Longa aanona yoye

Oya li haya ithanwa “aana yendundumo lyomvula”

UUNA omvula tayi loko, otashi vulika wu uve omindundumo ominene. Mbela ohadhi ku tilitha ethimbo limwe?—a Jesus okwa li hi ithana aalanduli ye yaali, “aana yendundumo lyomvula.” Natu tale kutya omolwashike.

Aalumentu mboka oyo Jakob naJohannes. Aamwayinathana ya valwa kuSebedeus nomukulukadhi gwe Salome. Otashi vulika Salome a li omumwayina gwaMaria, yina yaJesus. Osha yela kutya Jesus, Jakob naJohannes oya pambathana notashi vulika ya li ookuume sho taya putuka.

Sebedeus, Jakob naJohannes ayehe oya li aayuli yoohi. Jakob naJohannes aalanduli yotango mboka Jesus a li a hogolola. Sho e yi ithana, mbala oya thigi po ongeshefa yawo yokuyula oohi noye mu landula. Konima, Jesus okwa hogolola aalongwa 12 yomaalanduli ye ya ninge aayapostoli ye. Jakob naJohannes oya li yamwe yomwaamboka.

Oomwedhi dhontumba manga Jesus inaa dhipagwa, ye naalongwa ye oya li taya taakana moshitopolwa shaSamaria shoka shi na oondundu. Etango olya li pokutoka noya li ya vulwa noonkondo. Ihe Aasamaria oya li ya tindi okweedhilila Jesus naayapostoli ye uusiku mboka moshilando shawo. Owu shi kutya omolwashike?— Andiya tu tale.

Jesus naayapostoli ye oyomomuhoko gwAajuda, yo Aajuda oyendji oya li ye na onyanya nAasamaria. Ihe Jesus hasho a li ngaaka. Okwa li a kala nayo nombili. Jakob naJohannes nayo osho ya li ye na okukala ngaaka. Ihe aalongwa yaJesus mbaka yaali oya geyele Aasamaria sho inaaye ya yakula, e ta ya pula Jesus taya ti: “Owa hala, tu indile omulilo gu ze megulu, gu ya halakanithe po?” Mbela Jesus okwe ya yamukula ngiini?— Okwe ya lombwele kutya kaya li ye na okupopya oshinima oshiwinayi sha tya ngaaka. Jakob naJohannes oya li ye na oshindji okwiilonga kombinga yohenda.

Uupyakadhi wumwe mboka Jakob naJohannes ya li ye na owo okukala yi iholele komeho nenge tu tye okukala ya hala ya kale ya simana ye vule yalwe. Ethimbo owala efupi manga Jesus inaa sa, oya li ya tumu yina kuye e ke mu lombwele ta ti: “Pitika aamwandje mbaka yaali, ya ka kuutumbe gumwe okolulyo lwoye nomukwawo okolumoho lwoye omOshilongo shoye.” Sho aayapostoli ooyakwawo ye shi uvu oya li ye ya geela. Ando ongoye ando owa geye?—

Ngiika ando owa geye. Katu shi hole ngele pu na yamwe yi iholele komeho nenge ya hala okukala ya simana ye tu vule. Konima, Jakob naJohannes oya li ya mono kutya oya puka noya lunduluka e taya ningi aayapostoli aanahole noye na olukeno. Shika otashi tu longo shike?—

Oshiilongomwa shimwe shoka tu na okwiilonga kuJesus osho shika: natse otu na okukala aanambili. Jesus okwa li hi ihumbatele kehe gumwe nawa, kutya nduno omulumentu, omukiintu nenge okanona. Mbela oto ka kambadhala aluhe wa mana mo wu dhimbulukwe okulandula oshiholelwa she?—

Lesha mOmbiimbeli yoye

Markus 3:17, yelekanitha NW.

Mateus 27:55, 56; Markus 15:40, 41

Mateus 4:18-22

Johannes 4:4-15, 21-26; Lukas 9:51-55

Mateus 20:20-24; Markus 10:35-37, 41

[Enyolo lyopevi]