Jehova ohe tu gamene tu ka mone ehupitho

“Molwaashoka [omwi] inekela Kalunga meitaalo, ote mú gamene noonkondo dhe, sigo tamu mono ehupitho ndyoka lya longekidhwa oku ka hololwa pehulilo lyomathimbo.”—1 PET. 1:4, 5.

OTO YAMUKULA NGIINI?

Jehova ohe tu eta ngiini kelongelokalunga lyashili?

Ongiini tatu vulu okweetha Jehova e tu wilike?

Omomukalo guni Jehova he tu tsu omukumo?

1, 2. (a) Omolwashike tu na uushili kutya Kalunga ote ke tu kwathela tu kale aadhiginini? (b) Jehova oku tu shi nawa shi thike peni?

JESUS okwa ti: “Ngoka ti idhidhimike sigo ehulilo, oye ta hupithwa.” (Mat. 24:13) Oohapu dhe ndhoka otadhi ulike kutya otu na okwiidhidhimika sigo ehulilo, opo tu ka hupe sho Kalunga ta ka hanagula po uuyuni waSatana. Ihe shika itashi ti kutya Jehova okwa tegelela tu shi ninge kuunongo nokoonkondo dhetu yene. Ombiimbeli otayi ti: “Kalunga oku shi okwiinekelwa. Onkee ite mú ethele memakelo li vule oonkondo dheni. Ihe ngele ta pitika, mu makelwe, ote mú pe ompito okuza mo mulyo noonkondo dhoku li humbata.” (1 Kor. 10:13) Oohapu ndhika odha hala okutya shike?

² Jehova oha si oshimpwiyu kaatu ye momamakelo ngoka ge vule oonkondo dhetu. Ohe shi ningi, molwaashoka oku shi nawa onshitwe yetu, omashongo ngoka hage tu adha noku shi wo kutya otatu vulu okwiidhidhimika sigo openi. Mbela Kalunga oku tu shi ngaa shili nawa? Eeno, molwaashoka omanyolo otaga holola kutya oku tu shi nawa lela. Okwa tseya nawa eihumbato lyetu nosho wo shoka hatu ningi esiku nesiku. Oha vulu okumona shoka tatu dhiladhila nosho wo shoka shi li momitima dhetu.—Lesha Episalomi 139:1-6.

3, 4. (a) Shoka David a li a mono otashi ulike ngiini kutya Jehova oku na ko nasha natse pauhandimwe? (b) Jehova ota longo iilonga iindhindhilikwedhi yini kunena?

³ Yamwe oye wete kutya Kalunga ke na siku a ka kale a hokwa aantu yowala. Omupisalomi David okwa li a tedhatedha kombinga yaashoka e ta nyola ta ti: “Ngele te tala kegulu ndyoka we li shiti, komwedhi noonyothi mbyoka we yi uthile omahala gayo—omuntu omushike, sho ho mu dhimbulukwa?” (Eps. 8:3, 4) Otashi vulika David a li a pula epulo ndika, molwaashoka okwa mona nkene Jehova e na ko nasha naye. Nonando David oye a li onkelo yaIsai, okwa li ‘o opalela’ Jehova nokwa li e mu kutha ‘kuusita woonzi momalundu e te mu ningi omuleli gwaantu ye,’ Aaisraeli. (1 Sam. 13:14; 2 Sam. 7:8) Dhiladhila owala nkene David a li u uvite sho a mono kutya Omushiti gwaayihe oha pulakene kuye uuna ta tedhatedha, nonando okwa li owala okamatyona haka litha oonzi.

⁴ Jehova ohe tu ulukile wo ohole momukalo omundhindhilikwedhi kunena. Ohe eta ‘iinima iiwanawa lela yomiigwana ayihe’ melongelokalunga lyashili. Aapiya ye mboka ohe ya kwathele ya kale aadhiginini. (Hag. 2:7, NW) Opo tu uve ko nawa nkene Jehova he tu kwathele tu kale aadhiginini, natu tale tango nkene he eta aantu melongelokalunga lyashili.

KALUNGA OYE HE ETA AANTU KUYE

5. Yelitha nkene Jehova he eta aantu kOmwana.

⁵ Jesus okwa ti: “Kaku na nando omuntu ta vulu okuya kungame, okuninga Tate, nguka a tuma ndje, te mu eta kungame.” (Joh. 6:44) Oohapu ndhoka otadhi ulike kutya otwa pumbwa ekwatho lyaKalunga, opo tu ninge aalongwa yaKristus. Mbela Jehova ohe eta ngiini mboka ye na omitima dha fa dhoonzi kOmwana? Ohe shi ningi okupitila miilonga yokuuvitha onkundana ombwanawa nokekwatho lyombepo ondjapuki. Pashiholelwa, sho Paulus naatumwa ooyakwawo ya li muFilippi, oya tsakanene nomukiintu gwedhina Lidia e taye mu uvithile. Oohapu dhaKalunga otadhi ti: “Omuwa nokwe egulula omwenyo gwe okutaamba nokwiitaala shoka Paulus a ti.” Eeno, ombepo yaKalunga oya li ya kwathele Lidia u uve ko noku taambe ko etumwalaka ndyoka e ta ninginithwa pamwe negumbo lye.—Iil. 16:13-15.

6. Omomukalo guni Jehova e tu eta melongelokalunga lyashili?

⁶ Mbela Lidia oye owala a li a ningilwa oshinima shono? Hasho nando. Ngele owi iyapulila Kalunga, nena oye e ku eta melongelokalunga lyashili. Tate yetu gwomegulu okwa mona uuwanawa mboka wu li momutima gwoye, ngaashi owala a li e shi ningile Lidia. Jehova oye e ku kwathela nombepo ye ondjapuki wu uve ko onkundana ombwanawa nowu yi taambe ko. (1 Kor. 2:11, 12) Oha yambeke oonkambadhala dhoye wu longe ehalo lye, sho to tula miilonga shoka wi ilonga. Oha kala a nyanyukwa ngele owe mu iyapulile. Sho wa tameke okweenda mondjila ndjoka tayi fala komwenyo gwaaluhe, Jehova oye a kala ta wilike onkatu kehe to katuka.

7. Otu shi shi ngiini kutya Kalunga ote ke tu kwathela tu kale aadhiginini?

⁷ Jehova oye e tu hilila kuye opo tu mu longele, notu na uushili kutya ota tsikile oku tu kwathela tu kale aadhiginini. Oku shi kutya omanga oye e tu eta moshili, itatu vulu tu kale mo kutse yene. Omuyapostoli Petrus okwa nyolele Aakriste aagwayekwa a ti: “Molwaashoka [omwi] inekela Kalunga meitaalo, ote mú gamene noonkondo dhe, sigo tamu mono ehupitho ndyoka lya longekidhwa oku ka hololwa pehulilo lyomathimbo.” (1 Pet. 1:4, 5) Ekotampango lyoohapu ndhoka otali longo kAakriste ayehe kunena notu na okukala twe li hokwa pauhandimwe. Omolwashike mbela? Omolwaashoka atuhe otwa pumbwa ekwatho lyaKalunga tu kale aadhiginini kuye.

KALA WA KOTOKA KUU GWILE MEYONO

8. Omolwashike tu na okukala twa kotoka, opo kaatu gwile meyono?

⁸ Oothina dhonkalamwenyo nosho wo okwaagwanenena kwetu oyo iinima yimwe mbyoka tashi vulika yi nkundipaleke ekwatathano lyetu naKalunga. Ohashi vulika wo tu gwile meyono omolwayo, nopwaa na oku shi nongela. (Lesha Aagalati 6:1.) Uushili waashoka owi iwetikile kushoka sha li sha ningilwa David monkalamwenyo ye.

9, 10. Jehova okwa li a ningi po shike a gamene David kaa gwile meyono, nohe tu ningile shike kunena?

⁹ David okwa li u ulike kutya oku shi okwiipangela mwene, sho a li ta tidhwa komukwaniilwa Saul, ngoka a li e mu tsila ondumbo. (1 Sam. 24:2-7) Ihe konima yokathimbo David okwa li a nyengwa okwiipangela, sho ye naalumentu ye ya li ya sa ondjala nenota. David okwa pula Nabal, Omwiisraeli omukwawo e mu pe iikulya nomeya. Nabal okwa tindi, noshinima shoka osha li sha geyitha David. Okwa li a thita po kondjahi nokwa li a hala okudhipaga egumbo alihe lyaNabal. David okwa li a dhimbwa kutya ota ka kala e na ondjo yombinzi koshipala shaKalunga ngele okwa dhipaga aantu kaaye na ondjo. Omukulukadhi gwaNabal, Abigajil okwa li a yi olunyala moshinima shoka, nosha li sha kwathele David kaa gwile meyono. David okwa li e wete kutya Jehova okwe mu kwathela moshinima shoka. David okwa lombwele Abigajil a ti: “OMUWA Kalunga kaIsraeli na hambelelwe, sho e ku tumu, u tsakene ndje! Kalunga na hambelelwe molwoondunge dhoye oombwanawa nomolwashoka wa ningi nena ndjika okugamena ndje kiihuna yedhipago nokugalulila aatondi yandje ondjo yawo.”—1 Sam. 25:9-13, 21, 22, 32, 33.

¹⁰ Mehokololo ndika otatu ilongo mo kutya Jehova okwa li a longitha Abigajil a gamene David kaa gwile meyono. Jehova ohe tu ningile sha faathana kunena. Ihe shika itashi ti kutya ota ka kala aluhe he tu tumine gumwe e tu pukulule uuna tu uka meyono. Shimwe ishewe, ihatu kala naanaa tu shi kutya Jehova ota ka ninga po shike moonkalo dhontumba noihatu kala tu shi kutya ota ka pitika shike shi ningwe a gwanithe po elalakano lye. (Omuuv. 11:5) Kakele kaashono, natu kale neinekelo kutya oku shi oonkalo dhetu adhihe note ke tu kwathela tu kale aadhiginini. Jehova ote tu shilipaleke moohapu dhe ta ti: “Otandi ku ulukile ondjila ndjo u na okulandula; otandi ku wilike e tandi ku tonatele.” (Eps. 32:8) Ohe tu tonatele ngiini? Ohatu mono mo uuwanawa washike? Omolwashike tu na uushili kutya Jehova ota wilike oshigwana she kunena? Embo lyEhololo otali yamukula omapulo ngoka.

OKUTAAMBA KO OMAYELE OHAKU TU GAMENE

11. Jehova oku shi shi thike peni kombinga yiinima mbyoka tayi ningwa momagongalo gaapiya ye kunena?

¹¹ Omukwaniilwa Jesus Kristus okwa li a konakona omagongalo gaheyali ngoka ga li muAsia eshona. Ehololo ontopolwa 2 no 3, otali popi emoniko ndyoka tali ulike nkene Kristus a li ta konenene oonkalo dhokondandalunde momagongalo ngoka. Okwa li a pandula omagongalo gamwe e ta pe gamwe omayele, nokwa li a tumbula aantu yamwe yomugo kondandalunde. Emoniko ndika otali ti shike? Omagongalo gaheyali otaga thaneke Aakriste aagwayekwa mboka ya li ko konima yo 1914. Nonando omayele ngoka Jesus a pe omagongalo gaheyali oga li ga pamba unene aagwayekwa, otaga longo wo nokomagongalo gaapiya yaKalunga muuyuni auhe kunena. Onkee ano, otatu vulu okuthika pehulithodhiladhilo kutya Jehova ota wilike oshigwana she pethimbo lyetu okupitila mOmwana. Ongiini tatu vulu okumona uuwanawa mewiliko ndyoka?

12. Ongiini tatu vulu okweetha Jehova u ukithe oonkatu dhetu?

¹² Ekonakonombiimbeli lyopaumwene oli li omukalo gumwe gwokumona uuwanawa mewiliko lyaJehova lyopahole. Oha gandja omayele gopaMbiimbeli okupitila miileshomwa mbyoka hayi nyanyangidhwa komupiya omudhiginini nomunandunge. (Mat. 24:45, NW) Ihe opo tu mone uuwanawa muyo, otu na okukonga ethimbo tu yi konakone e tatu tula miilonga shoka shi li mo. Kalunga ohe tu ‘gamene twaa punduke’ okupitila mekonakonombiimbeli lyopaumwene. (Jud. 24) Mbela owa leshele nale oshinima shontumba miileshomwa yetu e to ipopile to ti shino osha fa owala ongame sha nyolelwa? Ngele osho, nena kala wu shi kutya Jehova oye te ku pukulula. Oha vulu okulongitha ombepo ye yi ukithe omadhiladhilo getu, opo tu lundulule eihumbato lyetu nenge iikala yetu. Ohe shi ningi a fa omuntu ta pupula kuume ke komapepe a gandje eitulomo kuye. Uuna tatu etha ombepo ondjapuki yaJehova yi tu wilike, nena ote ku ukitha oonkatu dhetu. (Lesha Episalomi 139:23, 24.) Onkee ano, natu gandje eitulomo lela kunkene hatu ningi ekonakono lyetu.

13. Omolwashike shi li nawa tu gandje eitulomo lela kunkene hatu ningi ekonakono lyetu?

¹³ Ngele ohatu longitha ethimbo olindji momainyanyudho, itatu ka kala we nethimbo lyokukonakona paumwene. Omumwatate gumwe okwa ti: “Oshipu okwiipwililika ekonakono lyopaumwene. Kunena omainyanyudho oga ha noge na ombiliha shi vulithe nale, molwaashoka oto ga adha ko-TV, kokompiuta nokoongodhi dhopeke. Oge li apuhe.” Ngele inatu kotoka, omainyanyudho otaga vulu okumana po ethimbo lyetu lyokukonakona iinima yopambepo muule ngolongo nage tu imbi thiluthilu tu kale ihaatu konakona we. (Ef. 5:15-17) Kehe gumwe ni ipule ta ti: ‘Ohandi konakona muule Oohapu dhaKalunga iikando yi thike peni? Ohandi shi ningi owala uuna ndi na oshipopiwa, nenge tandi ilongekidha oshitopolwa shoka tandi ka gandja pokugongala?’ Ngele osho ho ningi ngawo, ninga po sha. Oto vulu okulongitha Esiku lyElongelokalunga nenge esiku lyekonakono lyopaumwene wu kale ho yi muule wuunongo wopambepo mboka Jehova e tu pa wu tu gamene tu ka hupithwe.—Omayel. 2:1-5.

ETSOMUKUMO OHALI TU KWATHELE TU IDHIDHIMIKE

14. Omanyolo otage shi ulike ngiini kutya Jehova oku na ko nasha nomaiyuvo getu?

¹⁴ David okwa pita muudhigu oundji monkalamwenyo ye. (1 Sam. 30:3-6) Ombiimbeli otayi popi kutya Jehova okwa li e wete shoka David e li musho. (Lesha Episalomi 34:18; 56:8.) Kalunga oku shi wo nawa omaiyuvo getu. Uuna twa “dhengwa pevi” nenge twa “kanitha etegameno,” Jehova oha hedha popepi natse. Oshinima shoka otashi tu pe etegameno. David okwiimbi a ti: “Otandi nyanyukwa nokutanta omolwesilohenda lyoye. Ou wete okuhepekwa kwandje nowa tseya uudhigu wandje.” (Eps. 31:7) Kakele kokukala owala e shi uudhigu wetu, Jehova ohe tu kwathele wo. Ohe tu hekeleke noku tu tsa omukumo. Omukalo gumwe moka he shi ningi okupitila mokugongala kwopaKriste.

15. Oshike tatu ilongo mwaashoka sha li sha ningilwa Asaf?

¹⁵ Onkalo moka omupisalomi Asaf a li otayi tu kwathele tu mone esimano lyokugongala. Okwa li ti ipula ngele osha simana ngaa okulongela Kalunga, omolwokwaa na uuyuuki hoka kwa li apuhe. Asaf okwa li a teka omukumo. Okwa popi nkene e uvite a ti: ‘Omwenyo gwandje ogwa geye, niitiyanathigo yandje oya tsu ndje.’ Okonyala e ethe po okulongela Jehova. Oshike sha li sha kwathele Asaf a kale e na ondjele? Okwa ti: ‘Oosho e ya mongulu yaKalunga.’ Onkalo ye oya li ya hwepopala sho e ya mokati kaapiya yaJehova ooyakwawo. Okwa li e shi mono kutya uulinawa waakolokoshi owopokathimbo, molwaashoka Jehova ote ku ukitha iinima, note ke shi ninga lela. (Eps. 73:2, 13-22) Otatu vulu wo okwiiyadha monkalo ya fa yaAsaf. Otashi vulika tu kale twa gwililwa po notwa teka omukumo omolwokwaa na uuyuuki hoka ku li muuyuni waSatana kunena. Ihe okugongala pamwe naamwatate ohaku tu talaleke noku tu kwathela tu mone enyanyu mokulongela Jehova.

16. Oshiholelwa shaHanna otashi vulu oku tu kwathela ngiini?

¹⁶ Ongiini ngele oshidhigu kungoye okukala pokugongala omolwonkalo ndjoka yi li megongalo? Otashi vulika mu na omumwameme nenge omumwatate gumwe ihaamu tsu mu thithe, nenge wu kale wa sa ohoni sho we etha po oshinakugwanithwa shoye. Ngele osho ngawo, oshiholelwa shaHanna otashi vulu oku ku kwathela. (Lesha 1 Samuel 1:4-8.) Peninna ngoka a li a hokanwa naye okwa li he mu kondjitha, naashoka osha li hashi ehameke Hanna. Peninna okwa kala ha hindi aluhe Hanna omumvo nomumvo unene tuu ngele taya fala omayambo ketsalihangano lyaJehova kuShilo. Hanna okwa li ha ‘lili nokwa li ha tindi okulya,’ molwaashoka okwa li ha kala a lulilwa. Ihe nonando ongaaka, shoka inashi mu imba a ka galikane kotempeli. Jehova okwa li e mu laleke nuuyamba omolwuudhiginini we.—1 Sam. 1:11, 20.

17, 18. (a) Omomikalo dhini hatu mono etsomukumo pokugongala? (b) Owu uvite ngiini sho Jehova he ku kenukile, opo wu ka hupithwe?

¹⁷ Oshi li nawa kAakriste kunena ya landule oshiholelwa shaHanna shokukala aluhe pokugongala. Ngaashi tu shi shi nawa, ohatu tsuwa po omukumo. (Heb. 10:24, 25) Okweendathana nAakriste ooyakwetu ohaku tu hekeleke. Iipopiwa yawo nomatyokosha gawo ohaga gumu omitima dhetu. Omanga okugongala inaaku tameka nosho wo ngele kwa piti mo, otashi vulika Omukriste omukwetu a pulakene neitulomo kutse nenge a popye oohapu tadhi tu hekeleke. (Omayel. 15:23; 17:17) Omaimbilo ngoka hatu imbile Jehova ohage tu kumike. Jehova ohe tu “hekeleke” nohe tu ambidhidha ngele otwa hala oku mu longela nuudhiginini. Shika ohe shi ningi unene tuu uuna twa “sa iimpwiyu” notwa pumbwa etsomukumo ndyoka hatu mono pokugongala.—Eps. 94:18, 19.

¹⁸ Molwaashoka Kalunga ketu omunalukeno, natu kale tu uvite ngaashi omupisalomi Asaf ngoka i imbi a ti: “Owa kwata ndje koshikaha. Otandi wilikwa komaudhikilo goye.” (Eps. 73:23, 24) Inatu nyanyukwa tuu sho Jehova he tu gamene tu ka mone ehupitho!

[Ethano pepandja 28]

Jehova oye e ku eta kuye

[Ethano pepandja 30]

Okutula miilonga omayele gaJehova ohaku tu gamene

[Ethano pepandja 31]

Etsomukumo ndyoka hatu pewa ohali tu kwathele