Aaleshi yoshifo shetu taya pula . . .

Olye a li a tumu “onyothi”?

▪ Mbela owa mona nale omathano nenge iinyandwa tayi ulike aakwaniilwa yatatu nenge aanongo yokuuzilo taya talele po Jesus sho e li okahanona a langekwa metemba lyokulila iimuna? Ehokololo ohali ti anuwa Kalunga okwa longitha onyothi e ya wilike sigo ya thiki muBetlehem moshigunda moka mwa li mu na etemba lyokulila iimuna moka mwa li mwa langekwa okahanona. Miilongo yimwe aanona oyendji ohaya longwa nokuli omadhina gaanongo mbaka yatatu kutya anuwa oyo Melchior, Caspar naBaltazar. Ihe mbela ehokololo ndyoka li shiwike kaantu oyendji olya faathana ngaa naandyoka li li mOmbiimbeli? Aawe, inali faathana. Oli na nokuli omapuko ogendji.

Shotango, aalumentu mbaka oya li oolye? Ombiimbeli sho ya li ya nyolwa petameko mOshigreka, inayi ya ithana nando aakwaniilwa nenge aanongo yokuuzilo. Oya li oompulile nenge aayanekeli mboka haya tala koonyothi nokiikwagulu yilwe. Aalumentu mbaka oya li haya ningi iinima yopashipagani yuumpulile yi na ko nasha nokutala kunkene oonyothi hadhi inyenge mewangandjo. Ombiimbeli inayi ya popya komadhina nenge kutya oya li yangapi.

Oshitiyali, aalumentu mbaka oya li ya talele po uunake? Kaya li ya talele po pethimbo sho Jesus a li okahanona ke li metemba lyokulila iimuna. Shoka otu shi shi ngiini? Mateus, omunyoli gwEvaangeli, okwa ti: ‘Sho ya yi megumbo, oya mono mo okanona nayina Maria.’ (Mateus 2:11) Ndhindhilika kutya ovelise ndjika inayi tya kutya Jesus okwa li natango okahanona, ihe oya ti okwa li “okanona” pethimbo mpoka. Maria naJosef kaya li we ye li moshigunda shiimuna, ihe oya li megumbo.

Oshititatu, olye a li a tumu “onyothi” ndjoka ya li tayi wilike aayanekeli mbaka haya tala koonyothi nokiikwagulu yilwe? Aasita yomalongelokalunga kunena ohaya ti kutya Kalunga oye a tumu “onyothi” ndjoka. Ihe mbela oye ngaa shili e yi tumu? Dhimbulukwa kutya “onyothi” ndjoka inayi wilika aayanakeli mboka ya ye tango kuBetlehem. Pehala lyaashono, oye ya wilike ya ye komukwaaniilwa Herodes kuJerusalem. Aayanekeli mbaka oya li ya lombwele omukwaniilwa nguka omunandumbo nomudhipagi kombinga yaJesus noya li nokuli ya gandja etompelo ndyoka lya li lye mu ningitha a tonde okanona hoka ka li taka ka ninga “omukwaniilwa gwAajuda.” (Mateus 2:2) Herodes okwa li a longitha omukalo gwiineya sho e ya lombwele ya galukile kuye ye ye ye mu lombwele kutya okanona oke li naanaa peni oshoka naye anuwa okwa li a hala e ki inyongamene kuko. Okuza mpoka opo nduno “onyothi” ndjoka ya ka wilika aayanekeli mbaka sigo okehala hoka kwa li Josef naMaria. Shoka sha li sha ningwa kaayanekeli mbaka osha li tashi vulika shi etithe eso lyokanona hoka ando Kalunga okwa li inaa ya mo olunyala. Lagwenene, Jehova okwa li a yi mo olunyala. Osha li sha geyitha Herodes noonkondo sho aayanekeli inaaye mu galukila, e ta gandja elombwelo opo uunona wuumati auhe muBetlehem nowopuushiinda washo mboka wu li kohi yoomvula ndatu wu dhipagwe.—Mateus 2:16.

Konima, Jehova okwa ka popya kombinga yaJesus a ti: “Nguka oye Omumwandje omuholike nde mu hokwa.” (Mateus 3:17) Dhiladhila kwaashika: Mbela otashi vulika ngaa Tate nguka omunahole nomuyuuki a tume oompulile ndhoka hadhi longo shoka i indika mOmpango ye? (Deuteronomium 18:10) Mbela Jehova okwa li ngaa ta ka longitha onyothi yi ya fale kuHerodes, omudhipagi omunankondo nokwa nika oshiponga, ye ke mu lombwele etumwalaka ndyoka lya li tali ka tukula ongeyo nondumbo muye? Mbela Jehova okwa li ngaa ta ka longitha natango onyothi oyo tuu ndjoka yi wilike oompulile ndhika kehala hoka kwa li ku na omwana ngoka a li itaa vulu okwiigamena?

Natu shi thaneke ngeyi: Natu tye nduno ondjayi yetangakwiita lyontumba oya pe omukwiita gwayo ngoka oye dhingi metanga lyayo oshinakugwanithwa sha nika oshiponga shokuya kehala hoka ku na omutondi. Mbela ota ka hololela aatondi ye kutya omukwiita ngoka oku li peni? Itashi vulika nando! Sha faathana, Jehova okwa tumine Omwana muuyuni mbuka wa nika oshiponga. Mbela okwa li ngaa ta ka lombwela omukwaniilwa Herodes kutya Omwana ngoka a li itaa vulu okwiigamena oku li peni? Kapu na esiku shi ningwe!

Ngele osho shi li ngawo, olye nduno a li a tumu “onyothi” nenge oshinima shoka sha fa onyothi? Mbela olye a li a hala okudhipagitha Jesus sho a li okanona opo kaa koke ye a ka gwanithe po oshilonga she shoka a li a tumwa a longe kombanda yevi? Olye mbela ha kala a hala okupukitha aantu, ha humitha komeho iifundja, elongithonkondo nedhipago? Jesus okwe mu holola kutya oSatana Ondiaboli ngoka e li “omufundja nahe yiifundja aihe” ngoka a kala “omudhipagi okuza ketameko.”—Johannes 8:44.