‘Omwana okwa hala oku tu hololela he’
“Kaku na ngoka a tseya kutya Tate oye lye, Omwana oye awike, naangoka Omwana a hala oku mu hololela.”—LUK. 10:22.
OTO YAMUKULA NGIINI?
Omolwashike Jesus a gwana okuholola He e vule kehe gumwe?
Ongiini Jesus a li a hololele He yalwe?
Ongiini tatu vulu okulandula oshiholelwa shaJesus shokuhololela yalwe Kalunga?
1, 2. Aantu oyendji ohaya kala ya limbililwa kepulo lini, nomolwashike?
‘KALUNGA oye lye?’ Aantu oyendji ohaya kala ya limbililwa kepulo ndyoka. Pashiholelwa, nonando aantu oyendjiyendji mboka hayi iti Aakriste oyi itaala kutya Kalunga Omukwatatu, oyendji oye shi zimina kutya kapu na ngoka ta vulu okuuva ko elongo ndyoka. Omunyoli nomukwambepo gumwe oye shi zimine ya ti: ‘Elongo ndika itali vulu okuuviwa ko thiluthilu kaantu nokapu na ngoka ta vulu oku li yelitha, molwaashoka oli li oshinima shomuule kuyo.’ Kakele kaashono, aantu oyendji oyi itaala melongo lyoevolusi kutya kaku na Kalunga. Ohaya ti kutya iishitwa ayihe oye ya po ohaluka. Pehala lyokutinda kutya kaku na Kalunga, Charles Darwin okwa ti: ‘Ondi wete kutya elongo lyoevolusi itali vulu okuuviwa ko kaantu nando.’
2 Aantu oyendji yomaitaalo gi ili nogi ili oya kala nokwiipula iikando oyindji ngele Kalunga oko ngaa e li shili. Ihe olundji ohaya hulile muunyengwi e taya etha okukonga omayamukulo. Ano aantu ‘mboka inaayi itaala, omadhiladhilo gawo oga pukithwa’ kuSatana. (2 Kor. 4:4) Itashi kumitha sho aantu oyendji ya ngwangwana nokaye na sho ye shi kombinga yaTate Kalunga, Omushiti gwaayihe.—Jes. 45:18.
3. (a) Olye e tu hololele Omushiti? (b) Omapulo geni tatu ka kundathaneni?
3 Omolwashike sha simanenena aantu yi ilonge oshili kombinga yaKalunga? Omolwaashoka oomboka owala tayi ithana “edhina lyOMUWA” taya ka hupithwa. (Rom. 10:13) Okwiithana edhina lyaKalunga okwa kwatela mo okukala nekwatathano ewanawa naye. Jesus Kristus okwa li a lombwele aalongwa ye oshili ndjika ya simanenena. Okwa li e ya hololele He. (Lesha Lukas 10:22.) Omolwashike Jesus oye owala a li ta vulu okuholola He? Okwa li e shi ningi ngiini? Ongiini tse tatu vulu okuholela Jesus mokuhololela yalwe He? Natu ka kundathaneni omapulo ngaka.
JESUS KRISTUS OKWA GWANA OKUHOLOLA HE E VULE KEHE GUMWE
4, 5. Omolwashike Jesus oye owala a gwana okuholola He?
4 Jesus oye owala a gwana okuholola He. Omolwashike mbela? Omolwaashoka Jesus, “omuvalwa awike gwaKalunga,” okwa kala nale megulu e li oshishitwa shopambepo manga iinima ayihe yi na omwenyo inaayi shitwa. (Joh. 1:14; 3:18) Okwa kala e na ondondo yi ikalekelwa. Manga iishitwa yilwe inaayi shitwa, Omwana ngoka okwa kala puHe nokwi ilonga kombinga yaHe nosho wo yomaukwatya Ge. He nOmwana oya kala haya popi aluhe, shoka she ya ningitha ya kale ye holathane noonkondo uule woomvula odhindji. (Joh. 5:20; 14:31) Omwana oku shi nawa uukwatya waHe.—Lesha Aakolossa 1:15-17.
5 He okwa langeka po Omwana a kale Omupopikalelipo gwe, “Ohapu yaKalunga.” (Eh. 19:13) Onkee ano, Jesus oye owala a gwana okuhololela He yalwe. Omunyoli gwEvaangeli, Johannes okwa popi Jesus e li “Ohapu” noha kala “mekolo lyaHe.” (Joh. 1:1, 18, OB-1954) Johannes okwa li ta popi omukalondjigilile ngoka gwa li hagu ningwa pethimbo lye uuna aantu taya li. Pethimbo ndyoka ngele aantu taya li, gumwe oha kuutumba mekolo lyamukwawo. Osha li oshipu kaantu yaali mboka ye li pamwe okukala taya popi. Sha faathana, Omwana oha kala “mekolo lyaHe” nohaya popi ya mangulukilathana.
6, 7. Oshe ende ngiini, opo ekwatathano pokati kaHe nOmwana li koke?
6 Ekwatathano pokati kaHe nOmwana olye ende tali koko. Omwana ‘okwa li ha nyanyudha He esiku nesiku.’ (Lesha Omayeletumbulo 8:22, 23, 30, 31.) Osha yela kutya ekwatathano pokati kawo yaali olya li lya kola, molwaashoka oya kala taya longo pamwe. Omwana okwa kala wo nokuholela omaukwatya gaHe. Sho iishitwa yilwe iinandunge ya shitwa, Omwana okwa li e shi wete nkene He hu ungaunga nayo. Shoka osha li sha ningitha Jesus a kale a hokwa lela omaukwatya gaHe.
7 Konima yethimbo Satana okwa li a tsu ondumbo nuuthemba waJehova wokupangela. Shoka osha li sha pe Jesus ompito i ilonge nkene Jehova hu ulike ohole ye, uuyuuki, uunongo noonkondo dhe uuna a taalelwa konkalo ondhigu. Shika osha li sha kwathele Jesus i ilongekidhe nkene e na okuungaunga noonkalo oondhigu moka a li e ki iyadha lwanima pethimbo lyuukalele we kombanda yevi.—Joh. 5:19.
8. Omahokololo gomavaangeli otage tu kwathele ngiini twi ilonge oshindji kombinga yomaukwatya gaKalunga?
8 Omwana okwa li a yelitha nawa okanima kehe kombinga yaHe, molwaashoka okwa li e na ekwatathano lyopothingo naye e vulithe kehe gumwe. Oshike tu na okuninga ngele otwa hala okutseya nawa Jehova? Otu na okutala kwaashoka Omwana epona a longa aantu nosho wo kwaashoka a li ha ningi. Pashiholelwa, otashi vulika shi kale oshidhigu kutse okuuva ko nawa oshitya “ohole” uuna tatu lesha owala eityo lyasho membwiitya. Ihe ngele tatu dhiladhila komahokololo gomavaangeli ngoka taga popi uukalele waJesus nosho wo nkene a li ha kenukile yalwe, otashi tu kwathele tu uve ko nawa muule oohapu ndhoka tadhi ti kutya “Kalunga oye ohole.” (1 Joh. 4:8, 16) Otatu ka tseya wo omaukwatya gaKalunga galwe ngoka Jesus a li a hololele aalongwa ye sho a li kombanda yevi.
NKENE JESUS A HOLOLA HE
9. (a) Jesus okwa holola He momikalo mbali dhini? (b) Gandja oshiholelwa shoka tashi ulike omukalo moka Jesus a holola He okupitila mwaashoka a longo aantu.
9 Jesus okwa li a holola He ngiini kaalongwa ye nosho wo kaalanduli ye yomonakuyiwa? Okwe shi ningi momikalo mbali: Okupitila melongo lye nosho wo meihumbato lye. Tango natu taleni kelongo lye. Shoka Jesus a longo aalanduli ye otashi ulike kutya okwa li u uvite ko nawa omadhiladhilo gaHe, omaiyuvo ge nosho wo oondjila dhe. Pashiholelwa, Jesus okwa li a faathanitha He nomusita ngoka ha sile oshimpwiyu oonzi dhe, nuuna pwa kana yimwe ohe ke yi konga. Jesus okwa ti kutya uuna omusita a mono onzi ye, ohe yi “nyanyukilwa noonkondo shi vulithe ndhoka omilongo omugoyi ndhoka dha li inaadhi kana.” Eudhi ndyoka otali thaneke shike? Jesus okwa ti: “Onkee ano kali shi ehalo lyaHo megulu, ku kane nando okamwe kaambuka uushona.” (Mat. 18:12-14) Oshike to ilongo kombinga yaJehova meudhi ndika? Nonando omathimbo gamwe oho kala wu wete wa fa kuu na oshilonga nokapu na ngoka e na nangoye, Ho gwomegulu okwe ku hokwa noku na ko nasha nangoye. Okwe ku tala ko wu li ‘kamwe komuunzi mbuka uushona.’
10. Jesus okwa li a holola He ngiini meihumbato lye?
10 Omukalo omutiyali moka Jesus a hololela aalongwa ye He, omeihumbato lye. Sho omuyapostoli Filippus a pula Jesus a ti: “Tu ulukila Ho,” Jesus okwe mu lombwele shu ukilila a ti: “Kehe ngoka a mono ndje, okwa mona wo Tate.” (Joh. 14:8, 9) Natu tale kiiholelwa yimwepo moka Jesus u ulika omaukwatya gaHe. Sho omulumentu ngoka a “kanyata oshilundu” e mu hehela e mu aludhe, Jesus okwe mu gumu e ta ti: “Onda hala, yela.” Omunashilundu sho a aludhwa okwa li a mono kutya Jehova okwe mu kwathela okupitila mwaashoka Jesus a li a ningi. (Luk. 5:12, 13) Peso lyaLasarus, aalongwa otashi vulika ya li wo ya mono nkene Jesus u ulike ohenda yaHe sho a li a “hendwa komutima noku uvite uudhigu meni lye” e ta lili. Nonando Jesus okwa li e shi kutya ota ka yumudha Lasarus, okwa li a yemata ngaashi aamwayina yaLasarus nosho wo ookuume ke. (Joh. 11:32-35, 40-43) Nopwaa na omalimbililo, omahokololo gOmbiimbeli ngoka wu hole otage ku kwathele wu mone ohenda yaHe ndjoka Jesus u ulike miilonga ye.
11. (a) Sho Jesus a li o opaleke otempeli, okwa holola shike kombinga yaHe? (b) Omolwashike ehokololo lyaJesus lyokwoopaleka otempeli tali tu tsu omukumo?
11 Oshike tatu ilongo mwaashoka Jesus a li a ningi sho a tidha aahalithi motempeli? Kala ando wa fa wu mu wete sho ta tungu ongola yepando e ta tidha mo aalandithi yoongombe, yoonzi noyoonguti. Sho ta tilehi iimaliwa yawo nokuundulila iitaafula yawo pevi. (Joh. 2:13-17) Onkatu ya kwata miiti ndjoka Jesus a katuka oya dhimbulukitha aalongwa ye oohapu dhopahunganeko dhomukwaniilwa David tadhi ti: “Uulaadhi omolwongulu yoye otawu thiminike ndje.” (Eps. 69:9) Jesus okwa li u ulike kutya okwa halelela okupopila elongelokalunga lyashili sho a katuka onkatu nziya. Mbela mehokololo moka owu wete mo uukwatya waHe? Otashi tu dhimbulukitha kutya Kalunga ina nyengwa okuhanagula po aakolokoshi kombanda yevi, nokwa halelela oku shi ninga. Omukalo moka Jesus a li a katukile aayoni onkatu, otagu holola nkene He ha kala u uvitile uukolokoshi mboka a tala tawu longwa kombanda yevi alihe kunena. Shika oshi li ehekeleko kutse uuna tatu ningilwa okwaanuuyuuki.
12, 13. Momukalo moka Jesus a li u ungaunga naalongwa ye otatu ilongo mo shike kombinga yaJehova?
12 Natu taleni ishewe koshiholelwa shilwe nkene Jesus a li u ungaunga naalongwa ye sho ya li taya patana kutya olye omunene e vule ooyakwawo. (Mark. 9:33-35; 10:43; Luk. 9:46) Molwaashoka Jesus okwa kala ethimbo ele pamwe naHe, oku shi nkene Jehova ha kala u uvitile iikala yuuntsa. (2 Sam. 22:28; Eps. 138:6) Jesus naye okwa li a mono kutya Satana Ondiaboli oku na uuntsa. Ondiaboli oya li tayi lalakanene unene esimano nondondo yopombanda. Jesus okwa li a nika oluhodhi sho a mono iikala yokulalakanena oondondo tayi tsikile mokati kaalongwa ye. Iikala ya tya ngaaka oya li nokuli mokati kaamboka a li a hogolola ya ninge aayapostoli ye. Oya li yu ulike iikala mbyoka sigo esiku Jesus a dhipagwa. (Luk. 22:24-27) Ihe nonando ongaaka, okwa li a tsikile oku ya pukulula nohenda nokwa li e na einekelo kutya siku limwe onaye ku ulike iikala yeifupipiko ngaashi ye.—Fil. 2:5-8.
13 Iikala yaJehova oya li tayi imonikila muJesus sho a li ta pukulula aalongwa ye mboka ya li ye na omalalakano ga puka. Shoka Jesus a ningi naashoka a popi otashi ulike kutya He ihe ekelehi aapiya ye, nonando ohaya ningi omapuko olundji. Molwaashoka otu shi kutya Kalunga oku na uukwatya mboka, natu kale hatu mu pula e tu dhimine po uuna twa ninga epuko.
OMWANA OKWA HALA OKUHOLOLA HE
14. Oshike tashi ulike kutya Jesus okwa hala okuholola He?
14 Ookayamukulwa oyendji ohaya kambadhala okupangela aantu ooyakwawo nonyanya nosho wo oku ya imba ya mone uuyelele mboka ya pumbwa. Ihe Jesus okwa li a hala okulombwela yalwe uuyelele mboka e shi kombinga yaHe, nokwa li e mu hololele nawa yalwe. (Lesha Mateus 11:27.) Jesus okwa li wo a longo aalongwa ye ‘okutseya Jehova Kalunga kashili.’ (1 Joh. 5:20) Shoka osha li sha kwatela mo shike? Osha li sha kwatela mo okukwathela aalanduli ye yu uve ko shoka te ya longo kombinga yaHe. Jesus ina holeka uuyelele kombinga yaHe mokulonga aantu kutya He Omukwatatu, oshinima shoka ihaashi uviwa ko nando.
15. Omolwashike Jesus a li inaa holola uuyelele oundji kombinga yaHe?
15 Mbela Jesus okwa li a holola iinima oyindji ayihe mbyoka e shi kombinga yaHe? Aawe, ine shi ninga. (Lesha Johannes 16:12.) Omolwashike mbela? Omolwaashoka omathimbo gamwe aalongwa ye oya li ‘taya nyengwa okuuva ko’ iinima yimwe. Jesus okwa li e shi yelitha kutya ota ka tuma ‘omupopili,’ sha hala okutya, ombepo ondjapuki yi ya kwathele yu uve ko ‘oshili ayihe.’ (Joh. 16:7, 13) Ngaashi owala aavali aanawino haya lombwele oyana omayele ngoka ge thike poondunge dhawo, Jesus naye okwa li a tegelele aalongwa ye ya koke pambepo e ya lombwele nawa iinima yontumba kombinga yaHe, opo ye yi u uve ko nawa. Jesus okwa li e shi omangambeko gaalongwa ye.
HOLELA JESUS MOKUKWATHELA YALWE YA TSEYE JEHOVA
16, 17. Omolwashike tatu vulu okulombwela yalwe kombinga yaKalunga?
16 Uuna wu shi nawa omuntu gwontumba nowu hole omaukwatya ge, mbela iho kala wa hala okulombwela yalwe kombinga ye? Sho Jesus a li kombanda yevi, okwa li a lombwele aantu shi na ko nasha naHe. (Joh. 17:25, 26) Otatu vulu oku mu holela mokulombwela yalwe kombinga yaJehova.
17 Ngaashi twi ilongo, Jesus okwa li e na ontseyo oyindji kombinga yaJehova e vulithe kehe gumwe. Ihe okwa li a hala okulombwela yalwe shoka e shi. Okwa li a nongeke aalanduli ye ya tseye nawa omaukwatya gomuule gaKalunga. Aantu oyendji kunena kaye na ontseyo yiinima yopakalunga, ihe Jesus okwe tu kwathela tu yi uve ko. Mbela inatu pandula sho Jesus e tu hololela He okupitila mwaashoka a longo aantu nomeihumbato lye? Eeno, otwa pandula noonkondo sho tu shi He. (Jer. 9:24; 1 Kor. 1:31) Jehova ota ka hedha kutse, molwaashoka natse otwa ninga oonkambadhala tu hedhe kuye. (Jak. 4:8) Onkee ano, otatu vulu okutseyithila yalwe ontseyo ndjoka tu na. Ngiini mbela?
18, 19. Omomikalo dhini tatu vulu okuhololela yalwe Kalunga? Shi yelitha.
18 Ngaashi Jesus, natu kale hatu holola Kalunga moohapu dhetu nomiilonga yetu. Otu na okukala tu shi kutya aantu oyendji mboka hatu uvithile inaya tseya kutya Kalunga oye lye. Etaloko lyawo otashi vulika li kale lya pengithwa komalongo giifundja. Otatu vulu oku ya lombwela shoka tu shi kombinga yedhina lyaKalunga, yelalakano lye li na ko nasha naantu nosho wo omaukwatya ge ngoka ge li mOmbiimbeli. Otatu vulu wo okulombwela ooitaali ooyakwetu omahokololo gOmbiimbeli ngoka taga holola uukwatya waKalunga mboka twa li kaatu uvite ko nale. Ngele tatu shi ningi, otashi ke ye etela uuwanawa.
19 Ongiini tatu vulu okuholola Kalunga meihumbato lyetu, sho tatu holele Jesus? Otatu ke shi holola uuna iilonga yetu tayi ulike kutya otu hole Kristus, naashoka otashi ka ningitha aantu ya hedhe kuKalunga nokuJesus. (Ef. 5:1, 2) Omuyapostoli Paulus okwe tu ladhipike a ti: “Holelii ndje, oshoka ngame otandi holele Kristus.” (1 Kor. 11:1) Otu na uuthembahenda wi ikalekelwa wokukwathela aantu ya mone Jehova okupitila meihumbato lyetu. Onkee ano, natu landuleni oshiholelwa shaJesus shokuhololela yalwe Kalunga.