Onda kala nda kwata konguwo yOmujuda uule woomvula 70

Nakuhokolola Leonard Smith

Sho nda li ndi na oomvula 13 lwaampono, onda li nda kumithwa komahokololo gaali gOmbiimbeli. Ngashingeyi ondi na oomvula 70 nasha, ihe otandi dhimbulukwa natango ethimbo sho nda li ndu uvu ko nawa Sakaria 8:23, OB-1954 ngoka ta popi “aalumentu omulongo” ya kwata ‘konguwo yomulumentu Omujuda.’ Oya lombwele Omujuda ngoka ya ti: ‘Otwa hala okweenda pamwe nane; oshoka otse tu uvu, Kalunga e li pamwe nane.’

OMULUMENTU Omujuda ota thaneke Aakriste aagwayekwa, ‘naalumentu omulongo’ otaya thaneke ‘oonzi dhilwe’ nenge ongundu “yaJonadab” edhina ndyoka ya li hayi ithanwa nale.a (Joh. 10:16) Sho ndu uvu ko oshili, onda tseya kutya etegameno lyandje lyokukala nomwenyo kombanda yevi sigo aluhe, olyi ikolelela unene kokuyambidhidha nuulaadhi ongundu yaagwayekwa.

Eyele lyaJesus kombinga ‘yoonzi’ nosho wo ‘yiikombo’ ndyoka tali adhika muMateus 25:31-46 olya li wo lya kumitha ndje noonkondo. “Oonzi” otadhi thaneke aantu mboka taya ka hupa pethimbo lyehulilo, molwaashoka ohaya ningile uuwanawa aamwahe yaKristus aagwayekwa mboka ye li natango kombanda yevi. Ndi li omugundjuka gwomongundu yaJonadab, ohandi ilombwele aluhe te ti: ‘Ondi na okwaambidhidha aagwayekwa nokutaamba ko ewiliko lyawo, molwaashoka Kalunga oku li pamwe nayo, ngele onda hala Kristus a tale ndje ko ndi li onzi.’ Onda kala tandi ambidhidha aagwayekwa uule woomimvo dhi vulithe 70.

‘NGAME ONDI LI PENI?’

Meme okwa ninginithwa mo 1925 pokugongala hoka kwa li moshinyanga shaBetel, shoka sha li hashi longithwa kaamwatate. Osha li hashi ithanwa Etsalihangano lyaLondon. Onda valwa mo 15 Kotoba 1926. Onda ninginitwa mo 1940, poshigongi shoshikandjo muDover shi li komunkulofuta gwaIngilanda. Mokukoka kwandje onda kala ndi hole oshili yOmbiimbeli. ‘Onguwo yOmujuda’ ndjoka nda li nda kwata oshikando shotango oyameme, molwaashoka naye omugwayekwa. Pethimbo mpoka tate nosho wo omumwamemekadhona omukuluntu kaya li haya longele Jehova. Otwa kala megongalo lyedhina Gillingham li li kuumbugantuzilo waIngilanda, ndyoka lya li lya thikama po konyala maagwayekwa. Meme okwa li omulaadhi miilonga yokuuvitha.

MuSeptemba 1941 omwa ningilwe oshigongi shoshitopolwa muLeicester, shomuIngilanda. Opwa li pwa gandjwa oshipopiwa shi na oshipalanyolo: “Uudhiginini” nosha li tashi kundathana omupangeli gwuuyuni mbuka. Oshipopiwa shoka osha li sha kwathele ndje lwotango ndi uve ko kutya natse otwa kwatelwa mompata ndjoka yi li pokati kaJehova naSatana. Onkee ano, otu na okukala twa gama kombinga yaJehova nokukala aadhiginini kuye e li Omunamapangelo agehe.

Poshigongi shoka aagundjuka oya li ya ladhipikwa ya lalakanene iilonga yuukokolindjila. Oshipopiwa shi na oshipalanyolo: “Kehe gumwe mehangano oku na ompito yokuninga omukokolindjila,” osha li sha ningitha ndje ndi ipule kutya ‘ngame ondi li peni?’ Oshigongi shoka osha li sha kwathele ndje ndi mone kutya ndi li oshilyo shongundu yaJonadab, ondi na oshinakugwanithwa shokukwathela aagwayekwa miilonga yokuuvitha. Nopwaa na okukwatakwata, ondu udhitha ofooloma yokuya muukokolindjila.

IILONGA YUUKOKOLINDJILA PETHIMBO LYIITA

Sho ndi na omimvo 15, onda li nda langekwa po ndi li omukokolindjila i ikalekelwa me 1 Desemba 1941. Petameko otwa kala hatu longo pamwe nameme ngoka naye a li omukokolindjila, ihe konima yethimbo okwa li e etha po iilonga mbyoka omolwuukolele wopalutu. Oshitayimbelewa shaLondon osha li sha ningi elongekidho tu kale hatu longo pamwe nomumwatate Ron Parkin ngoka e li ngashingeyi oshilyo shOkomitiye yoshitayimbelewa muPuerto Rico.

Otwa li twa tumwa kiitopolwa yokomunkulofuta hayi ithanwa Broadstairs naRamsgate yi li mondoolopa yedhina Kent. Otwa li hatu kala mondunda hatu yi futu komwedhi. Aakokolindjila oya li haya pewa oothilinga 40 komwedhi yi ikwathele nadho, iimalilwa mbyoka oyi thike N$ 63.00 lwaampono. Otwa li owala hatu hupu po niimaliwa iishona shampa twa futu ondunda yetu, nokatwa li hatu kala tu shi kutya esiku tali landula otatu li shike. Ihe Jehova okwa kala aluhe noku tu sila oshimpwiyu palutu.

Olundji otwa kala hatu hingi nokuundula oombasikela dha tsilika iileshomwa oshimati lela, mokati kombepo yepukupuku tayi zi mefuta. MuKent omwa li hamu tuka oondhila dhiita dhi li pevi lela tadhi ka mboma moLondon, dho tadhi umbu iikuti yooshela dhoV-1. Esiku limwe onda li nda nuka kombasikela e tandi gwile momukanka gumwe sho ndu uvu omboma ya homa lwopomutse gwandje e tayi ka topela pehala limwe li li popepi naampoka nda li. Ihe nonando ongaaka, otwa kala tatu kokolondjila nenyanyu muKent.

ONDA KA LONGA KOBETEL

Meme okwa kala aluhe nokupopila muuwanawa oBetel. Oha ti: “Kapu na shimwe nde ku halela, kaashi shi oku ka longa moBetel.” Onda li nda kumwa nonda nyanyukwa sho ndi ithanwa muJanuali 1946 ndi ka kwathele koBetel yaLondon uule wiiwike itatu. Konima yiiwike mbyoka, omumwatate Pryce Hughes ngoka a li ta yakula moka okwa pula ndje ndi kale moBetel. Edheulo ndyoka nda mono mo olya kwathela ndje monkalamwenyo yandje ayihe.

Pethimbo mpoka iilyo yuukwanegumbo waBetel moLondon oya li 30 lwaampono. Oyindji yomuyo aamwatate aagundjuka, yamwe yomuyo aagwayekwa ngaashi, omumwatate Pryce Hughes, Edgar Clay naJack Barr, ngoka a ka ninga oshilyo shOlutuwiliki. Osha li uuthembahenda uunene okwaambidhidha aamwahe yaKristus methimbo lyuugundjuka lela. Opwa li “aawiliki” mboka haye tu tonatele.—Gal. 2:9.

Opo ndi li po esiku limwe moBetel, omumwatate gumwe okwa lombwele ndje kutya opu na omukulukadhi a hala okumona ndje. Omukulukadhi ngoka okwa li meme e na okapakete e ka kwatela monkwapa. Okwe ka pe ndje e ta yi, molwaashoka ka li a hala okupiyaganeka ndje sho te longo. Okwa li e etele ndje ondjatha yuutalala. Oshinima shoka osha li sha dhimbulukitha ndje Hanna, ngoka a li e etele omwanamati Samuel okanguwo kokombanda sho ta longo metsalihangano.—1 Sam. 2:18, 19.

IHANDI DHIMBWA NANDO OSIKOLA YAGILEAD

Mo 1947, aamwatate naamwameme yatano yomutse mboka twa li hatu longo moBetel otwa hiywa tu ye kOsikola yaGilead, koAmerika. Otwa yi mo 1948, notse twa li yomongundu onti-11. Osikola oya li muNew York, nopethimbo mpoka omwa li mu na uutalala wamemememe. Onda li nda pandula meme noonkondo ngoka a pa ndje ondjatha yuutalala.

Ihandi dhimbwa nando oomwedhi hamano ndhoka nda kala mosikola yaGilead. Ondi ilongo oshindji kaalongwa ooyakwetu mboka ya za miilongo 16 yi ili noyi ili. Kakele kedheulo lyopambepo ndyoka lya koleke ekwatathano lyandje naKalunga, onda mono uuwanawa mokweendathana nooitaali mboka aakuluntu momimvo. Gumwe gwomaalongwa mboka twa li nayo omumwatate Lloyd Barry; aalongi yetu, omumwatate Albert Schroeder naJohn Booth ngoka a li omutonateli gwofaalama mpoka pwa tungwa Osikola yaGilead. Lwanima, omumwatate John Booth, okwa ka ninga oshilyo shOlutuwiliki. Aamwatate mboka ondi ya hole noonkondo omolwuudhiginini wawo kuJehova nokehangano lye. Onda lenga wo omayele gopahole ngoka ya li ya pe ndje.

IILONGA YUUTONATELISHIKANDJO NOKUSHUNA KOBETEL

Sho nda zi koGilead, onda ningi omutonatelishikandjo muOhio, shi li muAmerika. Onda li ndi na owala omimvo 21, ihe aamwatate oya li ye hole ndje molwaashoka ondi na ondjungu. Onda li ndi ilongo oshindji kaamwatate aanamimvo sho ndi li miilonga yuutonateli.

Konima yoomwedhi dhontumba, onda shuna koBetel muBrooklyn omolwedheulo lya gwedhwa po. Sho ndi li hoka, onda li nda tseya aawiliki ngaashi, omumwatate Milton Henschel, Karl Klein, Nathan Knorr, T. J. (Bud) Sullivan naLyman Swingle, ayehe oya li iilyo yOlutuwiliki. Osha li etsomukumo kungame okutala kiilonga yawo nokeihumbato lyawo lyopaKriste. Shika osha ningitha ndje ndi kale ndi inekela ehangano lyaJehova noonkondo. Konima yaashoka onda li nda tumwa kuEuropa ndi ka tsikile niilonga yandje yuukalele.

Meme okwa si muFebuluali 1950. Konima yefumviko, onda li nda popi nda mana mo natate nosho wo nomumwamemekadhona, Dora. Onde ya pula kutya otaya ka ninga po shike kombinga yoshili, sho meme a sa naasho ngame ngoka nda li ndi na oku ya kwathela kaandi li puyo. Oya li ye shi omumwatate omugwayekwa omukokele, Harry Browning noye mu simaneka, noya li ya zimine ya konakone naye. Ayehe oya ninginithwa muule womumvo gumwe. Tate okwa li a langekwa po lwanima e li omuyakuli megongalo lyaGillingham. Konima yeso lyatate, Dora okwa hokanwa kuRoy Moreton omukuluntugongalo omudhiginini. Oya kala taya longele Jehova nuudhiginini sigo oosho Dora a hulitha mo 2010.

MOBETEL YAFULAANISA

Sho nda li mosikola yeputudho, ondi ilongo Oshifulaanisa, Oshindowishi nOshilatina. Ihe momalaka ngoka gatatu, Oshifulaanisa osha li hashi lyata ndje. Onda li nda pulwa ndi ka kwathele koBetel moFulaanisa, nonda kala tandi ipula ngele otashi ka za ngaa. Onda kala tandi longo pamwe nomuyakuli moshitayimbelewa shoka, omumwatate omugwayekwa omukokele, Henri Geiger. Oshinakugwanithwa shoka kasha li oshipu. Onda li handi ningi omapuko olundji, ihe ondi ilongo nkene ndi na okulongela kumwe naantu ooyakwetu.

Onda li nda kutha ombinga mokuunganeka oshigongi shotango shopaigwana mo 1951 sha li moFulaanisa. Omumwatate omugundjuka Léopold Jontès, omutonateli omweendi okwa li e ya koBetel a kwathele ndje. Lwanima, Léopold okwa langekwa po e li omutonateli gwoshitayimbelewa. Oshigongi osha li sha ningilwa mehala hali ithanwa Palais des sports. Aakalipo oya li ya zi kiilongo 28. Oonzapo 6 000 dhomuFulaanisa odha li dha nyanyukwa noonkondo sho dhu uvu kutya mesiku lyahugunina poshigongi opu na aantu 10 456.

Kanda li naanaa handi popi nawa Oshifulaanisa sho opo nde ya moFulaanisa. Epuko enene ndyoka nda li handi ningi olyo kutya onda li handi popi owala iitya yOshifulaanisa mbyoka ndi shi nawa, naashoka osha li shi imbi ndje ndi shi tseye nawa. Ihe ngele owa hala okuhwepopala mokupopya elaka ekwiilongo, kala ho li popi wa manguluka, naantu otaye ke ku pukulula sho to popi omapuko.

Onda tokola okukala handi yi kootundi dhokwiilonga Oshifulaanisa. Onda li handi yi ko kongulohi uuna kaaku na okugongala. Onda tameke okukala ndi shi hole, nohole ndjoka oye ende tayi koko. Ootundi ndhoka odha li dha kwathele ndje, molwaashoka onda ka kala handi kwathele osipana yokutoloka yOshifulaanisa. Konima yethimbo, onda kala handi toloka kungame mwene tandi kutha mOshiingilisa ndu ukitha mOshifulaanisa. Osha li uuthembahenda kungame sho tandi kwathele aapopi yOshifulaanisa muuyuni auhe ya mone iikulya yopambepo mbyoka hayi gandjwa kongundu yomupiya.—Mat. 24:45-47.

ONDJOKANA NOMAUTHEMBAHENDA GALWE

Onda hokana meme Esther mo 1956, omukokolindjila Omuswitse ngoka twa li twa tsakanene naye oomvula dhontumba dha tetekele. Otwa hokanene mOshinyanga shUukwaniilwa shi li popepi noBetel yaLondon (Etsalihangano ekulu lyaLondon, moka mwa li mwa ninginithilwa meme). Omumwatate Hughes oye a li e tu pe oshipopiwa. Meme gwaEsther ngoka e na eithano lyomegulu opo a li. Kakele kokumona kuume kopandjokana omwaanawa nomudhiginini, onda li wo nda mono kukumweno e na uupambepo uuwanawa nokwa kala omudhiginini sigo a mana oondjenda dhe dhokombanda yevi mo 2000.

Sho twa hokana, otwa ka kala pondje yaBetel. Esther okwa kala omukokolindjila i ikalekelwa kiitopolwa yokomikandi, moParis, omanga ngame tandi tsikile niilonga yokutoloka koBetel. Meme Esther okwa kwathela aantu oyendji ya ninge aapiya yaJehova. Mo 1964 otwi ithanwa tu ka kale moBetel. Mo 1976, onda langekwa po ndi li oshilyo shOkomitiye yOshitayimbelewa ndjoka ya totwa po momumvo ngoka. Meme Esther okwa kala aluhe nokwaambidhidha ndje nawa.

“NGAME KAMU NA NDJE ALUHE”

Onda kala handi talele po iikando niikando oombelewa oonene koNew York. Uuna ndi li hoka, onda kala handi pewa omayele omawanawa kiilyo yOlutuwiliki yi ili noyi ili. Pashiholelwa, oshikando shimwe sho nda li tandi ipula kombinga yiilonga mbyoka nda li inaandi mana, omumwatate Knorr okwi imemeha e ta ti: “Ino ipula naashoka, pula owala komeho.” Okuza mpono, ngele iilonga ya ndumbalele ndje, ohandi kambadhala okulonga oshilonga shimwe sigo sha pu e tandi yi koshikwawo, pehala lyokukala nde yi tila.

Jesus manga inaa sa okwa li a lombwele aalongwa ye a ti: “Ngame kamu na ndje aluhe.” (Mat. 26:11) Tu li oonzi dhilwe, otu shi shi kutya aamwahe yaKristus aagwayekwa itaya ka kala aluhe pamwe natse kombanda yevi. Onkee ano, onda pandula noonkondo sho nda kala nda kwata konguwo yOmujuda. Onda kala nuuthembahenda wokweendathana naagwayekwa oyendji uule woomvula dha konda 70.

[Enyolo lyopevi]

[Oohapu dha simana pepandja 21]

Omumwatate Knorr okwi imemeha e ta ti: “Ino ipula naashoka, pula owala komeho.”

[Omathano pepandja 19]

(Kolumoho) meme natate

(Kolulyo) Pehala lyaGilead mo 1948, nda zala ondjatha yuutalala ndjoka nda pewa kumeme

[Ethano pepandja 20]

Tandi tolokele omumwatate Lloyd Barry pelangeko lyoshitayimbelewa shaFulaanisa mo 1997

[Omathano pepandja 21]

(Kolumoho) Esiku lyohango yetu

(Kolulyo) Tu li miilonga yomomapya