“Ikolelela e to kala nomukumo”
‘Ikolelela e to kala nomukumo. OMUWA Kalunga koye ondi li pungoye.’—JOS. 1:7-9.
OTO YAMUKULA NGIINI?
Omoonkalo dhini Henok naNoowa ya li yu ulike uulaadhi?
Aakiintu yamwe yonale oya li yu ulike ngiini eitaalo nuulaadhi?
Iiholelwa yaagundjuka aalaadhi oye ku guma ngiini?
1, 2. (a) Oshike twa pumbwa omathimbo gamwe opo tu longe shoka shu uka monkalamwenyo yetu? (b) Otatu ka konakona shike moshitopolwa shika?
OMUNTU ngoka e na omukumo iha kakama nuupu ye ke shi omumbanda noiha tila. Omuntu ngoka oku na oonkondo, omupenda nomulaadhi. Onkee ano, omathimbo gamwe otwa pumbwa okukala tu na omukumo opo tu longe shoka shu uka monkalamwenyo yetu.
2 Aantu yamwe mboka ya popiwa mOmbiimbeli oya li aalaadhi nonando oya li moonkalo oondhigu. Yamwe oya li ye na omukumo sho ya li moonkalo ndhoka hadhi adha aapiya yaJehova olundji. Oshike tatu ilongo miiholelwa yaantu aalaadhi mboka ya popiwa mOmbiimbeli? Ongiini tatu vulu okukala aalaadhi?
GANDJA UUNZAPO NUULAADHI MUUYUNI MBUKA WAA NA KALAUNGA
3. Henok okwa li a hunganeke shike kombinga yaantu mboka kaaye na ko nasha naKalunga?
3 Osha li tashi pula uulaadhi okukala Onzapo yaJehova mokati kaakolokoshi mboka ya li ko manga Eyelu lyopethimbo lyaNoowa inaali ya. Ihe Henok ‘omutiheyali gwomoluvalo lwaAdam’ okwa li a popi nuulaadhi oohapu dhopahunganeko ndhoka tadhi ti: “Tala! [Jehova okwa li e, NW] ya pamwe naayengeli ye aayapuki yomayuvi ogendji okupangula ayehe nokugeela aakeenakonasha naKalunga ayehe omolwiilonga yawo ayihe yokudhina Kalunga, sho haa popi oohapu dhomatukano dha tsa ondumbo naKalunga.” (Jud. 14, 15) Oohapu ndhoka Henok okwa li e dhi popi mepitathimbo, molwaashoka okwa li e shi kutya ehunganeko ndyoka otali ka gwanithwa. Eeno, aakeenakonashanakalunga oya li ya sile meyelu.
4. Noowa okwa “kala mekwatathano naKalunga” nonando okwa li moonkalo dhini?
4 Eyelu olya li ko mo 2370 K.E.N, konima yomimvo 650 okuza sho Henok a hunganeke ehanagulo lyaakaanakalunanga. Mokweendela ko kwethimbo, Noowa okwa li a valwa e ta hokana nokonima yethimbo okwa tungu onguluwato pamwe noyanamati. Pethimbo lye, aayengeli ya yonuka oyi izaleke omalutu gopantu nokuya kombanda yevi e tayi ihogololele aakiintu aawanawa, mboka ya li ya vala aalefule. Uuwinayi waantu kombanda yevi owa li wi indjipala niikolokosha oya li ya taandele shaa mpoka. (Gen. 6:1-5, 9-11) Nonando onkalo osho ya li ngawo, Noowa “okwa kala mekwatathano naKalunga,” nokwa li a gandja uunzapo nuulaadhi e li “omuuvithi guuyuuki.” (Lesha 2 Petrus 2:4, 5.) Otwa pumbwa uulaadhi wa fa we sho tu li momasiku ngaka gahugunina.
OYA LI YE NA EITAALO NOMUKUMO
5. Moses oku ulike ngiini eitaalo nuulaadhi?
5 Oshi li nawa tu holele eitaalo nuulaadhi waMoses. (Heb. 11:24-27) Okuza mo 1513-1473 K.E.N, Kalunga okwa li e mu longitha a mangulule oshigwana shaIsraeli muupika waEgipiti noku shi fala mombuga. Moses okwa li a zimine oshilonga shoka, nonando okwa li e wete a fa itee shi vulu. (Eks. 6:12) Ye nomumwayina Aarona oya li ye na okuya iikando niikando kuFarao gwaEgipiti, omukwaniilwa e na omutse omukukutu ye ke mu lombwele a mangulule oshigwana shaIsraeli. Oya li wo ye na oku mu tseyithila Omageelo Omulongo ngoka Jehova a li ta ka tumina Aaegipiti u ulike kutya iikalunga yawo kayi na oonkondo. (Eks., ontop. 7-12) Moses okwa li e na eitaalo nuulaadhi, molwaashoka Kalunga okwa li e mu kwathele, ngaashi owala he tu ambidhidha kunena.—Deut. 33:27.
6. Oshike tashi ke tu kwathela tu gandje uunzapo nuulaadhi uuna tatu pulwa kwaamboka ye na oonkondopangelo?
6 Otwa pumbwa okukala aalaadhi ngaashi Moses. Jesus okwa ti: “Otamu ka falwa kiipala yomalenga noyaakwaniilwa omolwandje, shi ninge ompito yokuhokolola elaka etoye kuyo nokaapagani. Ihe ngele taye mú gandja ngeyi kaatokoli, inamu kala mu na oshimpwiyu kutya otamu ka popya shike, oshoka otamu pewa pethimbo tuu ndyoka shoka mu na oku shi popya. Oshoka hane tamu popi, ihe [ombepo] yaHo ta popi mune.” (Mat. 10:18-20) Ombepo yaJehova otayi ke tu kwathela tu gandje uunzapo nesimaneko opo tu popile eitaalo lyetu tu na uulaadhi uuna tatu pulwa kwaamboka ye na oonkondopangelo.—Lesha Lukas 12:11, 12.
7. Omolwashike Josua a li omulaadhi noha pondola?
7 Josua ngoka a landula Moses mokuwilika oshigwana shaIsraeli, okwa li e na eitaalo nomukumo, molwaashoka okwa li ha konakona aluhe Ompango yaKalunga. Aaisraeli oya li ye na okuya mEvi lyEuvaneko mo 1473 K.E.N. Kalunga okwa li a lombwele Josua a ti: “Ikolelela e to kala nomukumo.” Josua okwa li a katuka pandunge nokwe shi pondola, molwaashoka okwa kala metsokumwe nOmpango yaKalunga. Okwa li wo a lombwelwa kutya ‘ina tila ye ina tyololoka, oshoka OMUWA Kalunga ke, oku li pamwe naye shaa mpoka ta yi.’ (Jos. 1:7-9) Oohapu ndhoka odha li dha ladhipike Josua noonkondo. Kalunga okwa li pamwe naye shili, molwaashoka osha li owala sha pula oomwedhi hamano okuyuga ko Evi lyEuvaneko, mo 1467 K.E.N.
AAKIINTU MBOKA YA LI YA LONGELE KALUNGA NUULAADHI
8. Omolwashike Rahab e li oshiholelwa oshiwanawa sheitaalo noshuulaadhi?
8 Aakiintu oyendji oya kala nokulongela Jehova nuulaadhi uule womimvo omathele dha pita. Pashiholelwa, ohonda Rahab oya li yu ulike eitaalo lyayo muKalunga sho ya holeke oondaadhi mbali ndhoka dha li dha tumwa kuJosua. Ka li a lombwele aatumwa yomukwaniilwa kutya oondaadhi odhi li peni. Rahab okwa li a hupithwa pamwe naangandjawo sho Aaisraeli ya yugu ko Jeriko. Rahab okwe etha po iilonga ye yuulunde e ta ningi omulongeli gwaJehova omudhiginini nokwa ningi yinakulululwa yaMesiasa. (Jos. 2:1-6; 6:22, 23; Mat. 1:1, 5) Okwa li a lalekwa nuuyamba omolweitaalo nuulaadhi we.
9. Debora, Barak naJael oya li yu ulike ngiini uulaadhi?
9 Konima sho Josua a si mo 1450 K.E.N., ngashingeyi pwa pita omimvo 3461 lwaampono, Israeli osha kala tashi pangelwa kaatokolihapu. Omukwaniilwa Jabin gwaKaanana okwa kala nokuthindila kongudhi Aaisraeli uule womimvo 20. Kalunga okwa li i inyengitha Debora, omupolofeti omukiintu a lombwele Omutokolihapu Barak a ninge po sha. Barak okwa gongele etangakwiita lye, aalumentu 10 000 kondundu Tabor, nokwa li i ilongekidha oku ka kondjitha etangakwiita lyaJabin ndyoka lya li mewiliko lyondjayi Sisera, ndjoka ya li ye ya pesilu lyomulonga Kishon netangakwiita lyayo pamwe nomatembakwiita ge li 900. Sho Aaisraeli taya kuluka taya zi molusilu, Kalunga okwa lokitha omvula mesilu e tamu kala mu na enono nomatembakwiita gAakaanana kaga li we taga vulu okuhuma komeho. Barak naalumentu ye oya li ya sindana “netangakwiita lyaSisera alihe olye shi pelwe; inapu hupa nondhi.” Sisera okwa matuka a ka holame motenda yomukiintu Jael ngoka e mu dhipaga omanga a pwila moomposi. Ngaashi owala Debora, omupolofeti omukiintu a li e shi hunganeke sho Aakaanana ya sindika, esimano olya li lya pewa omukiintu Jael. “Moshilongo [shaIsraeli] nomwa li ombili ethimbo lyoomvula omilongo ne” omolwuulaadhi waDebora, Barak naJael. (Aatok. 4:1-9, 14-22; 5:20, 21, 31) Aalumentu naakiintu aatilikalunga oyendji oya kala nokuulika eitaalo nuulaadhi wa fa wawo.
OOHAPU DHETU OTADHI VULU OKULADHIPIKA YALWE
10. Omolwashike taku vulu okutiwa kutya oohapu dhetu otadhi vulu okunwetha mo yalwe?
10 Shoka hatu popi otashi vulu okuladhipika aalongelikalunga ooyakwetu. Omukwaniilwa David okwa li a lombwele omwana, Salomo omimvo 3 000 nasha dha pita a ti: “Kala wa tokola nou na einekelo. Tameka iilonga, ino katekwa kusha. OMUWA Kalunga ngoka tandi longele, ota ka kala pamwe nangoye. Ite ku etha, ndele ota kala nangoye, sigo wa hulitha iilonga mbyoka tayi longwa molwotempeli.” (1 Ondjal. 28:20) Salomo okwa li a longo nuulaadhi e ta tungile Jehova otempeli ombwanawa muJerusalem.
11. Omwenyo gwomulumentu gumwe ogwa li gwa hupithwa ngiini omolwuulaadhi wokakadhona okaIsraeli?
11 Omimvo 2 900 nasha dha pita, okakadhona okaIsraeli oka li ka kwathele Naeman ngoka a li te ehama uuvu woshilundu. Okakadhona hoka oka li ka kwatwa po ketangakwiita lyAayassur e taka ningi okapika kaNaeman, ondjayi yetanga ndyoka. Molwaashoka oka li ke shi iikumithalonga mbyoka Jehova a longo okupitila momupolofeti Elisa, oka li ka lombwele omukulukadhi gwaNaeman kutya omusamane gwe ota ka aluka kuuvu we ngele okwa yi kuIsraeli. Naeman okwa aludhwa pashikumithalonga sho a yi kuIsraeli nokwa li a ningi omulongeli gwaJehova. (2 Aak. 5:1-3, 10-17) Ngele owu li omugundjuka, nowu hole Kalunga wa fa okakadhona hoka, oto ka kala wu na uulaadhi wokuuvithila aalongi, aanasikola ooyakweni nayalwe.
12. Oohapu dhomukwaniilwa Hiskija odha li dha kwathele aalelwa ye ngiini?
12 Oohapu dha hogololekeka ohadhi vulu okuladhipika gumwe ngoka e li moothina. Omimvo 2 700 nasha dha pita, sho etangakwiita lyAayassur lya ponokele Jerusalem, omukwaniilwa Hiskija okwa lombwele aalelwa ye a ti: “Kaleni mwa tokola nomu na einekelo, inamu tila omupangeli gwaAssur nenge etangakwiita ndyoka te li wilike. Otu neni oonkondo tu ya vule. Oku na oonkondo dhopantu, ihe tse otu na ekwatho lyOMUWA, Kalunga ketu, te tu kwatha molugodhi lwetu.” Oohapu ndhoka odha li dha kwathele Aajuda momukalo guni? Ombiimbeli otayi ti: “Aantu oya pendapala pahapu dhomukwaniilwa gwawo.” (2 Ondjal. 32:7, 8) Oohapu dha fa ndhoka otadhi vulu oku tu tsa omukumo paumwene nosho wo Aakriste ooyakwetu uuna twa taalela omahepeko.
13. Obadja, omutonateli gwomukwaniilwa Ahab okwe tu tulila po oshiholelwa shuulaadhi shini?
13 Ethimbo limwe ohatu vulu okuulika uulaadhi nopwaahe na iitya yasha. Omimvo 2 900 nasha dha pita, Obadja, omutonateli gwomukwaniilwa Ahab okwa li a holeke aapolofeti yaJehova ethele “mekololo moongundu mbali dhomilongo oontano,” opo kaaya dhipagwe ngaashi sha li sha popiwa komukwaniilwakiintu omwiinayi, Isebel. (1 Aak. 18:4) Aapiya yaJehova aadhiginini kunena oya kala nokugamena nuulaadhi ooitaali ooyakwawo mokutinda okugandja uuyelele kaahepeki yawo, ngaashi owala sha li sha ningwa komutilikalunga Obadja.
ESTER OKWA LI OMUNYEKADHI OMULAADHI
14, 15. Omunyekadhi Ester okwa li u ulike ngiini eitaalo nuulaadhi, noshizemo osha li shashike?
14 Omimvo 2 400 nasha dha pita, omunyekadhi Ester okwa li u ulike eitaalo nuulaadhi wa dhenga mbanda konima sho Haman a li a hala okudhipagitha Aajuda mboka ye li moshitopolwa shaPersia. Itashi kumitha sho Aajuda ya li taya lilagana nokwiidhilika iikulya nokugalikana ya mana mo. (Est. 4:1-3) Omunyekadhi Ester okwa li a lulilwa unene koshinima shoka. Omumwayinagona Mordekai okwa li e mu tumine ontumwafo ndjoka ya gandja epitikilo Aajuda ya dhipagwe nokwa li a lombwele Ester a pule omukwaniilwa a sile ohenda oshigwana shawo. Ihe kehe ngoka ta yi mombala yomukwaniilwa inaa hiywa, okwa li e na okudhipagwa.—Est. 4:4-11.
15 Ihe Mordekai okwa li a lombwele Ester a ti: ‘Ngele to mwenene ompito ndjika, ekwatho otali zile Aajuda palwe e taa ka hupithwa. Ihe olye e shi tseya kutya ino ninga omunyekadhi omolwompito ndjika?’ Ester okwa li a pula Mordekai a gongaleke Aajuda muSusa noyi idhilike iikulya. Ester okwa ti: “Nangame osho te ningi pamwe naadhike yandje. Konima yaambika otandi ka ya komukwaniilwa, nando nashi kale sha pingathana nompango. Ngele ote si, nandi se.” (Est. 4:12-17) Ester okwa li a katuka nuulaadhi, nembo ndyoka lye mu lukilwa otali popi kutya Kalunga okwa li a hupitha oshigwana she. Pethimbo lyetu, Aakriste aagwayekwa nosho wo oonzi dhilwe ohaya ulike uulaadhi wa fa we uuna taya hepekwa. Ihe ngoka ‘hu uvu omagalikano’ oha kala aluhe kombinga yawo.—Lesha Episalomi 65:2; 118:6.
“IKOLELELA”
16. Jesus okwa tulila po aagundjuka oshiholelwa shini?
16 Nale sho Jesus a li e na omvula 12 okwa li a adhika motempeli “a kuutumba mokati kaalongi Aajuda, te ya pulakene ye te ya pula.” Ombiimbeli otayi ti: “Ayehe mboka ye mu pulakene, oya kuminwa oondunge dhe nomayamukulo ge.” (Luk. 2:41-50) Nonando okwa li omugundjuka, okwa li e na eitaalo nuulaadhi mboka we mu inyengitha a pule aalongimpango omapulo motempeli. Ngele aagundjuka megongalo lyopaKriste otaya landula oshiholelwa shaJesus, otaya ka vula ‘okuyamukula kehe gumwe ngoka te ya pula ya fatulule etegameno lyawo’ uuna pu na gumwe ngoka te shi ningi.—1 Pet. 3:15.
17. Omolwashike Jesus a li a ladhipikile aalongwa ye yi ‘ikolelele,’ nomolwashike natse twa pumbwa okukala twi ikolelela?
17 Jesus okwa li a ladhipike yalwe yi ‘ikolelele.’ (Mat. 9:2, 22) Okwa lombwele aalongwa ye a ti: “Ethimbo otali ke ya noli li po nokuli, uuna ne amuhe tamu ka halakanithwa. Kehe gumwe oti iyukile kaandjawo, e tamu thigi ndje po awike. Ihe ngame kandi li awike, oshoka Tate oku li pamwe nangame. Shika onde shi mú lombwele, opo mu kale mu na ombili tayi zi muukumwe weni nangame. Uuyuni otau ke mú hepeka. Ihe inamu tila, ngame onda sinda uuyuni!” (Joh. 16:32, 33) Ngaashi owala aalanduli yaJesus yonale ya li ye tondike kuuyuni, natse owu tu tonde kunena. Ihe katu na okulandula iikala yuuyuni. Itatu ka nyatekwa kuwo ngele otu na uulaadhi wa fa waJesus. Omwana gwaKalunga okwa sinda uuyuni, natse otatu vulu oku shi ninga.—Joh. 17:16; Jak. 1:27.
KALENI MWI “IKOLELELA”
18, 19. Omuyapostoli Paulus okwa li u ulike ngiini kutya oku na eitaalo nuulaadhi?
18 Omuyapostoli Paulus okwa li i idhidhimikile omamakelo ogendji. Oshikando shimwe, Aajuda muJerusalem oya li ya hala oku mu dhipaga, ihe aakwiita Aaroma oya li ye mu hupitha. Uusiku wa landula “Omuwa okwa thikama puPaulus a ti: ‘Ikolelela! Ngaashi wa hokolola ndje muJerusalem, ou na oku shi ninga wo muRoma.’” (Iil. 23:11) Paulus okwa ningi ngaashi a lombwelwa.
19 Paulus okwa li a ganda ‘aayapostoli mboka aanene’ aniwa sho ya li taya kambadhala okunyateka egongalo lyaKorinto. (2 Kor. 11:5; 12:11) Ka li e na iikala ya fa yaayapostoli mboka aaniifundja. Okwa li u ulike kutya ye omuyapostoli gwashili sho a li mondholongo, a dhengwa, a adhika kiiponga momalweendo ge, kiiponga yilwe, kondjala, kenota, a lala inaa kotha nokukala e na oshimpwiyu shooitaali ooyakwawo. (Lesha 2 Aakorinto 11:23-28.) Oshiholelwa she oshiwanawa sheitaalo nuulaadhi, oshi li euliko kutya Kalunga oye a li te mu kwathele.
20, 21. (a) Tumbula oshiholelwa shoka tashi ulike kutya otwa pumbwa okukala aalaadhi. (b) Omoonkalo dhini twa pumbwa okuulika uulaadhi, nuushili wuni tu na?
20 Aakriste ayehe itaya ka pita momahepeko omadhigu ngaashi Paulus. Ihe nonando ongaaka, ayehe oye na okukala nomukumo ya vule okwiidhidhimikila omashongo monkalamwenyo. Pashiholelwa, omumati gumwe omugundjuka muBrasilia okwa li oshilyo shongundu yaalongi yomuyonena. Ihe sho a konakona Ombiimbeli, okwa mono kutya okwa pumbwa okuninga omalunduluko. Olundji ngele omuntu ta thigi po ongundu ndjoka, okwa li ha dhipagwa. Omumati ngoka okwa li a galikana nokulongitha omanyolo u ulukile omuwiliki gwongundu yawo kutya omolwashike itaa vulu we okukala oshilyo. Oshizemo, okwa li a mangululwa nopwaa na egeelo lyasha e ta ningi omuuvithi gwonkundana yUukwaniilwa.
21 Otwa pumbwa uulaadhi, opo tu uvithe onkundana ombwanawa. Aagundjuka yetu oye wu pumbwa wo, opo ya kale aadhiginini. Opo omuntu a pule efudho kiilonga a ka kale omasiku agehe poshigongi shoshitopolwa, ohashi pula uulaadhi. Opu na oompito odhindji moka tu na oku wu ulika. Ihe nonando ongaaka, Jehova ohu uvu “egalikano lyomwiitaali” ngoka ta makelwa. (Jak. 5:15) Otu na uushili kutya ote tu pe ombepo ye ondjapuki tu vule okukala twi ‘ikolelela notu na omukumo.’
[Ethano pepandja 11]
Henok okwa li u uvitha nuulaadhi muuyuni wa kolokosha
[Ethano pepandja 12]
Jael okwa li omulaadhi noku na omukumo