Uukengeleledhi owa lunda pethimbo lyetu
“Otwa kala aadhiginini, aayapuki notwaa na oshipo mokati keni ooitaali.”—1 TES. 2:10, NW.
KONGA OMAYAMUKULO GOMAPULO NGAKA GA SIMANA:
Muukengeleledhi waDelila, Absalom naJudas Iskariot otatu ilongo mo shike?
Ongiini tatu vulu okuholela uudhiginini waJonatan nowaPetrus?
Ongiini tatu vulu okukala aadhiginini kookuume ketu kopandjokana nokuJehova?
1-3. (a) Iinima yini tayi ulike kutya otu li momasiku gahugunina, noya kwatela mo shike? (b) Omapulo gatatu geni tatu ka kundathana?
UUKWATYA wuni wa faathana wa li wu niwe kuDelila, Absalom naJudas Iskariot? Ayehe kaya li aadhiginini. Delila ka li omudhiginini komuholike gwe, omutokolihapu Simson. Absalom ka li omudhiginini kuhe, omukwaniilwa David naJudas ka li omudhiginini kOmuwa gwe, Jesus Kristus. Ayehe pautatu iilonga yawo yuukengeleledhi oya li ye etele yalwe iilanduliko iiwinayi. Omolwashike tu na okukala tatu ipula naashoka ya ninga?
2 Omunyoli gumwe okwa ti kutya uukengeleledhi owa ha kunena. Osho shi na okukala ngaaka, molwaashoka sho Jesus a popi endhindhiliko ‘lyehulilo lyuuyuni’ okwa ti: ‘Aantu oyendji otaa ka kengelelathana.’ (Mat. 24:3, 10, yelekanitha NW.) Oshitya “okukengelela” otashi ti kutya “okwiigandja nenge okugandja po ehala lyontumba miikaha yaatondi, to shi ningi miineya nenge molwaashoka kuu shi omwiinekelwa.” Okwaainekelwa hoka otaku ulike kutya otu li ‘momasiku gahugunina’ moka Paulus a hunganeka kutya aantu otaya ka kala ‘kaaye shi aadhiginini naakengeleledhi.’ (2 Tim. 3:1, 2, 4, NW) Aanyoli yomambo naadhani yoomuvi olundji ohaya nyola omahokolola taga yolitha nokudhana oomuvi tadhi nyanyudha nkene yamwe taya kengelelathana. Oshinima shoka ohashi ehameke nohashi eta uudhigu ngele osha ningwa shili monkalamwenyo. Oshi li wo euliko kutya otu li lela momasiku gahugunina.
3 Oshike tatu ilongo kaantu mboka ya li kaaye shi aadhiginini ya popiwa mOmbiimbeli? Ongiini tatu vulu okulandula iiholelwa yaamboka ya li aadhiginini kuyalwe? Okulye tu na okukala aadhiginini? Natu ka kundathananeni omapulo ngaka.
IIHOLELWA YAANTU YONALE MBYOKA YI LI ELONDODHO KUTSE
4. Delila okwa li a kengelele Simson ngiini, nomolwashike sha li oshinima oshiwinayi noonkondo?
4 Tango natu taleni koshiholelwa shaDelila ngoka a li a kengelele omuholike gwe, Simson. Simson oye a li e na okumangulula oshigwana shaKalunga miikaha yAafilisti. Ihe aakwaniilwa yatano Aafilisti oya li ya hala oku mu dhipaga. Oya pe Delila iimaliwa oyindji e mu pule okanaku kutya oonkondo dhe oonene ohadhi zi peni. Otashi vulika ya li ye shi kutya Delila ke hole naanaa Simson. Delila okwa li a taamba iimaliwa mbyoka, ihe nonando ongaaka, oonkambadhala dhe odha li dha ponyo iikando itatu. Delila okwa tsikile noku mu pula te mu thiminike ‘esiku nesiku.’ Lwahugunina, “Simson okwa vulwa okutsitsimikwa.” Onkee ano, okwe mu lombwele kutya shi valelwe a kululwe momutse, nongele osha ningwa ota kanitha oonkondo dhe.a Delila sho e shi uvu, okwa kotheke Simson mekolo lye e ta kululitha ko omafufu ge. Konima yaashono, okwe mu gandja kaatondi ye ye mu ningile shoka ya hala. (Aatok. 16:4, 5, 15-21) Delila okwa li a ningi oshinima oshiwinayi noonkondo. Omolwolwiho, Delila okwa li e ende mevi omuholike gwe.
5. (a) Absalom okwa li u ulike ngiini kutya ke shi omudhiginini kuhe David, naashika osha li sha holola shike? (b) David okwa li u uvite ngiini sho a kengelelwa kuAhitofel?
5 Absalom naye okwa li a kengelele he, David. Okwa li a hala esimano, nokwa li a tokola toko i ininge omukwaniilwa pehala lyahe. Absalomo okwa ‘yulu oomwenyo dhAaisraeli’ (OB-1954) mokukala he yi ikumbu noohapu dhiineya noku ya lombwela omauvaneko giifundja. Okwa li he ya papatele noku ya thipa komilungu, ongomuntu ngoka e na nayo shili nosho wo noompumbwe dhawo. (2 Sam. 15:2-6) Absalom okwa li nokuli a kwata ko Ahitofel ngoka a li omugandjindunge gwahe i inekelwa. Ahitofel okwa li a kengelele David, sho a gama kombinga yaAbsalom. (2 Sam. 15:31) David okwa popya mEpisalomi 3 nosho wo 55 nkene oshinima shoka sha li she mu gumu. (Eps. 3:1-8; lesha Episalomi 55:12-14.) Absalom okwa li u ulike kutya ina simaneka uunamapangelo waKalunga, sho a li a hala okuumba koshipundi miineya he, omukwaniilwa David ngoka a langekwa po kuJehova. (1 Ondjal. 28:5) Kapu na shikukutu ihaashi hulu. Lwahugunina, David okwa ka tsikila nokulela oshigwana e li omukwaniilwa ngoka a gwayekwa kuJehova.
6. Judas okwa kengelele Jesus ngiini, nedhina Judas oli na eityo lya faathana noshitya shini?
6 Ngashingeyi natu tale shoka Judas Iskariot a li a ningile Kristus. Jesus okwa li a lombwele aayapostoli ye 12 ongulohi yahugunina sho a li ta dhana pamwe nayo Opaasa a ti: “Ongame otandi mú lombwele: Gumwe gwomokati keni ota ka gwaaleka ndje.” (Mat. 26:21) Lwanima, ongulohi oyo tuu ndjoka, Jesus okwa li a lombwele Petrus, Jakob naJohannes moshikunino shaGetsemane a ti: “Ngoka ta gwaaleke ndje, oku li popepi.” Manga ta popi, ye Judas oku uluka ko nongundu onene ‘nokwe ya kuJesus e ta ti: “Muhongi, wa tokelwa.” Oye nokwe mu thipi komilungu.’ (Mat. 26:46-50; Luk. 22:47, 52) Judas okwa “gwaaleke omulumentu kee na oondjo,” Jesus Kristus, sho e mu gandja miikaha yaatondi ye. Judas okwa li a pewa ingapi opo a gwaaleke Jesus? Uumaliwa uusiliveli 30. (Mat. 27:3-5) Okuza mpono edhina Judas noshitya “omugwaaleki” oya kala yi na eityo lya faathana, unene tuu ngele omuntu ota kengelele kuume ke.b
7. Oshike tatu ilongo moshiholelwa (a) shaAbsalom naJudas? (b) shaDelila?
7 Oshike tatu ilongo moshiholelwa shaJudas, Absalom naDelila? Ohugunina yAbsalom naJudas oya li ombwiinayi, molwaashoka oya li ya kengelele aagwayekwa yaJehova. (2 Sam. 18:9, 14-17; Iil. 1:18-20) Ngele edhina Delila tali tumbulwa, nena otali ku dhimbulukitha kutya okwa li omugwaaleki noku na ohole yokambweenga. (Eps. 119:158) Onkee ano, natu ekeleheni kokulekule iikala yokulalakanena esimano nolwiho, molwaashoka Jehova ita ka kala e tu hokwa ngele otu yi na. Iiholelwa mbika otayi tu kwathele tu ekelehi kehe shimwe shoka tashi tu imbi tu kale aadhiginini.
LANDULA IIHOLELWA YAAMBOKA YA LI AADHIGININI
8, 9. (a) Omolwashike Jonatan a li u uvaneke okukala omudhiginini kuDavid? (b) Ongiini tatu vulu okuholela Jonatan kunena?
8 Ombiimbeli oya popya iiholelwa oyindji yoohandimwe mboka ya li aadhiginini. Natu taleni iyali yomuyo, nokutala kutya otatu ilongo mo shike. Shotango oshaJonatan, omulumentu ngoka a li omudhiginini kuDavid. Jonatan osheeli shomukwaniilwa Saul, okwa li e na ompito yokulandula he muukwaniilwa. Ihe okwa li e shi shi nawa kutya Jehova okwa hogolola David a ninge omukwaniilwa gwaIsraeli. Jonatan okwa li a simaneka etokolo lyaJehova ‘nokwa panga uukuume wa kola naDavid.’ Pehala lyoku mu tala ko e li omutondi, Jonatan okwa li u uvaneke kutya ota ka longela kumwe naye. Okwa pe David iinima ye ngaashi, elwaakani, egongamwele, uutati nekwamo, naashoka osha li euliko kutya okwa gandja uukwaniilwa kuye. (1 Sam. 18:1-4) Jonatan okwa li a ‘tsu David omukumo.’ Okwa li a hupula nokuli omwenyo gwe sho a li ta popile David koshipala shahe Saul. Molwaashoka Jonatan okwa li omudhiginini, okwa lombwele David a ti: “Ngoye oto ka ninga omukwaniilwa gwaIsraeli nangame ote kala elenga lyoye lyotango.” (1 Sam. 20:30-34; 23:16, 17) Sho Jonatan a si, David okwa li a nika uuthigwa noonkondo nokwe mu imbile ontakumandjimbo molwaashoka okwa li e mu hole.—2 Sam. 1:17, 26.
9 Omolwuudhiginini we Jonatan ka li a tsila David ondumbo. Okwa li a vulika kOmunamapangeloagehe, Jehova, nokwa ambidhidha tagu pu mo omugwayekwa Gwe, David. Otu na wo okuninga sha faathana nokunena. Otu na okulongela kumwe nehalo ewanawa naamwatate mboka ya langekwa po ye tu wilike, nonando katu na iinakugwanithwa yi ikalekelwa megongalo.—1 Tes. 5:12, 13; Heb. 13:17, 24.
10, 11. (a) Omolwashike Petrus a li omudhiginini kuJesus? (b) Ongiini tatu vulu okuholela Petrus, noshi na oku tu inyengitha tu ninge shike?
10 Oshiholelwa oshitiyali shoka tatu ka tala, oshomuyapostoli Petrus ngoka a li omudhiginini kuJesus. Sho Jesus a longitha oohapu dhopathaneko okutsa omuthindo esimano lyokukala neitaalo tali longo molutu nombinzi ye ndjoka a li e li pokuyamba, aalongwa ye oyendji oya li ye mu thigi po. Oya li taya ti kutya elongo lye ekukutu. (Joh. 6:53-60, 66) Jesus okwa pula aayapostoli ye 12 a ti: “Ne inamu hala okuya?” Ihe Petrus okwa yamukula a ti: “Omuwa, otatu yi kulye? Ngoye ou na oohapu ndhoka tadhi gandja omwenyo gwaaluhe. Ngashingeyi tse otwi itaala notu shi shi kutya ngoye Omuyapuki ngoka wa za kuKalunga.” (Joh. 6:67-69) Mbela shino osha hala okutya Petrus okwa li e uvite ko nawanawa eyambo ndyoka Jesus a li a popi? Otashi vulika naye a li kee li uvite ko. Kakele kaashono, okwa li a tokola toko a kale omudhiginini komugwayekwa gwaKalunga.
11 Petrus ina tya kutya Jesus okwa li e na etaloko lya puka nonokutya ngele okwa pewa ethimbo, otashi vulika e ki ipe uusama omolwoohapu dhe ndhoka. Petrus okwa zimine neifupipiko kutya Jesus oku na “oohapu ndhoka tadhi gandja omwenyo gwaaluhe.” Ohatu inyenge ngiini kunena uuna twa lesha oshinima shontumba shoka kaatu uvite ko nando eta nenge shoka shi li kokule nomadhiladhilo getu miileshomwa mbyoka ya nyanyangidhwa ‘komumati omwiinekelwa’? Otu na okuninga oonkambadhala dha mana mo tu shi uve ko, pehala lyokukala twa tegelela pu ningwe elunduluko ndyoka tali opalele omadhiladhilo getu.—Lesha Lukas 12:42.
KALA OMUDHIGININI KUKUUME KOPANDJOKANA
12, 13. Ohashi ende ngiini opo uukengeleledhi wu mone uupitilo mondjokana, nomolwashike omimvo dhopokati kaadhi na okukala eipopilo?
12 Uukengeleledhi kehe owu li oshinima oshiwinayi. Otu na oku wu kondjitha lela kaawu yone po ombili yegongalo nuukumwe momagumbo gAakriste. Natu ka taleni nkene tatu vulu okukala aadhiginini kookuume ketu kopandjokana nosho wo kuKalunga ketu.
13 Oludhi lumwe lwokukengelela ndoka halu teya po omagumbo olwo okuyona ondjokana. Omuhondeli oha yono po uuthemba we wokukala i inekelwa kukuume ke, mokukala e na iihole nomuntu gulwe i ili. Kuume ngoka a kengelelwa oha kala a hendwa komwenyo, ye iha kala we e shi kutya na ninge shike. Ohashi ende ngiini kaaihokani mboka ye holathane, opo gumwe gwomuyo a kengelele mukwawo? Olundji ohashi holoka uuna ohole yawo tayi ende tayi talala omolwuulelekule. Omuprofesoli gwonkalonawa yaantu, Gabriella Turnaturi okwa ti kutya “ngele ookuume kopandjokana ohaya kala pamwe aluhe [oshidhigu okuyona ondjokana], ihe ngele ihaya kala pamwe, nena uukengeleledhi nawo otawu ka mona uupitilo.” Uulelekule ohawu vulu okuningitha gumwe gwomaaihokani a kengelele mukwawo, nokuli nonando otashi vulika ye na omimvo dhopokati. Pashiholelwa, omusamane gumwe ngoka e na omimvo 50 okwa li a henge po omukulukadhi gwe omwiinekelwa ngoka ya kala naye mondjokana omimvo 25 e ta kala e na iihole nomukiintu gulwe. Yamwe ohayi ipopile taya ti kutya osho owala shi na okukala ngaaka komuntu gwoomvula 50. Ihe okukala kuu shi omwiinekelwa kukuume kopandjokana nonando owu na omimvo dhopokati, oshi li uukengeleledhi.c
14. (a) Jehova oha kala u uvite ngiini ngele kuume kopandjokana ta kengelele mukwawo? (b) Jesus okwa ti ngiini shi na ko nasha nokwiinekelathana mondjokana?
14 Mbela Jehova oha kala u uvite ngiini uuna gumwe a thiga po kuume ke kopandjokana nopwaa na etompelo lyopamanyolo? Kalunga ketu ‘oku tonde eteyondjokana,’ noha pangula ayehe mboka kaaye shi aadhiginini nohaya hepeke ookuume kawo kopandjokana noku ya thiga po. (Lesha Maleaki 2:13-16.) Jesus okwa li a popi oohapu ndhoka dhi li metsokumwe nehalo lyaHe. Jesus okwa ti kutya kapu ngoka te etha po nenge ta thigi po kuume ngoka kee na ondjo e ta kala inaa mona iilanduliko.—Lesha Mateus 19:3-6, 9.
15. Mboka ye li mondjokana otaya vulu ngiini okukala aadhiginini kookuume kawo?
15 Mboka ye li mondjokana otaya vulu ngiini okukala aadhiginini kookuume kawo? Oohapu dhaKalunga otadhi ti: ‘Nyanyukilwa omukulukadhi gwoye nenge omusamane gwoye wa za naye kuufuko.’ Otadhi ti wo: “Nyanyukilwa omwenyo gwoye namukadhoye [nenge nomusamane gwoye] ngoka u mu holelele.” (Omayel. 5:18; Omuuv. 9:9) Sho aaihokani taye ende taya kulupa, oye na ‘okukala pamwe aluhe,’ palutu nopamaiyuvo. Shoka otashi ti kutya oye na okukala haya pulakenathana, haya kala pamwe ethimbo ele nokukala ye holathane lela. Oye na okukambadhala okukaleka po ondjokana yawo nokukala ye na ekwatathano ewanawa naJehova. Oya pumbwa okukonakona Ombiimbeli pamwe, okulonga pamwe muukalele nokugalikana pamwe, opo Jehova e ya yambeke.
KALA OMUDHIGININI KUJEHOVA
16, 17. (a) Uudhiginini wetu kuKalunga otawu vulu ngiini okumakelwa megumbo nomegongalo? (b) Hokolola nkene okuvulika kelombwelo lyaKalunga lyokwaaendathana nomupambele a kondwa taku vulu okweeta iizemo iiwanawa.
16 Yamwe mboka ya li ya yona omayono ga kwata miiti megongalo oya li ya ‘gandwa, opo ya taambe eitaalo lyu uka.’ (Tit. 1:13) Yo yamwe oya li ya kondwa omolweihumbato lyawo ewinayi. “Mboka ya putudhwa kegeelo ndyoka,” oya li ya kwathelwa ya kale ye na ekwatathano ewanawa naKalunga. (Heb. 12:11) Ongiini ngele omupambele gwetu nenge kuume ketu kopothingo okwa kondwa? Otu na okukala aadhiginini kuKalunga, ihe hakomuntu ngoka. Jehova ohe tu tala ngele otatu vulika ngaa kelombwelo lye ndyoka tali ti kutya katu na okukala nekwatathano nakehe ngoka a kondwa.—Lesha 1 Aakorinto 5:11-13.
17 Aanegumbo yamwe oya tula po oshiholelwa oshiwanawa shokukala ya dhiginina kelombwelo lyaJehova ndyoka. Mandjawo omwa li omumati gumwe ngoka a kala a kondwa uule woomvula dhi vulithe pomulongo. Ihe uule wethimbo alihe ndyoka he, yina naamwayinamati yane, oya kala ihaaya “kwatathana” naye. Omathimbo gamwe okwa kala ha kambadhala okuninga iinima pamwe nayo, ihe kapu na gumwe ngoka a li he mu kumbulula. Sho a galulilwa megongalo okwa popi kutya okwa li ha kala a hala okuninga iinima pamwe nooyandjawo, unene tuu koongulohi hoka ha kala oye awike. Okwa ti kutya andola yaandjawo oya li haya kala naye okathimbo nando okashona, ando oshe mu gwanena owala. Ihe sho inaaya kala haya popi naye, oshe mu thiminike a galukile kuJehova. Ngele oho kala to makelwa wu endathane nomupambele a kondwa, dhiladhila aluhe koshiholelwa shoka.
18. Owa tokola toko okuninga shike konima sho wa konakona iiholelwa yayamwe mboka ya li aadhiginini naamboka ya li kaaye shi aadhiginini?
18 Muuyuni mbuka tu li uudhiginini owa pumba, wo uukengeleledhi owa vuka. Ihe atuheni, otatu vulu okulandula iiholelwa yAakriste ooyakwetu megongalo mboka aadhiginini. Eihumbato lyawo ewanawa olya fa tali tu lombwele tali ti: “One naKalunga omu li oonzapo. Otwa kala aadhiginini, aayapuki notwaa na oshipo mokati keni ooitaali.” (1 Tes. 2:10, NW) Onkee ano, atuheni natu kale aadhiginini kuKalunga ketu nosho wo kooyakwetu.
[Omanyolo gopevi]
a Ekwatathano lyi ikalekelwa ndyoka Simson a li e na naJehova e li Omunasiri, olyo lya li hali mu nkondopaleke. Oonkondo dhe kadha li hadhi zi momafufu ge go gene, ihe omwaashoka ga li ge lile po.
b Uutumbulilo “Judas okwa thipi,” otawu gandja eityo lyoshilonga shoka tashi “ningwa omolwuukengeleledhi.”
c Opo wu mone ekwatho nkene wu na okuungaunga nakuume kopandjokana ngoka kee shi omudhiginini, tala oshitopolwa: “Nkene to vulu okwiidhidhimika ngele wa kengelelwa kukuume kopandjokana” mOshungolangelo ye 1 Juni 2010, epandja 29-32.
[Ethano pepandja 10]
Petrus okwa li omudhiginini kuJesus, omugwayekwa gwaKalunga, nonando yalwe oya li ye mu thigi po