Dheula aalumentu ya kale ya gwana okupewa iinakugwanithwa
“Omulongwa kehe ngoka a pwa okulongwa, oku thike pomulongi gwe.”—LUK. 6:40.
1. Jesus okwa li a toto po ngiini egongalo pethimbo lyuukalele we kombanda yevi?
PEHULILO lyEvaangeli lye, omuyapostoli Johannes okwa nyola a ti: “Oku na iinima iikwawo oyindji Jesus e yi ninga. Ando ayihe oya nyolelwe shimwe nashimwe, ondi inekela, ando omambo ngoka itaga gwana mo muuyuni.” (Joh. 21:25) Jesus okwa li a longo nuudhiginini muukalele uule wethimbo efupi ndyoka a li kombanda yevi, ihe pethimbo mpoka okwa li a pumbwa okudheula aalumentu mboka ye na okukwatela komeho opo iilonga yi tsikile ngele a shuna megulu. Sho a shuna megulu mo 33 E.N., Jesus okwa adhika a dheula nale okangundu okashona kaauvithi yUukwaniilwa noka li ka ningi nziya egongalo enene ndyoka lya ka kala li na aantu omayovi ogendji.—Iil. 2:41, 42; 4:4; 6:7.
2, 3. (a) Omolwashike pu na ompumbwe onene yaalumentu yokuyakula momagongalo? (b) Otatu ka kundathana shike moshitopolwa shika?
2 Kunena opu na aauvithi yUukwaniilwa ye vulithe pomamiliyona gaheyali yi ipyakidhila momagongalo ga konda 100 000 muuyuni auhe, ihe opu na ompumbwe yaalumentu opo ya kwatele komeho momagongalo ngoka. Pashiholelwa, opu na lela ompumbwe onene yaakuluntugongalo. Mboka taya lalakanene uuthembahenda wokuyakula megongalo oye na okupandulwa molwaashoka oya “hala oshilonga oshiwanawalela.”—1 Tim. 3:1.
3 Kakele kaashono, uuthembahenda wokuyakula megongalo ihaye wu pewa owala ngeya. Elongo lyomuuyuni nenge owino ndjoka omulumentu e na hayo hayi talika ngele ta pewa iinakugwanithwa. Opo a kale a gwana okuyakula, oku na okukala nekwatathano ewanawa naKalunga nosho wo omaukwatya ngoka a hokwa. Ongiini aalumentu taya vulu okukwathelwa ya kale ya gwana okuyakula megongalo? Jesus okwa ti: “Omulongwa kehe ngoka a pwa okulongwa, oku thike pomulongi gwe.” (Luk. 6:40) Moshitopolwa shika, otatu ka kundathana omikalo dhimwe nkene Omulongi Omunene, Jesus Kristus, a li a kwathele aalongwa ye ya kale ya gwana okupewa iinakugwanithwa iinene notatu ka tala wo shoka tatu ilongo mwaashoka a ningi.
“Otandi mú ithana ookuume kandje”
4. Jesus okwa li u ulike ngiini kutya ye okuume kashili kaalongwa ye?
4 Jesus okwa li u ungaunga naalongwa ye ngaashi ookuume ke, ihe ka li e wete e ya vule. Okwa li a kala pamwe nayo, e yi inekela nokwa li e ya ‘lombwele iinima ayihe mbyoka e yi uva kuHe.’ (Lesha Johannes 15:15.) Oya li ya nyanyukwa noonkondo sho Jesus a yamukula epulo lyawo tali ti: “Tu lombwela, uunake ano tashi ka ningwa, nendhindhiliko olini tali holola, uuna to ya nehulilo lyuuyuni?” (Mat. 24:3, 4) Okwa li wo a lombwele aalanduli ye shoka shi li momutima gwe nosho wo omaiyuvo ge. Pashiholelwa, uusiku mboka Jesus a li a gwaalekwa, okwa kutha Petrus, Jakob naJohannes ya ye koshikunino shaGetsemane hoka a li a galikana a mana mo omolwuuwehame mboka a li u uvite. Aayapostoli mboka yatatu otashi vulika kaya li yu uvu oohapu ndhoka a popi megalikano lye, ihe oya li ye wete kutya oku li muudhigu uunene. (Mark. 14:33-38) Dhiladhila owala nkene aalumentu mboka yatatu ya li yu uvite sho Jesus a li a adhimithwa. (Mark. 9:2-8; 2 Pet. 1:16-18) Uukuume wopothingo mboka Jesus a li a panga naalongwa ye owa li we ya ladhipike konima sho ya ka kala niinakugwanithwa iinene.
5. Omomikalo dhini aakuluntugongalo taya vulu okukwathela yalwe?
5 Ngaashi Jesus, aakuluntugongalo kunena ohaya panga uukuume nayalwe noku ya kwathela. Oye hole ooitaali ooyakwawo nohayu ulike kutya oye na ko nasha nayo pauhandimwe. Nonando aakuluntugongalo ihaya popi iiholekwa yaantu, ihaya mwenene kehe shimwe. Oyi inekela aamwahe nohaye ya lombwele oshili ndjoka yi ilonga mOmbiimbeli. Ihaya kala ye wete ya simana ye vule aayakuligongalo mboka aagundjuka. Oye shi kutya aayakuligongalo oye hole Jehova nohaya longo nuudhiginini okuyakula egongalo.
“Onde mú pe oshiholelwa”
6, 7. Hokolola oshiholelwa shoka Jesus a tulile po aalongwa ye nonkene she ya nwetha mo.
6 Nonando aalongwa yaJesus oya li ye hole okulongela Kalunga, omathimbo gamwe eputuko nomuthigululwakalo gwawo ogwa li gwa nwetha mo okudhiladhila kwawo. (Mat. 19:9, 10; Luk. 9:46-48; Joh. 4:27) Kakele kaashono, Jesus ka li he ya ula omalaka nenge e ya tilithe. Ka li he ya pula ya longe sha shoka oshidhigu kuyo nenge shoka ye mwene itaa vulu okuninga. Pehala lyaashono, okwa li e ya tulile po oshiholelwa.—Lesha Johannes 13:15.
7 Oshiholelwa shini a li e ya tulile po? (1 Pet. 2:21) Okwa li hu uvithile yalwe a manguluka, molwaashoka ka li i indumbila iinima yopamaliko. (Luk. 9:58) Okwa li omwiifupipiki nokwa li ha longo aantu ta totha momanyolo. (Joh. 5:19; 17:14, 17) Okwa li ha popiwa naye nuupu nomunambili. Iilonga ye oyu ulike kutya oku hole aantu. (Mat. 19:13-15; Joh. 15:12) Oshinima shoka osha li sha nwetha mo noonkondo aayapostoli ye. Pashiholelwa, Jakob ka li a tila okudhipagwa nokwa li a longele Kalunga nuudhiginini sigo omeso. (Iil. 12:1, 2) Johannes okwa kala omulongwa gwaJesus omudhiginini uule womimvo dha konda po 60.—Eh. 1:1, 2, 9.
8. Aakuluntugongalo ohaya tulile po aalumentu aagundjuka nayalwe oshiholelwa shini?
8 Aakuluntugongalo mboka ye na ombepo yeiyambo, aaifupipiki naanahole oye li oshiholelwa oshiwanawa kaalumentu aagundjuka. (1 Pet. 5:2, 3) Aakuluntugongalo ohaya kala ya nyanyukwa okutseya kutya yamwe otaya landula oshiholelwa shawo oshiwanawa sheitaalo, shokulonga aantu, sheihumbato lyawo nosho wo shuukalele wawo.—Heb. 13:7.
‘Jesus okwe ya tumu nokwe ya pe omalombwelo’
9. Otu shi shi ngiini kutya Jesus okwa li a dheulile aalongwa ye iilonga yokuuvitha?
9 Konima sho Jesus a longo nuulaadhi muukalele uule womimvo mbali lwaampono, okwa li a tamununa mo iilonga ye sho a tumu aayapostoli ye 12 ye ku uvithe. Tango okwe ya lombwele shoka ye na okuninga. (Mat. 10:5-14) Omanga inaa kutitha engathithi lyaantu omayuvi pashikumithalonga, okwa li a lombwele aalongwa ye nkene ye na oku ya unganeka opo ye ya topolele iikulya nawa. (Luk. 9:12-17) Osha yela kutya Jesus okwa li a dheula aalongwa ye moku ya pa omalombwelo ga yela nogokondandalunde. Edheulo ndyoka nosho wo oonkondo dhombepo ondjapuki oya li ya kwathele aayapostoli yu unganeke iilonga iinene yokuuvitha okuza mo 33 E.N. okuuka komeho.
10, 11. Ongiini mboka aape taya vulu okupewa edheulo tali tsikile?
10 Omulumentu oha tameke okulongwa iinima yopambepo, uuna a taamba ko ekonakonombiimbeli. Otashi vulika ethimbo limwe twa pumbwa tu mu longe okulesha nawa. Otatu ka tsikila oku mu kwatha sho tatu konakona naye. Omuntu oha tsikile okupewa edheulo lyopambepo ngele a tameke okukala pokugongala kwopaKriste pandjigilile, ha kutha ombinga mOsikola yUukalele woPauteokratika nuuna a ningi omuuvithi inaa ninginithwa nosho tuu. Konima ngele a ninginithwa ota vulu okudheulilwa iilonga ngaashi okukaleka Oshinyanga shUukwaniilwa monkalo yi shi okutalwa. Mokweendela ko kwethimbo ota vulu okukwathelwa a tseye kutya oku na okuninga shike opo a langekwe po e li omuyakuligongalo.
11 Aakuluntugongalo ohaya pe aamwatate mboka ya ninginithwa iinakugwanithwa nomalombwelo ga pumbiwa nkene ye na okuunganeka iinima. Omumwatate ngoka ta dheulwa na kale e shi shoka e na okuninga. Ngele ota nyengwa okugwanitha po iilonga mbyoka a pewa, aakuluntugongalo aanahole itaya ka thika pehulithodhiladhilo kutya ina gwana. Pehala lyaashono, otaya ka tala nkene taya vulu oku mu kwathela opo a vule okugwanitha po iilonga ye. Otaya ka kala ya panda okumona omulumentu ngoka ta longo nehalo ewanawa nokwa nyanyukwa sho ta kwathele yalwe.—Iil. 20:35.
“Omunandunge ota pulakene omayele”
12. Omolwashike omayele gaJesus ga li tago opalele?
12 Jesus okwa li a dheula aalongwa ye moku ya pa omayele ngoka tago opalele oompumbwe dhawo pethimbo lyo opala. Okwa li a ganda Jakob naJohannes sho ya li ya hala okwiindila omulilo gu ze megulu gu halakanithe po Aasamalia mboka ya li inaaya hala oku mu taamba. (Luk. 9:52-55) Sho yina yaJakob naJohannes a yi kuJesus e ke mu pule ya pewe oondondo dha simana mUukwaniilwa, Jesus okwa lombwele Jakob naJohannes a ti: “Okukuutumba kolulyo lwandje nenge kolumoho lwandje hangame tandi ku gandja, ihe okwaamboka ye ku longekidhilwa kuTate.” (Mat. 20:20-23) Jesus okwa kala nokugandja omayele gu uvitike nawa, ge na oshilonga noga kankamena komithikampango dhaKalunga. Okwa li a longo aalongwa ye ya kale metsokumwe nomithikampango ndhoka. (Mat. 17:24-27) Okwa li wo e shi omangambeko gawo noka li a tegelela ya kale ya gwanenena. Okwa li e ya pe omayele molwaashoka okwa li e ya hole lela.—Joh. 13:1.
13, 14. (a) Oolye ya pumbwa okupewa omayele? (b) Gandja oshiholelwa nkene omukuluntugongalo ta vulu okupa gumwe omayele ngoka itaa humu komeho pambepo.
13 Omulumentu kehe ngoka a hala okuyakula yalwe megongalo ethimbo limwe oha kala a pumbwa okupewa omayele nenge epukululo lyopamanyolo. Omayeletumbulo 12:15 otaga ti: “Omunandunge ota pulakene omayele.” Omumwatate gumwe omugundjuka okwa ti: “Onda li handi dhiladhila kutya okwaahagwanenena kwandje oku li eshongo enene kungame. Ihe omayele ngoka nda pewa komukuluntugongalo oga li ga kwathele ndje ndi kale ndi na etaloko ewanawa.”
14 Ngele aakuluntugongalo oye shi dhimbulula kutya eihumbato lyontumba otali imbi omulumentu megongalo a ninge ehumokomeho pambepo, ohaya katuka oonkatu ye mu pukulule taye shi ningi nonge. (Gal. 6:1) Ethimbo limwe yamwe ohaya kala ya pumbwa okupewa omayele omolwiikala yawo. Ngele omumwatate iha ningi naanaa ngaashi ta vulu miilonga yaJehova, aakuluntugongalo otaya vulu oku mu kwathela a mone kutya Jesus okwa li omuuvithi gwUukwaniilwa omulaadhi ngoka a gandja oshinakugwanithwa kaalanduli ye ya ninge aantu aalongwa. (Mat. 28:19, 20; Luk. 8:1) Ngele opu na omumwatate ta lalakanene esimano, omukuluntugongalo ota vulu oku mu kwathela a tule po iikala mbyoka, ngaashi owala Jesus a li a kwathele aalongwa ye. (Luk. 22:24-27) Ongiini ngele omumwatate iha dhimine po? Omukuluntugongalo ota vulu oku mu kwathela ta longitha eyele lyaJesus li na ko nasha nomumati ngoka a li a inaa hala okudhimina po mukwawo ngoka a li e mu lila oongunga oonshona, nonando ye okwa li a dhiminwa po oongunga odhindji. (Mat. 18:21-35) Oshi li nawa aakuluntugongalo ya kale haya gandja omayele pethimbo mpoka ga pumbiwa.—Lesha Omayeletumbulo 27:9.
Kala ho “idheula”
15. Ongiini iilyo yuukwanegumbo tayi vulu okukwathela omulumentu a yakule megongalo?
15 Aakuluntugongalo oyo unene ye na okudheula aalumentu ya kale ya gwana okupewa iinakugwanithwa, ihe yalwe otaya vulu oku ya kwathela wo. Pashiholelwa, iilyo yuukwanegumbo otayi vulu wo oku shi ninga. Ngele omulumentu omukuluntugongalo nale, otashi ke mu kwathela wo uuna omukadhi noyana taye mu ambidhidha nohole. Ngele taye shi ningi nena omulumentu ngoka ota ka pondola miinakugwanithwa ye yegongalo. Ombepo yeiyambo yiilyo yuukwanegumbo otayi ke mu nyanyudha nosho wo yalwe otaye ke ya pandula.—Omayel. 15:20; 31:10, 23.
16. (a) Olye e na okuulika kutya okwa hala okuyakula yalwe? (b) Omulumentu okwa pumbwa okuninga shike opo a pewe iinakugwanithwa megongalo?
16 Omulumentu ngoka a hala oshinakugwanithwa oye e na okuulika kutya okwe shi hala, nonando yalwe otaya vulu oku mu kwathela noku mu ambidhidha. (Lesha Aagalati 6:5.) Shika itashi ti kutya omumwatate oku na owala okukala omuyakuligongalo nenge omukuluntugongalo opo a tameke okukwathela yalwe nokukala ta longo nuudhiginini muukalele. Ihe opo a pewe uuthembahenda megongalo oku na tango okugwanitha po iitegelelwa mbyoka ya popiwa momanyolo. (1 Tim. 3:1-13; Tit. 1:5-9; 1 Pet. 5:1-3) Ngele omulumentu okwa hala okuninga omuyakuligongalo nenge omukuluntugongalo, oku na okutala kutya openi a pumbwa okuninga ehumokomeho lyopambepo. Shoka otashi pula a kale ha lesha Ombiimbeli pandjigilile, ha konakona nuudhiginini, ha tedhatedha muule, ha galikana tashi zi komutima noha kutha ombinga nuulaadhi muukalele. Ngele te shi ningi, ota tula miilonga omayele gaPaulus ngoka a pe Timoteus taga ti: “Ihe ngoye idheula metilokalunga.”—1 Tim. 4:7, KB.
17, 18. Oshike tashi vulu okukwathela omumwatate a ninginithwa ngoka u uvite inaa gwana nenge e na uumbanda okupewa iinakugwanithwa megongalo?
17 Ongiini ngele omulumentu oku uvite inaa gwana okupewa iinakugwanithwa megongalo? Oshi li nawa a kaleke momadhiladhilo shoka Jehova naJesus haye tu ningile. Jehova oha “humbata omaudhigu getu esiku kehe.” (Eps. 68:19) Onkee ano, Tate yetu gwomegulu ota vulu okukwathela omumwatate a gwanithe po oshilonga she megongalo. Ngele omumwatate ke shi omuyakuligongalo nenge omukuluntugongalo, oshi li nawa a kale e shi kutya opu na ompumbwe onene yaalumentu mboka ya pyokoka ya kwatele komeho mehangano lyaJehova. Oku shi ninga otashi ke mu kwathela a kale e na etaloko ewanawa. Ota vulu wo okugalikana Jehova e mu pe ombepo ye ondjapuki ndjoka tayi ke mu kwathela a kale e na ombili neipangelo. (Luk. 11:13; Gal. 5:22, 23) Ota vulu wo okukala neinekelo kutya Jehova ota yambeke ayehe mboka ya halelela okuyakula.
18 Ongiini ngele omumwatate ngoka a ninginithwa ina hala okupewa iinakugwanithwa megongalo? Oshike tashi vulu oku mu kwathela a kale nehalo lyokuyakula megongalo? Paulus okwa nyola a ti: “Oshoka Kalunga oye mwene ta longo aluhe mune oku mú pa ehalo noonkondo, opo a tsakanithe elalakano lye ewanawa.” (Fil. 2:13) Omuntu ngele oku na ehalo lyokulongela Kalunga, ombepo ondjapuki otayi vulu oku mu kwathela opo a longe oshilonga shoka oshiyapuki. (Fil. 4:13) Kakele kaashono, Omukriste okwa pumbwa okugalikana opo Kalunga e mu kwathele a ninge shoka shu uka.—Eps. 25:4, 5.
19. Uutumbulilo “aasita ya-7 naakuluntu ya-8” owa hala okutya shike?
19 Jehova oha yambeke oonkambadhala ndhoka aakuluntugongalo taya ningi sho taya dheula yalwe. Oha yambeke wo aamwatate mboka ya hala okupewa iinakugwanithwa megongalo. Omanyolo otage tu shilipaleke kutya mokati koshigwana shaKalunga otamu ka kala “aasita ya-7 naakuluntu ya-8,” sha hala okutya, otapu ka kala aalumentu ya pyokoka mboka taya kwatele komeho mehangano lyaJehova. (Mika 5:4, KB) Onkee ano, natu panduleni aalumentu Aakriste oyendji mboka ya halelela notaya dheulwa opo ya kale ya gwana okupewa uuthembahenda wiilonga mboka tawu simanekitha Jehova.
Oto yamukula ngiini?
• Jesus okwa li a kwathele ngiini aalongwa ye ya kale ya gwana okupewa iinakugwanithwa iinene?
• Ongiini aakuluntugongalo taya vulu okuholela Jesus mokukwathela aalumentu megongalo ya kwatele komeho?
• Ongiini iilyo yuukwanegumbo tayi vulu okukwathela omulumentu a kale a gwana okupewa iinakugwanithwa megongalo?
• Omulumentu okwa pumbwa okuninga shike opo a vule okupewa iinakugwanithwa?
[Omathano pepandja 31]
Ongiini to vulu okudheula ngoka ho konakona naye Ombiimbeli ngele okwa hala okuninga ehumokomeho?
[Ethano pepandja 32]
Omulumentu ohe shi ulike ngiini kutya okwa hala okuyakula megongalo?