Onda li nda hala ndi kale nda fa omwanakadhona gwaJefta
Nakuhokolola Joanna Soans
Sho nda li ndi na oomvula omulongo nasha, onda tameke okukala ndi na ehalo enene lyokukala nda fa omwanakadhona gwaJefta. Nandi mu kuthile ko kashona kutya oshike sha li momadhiladhilo gandje nankene sha li she ende opo ndi kale nde mu fa.
MOMUMVO 1956 onda li nda kala lwotango poshigondji shOonzapo dhaJehova moBombay (hashi ithanwa ngashingeyi Mumbai) shaIndia, noshigongi shoka osha li sha lundulula onkalamwenyo yandje. Oshipopiwa shimwe shoka sha li tashi popi kombinga yomwanakadhona gwaJefta osha li sha gumu ndje komutima.
Ngaashi naanaa tashi vulika wa lesha mOmbiimbeli, omwanakadhona gwaJefta okwa li e na oomvula omulongo nasha sho a zimine kutya ita ka hokanwa. Kungeyi, he okwa li a vulu okugwanitha po euvaneko lye. Onkee ano, okwa li a longo megumbo lyaJehova nenge tu tye metsalihangano onkalamwenyo ye ayihe.—Aatokolihapu 11:28-40.
Ta, kuume onda li nda hala okukala nde mu fa tuu shili! Ihe shika osha li uupyakadhi molwaashoka okukala inoo hokanwa kakwa li pamuthigululwakalo gwOshiindia.
Nkene twa putuka maandjetu
Ongame omuvalwa omutitano gwomaanona yahamano yatate Benjamin naMeme Marcelina Soans. Egumbo lyetu olya li muUdipi, oshilando shoka shi li kuuninginino waIndia. Megumbo ohatu popi Oshitulu, elaka ndyoka hali popiwa kaantu ya adha lwopomamiliyona gaali. Ihe, aantu oyendji kosikola muUdipi oya li haya longwa melaka lyOshikannada.
Moshitopolwa shika, aantu oya kala ya simaneka ondjokana nosho wo okumona aanona. Kandi na nando esiku limwe tandi dhimbulukwa omuntu gumwe Omutulu ta popi kutya ina nyanyukwa molwaashoka kee na kuume kopandjokana, nenge molwaashoka e na ezaza nenge a nika uupongo. Oonkalo ndhika aantu oya li owala ya fa kaaye dhi shi. Pashiholelwa, megumbo otwa li mo nookuku mboka ya vala aavali yetu, aamwayina yameme noyatate yaalumentu noyaakiintu nosho wo aanona mboka ya valwa kaamwayina yatate nameme.
Pamuthigululwakalo gwetu aanona oya li ya talika ko kutya oye li owala aakwawo yayina. Ngele aantu otaya talika kutya oya za mezimo lyalye, lyomukulukadhi olyo hali landulwa, naanona yaakadhona oyo ya li haya mono uuthiga owindji. Miitopolwa yimwe yAatulu, omukadhona okwa li ha tsikile okukala nayina nonando okwa hokanwa, nomusamane gwe oye a li ha tembukile kaandjamukadhona.
Molwaashoka otwa li anuwa Aakriste, iinima yimwe katwa li hatu yi ningi ngaashi Aatulu ooyakwetu. Ongulohi kehe, tatekulu ngu a vala tate okwa li ha ningi owandaha, ta galikana ye te tu leshele Ombiimbeli mOshitulu. Ngele a pandja Ombiimbeli ye ndjoka yiinyakwi, okwa li owala a fa a patulula okaketha komaliko gondilo. Onda li he kala nda nyanyukwa tuu shili! Oohapu ndhika dhEpisalomi 23:1 (NW): ‘Jehova oye omusita gwandje, itandi pumbwa sha,’ odha li dha gumu ndje komutima. Onda kala tandi ipula kutya, ‘matsa Jehova ngu ta popiwa mpaka olye naanaa, nomolwashike taku tiwa kutya ye omusita?’
“Iipeta” osho nee ya gu ko komeho gandje
Omolwuuhupilo tawu shongola, konima yIita Iitiyali yUuyuni otwa li twa tembukile koBombay shoka shi li ookilometa 900 okuza moshitopolwa moka twa li. Momumvo 1945, sho tu li koshitopolwa hoka, Oonzapo dhaJehova mbali odha li dha talele po tate e tadhi mu pe okambo kOmbiimbeli. Tate okwa li a lesha e ta taamba ko etumwalaka ndyoka li li mokambo moka, nokwa tameke okuuvithila aapopi yelaka lyOshikannada. Lwopetameko lyoomvula 1950 nasha, okangundu kokwiilonga Ombiimbeli oka li ka koko e ta ka ningi egongalo lyotango lyOshikannada moBombay.
Tate nameme oya li ye tu longo Ombiimbeli tu kale tu yi shi nawa notu kale tu shi oku yi longa yalwe. Kehe esiku, oya li haya konakona nokugalikana natse. (Deuteronomium 6:6, 7; 2 Timoteus 3:14-16) Esiku limwe manga tandi lesha Ombiimbeli, osha fa owala iipeta ya gu ko komeho gandje. Onda li ndi ilongo kutya Jehova ota popiwa e li omusita molwaashoka oha wilike, oha palutha noha gamene aalongeli ye.—Episalomi 23:1-6; 83:18, yelekanitha NW.
Jehova okwa li a kwata ndje moshikaha
Onda li nda ninginithwa konima yethimbo efupi okuza poshigongi oshindhindhilikwedhi shoka sha li moBombay momumvo 1956. Konima yoomwedhi hamano, onda li nda holele omumwamememati gwomukuluntu Prabhakar e ta ndi ningi omukokolindjila, nenge ndi tye omuuvithi gwonkundana ombwanawa. Nonando onda li nda halelela okuuvithila yalwe kombinga yOmbiimbeli, okana kandje oka li ha ka kukuta kuumbanda ngele tandi popi kombinga yaashoka ndi itaala. Onda li owala handi tameke te kokoma. Onda li handi ilombwele tandi ti: ‘Otandi vulu owala okulonga iilonga mbika kekwatho lyaJehova!’
Jehova okwa li a kwatha ndje okupitila maatumwa Homer naRuth McKay ya za koCanada mboka ya longwa kosikola yaatumwa yOonzapo dhaJehova koNew York, U.S.A., mo 1947. Oya li ya kwata ndje moshikaha, oku shi popya pathaneko, nda fa okanona opo taki ilongo okweenda, sho nda tameke iilonga yandje yokuuvitha. Ruth okwa li ha kwathele ndje aluhe ndi idheulile iilonga yokuuvitha egumbo negumbo. Okwa li e shi nawa okukwathela ndje uuna ndi na uumbanda. Okwa li ha kwata ndje miikaha e ta ti: “Ino tila kuume. Natu tale ishewe nkene tatu shi enditha megumbo lya landula ko.” Ewi lye lyombili olya li hali tsu ndje omukumo.
Esiku limwe, onda li nda lombwelwa kutya Elizabeth Chakranarayan, Omukriste omukokele a pyokoka mokulonga aantu Ombiimbeli, oye tatu kala hatu longo naye miilonga yokuuvitha. Sho nde shi uvu tango onda li tandi ipula te ti: ‘Akwetu omuntu nguno otandi ka kala naye ngiini ngele omukuluntu nayi kungaye?’ Ndele oye ngaa a ka pa ndje ekwatho ndyoka nda li nda pumbwa.
“Kapu na nando esiku tu kale otse atuke”
Tango otwa li twa tuminwa kuAurangabad oshitopolwa shoka sha ningilwa iinima oyindji yopandjokonona shoka shi li ookilometa 400 kuuzilo waBombay. Sho twa thiki, otwa li twa mono kutya otse owala yaali twa li mo Oonzapo mokati kaantu ya thika lwopemiliyona moshilando shoka. Kakele kaashono, onda li ndi na okwiilonga elaka epe lyOshimarathi ndyoka lya li tali ti pii moshilando moka.
Omathimbo gamwe onda li handi kala nda sa ezaza shili. Onda li handi kala te lili nda fa okathigwa. Ihe Elizabeth ngoka a li ha popi nangame a fa omuvalakadhi lela, okwa li a tsu ndje omukumo. Okwa li ha ti: “Eeno oshoshili kutya omathimbo gamwe otashi vulika tu kale twa sa ezaza notu uvite uuwike, ihe kapu na nando esiku tu kale otse atuke. Nonando otashi vulika wu li kokule nookuume koye nosho wo noyaandjeni, Jehova oku li nangoye aluhe. Ngele owe mu ningi kuume koye, ito ka kala we wu na uuza.” Omayele ge ohandi ga dhimbulukwa sigo okeluwa ndi.
Omathimbo gamwe otwa li hatu ende montsi, momanoko, mepyokoto lyomutenya nomuutalala, uule wookilometa 20 esiku kehe ngele katu na oshimaliwa sholefa. Pothinge, okwa li haku kala ku na uupyu wamemememe (oograte 40). Pethimbo lyomvula yepoola, miitopolwa mbyoka twa li hatu longo omwa li hamu kala mu na omanoko uule woomwedhi. Ihe shoka twa li hatu mono shi li eshongo unene shi vulithe ponkalo yombepo omataloko gopamithigululwakalo.
Aakiintu kaya li haya popi naalumentu pokati kaantu, shila ongele pamwe ya pambathana, yo nee aalumentu kaya li naanaa haya longwa kaakiintu. Onkee ano, otwa li hatu shekwa nokuningwa nayi. Poomwedhi hamano dhopetameko, oshiwike kehe otwa li hatu ningi elongelokalunga tu li owala yaali. Mokweendela ko kwethimbo, aantu mboka ye na ohokwe oya li ya tameke okugongala natse. Konima otwa ka kala tu li okangundu. Yamwe oya li nokuli ya tameke okuya pamwe natse miilonga yokuuvithila aantu.
“Tsikila nokuhwepopaleka uunkulungu woye”
Konima yoomvula mbali netata lwaampoka, otwa li twa tuminwa ishewe koBombay. Ngame onda li nda pulwa ndi ka kwathele tate ngoka oye owala a li ha toloka iileshomwa yetu yopaMbiimbeli melaka lyOshikannada, omanga Elizabeth a tsikile niilonga yokuuvitha. Tate okwa li a nyanyukwa shili sho nde ya ndi mu kwathele molwaashoka okwa li e na iinakugwanithwa oyindji megongalo.
Momumvo 1966, aavali yandje oya li ya tokola ya shune kegumbo kuUdipi. Tate manga inaa thiga po oBombay okwa ti: “Tsikila nokuhwepopaleka uunkulungu woye mukadhona gwandje. Toloka iinima yu uvitikiwe ko noya yela. Ino kala wi iyinekela sha pitilila, tsikila nokukala omwiifupipiki. Kala wi inekela muJehova.” Ngaka ogo omayele ge gahugunina ngoka a li a pe ndje molwaashoka okwa li a hulitha konima owala yethimbo efupi sho ya shuna kuUdipi. Onda li nda kambadhala naanaa ndi ninge ngaashi tate a li a lombwele ndje naashoka osho handi ningi sigo okunena miilonga yandje yokutoloka.
“Ano ino hala omusamane?”
Pamuthigululwakalo gwOshiindia, aavali oyo haya kongele oyana ookuume kopandjokana manga ye li aashona lela yo taye ya lombwele nokuli ya mone aanona. Nomolwaashoka aantu oya li haya pula ndje olundji taya ti: “Ano ino hala omusamane? Yakwetu olye te ke ku sila oshimpwiyu ngele wa kulupa? Oshili ito ka kala ngaa wu na owike?”
Omathimbo gamwe, omapulo ga tya ngaaka oga li haga kala ga dhigupalela ndje shili pamadhiladhilo. Nonando onda li handi holeke nkene ndi uvite ngele ndi li naantu, uuna ndi li ongame awike onda li handi mbumbulile Jehova omutima gwandje. Onda li nda hekelekwa shili sho nda tseya kutya ka li e wete itaandi vulu oku mu longela pakuudha shaashi inandi hokanwa. Opo ndi tsikile noku mu longela kaandi na omapiyaganeko gasha, onda li aluhe handi dhiladhila omwanakadhona gwaJefta nosho wo Jesus, aantu mboka ya li inaaya ya mondjokana noya li yi itula mo thiluthilu mokulonga ehalo lyaKalunga.—Johannes 4:34.
Omagano ga za kuJehova
Tse naElizabeth otwa kala ookuume uule woomvula tadhi ihilile po-50. Elizabeth okwa si e na oomvula 98 momumvo 2005. Molwaashoka omeho ge oga ka nkundipala, osha kala oshidhigu kuye okulesha Ombiimbeli nomolwaashoka esiku kehe okwa kala ha galikana kuKalunga ethimbo ele. Omathimbo gamwe sho e li mondunda ye onda li handi ipula kutya ota kundathana nomuntu kombinga yomanyolo gontumba, ihe nani okwa li owala ta popi naJehova. Jehova okwa li Omuntu gwolela kuye nokwa li ha kala a fa e mu wete. Onda li nda mono kutya shika osho tashi vulu okukwathela ndje ndi kale ngaashi omwanakadhona gwaJefta mokulongela Kalunga nuudhiginini. Otandi pandula Jehova shili, sho a li a pe ndje Omukriste omukokele a pyokoka pambepo a dheule ndje nokuladhipike ndje methimbo lyuugundjuka wandje nomomathimbo guudhigu wandje auhe.—Omuuvithi 4:9, 10.
Inandi lalekwa tuu nuuyamba sho handi longele Jehova ngaashi omwanakadhona gwaJefta! Okukala inaandi hokanwa nokulandula aluhe omayele gOmbiimbeli okwa ningitha ndje ndi kale ndi na onkalamwenyo tayi ti sha noya yambapala sho tandi tsikile “okwiigandja moshilonga shOmuwa.”—1 Aakorinto 7:35.
[Ethano pepandja 22]
Tate ta gandja oshipopiwa moBombay moomvula dho-1950 nasha
[Ethano pepandja 22]
Tu li naElizabeth konima owala yethimbo efupi manga inaa hulitha
[Ethano pepandja 23]
Tatu hiya aantu koshipopiwa shopaMbiimbeli moBombay mo-1960
[Ethano pepandja 23]
Ndi li naalongi pamwe nangame mombelewa yetu yokutoloka