja eitulomo kokulongela Kalunga nokupititha komeho Uukwaniilwa we monkalamwenyo yetu.—Mat. 6:22, NW.
‘Uuyuni otawu hulu po’
15. Johannes okwa lombwele shike ooitaali ooyakwawo kombinga yuuyuni mbuka?
15 Aakriste yashili oye li “oondjendi naakwiilongo” muyuuni mbuka waSatana, molwaashoka oyi itaala kutya kawu na siku inaawu hula po. (1 Pet. 2:11; 2 Pet. 3:7) Omatokolo getu monkalamwenyo, omahalo nomalalakano getu ohage shi ulike. Omuyapostoli Johannes okwa gandja omayele kooitaali ooyakwawo kaaya kale ye hole uuyuni nenge iinima mbyoka yi li mo molwaashoka “uuyuni niinima ayihe yi li mo mbyoka aantu ye yi hokwa, otayi hulu po. Ihe ngoka ta longo shoka Kalunga e shi hala, ota kala e na omwenyo aluhe.”—1 Joh. 2:15-17.
16. Ongiini tatu vulu okuulika kutya otu li oshigwana shaJehova shi ikalekelwa?
16 Jehova okwa li a lombwele oshigwana shaIsraeli kutya ngele otashi vulika kuye, otashi ka ninga ‘aantu ye mwene ya hogololwa.’ (Eks. 19:5) Mpoka sha kala tashi vulika kuye, elongelokalunga lyasho nonkalamwenyo yasho oya li hayi kala ya yooloka ko kwaandjoka yiigwana yilwe. Kunena oshigwana shaJehova osha yooloka ko thiluthilu kuuyuni waSatana. Otatu lombwelwa taku ti: ‘Etheni okudhina Kalunga nuuhalu wuuyuni, ne mu kale meikwatonawa, muuyuuki nomokusimaneka Kalunga, sho mwa tegelela nomwa tegamena esiku lyelago, uuna eadhimo lyaKalunga keni omunene nolyOmukulili Jesus Kristus tali ka holoka. Oye okwi igandja meso omolweni, opo mu hupithwe mo muuwinayi auhe ye e mu yelithe, mu ninge aantu ye mwene ya hala okulonga uuwanawa.’ (Tit. 2:11-14) “Aantu” yaJehova oya thikama po mAakriste aagwayekwa nosho wo ‘moonzi dhilwe’ dhaJesus omamiliyona ndhoka tadhi ya kwathele.—Joh. 10:16.
17. Omolwashike aagwayekwa noonzi dhilwe itaye ki ipa nando uusama sho ya kala aakwiilongo muuyuni mbuka wa kolokosha?
17 Aagwayekwa oya “tegamena esiku lyelago” sho taya ka pangela pamwe naKristus megulu. (Eh. 5:10) Sho etegameno lyoku ka kala nomwenyo sigo aluhe kombanda yevi tali ka gwanithwa, oonzi dhilwe itadhi ka kala we aakwiilongo muuyuni mbuka wa kolokosha. Otadhi ka kala dhi na omagumbo omawanawa, iikulya niikunwa ofulundundu. (Eps. 37:10, 11; Jes. 25:6; 65:21, 22) Itadhi ka dhimbwa nando kutya iinima ayihe mbyoka oya za kuJehova, “omupangeli gwuuyuni auhe” ngaashi Aaisraeli ya li ye shi ningi. (Jes. 54:5) Aagwayekwa noonzi dhilwe otaya ka kala aluhe ya nyanyukwa molwaashoka ya kala aakwiilongo muuyuni mbuka wa kolokosha.
Oto yamukula ngiini?
• Omomukalo guni aalumentu aadhiginini yonale ya li aakwiilongo?
• Aakriste yonale oya li yi ihumbata ngiini muuyuni wopethimbo lyawo?
• Omolwashike Aakriste yashili ihaaya kala ya pwila miinima yuuyuni mbuka?
• Omolwashike itaatu ki ipa nando uusama sho tu li aakwiilongo muuyuni mbuka wa kolokosha?
[Ethano pepandja 18]
Aakriste yonale kaya li haya kutha ombinga momainyanyudho gelongithonkondo naangoka ga nyata